1, 2. 1) ¿Baʼax kettʼaanil tu yaʼalaj Jesús? 2) Le kettʼaanaʼ, ¿baʼax ku kaʼansiktoʼon yoʼolal u nojoch utsil Jéeoba?

JUNPʼÉEL kʼiin táan u taal u sáastaleʼ u yuumil junpʼéel parcelaeʼ bin kʼíiwik utiaʼal u contratartik máakoʼob utiaʼal ka meyajnakoʼob teʼ tuʼux u pakʼmaj uvaoʼ. Letiʼeʼ tu yaʼalaj tiʼ le máakoʼob bajux ken u boʼottiʼoboʼ, le máakoʼob túunoʼ tu yaʼaloʼob maʼalob u yuʼubikoʼob, ka binoʼob meyaj tu yéetel. Chéen baʼaleʼ tumen kʼaʼabéet u maasil j-meyajoʼobeʼ, le máakoʼ bin tiʼ jejeláas horaʼob teʼ kʼíiwik utiaʼal u contratartik uláakʼ j-meyajoʼoboʼ. Le bukaʼaj tu yaʼalaj ken u boʼottiʼoboʼ letiʼe bukaʼaj tu yaʼalaj xan tiʼ le máaxoʼob tu yáax contratartoʼ. Ka káaj u yáakʼabtaleʼ u yuumil le paakʼaloʼ tu tʼanoʼob utiaʼal ka u boʼotoʼob. Le bajux tu tsʼáaj tiʼ le máaxoʼob meyajnajoʼob junpʼéel horaoʼ le xan tu tsʼáaj tiʼ le máaxoʼob meyajnajoʼob bul kʼiinoʼ. Le oʼolaleʼ le máaxoʼob meyajnajoʼob bul kʼiinoʼ káaj u x-mukul tʼaanoʼob; u yuumil túun le parcelaoʼ tu yaʼalajtiʼob: ‹¿Maʼ wa ta waʼaleʼex jeʼel a taaleʼex meyaj yoʼolal le bajux tin waʼalajteʼex ken a náajalteʼexoʼ? ¿Maʼ wa tu páajtal in beetik jeʼel baʼaxak in kʼáat yéete.l in taakʼineʼ? ¿Táan wa u yaatal a wóoleʼex tumen teneʼ utsen?› (Mat. 20:1-15).

² Le kettʼaan tu yaʼalaj Jesusoʼ ku kaʼansiktoʼon junpʼéel jatsʼuts  modos yaan tiʼ Jéeoba: U nojoch utsil ^[1] (xok 2 Corintoiloʼob 6:1). Maʼ xaaneʼ yaan máax tuklikeʼ le máaxoʼob meyajnajoʼob bul kʼiinoʼ maas yaʼab taakʼin unaj u tsʼaʼabaltiʼob kaʼachi. Chéen baʼaleʼ u yuumil le parcelaoʼ tu yeʼesaj nojoch utsil tak tiʼ le máaxoʼob meyajnajoʼob chéen wa jaypʼéel horaoʼ. Juntúul máax ku xakʼaltik u tʼaaniloʼob le Bibliaoʼ, ku yaʼalikeʼ le tʼaan «nojoch utsil» ku chʼaʼchiʼitaʼal teʼ Bibliaoʼ u kʼáat u yaʼal «junpʼéel baʼax ku tsʼaʼabaltoʼon kex maʼ k-náajaltmiʼ wa junpʼéel baʼax ku siʼibil tiʼ wa máax kex maʼ u náajaltmiʼ».

3, 4. 1) ¿Baʼaxten tsʼoʼok u yeʼesiktoʼon u nojoch utsil Jéeoba, yéetel bix tu beetil?

³ Le Bibliaoʼ ku yaʼalikeʼ «u nojoch utsil Dio[seʼ]» junpʼéel baʼax ku síiktoʼon (Efe. 3:7). Mix juntúul tiʼ toʼon jeʼel u páajtal u beetik baʼax ku yaʼalik Jéeoba jach jeʼex u kʼáatiktoʼonoʼ. Le oʼolaleʼ mix juntúul ku náajmatik u nojoch utsil Dios, baʼaxeʼ chéen k-náajmatik le kíimiloʼ. Le rey Salomonoʼ tu yaʼaleʼ ‹minaʼan mix máak ka u beet uts mantatsʼ yéetel maʼ u kʼebanchajal› (Ecl. 7:20). Ka máan kʼiineʼ le apóstol Pablooʼ tu yaʼalaj: «Tuláakloʼob kʼebanchajaʼanoʼob yéetel maʼ tu páajtal u yeʼeskoʼob u nojbeʼenil Dios», tsʼoʼoleʼ tu yaʼalaj xan: «Tumen le boʼol ku tsʼáaik le kʼebanoʼ letiʼe kíimiloʼ» (Rom. 3:23; 6:23, u yáax jaats).

