1, 2. (a) Alondesye citagu ca Yesu cakwamba ya msyene mgunda wa mipeleya. (b) Ana citaguci cikulosya catuli ndamo ja koloŵa magasa soni umbone mtima?

KUNDAŴINDAŴIPE, msyene mgunda wa mipeleya ŵapite kumsika kukulolesya ŵandu ŵakuti akalime mumgunda mwakwe. Ŵapatile ŵanduwo ni ŵakamulene ya malipilo gacapocele pambesi pakamula masengogo, kaneko ŵapite ku mgunda kula. Nambope, msyene mgundajo ŵayiweni kuti pakusosekwa ŵamasengo ŵane, m’yoyo ŵajawulaga kumsika kula ndaŵi ni katema kukulolesya ŵamasengo ŵane ŵajinji. Jwalakwe ŵasalile ŵandu ŵanewo kupwatikapo ŵaŵapatile cakwigulo kuti ciŵape malipilo gambone. Pambesi pakamula masengogo, msyene mgunda jula ŵasongangenye ŵamasengowo ni kwapa wosope mbiya syakulandana, mwangajigalila kuti ŵane ŵayice kundaŵi, ŵane musi, soni ŵane ligulo. Ŵandu ŵaŵayice kundaŵi ŵala paŵayiweni yeleyi, ŵatandite kudandawula. Nambope msyene mgundajo ŵatite, ‘Ana jemanja nganimjiticisya malipilo ganamsalile kuti cinampe? Ana nganguŵajilwa kwapa ŵamasengo ŵangu wosope yiliyose yangusaka? Ana mkutenda wiwu ligongo lyakuti ndili jwakoloŵa magasa?’—Mat. 20:1-15.

² Citagu caŵasasile Yesuci cikutukumbusya ya ndamo jine ja Yehofa jakusajikolanga m’Baibulo, jajili “umbone mtima.” ^[1] (Aŵalanje 2 Akolinto 6:1.) Ŵandu ŵaŵatandite kamula masengo kwigulo ŵala  nganaŵajilwa kupocela malipilo gakulandana ni ga ŵandanda ŵala, nambope, msyene mgundajo ŵapele ligongo lya umbone mtima wakwe. Pakwamba ya maloŵe gakuti “umbone mtima” gele m’Mabaibulo gane akusagakolanga kuti “canasa,” mundu jwine ŵasasile kuti, “Songa jekulungwa m’maloŵega jili kupeleka cindu mwalulele kwa mundu jwanganaŵajilwaga kumpa.”

3, 4. Ligongo cici Yehofa ŵalosisye umbone mtima wakwe kwa ŵandu wosope, soni ŵalosisye catuli?

³ Malemba gakusasala ya ‘mtuka walulele wa umbone mtima wa Mlungu.’ (Aef. 3:7) Ligongo cici Yehofa ŵatupele ‘mtuka walulelewu,’ soni ŵatupele catuli? Yikaŵe kuti tukusatenda cenenepe yosope yakusasaka Mlungu, nikuti jwalakwe ngamkanasosekwaga kutulosya umbone mtima wakwe. Nambope, ngatukusakombola kutenda yeleyo. Ni ligongo lyakwe Mwenye Solomo juŵaliji jwalunda ŵalembile kuti, ‘Pangali mundu jwakulungama pacilambo capasi jwakusatenda yambone ndaŵi syosope mwa ngalemwesya cilicose.’ (Mlal. 7:20) Nombe najo ndumetume Paulo ŵalembile kuti, ‘Wosope ŵalemwisye soni ali ŵakupelembela pa lumbili lwa Mlungu.’ Soni kuti, ‘malipilo ga ulemwa gali ciwa.’ (Alo. 3:23; 6:23a) Yeleyi ni yatwasosekwe kupocela.

