1, 2. Ifa usun aposel Paulus a pwáraatá an kilisou ren án Kot we úméúméch?

 APOSEL PAULUS a tongeni enletin apasa: “An [Kot] ümöümöch ngeniei esap lomotongau.” (Álleani 1 Korint 15:9, 10.) Paulus a fókkun silei pwe ese fich ngeni an epwe kúna án Kot we úméúméch mi lapalap. I emén chón eriáfféwú ekkewe Chón Kraist me lóóm.

² Arap ngeni sópwólóón manawen Paulus, iei met a makkeei ngeni Timoty: “Üa kilisou ngeni Kraist Jesus ach Samol, ewe mi fang ngeniei pöchökül fän iten ai angang. Üa kilisou ngeni ren an ekieki pwe ngang mi allükülük o a awisaei pwe üpwe angang ngeni.” (1 Tim. 1:12-14) Menni ena angang Paulus a fós usun? Paulus a ereni ekkewe mwán mi ásimaw lón ewe mwichefel lón Efisos: “Manauei esap aüchea ngeniei. Üa chök mochen awesala ai kitir o awesöchüela ewe angang ach Samol Jesus a ngeniei pwe üpwe föri. Iei ewe angang ai üpwe pwärätä ewe Pworausen Manau usun ewe ümöümöchün Kot.”​—Föf. 20:24.

3. Ifa ewe angang mi sókkóló aúchean Paulus a féri? (Ppii ewe sasing lepoputáán ei lesen.)

 ³ Menni ena “Pworausen Manau” Paulus a afalafal usun, me ifa usun ena pwóróus a pwáraatá án Kot we úméúméch? Iei alon Paulus ngeni ekkewe Chón Kraist lón Efisos: “Üa lükü pwe oua fen rong, pwe lon än Kot ümöümöch a ngeniei ei angang pwe üpwe föri fänäsengesimi.” (Ef. 3:1, 2) Jesus a ewisa ngeni Paulus an epwe afalafala ewe kapas allim ngeni ekkewe aramas esap iir chón Jus. Iwe, epwe kerán ina atun an a suuk ngeni aramas seni ekkewe mwú ar repwe chóni án Kot we Mwú mi nóm fán nemenien ewe Messaia. (Álleani Efisos 3:5-8.) Paulus a afalafal fán tinikken me a isetiw leenien áppirú mi múrinné fán iten Chón Kraist ikenái. I a ánnetatá pwe ese “lomotongau” án Kot we úméúméch ngeni.

4, 5. Pwata sia tongeni apasa pwe ewe “Pworausen Manau usun ewe Mwün Kot” a lélléfengen me ewe “Pworausen Manau usun ewe ümöümöchün Kot”?

⁴ Lón ei fansoun lesópwólóón, néún Jiowa kewe aramas ra eáni ewe wis ar repwe afalafala “ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin.” (Mat. 24:14) Ewe pwóróusen manaw usun ewe Mwúún Kot a léllé ngeni ewe “Pworausen Manau usun ewe ümöümöchün Kot.” Ifa usun? Feiéch meinisin seni án Kot we Mwú epwe torikich pokiten an we úméúméch. (Ef. 1:3) Ren án Paulus tinikken le afalafal, i a pwáraatá an kilisou ren án Jiowa we úméúméch. Kich mi pwal ákkáppirú án Paulus leenien áppirú?​—Álleani Rom 1:14-16.

⁵ Lón ewe lesen mwen ei, sia káé pwe kich chón tipis sia kúna feiéch seni án Jiowa úméúméch lón sókkopaten napanap. Pokiten a torikich chómmóng feiéch, mi wor wisach ach sipwe asukula aramas usun án Jiowa pwáraatá tong me ifa usun repwe tongeni kúna feiéch seni. Ifa usun sipwe álisi ekkewe ekkóch pwe repwe aúcheani án Kot we úméúméch?

6, 7. Lupwen sia áweweei ngeni aramas usun ewe méén kepich, ifa usun sia pwal esilefetálei ewe kapas allim usun án Kot we úméúméch?