⁴ Yoʼolal u yaabilaj Jéeoba tiʼ wíinikeʼ «tu tsʼáaj u juntúuliliʼ Paal» utiaʼal u kíimil. Lelaʼ letiʼe maas nojoch utsil tsʼoʼok u yeʼesik Jéeoba tiʼ tuláakal wíinikoʼ (Juan 3:16). Pabloeʼ tu yaʼaleʼ Jesuseʼ tsʼoʼok «u tsʼaʼabal junpʼéel kiʼichkelem yéetel tsikbeʼen corona tiʼ. Bey túunoʼ, tu yoʼolal u nojoch utsil Dioseʼ, letiʼeʼ tu yojéeltaj baʼax le kíimiloʼ utiaʼal u yutsil tuláakal máak» (Heb. 2:9). Jeʼex k-ilkoʼ «le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús» (Rom. 6:23, u tsʼook jaats).

5, 6. 1) ¿Baʼax kun úuchultoʼon wa ku gobernar le kʼeban t-óokʼoloʼ? 2) ¿Baʼax kun úuchultoʼon wa k-antal yáanal u nojoch utsil Dios?

⁵ ¿Baʼaxten túun tuláakloʼon j-kʼebanoʼon yéetel k-kíimil? Le Bibliaoʼ ku yaʼalik: «Yoʼolal u kʼeban juntúul máak reinarnaj le kíimiloʼ». Jeʼex k-ilkoʼ tumen u paalaloʼon Adaneʼ j-kʼebanoʼon yéetel k-kíimil (Rom. 5:12, 14, 17). Chéen baʼaleʼ yaan baʼax jeʼel u páajtal k-beetik utiaʼal maʼ u reinar t-óokʼol le kʼebanoʼ. ¿Baʼaxiʼ? Letiʼe k-tsʼáaik fe tiʼ u kuxtal Jesús tu kʼuboʼ, ken k-beet lelaʼ k-ilik u nojoch utsil Jéeoba ichil k-kuxtal. Le Bibliaoʼ ku yaʼalik: «Le tuʼux maas yaʼabchaj le kʼebanoʼ maas yaʼabchaj xan u nojoch utsil Dios. ¿Baʼaxten? Tumen jeʼex úuchik u reinar le kʼeban yéetel le kíimiloʼ, bey xan kun reinar u nojoch utsil Dios yoʼolal u justicia, utiaʼal ka yanak kuxtal minaʼan u xuul tu yoʼolal k-Yuumtsil Jesucristo» (Rom. 5:20, 21).

⁶ Kex kʼebanoʼoneʼ maʼ unaj k-chaʼik u reinar t-óokʼol le kʼebanoʼ, le oʼolal ken k-beet junpʼéel baʼax kʼaaseʼ unaj k-kʼáatik tiʼ Jéeoba ka u perdonartoʼon. Le apóstol Pablooʼ tu yaʼalaj: «Le kʼebanoʼ maʼ unaj u palitsiltkeʼexiʼ, tumen minaʼaneʼex yáanal ley, baʼaxeʼ yáanal u nojoch utsil Dios» (Rom. 6:14). ¿Baʼax utsil ku taasiktoʼon k-antal yáanal u nojoch utsil Dios? Pabloeʼ tu yaʼalaj: «Dioseʼ tsʼoʼok u chíikbesik u nojoch utsil, yéetel lelaʼ [...] ku kaʼansiktoʼon bix jeʼel k-náachkuntikba tiʼ baʼaloʼob kʼaastak yéetel tiʼ luʼumkabil tsʼíibolaloʼobeʼ, bix jeʼel u yantaltoʼon junpʼéel toj kuxtal yéetel junpʼéel maʼalob tuukuleʼ, yéetel bix jeʼel k-kʼubik óol k-meyajt Dios teʼ yóokʼol kaab yaan bejlaʼaʼ» (Tito 2:11, 12).

7, 8. ¿Baʼax u kʼáat u yaʼal le tʼaanoʼob «jejeláas bix u yeʼesik» u nojoch utsil Diosoʼ? (Ilawil le fotoʼob yaan tu káajbal le xookaʼ.)

