1, 2. (a) Ihulagway an ilustrasyon ni Jesus mahitungod han tag-iya han urubasan. (b) Paonan-o iginpapakita hito nga ilustrasyon an kalidad nga pagkamaopay ngan diri-matupngan nga pagkabuotan?

TEMPRANO ha aga, may tag-iya hin urubasan nga kinadto ha merkado basi mamiling hin mga trabahador. An kalalakin-an nga iya naagian umuyon ha suhol nga iya igintanyag ha ira, ngan nagtrabaho hira. Kondi an tag-iya nagkinahanglan pa hin dugang nga mga trabahador salit bumalik hiya ha merkado ngan nagpinamiling hin mga trabahador ha bug-os nga adlaw ngan gintanyagan hira hin angayan nga suhol. Han gab-i na, gintirok niya an mga trabahador basi ihatag an ira suhol. Gintagan niya hira hin parapriho nga kantidad, nagtrabaho man hira hin damu ka-oras o usa la ka oras. Han hinbaroan ito han mga trabahador nga siyahan nga gintawag, nagreklamo hira. An tag-iya binaton: ‘Diri ba nagkauyon kita ha suhol nga akon igintanyag ha iyo? Diri ba may katungod ako nga ihatag ha ngatanan ko nga trabahador an anoman nga karuyag ko? Naaawa ba kamo tungod kay maopay ako?’​—Mat. 20:1-15.

² Ito nga ilustrasyon ni Jesus nagpapahinumdom ha aton han usa nga kalidad ni Jehova nga agsob unabihon ha Biblia​—an iya “diri-matupngan nga pagkabuotan.” ^[1] (Basaha an 2 Corinto 6:1.) An mga nagtrabaho hin usa la ka oras diri unta angay makakarawat han kanan bug-os  nga adlaw nga suhol, pero an tag-iya han urubasan nagpakita hin diri-matupngan nga pagkabuotan. May kalabotan han pulong nga “diri-matupngan nga pagkabuotan” nga iginhuhubad nga “kalooy” ha damu nga bersyon han Biblia, usa nga eskolar an nagsurat: “An kabug-osan nga ideya hini nga pulong amo an paghatag hin libre ngan diri-matupngan nga regalo ha usa nga tawo nga waray ginhimo nga pangalimbasog ngan diri angay makakarawat hito.”

3, 4. Kay ano nga iginpakita ni Jehova an iya diri-matupngan nga pagkabuotan ha katawohan ngan paonan-o niya ito ginbuhat?

³ An Kasuratan naghihisgot nga an “diri-matupngan nga pagkabuotan han Dios” usa nga “regalo nga waray bayad.” (Efe. 3:7) Kay ano nga iginhatag ni Jehova inin “regalo nga waray bayad,” ngan paonan-o niya ito iginhatag? Kon perpekto naton nga nasusunod an ngatanan nga ginkikinahanglan ni Jehova, angay unta naton makarawat an iya pagkabuotan. Pero diri naton ito nahihimo. Salit an maaramon nga hi Hadi Solomon nagsurat: “Waray uusa ka tawo nga matadong dida ha tuna, nga nagbubuhat hin maopay, ngan diri nakakasala.” (Ekles. 7:20) Nagsiring liwat hi apostol Pablo: “An ngatanan nakasala ngan diri nira naipapakita an himaya han Dios,” ngan “an bayad han sala amo an kamatayon.” (Roma 3:23; 6:23a) Ito an angay naton makarawat.

⁴ Kondi, iginpakita ni Jehova an iya gugma ha makasasala nga katawohan pinaagi han iya diri-matupngan nga pagkabuotan. Iya iginhatag an pinakadaku nga regalo, “an iya bugtong nga Anak” basi mamatay para ha aton. (Juan 3:16) Salit hi Pablo nagsurat: “Ginkoronahan na yana [hi Jesus] hin himaya ngan dungog tungod ha pag-antos hin kamatayon. Pinaagi han diri-matupngan nga pagkabuotan han Dios, naeksperyensyahan niya an kamatayon para ha ngatanan.” (Heb. 2:9) Oo, “an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.”​—Roma 6:23b.

5, 6. Ano an resulta kon magpapamando kita (a) ha sala? (b) ha diri-matupngan nga pagkabuotan?

⁵ Paonan-o napanunod han katawohan an sala ngan kamatayon? An Biblia nasiring: “Tungod ha pagtalapas han usa nga tawo [hi Adan] an kamatayon nagmando sugad nga hadi” ha iya katulinan. (Roma 5:12, 14, 17) Pero makalilipay nga mahimo kita magdesisyon nga diri magpamando o magpakontrol ha sala. Pinaagi ha pagtoo ha halad-lukat han Kristo, ginpili naton nga magpamando ha diri-matupngan nga pagkabuotan ni Jehova. Paonan-o? “Han pagdugang han sala, mas dinugang pa an diri-matupngan nga pagkabuotan. Para ha ano nga katuyoan? Sugad la nga an sala ngan kamatayon nagmamando sugad nga hadi, sugad man an diri-matupngan nga pagkabuotan nagmamando sugad nga hadi pinaagi han katadongan nga magriresulta hin kinabuhi nga waray kataposan pinaagi han aton Ginoo nga hi Jesu-Kristo.”​—Roma 5:20, 21.