⁶ Lón ei fansoun, chómmóng aramas rese meefi mengiringir lupwen ra tipis, ina popun rese weweiti lamoten ewe méén kepich ngeniir. Nge a pwal chóchchómmóngóló chókkewe ra mirititi pwe ewe sókkun manaw ra manaweni ese atoto ngeniir pwapwa. Chómmóng aramas rese silei ena mettóch tipis, ifa usun a kkúú manawer, me met mi lamot repwe féri pwe repwe ngaseló seni fétekin tipis. Iwe, ika ra fós ngeni Chón Pwáraatá Jiowa, repwe kerán silei usun ekkena mettóch. Lupwen ra weweiti met ena tipis, iwe, ekkewe mi letipwenechar ra kilisou ren ar silei pwe Jiowa a tiinaato Néún we ngeni fénúfan pwe epwe angasakicheló seni tipis me máló. Jiowa a féri ena pokiten watteen an tong me an úméúméch.​—1 Joh. 4:9, 10.

⁷ Nengeni met Paulus a apasa usun Néún Jiowa we mi áchengicheng: “Pun lon Kraist sia ngasala ren chaan, pwe ach kewe tipis ra musala. A ifan me watten än Kot we ümöümöch.” (Ef. 1:7) Án Kraist asorun méén kepich ina met a ánnetatá án Kot tong ngenikich lap seni meinisin me pwáraatá úkúkún watteen an we úméúméch. A mmen oururukich ach silei pwe ika sia eáni lúkúlúk wóón án Jesus asor, ach kewe tipis repwe musoló me sipwe eáni eú mwelien letip  mi limeliméch. (Ipru 9:14) A ifa me múrinnéén ena kapas allim sipwe esilei ngeni aramas!

8. Pwata a lamot án aramas mi tipis repwe chásefál ngeni Kot?

⁸ Ika aramas rese eáni lúkúlúk wóón án Jesus we asor, me ren ekiekin Kot, iir ra usun chón oputa i. Ina minne, wisach ach sipwe apwóróusa ngeniir pwe ra tongeni wiliti chiechien Kot. Iei met aposel Johannes a makkeei: “Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.” (Joh. 3:36) Sia tongeni pwapwa pwe ren án Kraist we asor a suuk ngenikich ach sipwe wiliti chiechien Kot. A iei usun án Paulus áweweei ena: “Me lom oua toau seni Kot o chon oputa i pokiten ekewe mettoch oua föföri o ekkekieki. Nge iei oua chä ngeni Kot ren mälan Nöün we.”​—Kol. 1:21, 22.

9, 10. (a) Ifa ewe angang Kraist a ewisa ngeni pwiin kewe mi kepit? (b) Ifa usun ekkewe ‘ekoch sip’ ra álisi ekkewe mi kepit?

⁹ Kraist a fen ewisa ngeni pwiin kewe mi kepit wóón fénúfan ewe “angangen achächä.” Paulus a ereniir: “Ekei mettoch meinisin ra pop seni Kot, i ewe mi achäfengenikich me i ren Kraist o ngenikich ewe angangen achächä. Iei masouen ach afalafal, pwe Kot a nonom lon Kraist o achäsefäli chon fanüfan ngeni püsin i. Esap chüen chechemeni ar tipis, pwe a awisakich pwe sipwe afalafala ewe kapasen achächä. Iei mine äm aia chon arong fän iten Kraist usun itä nge Kot a nöünöü äm le tüngor ngenikemi. Äm aia tüngormau ngenikemi fän iten Kraist: Oupwe chäfengen me Kot.”​—2 Kor. 5:18-20.

¹⁰ A eú wis mi aúchea fán iten ekkewe ‘ekoch sip’ ar álisi ekkewe mi kepit lón ei angang. (Joh. 10:16) Ekkewe ‘ekoch sip’ ra usun chék chón kúné, ra féri lap ngeni ewe angangen afalafal, asukula aramas usun ewe enlet, me álisiir le ririéchfengen me Jiowa. Ina eú angang mi lamot lón ewe angangen afalafala ewe kapas allim usun án Kot we úméúméch.