⁷ Le apóstol Pedrooʼ tu tsʼíibtaj: «Cada juntúul tiʼ teʼexeʼ u yáant u yéet máakil yéetel le  bukaʼaj baʼaloʼob síiʼantiʼoʼ; beyoʼ yaan a weʼeskeʼex jach maʼalob bix u meyajteʼex le nojoch utsil u kʼubéentmajteʼex Diosoʼ; letiʼeʼ jejeláas bix u yeʼesik lelaʼ» (1 Ped. 4:10). ¿Baʼax u kʼáat u yaʼal lelaʼ? U kʼáat u yaʼaleʼ cada ken yanaktoʼon junpʼéel túuntaj óoleʼ Jéeobaeʼ yaan u tsʼáaiktoʼon jach baʼax kʼaʼabéettoʼon utiaʼal u páajtal u chúukpajal k-óol (1 Ped. 1:6).

⁸ Le apóstol Juanoʼ tu yaʼalaj: «Letiʼeʼ chuup kaʼach yéetel nojoch utsil bey xan yéetel jaajil, le oʼolaleʼ tuláakloʼon maʼ xuʼul k-kʼamik yaʼabkach utsiloʼobiʼ» (Juan 1:16). Dioseʼ jejeláas bix u yeʼesiktoʼon u nojoch utsil, yoʼolal lelaʼ k-kʼamik yaʼab bendicionoʼob. Koʼox ilik jujunpʼéeloʼobiʼ.

9. ¿Baʼax k-kʼamik ikil u yeʼesiktoʼon Jéeoba u nojoch utsil, yéetel bix k-eʼesik k-tsʼáaik gracias tu yoʼolal?

⁹ Jéeobaeʼ ku perdonartik k-kʼebanoʼob. Chéen baʼaleʼ letiʼeʼ chéen ku beetik wa k-arrepentir tu jaajil k-óol yéetel wa ku yilik táan k-tsʼáaik k-óol pʼat le baʼaloʼob maʼ maʼalobtak k-beetkoʼ (xok 1 Juan 1:8, 9). Pabloeʼ tu tsolaj tiʼ le sukuʼunoʼob teʼ yáax siglo yéeyaʼanoʼob bix u perdonartik Jéeoba le kʼebanoʼoboʼ, tu yaʼalajtiʼob: «Dioseʼ tu tokoʼon tiʼ u páajtalil le éeʼjochʼeʼeniloʼ ka tu máansoʼon yáanal u reino le u Paal jach u yaabiltmoʼ, le máax oʼolal tsʼoʼok u boʼotaʼal k-jáalkʼabtaʼaloʼ; lelaʼ u kʼáat u yaʼaleʼ u perdonartaʼal k-kʼebanoʼob» (Col. 1:13, 14). Ken k-alabart Jéeobaeʼ k-eʼesik k-tsʼáaik gracias tiʼ tu yoʼolal le nojoch utsil ku yeʼesiktoʼonoʼ. Ikil u perdonartikoʼon Jéeobaeʼ yaan uláakʼ bendicionoʼob jeʼel u páajtal k-kʼamkeʼ.

10. ¿Baʼax ku béeytal k-beetik tu yoʼolal u nojoch utsil Dios?

¹⁰ Ku páajtal k-bisikba maʼalob yéetel Dios. Toʼoneʼ kʼebanoʼon, le oʼolal desde ken síijikoʼoneʼ u enemigoʼon Dios. Le apóstol Pablooʼ tu yaʼalaj: «Kex u enemigoʼon Dios kaʼach[eʼ,] béeychaj k-kaʼa bisikba tu yéetel úuchik u kíimil u Paaloʼ» (Rom. 5:10). Tu yoʼolal u kuxtal Jesús tu kʼuboʼ, toʼoneʼ ku béeytal k-kaʼa bisikba yéetel Dios yéetel jeʼel xan u páajtal k-kʼuchul k-beetba u amigoʼoneʼ. Pabloeʼ tu yaʼaleʼ lelaʼ junpʼéel bix u yeʼesiktoʼon u nojoch utsil Jéeoba. Lelaʼ bey tu yaʼalil tiʼ le sukuʼunoʼob yéeyaʼanoʼoboʼ: «Beora tsʼoʼok u yaʼalaʼal toj k-kuxtal tu yoʼolal k-fejeʼ, yanaktoʼon jeetsʼelil mantatsʼ yéetel Dios tu yoʼolal k-Yuumtsil Jesucristo, tu yoʼolal xan letiʼeʼ, k-fejeʼ ku tsʼáaiktoʼon u páajtalil k-natsʼikba tu yiknal Dios utiaʼal k-kʼamik u nojoch utsil, lelaʼ letiʼe yaantoʼon beoraaʼ» (Rom. 5:1, 2). ¿Máasaʼ jach k-tsʼáaik u graciasil tiʼ Jéeoba ikil u béeytal k-bisikba tu yéetel?

