1, 2. Diosan khuyapayasiñapat yuspäratapjja, ¿kunjamsa apóstol Pablojj uñachtʼayäna?

APÓSTOL Pablojj akham sasaw taqe chuym säna: “[Diosan] munasiñapasti nayatakejj janipuniw inamayäkiti” sasa (1 Corintios 15:9, 10 liytʼañataki). Pablojj cristianonakar arknaqeri jaqënwa, ukhamasti Diosajj janiw jupar khuyapayañapäkänti, uk Pablojj sum yatïna. Ukampis Diosajj khuyaptʼayänwa.

² Janïr jiwkasajj akham sasaw Pablojj Timoteor qellqäna: “Tatit Jesucristosarojj yuspagartwa, jupasti akatakiw chʼam churitu, ukatsti nayarojj cheqat uñtʼitu, Jupan serviripat uskusitu” sasa (1 Tim. 1:12-14). ¿Kun lurañapatakis Diosajj Pablor uskpachäna? Pablojj akham sasaw Éfeso markankir irpir chuymaninakarojj säna: “Janirakiw jakañajjas kuna jachʼäkis nayatakejja, jan ukasti kuntejj Tatitojj: ‘Luram’ siskitu uk kusisiñamp phoqhañakiw  waktʼitu. Ukasti Diosan munasiñap utjatap jaqenakar qhanañchaña[wa]” sasa (Hech. 20:24).

3. ¿Kunsa apóstol Pablojj lurañapäna? (26 janankir foto uñjjattʼam).

³ ¿Kuna ‘suma yatiyäwinaksa’ Pablojj yatiyäna, ukat kunjamsa ukajj Diosan khuyapayasiñap uñachtʼayäna? Éfeso markankir cristianonakarojj akham sasaw Pablojj säna: “Niya yatipjjpachätawa, Diosajj khuyapayasiñapat jumanakar Tatitun arunakap parlañajjataki khitankitu ukjja” sasa (Efe. 3:1, 2). Jesusajja, jan judiöpkis uka jaqenakar suma yatiyäwinak yatiyañapatakiw Pablor mayïna. Ukhamatwa yaqha markankir jaqenakajj Mesiasan apnaqat Reinopampi apnaqatäpjjarakispäna (Efesios 3:5-8 liytʼañataki). Pablojj taqe chuymaw uka toqet yatiyäna, jichhürunakansa jupat yateqasiraksnawa. Diosan khuyapayasiñapajj jan inamayätapwa jupajj uñachtʼayäna.

4, 5. Diosan Reinopat suma yatiyäwinakajja, ‘Diosan khuyapayasiñapat suma yatiyäwinakarakiwa’ sasinjja, ¿kunatsa sistanjja?

⁴ Aka qhepa urunakanjja, Diosan servirinakapajj ‘Oraqpachanwa Diosan Reinopat suma yatiyäwinak yatiyapjjañapa, ukhamat taqe markanakan yatipjjañapataki’ (Mat. 24:14). Diosan Reinopat suma yatiyäwinakajja, ‘Diosan khuyapayasiñapat suma yatiyäwinakarakiwa’. ¿Kunatsa ukham sistanjja? Jutïr pachanjja, Diosan khuyapayasiñapatwa walja bendicionanak katoqañäni (Efe. 1:3). Apóstol Pablojj taqe chuyma yatiyasaw Diosarojj jupat khuyaptʼayasitapat yuspäräna. ¿Kunjamsa jiwasajj Pablot yateqasiraksna? (Romanos 1:14-16 liytʼañataki).

⁵ Juchararästansa, Diosan khuyapayasiñapajj kunaymanitwa yanaptʼistu, ukwa pasïr yatichäwin yatjjatawaytanjja. Niyakejjay kunayman toqet yanaptʼchistojja, kunjamsa Jehová Diosajj munasiñap uñachtʼayistu uka toqetwa mayninakar yatichañasa. Ukatsti kunjamsa Diosan munasiñapajj jupanakar yanaptʼarakispa uksa jupanakar yatichañasarakiwa. Ukhamajja, ¿kunjamsa Diosan khuyapayasiñapat yuspärapjjañapatakejj mayninakar yanaptʼsna?

6, 7. Criston jiwas layku jiwatapat jaqenakar yatiyasajja, ¿kunjamsa Diosan khuyapayasiñapat suma yatiyäwinak yatiyasktanjja?