⁴ Yehofa ŵalosisye cinonyelo cakwe kwa ŵandu ŵakupelembelawe mwakutumisya pacilambo capasi ‘mwanace jwakwe jumopejo’ kuti atuwile. Pelepatu jwalakwe ŵalosisye umbone mtima wekulungwa. (Yoh. 3:16) Paulo ŵalembile ya Yesu kuti apano ‘am’wecice cisoti ca lumbili ni ucimbicimbi ligongo lyakuti ŵalasile mpaka kuwa. Yeleyi yatendekwe kuti mwa umbone mtima wa Mlungu, apasye ciwa m’malo mwa jwalijose.’ (Ahe. 2:9) Yisyene, “Mtuka wakusapeleka Mlungu uli umi wangamala kupitila mwa Ambuje ŵetu Yesu Klistu.”—Alo. 6:23b.

5, 6. Ana pakusaŵa yakuyicisya yatuli patukulamulidwa ni (a) ulemwa? (b) umbone mtima?

⁵ Ligongo cici tuli ŵakulemwa soni tukusawaga? Baibulo jikusasala kuti, “Ligongo lya ulemwa wa mundu jumo [Adamu] ciwa calamulile mpela mwenye.” M’yoyo ligongo lyakuti tuli ŵanace ŵa Adamu, tuli ŵangali umlama soni tukusawa.” (Alo. 5:12, 14, 17) Nambo cakusangalasya cili cakuti mpaka tusagule ngalamulidwasoni ni ulemwa. Patukukulupilila mbopesi ja ciwombolo ja Klistu, tukusaŵa tuli mkuliŵika pasi pa ulamusi wa umbone mtima wa Yehofa. Catuli? “Pele ulemwa watupile, umbone mtima watupilesoni. Ligongo cici? Mpela mwele ulemwa walamulile cisawu mwenye pampepe ni ciwa, m’yoyosoni umbone mtima ulamulile mpela mwenye kupitila mu cilungamo kuti umi wangamala uyice kupitila mwa Yesu Klistu.”—Alo. 5:20, 21.

⁶ Atamose kuti tuli ŵakulemwa, ngatukusosekwa kunda kuti ulemwa utulamulileje. Patutesile cakulemwa, tukusosekwa kum’ŵenda Yehofa kuti atukululucile. Paulo ŵakalamwisye Aklistu kuti, “Ulemwa ukaŵa ambuje kwa jemanja, ligongo nganim’ŵa pasi pa cilamusi nambo pasi pa umbone mtima wekulungwa.” (Alo. 6:14) M’yoyo, m’weji tuli pasi pa umbone mtima wa Mlungu. Nambo, ana umbone mtima wa Mlungu mpaka utukamucisye catuli? Paulo ŵaŵecete kuti, “Umbone mtima wa Mlungu . . . ukusatujiganya kuleka umi wangamcimbicisya Mlungu nambosoni yakumbila ya pacilambo capasi. Ukusatujiganyasoni kuti tukole umi wakuligosa, wakulungama ni wakumcimbicisya Mlungu m’masiku agano.”—Tito 2:11, 12.

7, 8. Ana yikusagopolela cici patukusala kuti Yehofa akusalosya umbone mtima wakwe wekulungwa “m’matala gakulekanganalekangana”? (Alole ciwulili cacili kundanda kwa nganiji.)

⁷ Ndumetume Petulo ŵalembile kuti, “Mwakamulana ni mtuka wapocele jwalijose, awukamulicisye  masengo pa kutumicilana jwine ni mjakwe, mpela ŵakulolela ŵambone ŵapocele umbone mtima wa Mlungu wawulosisye m’matala gakulekanganalekangana.” (1 Pet. 4:10) Ana yeleyi yigopolela cici? Yigopolela kuti, yakulingwa yiliyose yampaka tusimane nayo pa umi wetu, Yehofa mpaka akombole kutukamucisya kuti tumalane nayo. (1 Pet. 1:6) Jwalakwe cacitulosya umbone mtima wakwe mwakamulana ni yakulingwa yatusimene nayo.

