1, 2. Mũtũmwo Paulo onanirie atĩa atĩ nĩ aakenagio nĩ ũtugi mũnene wa Ngai?

MŨTŨMWO PAULO oigire ũũ: “Ũtugi ũcio mũnene [wa Ngai] ndonirio ndwarĩ wa tũhũ.” (Thoma 1 Akorintho 15:9, 10.) Paulo nĩ aamenyaga wega atĩ ti kwagĩrĩra aagĩrĩire kũiguĩrũo tha nĩ Ngai tondũ mbere-inĩ nĩ aanyariraga Akristiano.

² Paulo atanakua aandĩkĩire Timotheo ũũ: “Nĩ njokagĩria Kristo Jesu Mwathani witũ ngatho, o we waheire hinya, tondũ nĩ onire ndĩ mwĩhokeku akĩhe ũtungata.” (1 Tim. 1:12-14) Ũtungata ũcio warĩ ũrĩkũ? Paulo aatarĩirie athuri a kĩũngano kĩa Efeso ũũ: “Ndionaga muoyo wakwa mwene ũrĩ wa bata harĩ niĩ, ũndũ ũrĩa wa bata nĩ atĩ ndĩkie ihenya rĩakwa na ũtungata ũrĩa ndaaheirũo nĩ Mwathani Jesu, wa kũruta ũira kĩhinyio wĩgiĩ ũhoro ũrĩa mwega wa ũtugi mũnene wa Ngai.”—Atũm. 20:24.

3. Nĩ ũtungata ũrĩkũ wa mwanya Paulo aahetwo? (Rora mbica kĩambĩrĩria-inĩ gĩa gĩcunjĩ gĩkĩ.)

 ³ Nĩ ‘ũhoro ũrĩkũ mwega’ Paulo aahunjagia ũrĩa wonanagia ũtugi mũnene wa Jehova? Eerire Akristiano a Efeso ũũ: “Nĩ mũiguĩte atĩ nĩ ndaaheirũo ũramati wa ũtugi mũnene wa Ngai nĩ ũndũ wanyu.” (Ef. 3:1, 2) Nĩ aahetwo wĩra wa kũhunjĩria andũ a ndũrĩrĩ ũhoro ũrĩa mwega nĩguo o nao magĩe na mweke wa gũgaathamaka hamwe na Kristo Ũthamaki-inĩ wa Kĩĩmesia. (Thoma Aefeso 3:5-8.) Paulo aahunjirie na kĩyo na agĩkorũo arĩ kĩonereria kĩega kũrĩ Akristiano ũmũthĩ, na akĩonania atĩ ũtugi ũcio mũnene onetio ndwarĩ wa “tũhũ.”

4, 5. Nĩkĩ no tuuge atĩ ‘Ũhoro ũrĩa mwega wa Ũthamaki’ nĩ ũndũ ũmwe na “ũhoro ũrĩa mwega wa ũtugi mũnene wa Ngai”?

⁴ Matukũ-inĩ maya ma kũrigĩrĩria, Aira a Jehova nĩ maheetwo wĩra wa kũhunjia ‘ũhoro mwega wa Ũthamaki thĩ yothe ũtuĩke ũira kũrĩ ndũrĩrĩ ciothe.’ (Mat. 24:14) Ningĩ nĩ tũhunjagia “ũhoro ũrĩa mwega wa ũtugi mũnene wa Ngai” tondũ irathimo iria twĩrĩgagĩrĩra gũkona thĩinĩ wa thĩ njerũ, tũgaaciona nĩ ũndũ wa ũtugi mũnene wa Jehova kũgerera harĩ Kristo. (Ef. 1:3) Hihi nĩ tuonanagia ngatho nĩ ũndũ wa ũtugi mũnene wa Jehova na njĩra ya kũhunjia na kĩyo o ta ũrĩa Paulo eekaga?​—Thoma Aroma 1:14-16.

⁵ Gĩcunjĩ kĩu kĩrathirire, nĩ tũrerutire ũrĩa tũgunĩkaga kuumana na ũtugi mũnene wa Jehova na njĩra nyingĩ o na tũrĩ ehia. Kwoguo nĩ twagĩrĩirũo kwĩrutanĩria biũ kũmenyithia andũ othe ũrĩa Jehova onagia andũ wendo na ũrĩa mangĩgunĩka. Nĩ na njĩra irĩkũ imwe tũngĩteithia andũ nacio nĩguo monanie ngatho nĩ ũndũ wa ũtugi mũnene wa Ngai?