⁶ Jichhürunakanjja, juchar purtʼasisajj janiw jaqenakajj chuym ustʼayasipkiti, ukatwa kunatsa mä qhespiyirejj wakisi uk jan amuyapkiti. Ukatsti, kunjamtï jakapki ukham jakasajj jan kusisit jakasipjjatapjja sapürutjamaw amuyasipjjaraki. Jehová Diosan Testigonakapampi parlapjje ukhakiw kunas juchajja, kunjamsa juchajj maynir jan waltʼayaspa, kunas juchat qhespiyatäñatakejj wakisi uk amuyapjje. Juchajj kunasa uk amuyasajja, suma chuyman jaqenakajj Yoqaparu Diosajj jiwañampita juchampit jiwasar qhespiyañatak khitanitapatjja, wal yuspärapjje. Jehová Diosajja, jaqenakar wal munasitapata ukhamarak khuyaptʼayasitapatwa uk luräna (1 Juan 4:9, 10).

⁷ Jehová Diosan wali munat Yoqapatjja Pablojj akham sänwa: “Diosajj jachʼa munasiñapatwa Yoqapan jiwäwipa toqe qhespiyistu, juchanakassa perdona[rakistu]” sasa (Efe. 1:7). Criston jiwas layku jiwatapaw Diosajj qawqhsa jiwasar munasistu uk uñachtʼayi, qawqha Khuyapayasirisa uksa uñachtʼayarakiwa. Jiwasatï Jesusan jiwas layku jiwataparu iyawsañäni ukhajja, juchanakasajj perdonatäniwa, qʼoma conciencianirakïñäniwa. Uk yatisajj chuymachataw jikjjatastanjja (Heb. 9:14). Uka suma yatiyäwinakjja taqeniruw yatiyañ muntanjja.

8. ¿Kunatsa jaqenakajj Diosamp sumankthapipjjañapa?

⁸ Jaqenakatï Jesusan jiwataparu jan iyawsapkani ukhajja, Diosajj uñisirinakaparjamaw uñjani. Ukatwa ‘Diosan amigopäpjjasmawa’ sasin jaqenakar yatiyañasa. Apóstol Juanajj akham sasaw qellqäna: “Khititejj Yoqar iyawski ukajja wiñay jakañaniwa, ukampis khititejj jan Yoqaru iyawski ukajja janiw wiñay jakañanïkaniti, jan ukasti Diosan ajjsarkañ mutuyäwipwa katoqani” sasa (Juan 3:36). Criston jiwas layku jiwatapatwa Diosan amigopäsna, uk yatiñajj wal kusisiyistu. Pablojj sänwa: “Nayrajj jumanakajj Diosat jayankasipkäyätawa chuymanakamansti Diosan uñisirinakaparaki, jan walinak lurapjjatam layku. Ukampis jichhajj Diosajj jupampejj sumankthapiyjjapjjtamwa, Cristojj janchipan jiwatap toqe” sasa (Col. 1:21, 22).

9, 10. 1) ¿Kunsa Cristojj alajjpachar sarañataki ajllitanakar mayïna? 2) ¿Kunjamsa ‘yaqha uwijanakajj’ ajllitanakar yanaptʼapjje?

⁹ Cristojja, alajjpachar sarañatak ajllitanakaruw “Diosampi sumankthapiyañ arunak” yatiyapjjañapatakejj jaytawayi. Pablojj jupanakar akham sänwa: “Taqe akanaksti Dios kipkarakiw luri, jupampisa sumankthapiyjjarakistu ukatsti Cristo toqew, taqenirus Diosampi sumankthapiyañ arunak loqtañwa jaytarakistu. Diosajj akapachampejj Cristo toqwa sumankthapiskäna, jaqenakan juchanakapat jan amtasisa. Jiwasarusti uka sumankthapiñ arunakwa jaytawayarakistu mayninakar churañasataki. Ukhamajj Diosan khitanakapjamawa jumanakar jutapjjsma, Dios kikpas jumanakar achiktʼapkiristam [jan ukajj ruwtʼapkiristam] nanak toqe ukhama. Tatitun sutipjjaruw achiktʼapjjsma: sumankthapjjapjjamay Diosampejja” sasa (2 Cor. 5:18-20).

¹⁰ ‘Yaqha uwijanakjam’ uñtʼatäpki ukanakatakejja, alajjpachar sarañataki ajllitanakar yatiyañan yanaptʼañajj mä suma luräwiwa (Juan 10:16). Criston ‘khitanakapjamajja’ jan ukajj yatiyirinakjamajja, ‘yaqha uwijanakaw’ jila partejj yatiyapjje. Jupanakaw Jehová Diosan cheqa yatichäwinakap yatichapjje, Jehová Diosamp sum apasipjjañapatakis jaqenakar yanaptʼapjjaraki. Ukhamatwa Diosan khuyapayasiñapat suma yatiyäwinakajj yatiyasiski.