11, 12. Pwata a eú kapas allim án aramas silei pwe ra tongeni iótek ngeni Jiowa?

¹¹ Chómmóng aramas ra chék iótek pokiten a ekinamwei letiper, nge rese wesewesen lúkú pwe Kot a aúselinga ar iótek. Mi lamot repwe silei pwe Jiowa i ewe Chón “aüselinga iotek.” Ewe soumakken kélfel, Tafit, a makkeei: “En ka aüselinga iotek. Aramas meinisin repwe feito reöm pokiten ar tipis. Lupwen äm pupungau ra chouitikem, en ka amuseer senikem.”​—Kölf. 65:2, 3.

¹² Jesus a ereni néún chón káé: “Meinisin mine oupwe tüngor fän itei üpwe apwönüetä.” (Joh. 14:13) Weween pwe sia tongeni iótek me tingor mettóch “meinisin” mi tipeeú ngeni letipen Jiowa. Johannes a makkeei: “A wor ach apilükülüköch lon ach churi Kot, pun sia silei pwe are sia tüngor och mine a fich ngeni letipan, a aüselingakich.” (1 Joh. 5:14) A ifa me múrinnéén ach álisi aramas le weweiti pwe iótek esap chék eú minen oururun letiper nge fen ina eú alen ach sipwe arap ngeni án Jiowa “lenien mot” ikewe “ia sia küna ümöümöch me ie”! (Ipru 4:16) Lupwen sia áiti ngeni aramas ifa usun repwe iótek lón ewe napanap mi pwúng, ié repwe itá iótek ngeni, me repwe iótek fán iten ekkewe mettóch mi fich, iwe, sia álisiir ar repwe wiliti chiechien Kot, me repwe kúna oururun  letiper lupwen ra nóm fán weires.​—Kölf. 4:1; 145:18.

13, 14. (a) Ikkefa ekkewe feiéch mi amwarar ekkewe mi kepit repwe eáni lón mwachkkan? (b) Ifa ewe angang mi amwarar ekkewe mi kepit repwe féri fán iten aramas?

¹³ Jiowa epwe pwáraatá watteen an we úméúméch lón “ekewe fansoun repwe feito.” Ifa usun? Kot epwe ngeni ekkewe 144,000, chienen Kraist kewe le nemenem lón láng, eú feiéch mi amwarar. Paulus a áweweei menni ena feiéch lupwen a makkeei: “Pokiten än Kot ümöümöch a fokun somwosomwola o an echenikich a fokun lapalap, a amanauakich me Kraist lupwen sia mäla lon ach pupungau. Ren än Kot ümöümöch sia küna manau. Lon ach eufengen me Kraist Jesus, Kot a amanauakich me Kraist pwe sipwe eti Kraist le nemenem lon läng. A föri iei usun, pwe epwe pwärätä lon ekewe fansoun repwe feito an we ümöümöch mi fokun lapalap esap wor eman a tongeni awewei, a nom lon an we chen a pwäri ngenikich lon Kraist Jesus.”​—Ef. 2:4-7.

¹⁴ A weires ach sipwe anchangei úkúkún amwararen ekkewe mettóch Jiowa a fen ammólnatá fán iten ekkewe Chón Kraist mi kepit lupwen repwe eti Kraist le nemenem lón láng. (Luk. 22:28-30; Fil. 3:20, 21; 1 Joh. 3:2, Testament Mi Fö) Jiowa epwe pwáraatá ngeniir “an we ümöümöch mi fokun lapalap” lón eú napanap mi kkóló aúchean. Iir repwe wewe ngeni ewe “Jerusalem mi fö,” ewe fin apwúpwúlú ngeni Kraist. (Pwär. 3:12; 17:14; 21:2, 9, 10) Repwe angangfengen me Jesus lón ewe angangen “apöchöküla chon ekewe mwü.” Repwe álisi aramas ar repwe ngas seni fétekin tipis me máló, me repwe álisiir ar repwe wiliti aramas mi unuséch.​—Álleani Pwärätä 22:1, 2, 17.

15, 16. Ifa usun Jiowa epwe pwáraatá an we úméúméch ngeni ekkewe ‘ekoch sip’ lón mwachkkan?