⁸ Ndumetume Yohane ŵalembile kuti: “Wosopewe twapocele yindu kutyocela mu yejinji yakwete. Twapocele umbone mtima wekulungwa.” (Yoh. 1:16) Ligongo lyakuti Yehofa akusalosya umbone mtima wakwe m’matala gakulekanganalekangana, tukusapocelasoni majali gejinji. Ana gane mwa majaliga ni gapi?

9. Ana umbone mtima wa Yehofa ukusatukamucisya catuli?

⁹ Kululucidwa yakulemwa yetu. Ligongo lya umbone mtima wa Yehofa, ulemwa wetu ukululucidwe. Nambo akusatenda yeleyi naga tupitikwice mtima ni kwendelecela kulimbana ni yakumbila yetu. (Aŵalanje 1 Yohane 1:8, 9.) Canasa ca Mlungu cikusatutendekasya kum’yamicila soni kumlumba jwalakwe. Paulo ŵalembele Aklistu acimjakwe ŵasagulwe ni msimu kuti: “[Yehofa] ŵatukulupwisye ku macili ga cipi, ni ŵatujinjisye mu ucimwene wa mwanagwe jwakunonyelwa. Mwa jwalakwe, twagopoledwe ni ciwombolo, yayatendekasisye kuti yakulemwa yetu yikululucidwe.” (Akolo. 1:13, 14) Ligongo lyakuti yakulemwa yetu yakululucidwe, yitendekasisye kuti tupate majali gane gamajinji.

10. Ana tukusasangalala ni cici ligongo lya umbone mtima wa Yehofa?

¹⁰ Kuŵa pa unasi wambone ni Mlungu. Wosopewe tuli ŵangali umlama ligongo twapagwile ni ulemwa. Tuli acimmagongo wa Mlungu. Nambope Paulo ŵaŵecete kuti, ‘Patwaliji amagongo ŵa Mlungu, ciwa ca Mwanagwe catujilenye ni Mlungu.’ (Alo. 5:10) Ligongo lya ciwombolo, yitendekasisye kuti tuŵe pa mtendele ni Yehofa soni kuŵa acimjakwe. Paulo ŵasasile yeleyi pakusaka kamulanya ni umbone mtima wa Yehofa. Jwalakwe ŵaŵecete kuti, ‘Pakuŵa sambano tuli [Acimjakwe ŵa Yesu ŵasagulwe ni msimu] ŵakulungamisidwa pa meso pa Mlungu kupitila mwa Ambuje ŵetu Yesu Klistu, ŵaŵatutendesye kuti tuŵe pa mtendele ni Mlungu. Mwa jwalakweju, soni ligongo lya kulupilila, tupocele umbone mtima wa Mlungu wakusapeleka mwalulele.’ (Alo. 5:1, 2) Welewu wuli upile wekulungwa mnope.

11. Ana ŵasagulwe akusiŵatendekasya wuli ‘ŵangondolo sine’ kuŵa ŵakulungama?

¹¹ Kuŵa ŵakulungama. Wosopewe mwacipagwa nganituŵa ŵakulungama. Nambo jwakulocesya Daniyele ŵalembile kuti, mkati mwa ndaŵi ja mbesi “ŵandu ŵakwete umanyilisi,” ŵali ŵasagulwe ni msimu, ŵasigele pacilambopa “cacakamucisya ŵandu kuti aŵe ŵakulungama.” (Aŵalanje Danieli 12:3.) Ana ŵasagulwe ni msimu akusatenda yeleyi catuli? Akusatenda yeleyi mwakulalicila soni kwiganya mamiliyoni gejinji ga ‘ŵangondolo sine’ kuti aŵe ŵakulungama pameso pa Yehofa. (Yoh. 10:16) Nambope, yeleyi yikombolece ligongo lya umbone mtima wa Yehofa. Paulo ŵasasile kuti, ‘Tuŵajilwe kuŵa ŵakulungama ligongo lya umbone mtima wa Mlungu wawulosisye, pakutugopola ni mbopesi ja ciwombolo jajapelecedwe ni Klistu Yesu jajili mpela mtuka walulele.’—Alo. 3:23, 24.