11. Le sukuʼunoʼob yéeyaʼanoʼoboʼ, ¿bix u yáantkoʼob le uláakʼ tamanoʼob u tojkíint u kuxtaloʼoboʼ?

¹¹ Ku béeytal k-tojkíintik k-kuxtal tu táan Dios. Le profeta Danieloʼ tu yaʼaleʼ teʼ tsʼook kʼiinoʼoboʼ le máaxoʼob yaan u naʼatoʼob wa le yéeyaʼanoʼoboʼ yaan u «kaʼanbesikoʼob baʼax tubeel tiʼ yaʼabkach máakoʼob» (xok Daniel 12:3). ¿Bix u beetkoʼob lelaʼ? Letiʼobeʼ ku kʼaʼaytikoʼob le baʼaxoʼob ken u beet Diosoʼ yéetel ku kaʼanskoʼob tiʼ u millonesil «uláakʼ tamanoʼob» baʼax uts tu tʼaan Jéeoba (Juan 10:16). Letiʼobeʼ ku yáantkoʼob le máakoʼob utiaʼal ka u tojkíint u kuxtaloʼob tu táan Diosoʼ, lelaʼ chéen ku béeytal xan yoʼolal u nojoch utsil Jéeoba. Pabloeʼ tu yaʼalaj: «Dioseʼ tsʼoʼok u tsʼáaik junpʼéel siibal tiʼ le máaxoʼob yaan u fejoʼoboʼ, tumen yoʼolal u nojoch utsileʼ tsʼoʼok u yaʼalik toj u kuxtaloʼob; lelaʼ tu beetaj úuchik u jáalkʼabtaʼaloʼob tiʼ le kʼeban yoʼolal le boʼol tu beetaj Cristo Jesusoʼ» (Rom. 3:23, 24).

12. Le oracionoʼ, ¿bix u yeʼesik u nojoch utsil Dios?

¹² Ku páajtal k-orar utiaʼal k-natsʼikba tiʼ Dios. Tu yoʼolal u nojoch utsil Dioseʼ ku béeytal k-orar tiʼ letiʼ. Pabloeʼ tu yaʼaleʼ tuláakloʼon unaj k-natsʼikba «yéetel u jaajil k-óol tiʼ u trono Dios, le máax eʼesik nojoch utsil tiʼ máakoʼ» (Heb. 4:16, u yáax jaats). Toʼoneʼ jeʼel u páajtal k-orar tiʼ Jéeoba jeʼel baʼalak hora tu kʼaabaʼ Jesuseʼ. ¿Máasaʼ lelaʼ junpʼéel nojoch privilegio? Pabloeʼ tu yaʼalaj: «Tu yoʼolal letiʼeʼ bey xan tu yoʼolal le fe k-tsʼaamaj tiʼ letiʼoʼ, jeʼel u páajtal  k-tʼaan yéetel u jaajil k-óoleʼ yéetel jeʼel u páajtal k-natsʼikba tu yiknal Dios yéetel x-maʼ saajkilileʼ» (Efe. 3:12).

13. ¿Bix u yeʼesik u yutsil Jéeoba jach teʼ kʼiinoʼob kʼaʼabéettoʼonoʼ?

¹³ Jeʼel u páajtal k-kʼamik u yáantaj Dios ken kʼaʼabéetchajaktoʼoneʼ. Pabloeʼ tu yaʼaleʼ jeʼel u páajtal k-orar mantatsʼ tiʼ Jéeoba «utiaʼal ka u chʼaʼtoʼon óotsilil yéetel utiaʼal ka u yeʼestoʼon u nojoch utsil ken u yáantoʼon jach teʼ kʼiin kʼaʼabéettoʼonoʼ» (Heb. 4:16, u tsʼook jaats). Cada ken yanaktoʼon wa baʼax problemaileʼ jeʼel u páajtal k-kʼáatik tiʼ Jéeoba ka u yáantoʼoneʼ. Kex maʼ t-náajmatikeʼ wa k-kʼáat óoltik tiʼeʼ, jeʼel u yáantkoʼoneʼ. Yaan kʼiineʼ ku meyajtiʼ le sukuʼunoʼob yéetel le kiikoʼob utiaʼal u núukik k-oracionoʼoboʼ. Jéeobaeʼ ku núukik k-oracionoʼob, le oʼolal «jeʼel u páajtal u líikʼil k-óol yéetel k-aʼalik lelaʼ: ‹Jéeoba máax áantken; maʼ ken in chʼaʼ saajkil. ¿Baʼax jeʼel u beetikten wíinikeʼ?›» (Heb. 13:6).