⁶ Oo, bisan kon makasasala kita, diri karuyag sidngon nga magpapakontrol na la kita ha sala. Kon nakakasala kita, makakahangyo kita han pagpasaylo ni Jehova. Ginpahamangnoan ni Pablo an mga Kristiano: “Kinahanglan diri magin agaron niyo an sala kay diri kamo sakop han balaud kondi sakop han diri-matupngan nga pagkabuotan.” (Roma 6:14) Salit iginpapakita hini nga ginmamandoan kita han diri-matupngan nga pagkabuotan. Ano an resulta hito? Hi Pablo nagsaysay: ‘An diri-matupngan nga pagkabuotan han Dios nagtututdo ha aton nga isalikway an pagin diri-diosnon ngan an kalibotanon nga mga hingyap, ngan magkinabuhi nga may maopay nga panhunahuna ngan pagkamatadong ngan debosyon ha Dios samtang adi kita hini nga sistema.’​—Tito 2:11, 12.

7, 8. Ano an iginpapasabot han diri-matupngan nga pagkabuotan ni Jehova nga “iginpapakita ha iba-iba nga paagi”? (Kitaa an retrato ha tinikangan hini nga artikulo.)

⁷ Hi apostol Pedro nagsurat: “Sugad la nga an tagsa ha iyo may nakakarawat nga regalo, gamita  ito ha pagbulig ha usa kag usa sugad nga maopay nga mga tinaporan han diri-matupngan nga pagkabuotan han Dios, nga iginpapakita ha iba-iba nga paagi.” (1 Ped. 4:10) Ano an iginpapasabot hito? Anoman nga pagsari an mahimo naton atubangon, mabubuligan kita ni Jehova nga makapailob. (1 Ped. 1:6) Maipapakita niya pirme an iya diri-matupngan nga pagkabuotan ha tagsa nga pagsari nga aton inaatubang.

⁸ Oo, iginpapakita ni Jehova an iya diri-matupngan nga pagkabuotan ha iba-iba nga paagi. Hi apostol Juan nagsurat: “Puno hiya han diri-matupngan nga pagkabuotan, salit padayon nga nakarawat naton ito.” (Juan 1:16) Damu nga bendisyon an aton nakakarawat tungod han pagpakita ni Jehova han iya pagkabuotan ha iba-iba nga paagi. Ano an pipira hito?

9. Ano an aton napapahimulosan tungod han diri-matupngan nga pagkabuotan ni Jehova, ngan paonan-o naton maipapakita an aton pagpasalamat hito?

⁹ Napapasaylo an aton mga sala. Tungod han diri-matupngan nga pagkabuotan ni Jehova, napapasaylo an aton mga sala kon nagbabasol kita ngan padayon nga gin-aatohan an aton makasasala nga mga hingyap. (Basaha an 1 Juan 1:8, 9.) Sadang gud kita magin mapasalamaton ha kalooy han Dios ngan dayawon hiya tungod hito. Ha surat ni Pablo ha iya igkasi-dinihogan nga mga Kristiano, hiya nagsiring: “Gintalwas kita [ni Jehova] tikang ha awtoridad han kasisidman ngan ginbalhin kita ngadto ha ginhadian han iya hinigugma nga Anak, nga pinaagi ha iya natalwas kita tungod han lukat, nga nangangahulogan hin kapasayloan han aton mga sala.” (Col. 1:13, 14) Tungod kay napapasaylo an aton mga sala, nakakarawat naton an damu nga iba pa nga makalilipay nga bendisyon.

10. Ano nga pribilehiyo an aton nakakarawat tungod han diri-matupngan nga pagkabuotan han Dios?

¹⁰ Nagkakaada kita mamurayawon nga relasyon ha Dios. Tungod kay makasasala kita, mga kaaway kita han Dios tikang han igin-anak kita. Maaram gud hito hi Pablo, hiya nagsiring: “Han mga kaaway pa kita, iginpahiuli kita ha Dios pinaagi han kamatayon han iya Anak.” (Roma 5:10) Tungod hini nga pagpahiuli, nagkakaada kita mamurayawon nga relasyon kan Jehova. Iginpakita ni Pablo an koneksyon hini nga pribilehiyo ha diri-matupngan nga pagkabuotan ni Jehova han hiya nagsiring: “Yana nga iginpahayag kita [an dinihogan nga kabugtoan han Kristo] nga matadong tungod han pagtoo, pahimulosan naton an pakigmurayaw ha Dios pinaagi han aton Ginoo nga hi Jesu-Kristo, nga pinaagi liwat han pagtoo ha iya naabrihan an dalan basi makarawat naton an diri-matupngan nga pagkabuotan nga naieksperyensyahan naton yana.” (Roma 5:1, 2) Daku gud ito nga bendisyon!