12. Ana lipopelo likusakamulana catuli ni umbone mtima wa Mlungu?

¹² Kum’ŵandicila Yehofa mwipopelo. Ligongo lya umbone mtima wa Yehofa, tukwete upile wakupopela kwa jwalakwe ndaŵi jilijose. Pakwamba ya citengu ca Yehofa, Paulo ŵasasile kuti cili ‘citengu ca ucimwene wa Mlungu jwa umbone mtima.’ Soni tukwete upile ‘wakuŵecetana najo mwagopoka.’ (Ahe. 4:16a) Yehofa atupele upile welewu kupitila mwa mwanagwe. ‘Mwa jwalakwe  tukwete upile wakuŵecetana najo soni ali litala lyakuyicila kwa Mlungu mwangakayicila cilicose pakuŵa tukwete cikulupi mwa Yesujo.’ (Aef. 3:12) Upile welewu wakuŵecetana ni Yehofa ndaŵi jilijose ukusalosya umbone mtima wa Yehofa.

13. Ana umbone mtima wa Mlungu mpaka utukamucisye catuli patusimene ni yakusawusya?

¹³ Kupata cikamucisyo pa ndaŵi jakuŵajilwa. Paulo ŵatulimbikasisye kuti, tupopeleje kwa Mlungu ndaŵi jilijose, ‘kuti atutendele canasa soni tupate umbone mtima wakwe, pandaŵi jatukusaka cikamucisyo.’ (Ahe. 4:16b) Ndaŵi jilijose jatusimene ni yakusawusya pa umi wetu, mpaka tum’ŵende Yehofa kuti atukamucisye. Mwangajigalila yatusimene nayo, jwalakwe akusajanga mapopelo getu. Ndaŵi syejinji akusatenda yeleyi kupitila mwa Aklistu acimjetu. “Mwati tulimbeje mtima ni kujila kuti, ‘Yehofa ali jwakungamucisya jwangu. Ngasinjogopa. Ana mundu mpaka andende cici une?’”—Ahe. 13:6.

14. Ana umbone mtima wa Yehofa ukusatukamucisya catuli?

¹⁴ Kututamika mitima pasi. Majali gejinji gatukusapata kupitila mu umbone mtima wa Yehofa, gakusatamika mitima jetu pasi pandaŵi jatusimene ni yakusawusya. (Sal. 51:17) Paulo ŵalembele Aklistu ŵa ku Tesalonika ŵaŵasimanaga ni yakusawusya kuti, “Ambuje ŵetu Yesu Klistu msyenejo, ni Mlungu ŵali Atati ŵetu, ŵakusatunonyela ni kutulimbisya soni ŵakusatupa cembeceyo cambone kupitila mu umbone mtima wakwe, alimbisye mitima jawo soni ŵape macili.” (2 Ates. 2:16, 17) Yili yakusangalasya kumanyilila kuti, Yehofa akusatusamalila ligongo lya umbone mtima wakwe.

15. Ana tukwete cembeceyo catuli ligongo lya umbone mtima wa Yehofa?

¹⁵ Kola cembeceyo ca umi wangamala. Mpela ŵandu ŵakulemwa, nitukaliji ŵangali cembeceyo cilicose yikaŵe kuti Yehofa nganatukamucisya. (Aŵalanje Salimo 49:7, 8.) Nambo Yehofa ŵatupele cembeceyo cambone mnope. Yesu ŵasalile ŵakumkuya ŵakwe kuti, “Ali lili lisosa lya Atati ŵangu kuti, ŵosope ŵakumanyilila une kuti ndili Mwanace jwa Mlungu ni kungulupilila  akole umi wangamala.” (Yoh. 6:40) M’yoyo, tukwete upile wakutama ni umi kwangamala ligongo lya umbone mtima wa Mlungu. Paulo pakuyamicila umbone mtima wa Mlunguwu, ŵaŵecete kuti: ‘Umbone mtima wa Mlungu uwonecele, pakusaka kulupusya ŵandu wosope.’—Tito 2:11.