6, 7. Nĩ na njĩra ĩrĩkũ tũhunjagia ũhoro ũrĩa mwega wa ũtugi mũnene wa Ngai rĩrĩa tũrataarĩria andũ ũhoro wĩgiĩ ũkũũri?

⁶ Andũ aingĩ ũmũthĩ matithumbũkaga rĩrĩa mehia, na kwoguo mationaga bata wa ũkũũri. No nĩ monaga atĩ mũtũũrĩre ũcio wao ndũmarehagĩra gĩkeno. Ĩndĩ maria na Aira a Jehova nĩ mataũkagĩrũo kwĩhia nĩ kuuga atĩa, ũrĩa kũmahutagia, na ũrĩa tũrabatara gwĩka nĩguo tũkũũrũo kuuma ũkombo-inĩ wa mehia. Arĩa makoragwo na ngoro njega nĩ makenaga mamenya atĩ Jehova aatũmire Mũrũ wake gũkũ thĩ nĩguo atũkũũre kuumana na mehia na gĩkuũ, nĩ ũndũ wa wendo wake na ũtugi mũnene.—1 Joh. 4:9, 10.

⁷ Paulo akĩaria ũhoro wa Jesu, aandĩkire ũũ: “Kũringana na kũingĩha kwa ũtugi mũnene wa Ngai, nĩ tũhonokagio nĩ ũndũ wa mũrũ ũcio wake [Jesu] na njĩra ya ũkũũri kũgerera thakame yake, tũkoherũo mehia maitũ.” (Ef. 1:7) Igongona rĩa ũkũũri rĩa Kristo rĩonanagia wendo mũnene wa Ngai gũtwerekera na ũtugi wake mũnene. Na githĩ tũtikenaga twamenya atĩ tuonania wĩtĩkio harĩ igongona rĩrĩa Jesu aarutire nĩ tuohagĩrũo mehia na tũgakorũo na thamiri theru? (Ahib. 9:14) Hatarĩ nganja ũcio nĩ ũhoro mwega wa kwĩra arĩa angĩ.

8. Nĩkĩ andũ ehia nĩ mabataraga kũiguithanio na Ngai?

⁸ Nĩ tũheetwo wĩra wa kũmenyithia andũ atĩ no makorũo na ũrata wa hakuhĩ  hamwe na Mũũmbi wao. Ngai onaga andũ arĩa matakoragwo na wĩtĩkio harĩ igongona rĩa Jesu marĩ thũ ciake. Mũtũmwo Johana aandĩkire ũũ: “Ũrĩa wonanagia wĩtĩkio harĩ Mũriũ arĩ na muoyo wa tene na tene; ũrĩa ũtaathĩkagĩra Mũriũ ndakoona muoyo, ĩndĩ marakara ma Ngai matũũraga igũrũ rĩake.” (Joh. 3:36) Ũndũ mwega nĩ atĩ igongona rĩa ũkũũri rĩtũmaga andũ mahote kũiguithanio na Ngai. Paulo oigire ũũ: “Inyuĩ arĩa hĩndĩ ĩmwe mwarĩ thũ cia Ngai na mwaraihanĩrĩirie nake nĩ gũkorũo meciria manyu meendaga gwĩka maũndũ moru-rĩ, rĩu inyuĩ nĩ amũiguithanĩtie nake we mwene kũgerera mwĩrĩ wa ũcio wakuire.”​—Kol. 1:21, 22.

9, 10. (a) Kristo aaheire arĩa aitĩrĩrie maguta wĩra ũrĩkũ? (b) Arĩa a “ng’ondu ingĩ” mateithagia arĩa aitĩrĩrie maguta atĩa?

⁹ Kristo nĩ aheete Akristiano aitĩrĩrie maguta kĩrĩa Paulo eetire “ndũmĩrĩri ĩrĩa ya ũiguithanio.” Paulo agĩtaarĩria ũndũ ũcio aandĩkĩire Akristiano aitĩrĩrie maguta a karine ya mbere ũũ: “No maũndũ mothe moimaga kũrĩ Ngai, o we watũiguithanirie nake we mwene kũgerera Kristo na agĩtũhe ũtungata wa ũiguithanio, naguo nĩ atĩ Ngai nĩ aaiguithanirie thĩ harĩ we mwene kũgerera Kristo, atekũmatarĩra mahĩtia mao, na agĩtwĩhokera ithuĩ ndũmĩrĩri ĩrĩa ya ũiguithanio. Kwoguo-rĩ, ithuĩ tũrĩ mabarũthi handũ-inĩ ha Kristo, ta Ngai arathaithana kũgerera harĩ ithuĩ. Tũrathaitha andũ ũũ handũ-inĩ ha Kristo: ‘Ĩtĩkĩrai kũiguithanio na Ngai.’”—2 Kor. 5:18-20.