11. Paonan-o ginbubuligan han mga dinihogan an “iba nga mga karnero” nga magin matadong ha mga mata ni Jehova?

¹¹ Nagigin matadong kita. Kita ngatanan natawo nga diri matadong. Pero igintagna ni propeta Daniel nga durante han kataposan nga mga adlaw, “hira nga makinaadmanon,” an mga dinihogan nga nanhibilin, ‘magdadara hin damu ngadto ha pagkamatadong.’ (Basaha an Daniel 12:3.) Tungod han ira pagsangyaw ngan pagtutdo nga buruhaton, minilyon nga “iba nga mga karnero” an ira ‘gindadara’ o ginbubuligan nga magin matadong ha mga mata ni Jehova. (Juan 10:16) Kondi nagin posible la ini tungod han diri-matupngan nga pagkabuotan ni Jehova. Hi Pablo nagsaysay: “Gintagan hira hin waray bayad nga regalo han iginpahayag hira nga matadong tungod han [kanan Dios] diri-matupngan nga pagkabuotan pinaagi han lukat nga iginbayad ni Kristo Jesus.”​—Roma 3:23, 24.

12. Ano an koneksyon han pag-ampo ha diri-matupngan nga pagkabuotan han Dios?

¹² Nakakadaop kita ha trono han Dios pinaagi ha pag-ampo. Tungod han diri-matupngan nga pagkabuotan ni Jehova, gintatagan kita niya hin pribilehiyo nga makadaop ha iya langitnon nga trono pinaagi ha pag-ampo. Ngani, gintatawag ni Pablo an trono ni Jehova nga “trono han diri-matupngan nga pagkabuotan” ngan gin-aaghat kita nga dumaop hito nga “may kagawasan ha pagyakan.”  (Heb. 4:16a, ftn.) Nagin posible ini nga pribilehiyo tungod han iya Anak, “nga pinaagi ha iya may kagawasan kita ha pagyakan ngan pagdaop ha Dios nga may pagsarig kay natoo kita ha Kristo.” (Efe. 3:12) Oo, an pakadaop kan Jehova pinaagi ha pag-ampo daku gud nga kapahayagan han iya diri-matupngan nga pagkabuotan.

13. Paonan-o an diri-matupngan nga pagkabuotan “mabulig ha aton ha husto nga panahon”?

¹³ Nakakakarawat kita hin bulig ha husto nga panahon. Gin-aaghat kita ni Pablo nga diri mag-alang pagdaop kan Jehova pinaagi ha pag-ampo, “basi makarawat naton an kalooy ngan an diri-matupngan nga pagkabuotan nga mabulig ha aton ha husto nga panahon.” (Heb. 4:16b) Kon nakakaeksperyensya kita hin mga pagsari o kakurian, makakaaro kita han bulig ngan kalooy ni Jehova. Bisan kon diri kita angay kalooyan, ginbabaton niya an aton mga pag-ampo. Kasagaran nga ginbubuhat niya ito pinaagi ha mga igkasi-Kristiano, “salit makakasarig gud kita ngan makakasiring: ‘Hi Jehova an akon parabulig, diri ako mahahadlok. Ano an mahihimo han tawo ha akon?’”​—Heb. 13:6.

14. Paonan-o nagpapahimulos an aton kasingkasing tungod han diri-matupngan nga pagkabuotan ni Jehova?

¹⁴ Naliliaw an aton mga kasingkasing. Pinaagi han diri-matupngan nga pagkabuotan ni Jehova, daku gud nga bendisyon nga ginliliaw niya adton ‘ruba an kasingkasing. (Sal. 51:17) Nagsurat hi Pablo ha mga Kristiano ha Tesalonica nga gintitimaraot: “Hinaot an aton Ginoo nga hi Jesu-Kristo mismo ngan an Dios nga aton Amay, nga nahigugma ha aton ngan padayon nga nagliliaw ngan naghahatag hin maopay nga paglaom pinaagi han diri-matupngan nga pagkabuotan, magliaw han iyo kasingkasing ngan magparig-on ha iyo.” (2 Tes. 2:16, 17) Makalilipay gud hibaroan nga hinigugma ngan ginliliaw kita ni Jehova tungod han iya diri-matupngan nga pagkabuotan!