11, 12. Jaqenakajj Diosar mayisipjjaspawa, ¿kunatsa uk yatiñajj jupanakatak mä suma yatiyäwejja?

¹¹ Walja jaqenakajja, Diosajj janis mayisitanakap istʼkaspa ukhamwa amuyapjje, ukatwa sum jikjjatasiñ laykukejj mayisipjje. Ukampis ‘mayisitanakar istʼiri’ Diosätapjja jupanakajj yatipjjañapawa. Salmonak qellqeri David chachajj akham sänwa: “Jumajj mayisitanakar istʼirïtawa. Taqe jaqenakaw jumarojj makhatapjjtam. Jucha luratanakajjajj aynachtʼayapjjetuwa, ukampis jumaw juchanakajjat pampachapjjesta” sasa (Sal. 65:2, 3).

¹² Jesusajj akham sasaw arkirinakapar säna: “Kuntejj nayan sutejjaru mayipjjäta ukjja, nayajj taqe kunsa luräwa” sasa (Juan 14:14). Ukhamasti Diosan munañaparjamächi ukajja, kunsa Jupar mayiksnawa. Apóstol Juanajj akham sasaw qellqäna: “Utjistuwa Diosar iyawsañasajja, yatiraktanwa kuntejj Diosarojj mayiñäni munañaparjama ukjja jupajj istʼistuwa” sasa (1 Juan 5:14). Diosar mayisiñajj janiw sum jikjjatasiñatakik yanaptʼkistuti, jan ukasti ‘munasir Dios Awkisan tronoparu’, jakʼachasiñatakiw yanaptʼistu. Uk amuyapjjañapatakiw jaqenakar yanaptʼañasa (Heb. 4:16). Kunjamsa mayisipjjañapa, khitirus mayisipjjañapa, kunatsa mayisipjjañapa uka toqet jaqenakar  yatichtan ukhajja, Jehová Diosan amigopäpjjañapataki ukhamarak tʼaqhesiñanakapat jan sinti llakisipjjañapatakiw jupanakar yanaptʼasktanjja (Sal. 4:1; 145:18).

13, 14. 1) ¿Kuna suma luräwsa ajllit cristianonakajj jutïrin katoqapjjani? 2) ¿Kunjamsa ajllit cristianonakajj jaqenakar yanaptʼapjjani?

¹³ Jutïr pachanjja, Jehová Diosajj jukʼampiw khuyaptʼayasiñap uñachtʼayani. ¿Kunjamsa? Cristomp chika alajjpachan apnaqapkani uka 144.000 ajllit cristianonakarojja, Diosajj mä suma luräwi churani. Kuna suma luräwsa churani uk qhanañchañatakejja, Pablojj akham sasaw qellqäna: “Diosajj jachʼa khuyapayasiñaniwa, walrak munasirakistu. Ukatwa Cristomp chika jakañ churistu, juchanakasan jiwataskchïyätan ukasa. Ukhamajj jumanakajj Diosan khuyapayasiñapatwa qhespiyatäpjjtajja. Diosajj Cristo Jesusamp chikaw jaktayarakistu, jupamp chikaw alajjpachanakan qontʼayarakistu. Aksti luriwa qhepa pachanakan uñachtʼayañataki, kunja jachʼa munasiñapampis munistu ukata, ukhamarak khuyapayasiñapas jiwasatak utjatapata Cristo Jesús layku” sasa (Efe. 2:4-7).

¹⁴ Cristomp chik alajjpachan apnaqjjapjjani ukhajja, kunanaksa Jehová Diosajj ajllit cristianonakatak wakichpachäni ukjja janiw amuyksnati (Luc. 22:28-30; Fili. 3:20, 21; 1 Juan 3:2). Jehová Diosajj “kunja jachʼa munasiñapampis munistu” ukjja, jukʼampwa ajllit cristianonakarojj jutïrin uñachtʼayani. Jupanakajj ‘machaq Jerusalenat’ uñtʼatäpjjaniwa, mä arunjja, Criston noviaparuw tukupjjani (Apo. 3:12; 17:14; 21:2, 9, 10). Ajllit cristianonakajja, Jesusampi chika irnaqasaw ‘markanakan qollasiñapatak’ yanaptʼapjjani. Jupanakaw juchampit jiwañampit qhespiñatakejj jaqenakar yanaptʼapjjani, jan juchani jaqenakar tukupjjañapatakis yanaptʼapjjarakiniwa (Apocalipsis 22:1, 2, 17 liytʼañataki).

15, 16. Jutïrinjja, ¿kunjamsa Jehová Diosajj khuyapayasiñap ‘yaqha uwijanakar’ uñachtʼayani?