14. ¿Baʼax uláakʼ k-kʼamik yoʼolal u nojoch utsil Jéeoba?

¹⁴ Ku líiʼsik u yóol k-puksiʼikʼal. Tu yoʼolal u nojoch utsil Jéeobaeʼ ku líiʼsik k-óol ken muʼyajnakoʼon (Sal. 51:17). Le ka joʼopʼ u chʼaʼpachtaʼal le sukuʼunoʼob yanoʼob Tesalónicaoʼ, Pabloeʼ tu yaʼalajtiʼob: «K-Yuumtsil Jesucristo bey xan Dios k-Taata, Máax tu yaabiltoʼon, ku kiʼimakkúuntik k-óol mantatsʼ yéetel ku tsʼáaiktoʼon junpʼéel nojoch esperanza tu yoʼolal u nojoch utsileʼ, letiʼob ka u líiʼsoʼob u yóol a puksiʼikʼaleʼex yéetel ka u muʼukʼaʼankúuntoʼob a wóoleʼex» (2 Tes. 2:16, 17). ¿Máasaʼ jach ku kiʼimakkúuntik k-óol k-ojéeltik Jéeobaeʼ jach u yaabiltmoʼon yéetel ku kanáantkoʼon yoʼolal u nojoch utsil?

15. ¿Baʼax esperanzail yaantoʼon yoʼolal u nojoch utsil Jéeoba?

¹⁵ Yaantoʼon u esperanzail k-kuxtal minaʼan u xuul. Wa maʼ tu yoʼolal u yáantaj Jéeobaeʼ bejlaʼa minaʼantoʼon esperanzaeʼ tumen tuláakloʼon kʼebanoʼon (xok Salmo 49:7, 8). Chéen baʼaleʼ Jéeobaeʼ tsʼoʼok u tsʼáaiktoʼon junpʼéel jatsʼuts esperanza, ¿máakalmáakiʼ? Jesuseʼ tu yaʼalaj: «Lelaʼ letiʼe baʼax u kʼáat in Taataoʼ: ka yanak kuxtal minaʼan u xuul tiʼ tuláakal le máax ku kʼamik le Paal yéetel ku tsʼáaik u fe tiʼ  letiʼoʼ» (Juan 6:40). Bey túunoʼ tu yoʼolal u nojoch utsil Jéeobaeʼ yaantoʼon u jatsʼuts páajtalil k-kuxtal utiaʼal minaʼan u xuul. Pabloeʼ tu yaʼalaj: «Dioseʼ tsʼoʼok u chíikbesik u nojoch utsil, yéetel lelaʼ táan u taasik salvación tiʼ tuláakal u jejeláasil máakoʼob» (Tito 2:11).

16. Le sukuʼunoʼob teʼ yáax siglooʼ, ¿baʼax ku beetkoʼob kaʼachi?

¹⁶ Yaʼab bendicionoʼob k-kʼamik yoʼolal u nojoch utsil Jéeoba, chéen baʼaleʼ maʼ unaj k-tuklik wa yoʼolal u nojoch utsileʼ jeʼel u perdonarkoʼon kex ka seguernak k-kʼebantaleʼ. Jujuntúul cristianoʼob teʼ yáax siglooʼ «ku meyajtiʼob u yutsil [...] Dios utiaʼal u yaʼalikoʼob maʼ kʼaas le kuxtal ku biskoʼob ichil x-maʼ suʼtaliloʼ» (Jud. 4). Letiʼobeʼ ku tuklikoʼobeʼ jeʼel u páajtal u beetkoʼob baʼax kʼaaseʼ tumen ken tsʼoʼokkeʼ yaan u perdonartaʼaloʼob. U maas kʼaasileʼ ku túulchʼintkoʼob u maasil utiaʼal ka kʼebanchajkoʼob xan. Bejlaʼeʼ le máax ku beetik jeʼex letiʼobeʼ táan «u poʼopochʼik le kiliʼich muukʼ beetik u chʼaʼabal óotsilil tiʼoʼ» (Heb. 10:29).