16. Ana ŵane mwa Aklistu ŵandanda ŵalosisye catuli ungayamicila umbone mtima wa Mlungu?

¹⁶ Tukusapocela majali gejinji ligongo lya umbone mtima wa Yehofa. Nambope tukakamulicisyaga masengo umbone mtimawu kuŵa pakutendela ndamo syakusakala paganisya kuti Yehofa akusajiticisya ndamo syosope. Mu ndaŵi jamunyuma, papali Aklistu ŵane ŵaŵalingaga ‘kamulicisya masengo umbone mtima wa . . . Mlungu kuŵa ligongo lyakutendela ndamo syakusakala.’ (Yuda 4) Aklistu ŵangakulupicikaŵa, ŵaganisyaga kuti mpaka alemwe mwamele nipo Yehofa mpaka ŵakululucile ndaŵi syosope. Jemanjaji ŵatendesyaga ŵandu ŵane kuti atendejesoni yakulemwa. Moŵa aganosoni, jwalijose jwakutenda yeleyi akusaŵa ali ‘mkuwutumbilikasya msimu ŵa Mlungu, jwele jwakusalosya umbone mtima wekulungwa.’—Ahe. 10:29.

17. Ana Petulo ŵakalamwisye Aklistu ya cici?

¹⁷ Moŵa agano, Satana akwatendekasya Aklistu ŵane ganisya kuti Mlungu jwangakululucila ŵandu yakulemwa yatesile. Nambo nganiyiŵa m’yoyo ni Yehofa, jwalakwe ali jwakusacilila kwakululucila ŵandu ŵapitikwice mtima. Yehofa akusajembeceya kuti tutende cilicose cakomboleka kuti tuŵambale yakumbila yetu. Jwalakwe ŵamsalile Petulo kulemba kuti, “Jemanja ŵakunonyelwa, pakuŵa mkumanyilila yeleyi mkalamuce ni yakulemwa ya ŵandu ŵangalumbana kogopela kuti yitakumsokonasya. Nambo mkule mu canasa ni umanyilisi wa Ambuje ni mkulupusyo jwetu Yesu Klistu.”—2 Pet. 3:17, 18.

18. Ligongo lya umbone mtima wa Yehofa, ana tukwete ukumu watuli?

¹⁸ Tukusayamicila umbone mtima wa Yehofa. M’yoyo, tukusosekwa kamulicisya masengo mtuka watupele pakumcimbicisya Mlungu soni kwakamucisya ŵane. Ana mpaka tutende wuli yeleyi? Paulo ŵasasile kuti, ‘Pakuŵa tukwete mituka jakulekanganalekangana mwakamulana ni mwaŵatugaŵilile Mlungu mwa umbone mtima wakwe, . . . naga wuli kulalicila maloŵe ga Mlungu tukamulicisye masengo mtukawo mwakulingana ni cikulupi catukwete, naga uli kwatumicila ŵane, tutumicile nditu, cinga kuli kwiganya, tujiganyeje nditu, cinga kuli kwalimbikasya ŵane, twalimbikasye nditu, . . . jwakwatendela ŵane canasa atendeje mwakusangalala.’ (Alo. 12:6-8) Ligongo lya umbone mtima wa Yehofa, tukwete ukumu wakamula masengo gakulalicila mwamtawu, kwajiganya ŵane Baibulo, kwalimbikasya abale ni alongo, soni kwakululucila ŵane patulemwecesye.

19. Ana mtwe wakuyicisya tucitagulilana ya ukumu wapi watukwete?

¹⁹ Mpela ŵandu ŵatupocele umbone mtima wa Yehofa, tukusosekwa kutenda yampaka tukombole kuti, ‘tulalicile ngani syambone sya umbone mtima wekulungwa wa Mlungu.’ (Mase. 20:24) Mu mtwe wakuyicisya tucitagulilana cenene ya ukumu welewu.