¹⁵ Efesios 2:7 qellqatarjamajja, Diosajj jutïr pachanwa khuyapayasiñap uñachtʼayarakini. Uka pachanjja taqeniw ‘kunja jachʼa munasiñapampis Diosajj munistu’ uk uñjapjjani (Luc. 18:29, 30). ¿Kunjamsa Diosajj uka jachʼa munasiñap uñachtʼayani? Mä toqetjja, jiwatanakar jaktayasaw uñachtʼayani (Job 14:13-15; Juan 5:28, 29). ¿Khitinakas jaktayatäpjjpachäni? Jesusajj jiwayatäkäna uka nayrajja, Diosat jan jitheqtas servir walja chachanaka warminakaw jiwapjjäna, taqe jupanakaw jaktayatäpjjani. ‘Yaqha uwijanakatsti’, mä arunjja, Diosat jan jitheqtas servirinakajj waljaniw aka qhepa urunakan jiwapjjaraki, jupanakas jaktayatäpjjarakiniwa. Jaktasinjja jupanakajj Diosar servisipkakiniwa.

¹⁶ Diosar jan uñtʼas jiwawayapki taqe uka jaqenakas jaktayatäpjjarakiniwa. Apóstol Juanajj akham sasaw qellqäna: “Jiwatanakarusti jiskʼarus jachʼarus jupan nayraqatapan saytʼata uñjta. Libronakasti jistʼaratänwa, ukhamarak yaqha librosa. Uka librosti jakañ libro satawa. Jiwatanakasti luräwinakaparjam uñjatäpjjänwa, kunjämtï uka libronakan qellqatäkänsa ukhamaru. Lamar qotasti jupan ukan jiwirinakwa katuyjjäna. Jiwañasa, jiwatanak katjjäskän ukasa, qawqhatï jupan utjkäna ukjpachwa katuyjjarakïna. Taqe maynisa luräwinakaparjama taripatäpjjarakïnwa” sasa (Apo. 20:12, 13). Jaktanirinakarojja, Jehová Diosat yateqapjjañapataki ukhamarak Diosan Reinopar iyawsapjjañapatakiw tiempo churasini. Jupanakasti Biblian aski yatichäwinakaparjam sarnaqañwa yateqapjjani. Libronakansa, jan ukajj machaq rollonakansa  ewjjanakajj qellqatäkani ukarjamaw sarnaqapjjarakini. Uka machaq ewjjanak churasaw Jehová Diosajj khuyapayasiñap uñachtʼayarakini.

17. ¿Kunsa jaqenakar yatiyasajj janipun armañasäki?

¹⁷ Akapachajj niyaw tʼunjatäni, ukhamasti Diosan Reinopat suma yatiyäwinak yatiyañajj wali wakiskiriwa (Mar. 13:10). Diosan arunakapjja, Jupar jachʼañchañ amtampiw yatiytanjja, uk janipun armañäniti. ¿Kunjamsa uk lursna? ‘Jutïr pachanjja, Diosan khuyapayasiñapatwa taqe bendicionanak katoqañäni’ sasaw jaqenakar yatiyañasa.

18, 19. ¿Kunjamsa Jehová Diosan khuyapayasiñap jachʼañchsna?

¹⁸ Yatiykasajj akham sasaw jaqenakar qhanañchsna: ‘Cristojj apnaqjjani ukhajja, jupan jiwas layku jiwatapat utjañapäki taqe uka bendicionanakwa katoqañäni. Ukatsti jukʼat jukʼatwa jan juchan jaqer tukurakiñäni’ sasa. Biblianjja, ‘oraqejj librëjjaniwa, esclavöñas tukusiniwa, Diosan wawanakapan qhespiyat jakäwipanwa’ jakasjjapjjarakini sasin qellqatawa (Rom. 8:21). Ukham jakasiñajja, Jehová Diosan khuyapayasiñapatwa utjani.

¹⁹ Apocalipsis 21:4, 5 qellqatan jikjjataski uka arunak jaqenakar yatiyañajj wali kusiskañawa. Uka qellqatan akham siwa: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa. Tronon qontʼatäkäna ukajja, mä arunjja, Jehová Diosajja akham siwa: “Uñjam, nayajj taqe kunwa machaqat lurta” sasa. Ukatsti saskakiwa: “Qellqam, aka arunakasti cheqapawa, katuyaskañarakiwa” sasa. Diosan uka suma yatiyäwinakap mayninakar taqe chuyma yatiyasajja, Jupajj qawqha khuyapayasiris ukwa jachʼañchasktanjja.