17. ¿Baʼax tsolnuʼukil tu tsʼáaj le apóstol Pedrooʼ?

¹⁷ Teʼ kʼiinoʼobaʼ Satanaseʼ tsʼoʼok u beetik u tuklik jujuntúul sukuʼunoʼob maʼ kʼaas ka kʼebanchajkoʼobiʼ tumen deporsi yaan u perdonartaʼaloʼob tumen Jéeoba. U jaajileʼ Jéeobaeʼ jeʼel u perdonartikoʼon wa jach tu jaajil k-arrepentireʼ, chéen baʼaleʼ letiʼ xaneʼ ku páaʼtik ka k-beet tuláakal le ku páajtal utiaʼal u xuʼulul k-beetik le baʼax kʼaasoʼ. Letiʼeʼ tu beetaj u tsʼíibtik apóstol Pedro le tʼaanoʼobaʼ: «In yaabilaj sukuʼuneʼex, bey tumen tsʼoʼok a wojéeltikeʼex le baʼaloʼob táanil tiʼ u yúuchloʼoboʼ, kanáantabaʼex utiaʼal maʼ a jíiltaʼaleʼex junmúuchʼ tu yéeteloʼob tu yoʼolal le bej maʼ maʼalob ku bisik le kʼasaʼan máakoʼoboʼ, tumen wa maʼeʼ jeʼel a pʼatkeʼex le maʼalob bej tuʼux jeetsʼel yanileʼexoʼ. Baʼax unaj a beetkeʼexeʼ, seguernak a kʼamkeʼex nojoch utsil yéetel kʼaj óolal tiʼ k-Yuumtsil yéetel k-Salvador Jesucristo» (2 Ped. 3:17, 18).

18. ¿Baʼax unaj k-beetik yoʼolal u nojoch utsil Jéeoba?

¹⁸ Toʼoneʼ jach k-tsʼáaik u graciasil tiʼ Jéeoba yoʼolal u nojoch utsil ku yeʼesiktoʼonoʼ. Le oʼolaleʼ unaj k-ilik u meyajtoʼon le baʼaxoʼob u tsʼaamajtoʼon utiaʼal k-alabartikoʼ bey xan utiaʼal k-áantik u maasil. Lelaʼ deporsi letiʼe baʼax unaj k-beetkoʼ. ¿Bix jeʼel u meyajtoʼon maʼalob le baʼaxoʼob u tsʼaamajtoʼonoʼ? Le apóstol Pablooʼ tu yaʼalaj: «Dios túuneʼ jejeláas siibaloʼob u tsʼaamajtoʼon tu yoʼolal le u nojoch utsil tu yeʼesajtoʼonoʼ. Le oʼolaleʼ wa síiʼantoʼon páajtalil utiaʼal [...] k-meyajtik uláakʼ máakoʼobeʼ, koʼoneʼex meyajtikoʼob; le máax ku kaʼansajoʼ, kaʼansajnak túun; le máax ku tsolnuʼukoʼ, u tsʼáa u yóol tsolnuʼuk; [...] le máax ku chʼaʼ óotsilileʼ, u beet yéetel kiʼimak óolal» (Rom. 12:6-8). Bey túunoʼ u nojoch utsil Jéeobaeʼ unaj u péeksikoʼon k-tsʼáa k-óol teʼ kʼaʼaytajoʼ, k-kaʼansik le máakoʼob yéetel le Bibliaoʼ, k-líiʼsik u yóol le sukuʼunoʼoboʼ yéetel k-perdonartik le máaxoʼob ku beetkoʼobtoʼon wa baʼaxoʼ.

19. ¿Baʼax ken k-il teʼ tuláakʼ xookoʼ?

¹⁹ Yoʼolal u nojoch utsil Jéeobaeʼ yaʼab baʼaloʼob u tsʼaamajtoʼon. Le oʼolaleʼ unaj k-tsʼáaik k-óol utiaʼal ‹k-chúukaʼan kʼaʼaytik u maʼalob péektsilil u nojoch utsil Dios› (Bax. 20:24). Teʼ tuláakʼ xookoʼ yaan k-ilik baʼaxoʼob unaj k-beetik yoʼolal le nojoch utsil ku yeʼesiktoʼon Diosoʼ.