¹⁵ Efisos 2:7 a erá pwe Kot epwe pwáraatá an we úméúméch “lon ekewe fansoun repwe feito.” Lón ena atun, meinisin aramas wóón fénúfan repwe wesewesen kúna “an we ümöümöch mi fokun lapalap esap wor eman a tongeni awewei.” (Luk. 18:29, 30) Án ekkewe aramas mi máló manawsefál seni “ewe lenien sotup,” ina eú me lein ekkewe mettóch mi lapalap Jiowa epwe féri mi pwáraatá an úméúméch. (Hiop 14:13-15; Joh. 5:28, 29) Ié kana repwe manawsefál? Ekkewe aramas mi tuppwél, iir kewe ra máló me mwen án Kraist máló, me ekkewe ‘ekoch sip’ mi máló lón ekkeei ránin lesópwólóón. Meinisin chókkana mi tuppwél repwe manawsefál pwe repwe sópweló le angang ngeni Jiowa.

¹⁶ Chómmóng aramas mi máló nge rese silei Kot repwe pwal manawsefál. Johannes a makkeei: “Üa küna ekewe mi mäla, ekewe aramas tekia me aramas kis, ra ütä me mwen ewe lenien motun king. Iwe, ekewe puk ra sukula. Mürin pwal eu puk a sukula, iei ewe puken iten chon manau. Iwe, ekewe mi mäla ra küna kapwüng won mine ra föri usun a makketiu lon ekewe puk. Mürin ewe matau a fangewu ekewe mi mäla ra nom lon, pwal mäla me ewe lenien sotup ra fangewu ekewe mi mäla ra nom lor. Iwe, ir meinisin ra küna kapwüng won meinisin mine ra föri.” (Pwär. 20:12, 13) Epwe suuk ngeni ekkewe mi manawsefál ar repwe káé usun Jiowa me etiwa an we nemenem. Mi lamot repwe káé me apwénúetá ekkewe kapasen emmwen lón Paipel me ekkewe mineféén kapasen emmwen mi makketiw lón “ekewe puk.” Ekkena mineféén kapasen  emmwen, pwal ina eú alen án Jiowa epwe pwáraatá an we úméúméch.

17. Met sipwe chechchemeni lupwen sia fiti ewe angangen afalafal?

¹⁷ Pokiten ewe sópwólóón a arapoto, a fókkun lamot lón ei fansoun lap seni lóóm ach sipwe esilefeili kapas allimen án Kot we Mwú! (Mark. 13:10) Mi lamot sipwe chechchemeni pwe sia fiti ewe angangen afalafal pwe sipwe asamolu Jiowa. Ifa usun sipwe féri ena? Mi lamot sipwe ereni aramas pwe meinisin ekkewe feiéch sipwe pwapwaiti lón ewe ótót sefé, ra chék tufich pokiten án Jiowa we úméúméch mi amwarar.

18, 19. Ifa usun sipwe elingaaló án Jiowa we úméúméch?

¹⁸ Lón ach afalafal ngeni aramas, sia tongeni áweweei ngeniir pwe lupwen ewe Mwúún Kraist a nemenem, aramas repwe kúna meinisin feiéch seni ewe méén kepich me ekis me ekis repwe unuséchúló. Ewe Paipel a apasa: “Förien Kot kana repwe ngasala seni ar ngauala me tala o eti nöün Kot kewe lon ar ngasala me ling.” (Rom 8:21) Epwe chék tufich ena ren án Jiowa we úméúméch.

¹⁹ Mi nóm rech ewe feiéch ach sipwe esilei ngeni aramas meinisin ewe pwon mi ámmeseik mi mak lón Pwärätä 21:4, 5: “[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” Jiowa, ewe mi mómmóót wóón ewe leenien motun king, a apasa: “Nengeni, üpwe asöfösefäli mettoch meinisin.” A pwal erá: “Kopwe makkeetiu ekei kapas, pun ra let o allükülük.” Lupwen sia tinikken le afalafala ena kapas allim ngeni aramas, sia wesewesen elingaaló án Jiowa we úméúméch!