15. Tungod han diri-matupngan nga pagkabuotan han Dios, ano nga paglaom an aton makakarawat?

¹⁵ Nagkakaada kita paglaom nga mabuhi ha waray kataposan. Tungod kay makasasala kita, waray gud kita paglaom bisan kon mangalimbasog kita. (Basaha an Salmo 49:7, 8.) Pero gintatagan kita ni Jehova hin makalilipay nga paglaom. Nagsaad hi  Jesus ha iya mga sumurunod: “Kaburut-on han akon Amay nga an tagsa nga nakilala ha Anak ngan nagpapakita hin pagtoo magkaada kinabuhi nga waray kataposan.” (Juan 6:40) Oo, an paglaom nga mabuhi ha waray kataposan usa nga regalo ngan makalilipay gud nga kapahayagan han diri-matupngan nga pagkabuotan han Dios. Kombinsido gud hito hi Pablo, hiya nagsiring: “Iginpakita han Dios an iya diri-matupngan nga pagkabuotan nga naghahatag hin katalwasan ha ngatanan nga klase hin tawo.”​—Tito 2:11.

16. Paonan-o gin-abuso han pipira nga Kristiano ha siyahan nga siglo an diri-matupngan nga pagkabuotan han Dios?

¹⁶ Bisan kon damu nga bendisyon an aton napapahimulosan tungod han diri-matupngan nga pagkabuotan ni Jehova, diri naton sadang hunahunaon nga gin-uuyonan niya an ngatanan nga aton ginbubuhat. May mga Kristiano ha siyahan nga siglo nga nagsari nga ‘himoon nga pasangil an diri-matupngan nga pagkabuotan han Dios para han ira mangil-ad nga paggawi.’ (Jud. 4) Inin diri matinumanon nga mga Kristiano posible nga naghunahuna nga puydi hira magbinuhat hin sala ngan makakalaom pirme han pagpasaylo ni Jehova. Mas maraot pa gud, nangalimbasog hira nga aghaton an ira kabugtoan nga magbuhat liwat hin maraot. Yana, an mga nagbubuhat hito “nag-iinsulto han espiritu nga nagpapakita han diri-matupngan nga pagkabuotan han Dios.”​—Heb. 10:29.

17. Ano an mapwersa nga sagdon ni Pedro?

¹⁷ Yana, ginlilimbongan ni Satanas an pipira nga Kristiano ha paghunahuna nga makakalaom hira han kalooy han Dios bisan kon magbinuhat hira hin sala. Bisan kon andam hi Jehova magpasaylo ha mabinasulon nga nakasala, naglalaom hiya nga aatohan naton an aton makasasala nga mga hingyap. Gin-giyahan niya hi Pedro ha pagsurat: “Mga hinigugma, tungod kay iyo na ini hinbaroan nga daan, magbantay kamo nga diri kamo mahisimang han matinalapason nga mga tawo pinaagi han ira kasaypanan ngan diri mawara an iyo mismo karig-on. Lugod padayon nga mag-uswag kamo ha diri-matupngan nga pagkabuotan ngan ha kahibaro mahitungod han Ginoo ngan Paratalwas nga hi Jesu-Kristo.”​—2 Ped. 3:17, 18.

18. Tungod han diri-matupngan nga pagkabuotan ni Jehova, ano an aton mga responsabilidad?

¹⁸ Mapasalamaton gud kita ha diri-matupngan nga pagkabuotan ni Jehova salit inaabat naton nga may responsabilidad kita nga gamiton an aton mga regalo ha pagdayaw ha Dios ngan pagbulig ha aton igkasi-tawo. Paonan-o naton ito mahihimo? Hi Pablo nagsiring: “Tungod kay may mga regalo kita nga nagkakaiba-iba uyon ha diri-matupngan nga pagkabuotan nga iginhatag ha aton, . . . kon regalo ito ha sagrado nga buruhaton, sadang naton buhaton ini nga sagrado nga buruhaton, o an may regalo ha pagtutdo, manutdo hiya. An may regalo ha pagsagdon, magsagdon hiya; . . . an nagpapakita hin kalooy, buhaton niya ito nga may kalipay.” (Roma 12:6-8) An pakakarawat han diri-matupngan nga pagkabuotan ni Jehova, nag-oobligar ha aton nga bug-os nga makigbahin ha ministeryo, tutdoan an iba mahitungod ha Biblia, dasigon an mga igkasi-Kristiano, ngan pasayloon an bisan hin-o nga nakakasala ha aton.

19. Ano an aton hihisgotan ha sunod nga artikulo?

¹⁹ Mapasalamaton gud kita ha daku nga gugma nga iginpapakita ha aton han Dios, salit napapagios kita nga buhaton an ngatanan basi ‘bug-os nga tumanon an pagsangyaw han maopay nga sumat mahitungod han diri-matupngan nga pagkabuotan han Dios.’ (Buh. 20:24) Ini nga responsabilidad hihisgotan ha masunod nga artikulo.