¹⁰ “Ng’ondu ingĩ” nĩ cionaga arĩ gĩtĩo gũteithia arĩa aitĩrĩrie maguta wĩra-inĩ wa kũhunjia. (Joh. 10:16) Magĩtungata matũmĩtwo nĩ Kristo, arĩa a “ng’ondu ingĩ” nĩ makoragwo na itemi inene rĩa kũruta andũ ma cia Bibilia na kũmateithia makũrie ũrata wa hakuhĩ na Jehova. Ũcio nĩ wĩra wa bata wa kũruta ũira kĩhinyio wĩgiĩ ũhoro mwega wa ũtugi mũnene wa Ngai.

11, 12. Nĩkĩ andũ kũmenya atĩ no mahoe Jehova nĩ ũhoro mwega?

¹¹ Andũ aingĩ mahoyaga tondũ gwĩka ũguo nĩ gũtũmaga maigue wega, no matikoragwo na ma atĩ Ngai nĩ aiguaga mahoya mao. Nĩ marabatara kũmenya atĩ Jehova nĩ “mũigua wa mahoya.” Daudi aandĩkire ũũ: “Wee mũigua wa mahoya-rĩ, arĩa othe me mwĩrĩ magokaga o harĩ wee. Waganu mĩthemba mĩthemba nĩũngĩragia hinya: ha ũhoro wa mehia maitũ-rĩ, we no we ũkũmahorohia.”—Thab. 65:2, 3.

¹² Jesu eerire arutwo ake ũũ: “Mũngĩhoya ũndũ o wothe na rĩĩtwa rĩakwa, nĩ ndĩrĩmũhingagĩria.” (Joh. 14:14) “Ũndũ o wothe” nĩ ũrĩa ũratwarana na wendi wa Jehova. Johana oigire ũũ: “Na ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga.” (1 Joh. 5:14) Na githĩ ti ũndũ mwega gũteithia andũ gũtaũkĩrũo atĩ mahoya ti ma gũtũma tũigue wega, no nĩ njĩra ya gũkuhĩrĩria “gĩtĩ kĩa ũnene kĩa Ngai o ũcio ũheanaga ũtugi mũnene.” (Ahib. 4:16) Rĩrĩa twamonia njĩra ĩrĩa yagĩrĩire ya kũhoya, Nũ twagĩrĩire kũhoya, na maũndũ marĩa twagĩrĩire kũhoya, nĩ tũrĩmateithagia gũkuhĩrĩria Jehova na makomĩrĩrio rĩrĩa marĩ na mathĩna.—Thab. 4:1; 145:18.

13, 14. (a) Arĩa aitĩrĩrie maguta magakorũo na mĩeke ĩrĩkũ ya mwanya mahinda mokĩte? (b) Nĩ ũndũ ũrĩkũ wa magegania arĩa aitĩrĩrie maguta magekĩra andũ?

¹³ Jehova nĩ akonania ũtugi mũnene na njĩra nene makĩria thĩinĩ wa “mĩtabarĩre ya maũndũ ĩrĩa ĩroka.” Paulo akĩaria ũhoro wa mweke wa mwanya ũrĩa Ngai ahete arĩa 144,000 arĩa magaathamaka hamwe na Kristo kũrĩa igũrũ, aandĩkire ũũ: “No Ngai, nĩ ũndũ wa tha ciake nyingĩ, na nĩ ũndũ wa wendo wake mũingĩ ũrĩa aatwendire naguo, nĩ aatũmire tũkorũo tũrĩ muoyo hamwe na Kristo o na rĩrĩa twarĩ akuũ nĩ ũndũ wa mehia—kũgerera ũtugi wake mũnene nĩ mũhonoketio. Makĩria ma ũguo, nĩ aatũriũkirie hamwe nake na agĩtũiga kũũrĩa igũrũ tũrĩ na ũiguano na Kristo Jesu, nĩguo atĩ hĩndĩ ya mĩtabarĩre ya maũndũ ĩrĩa ĩroka akoonania ũrĩa ũtugi wake mũnene ũkĩrĩrĩirie kũgerera wega wake harĩ ithuĩ arĩa tũrĩ na ũiguano na Kristo Jesu.”​—Ef. 2:4-7.

¹⁴ Nĩ ũndũ mũritũ gwĩciria maũndũ marĩa Jehova aigĩire Akristiano arĩa aitĩrĩrie maguta rĩrĩa magathiĩ gũthamaka na Kristo kũrĩa igũrũ. (Luk. 22:28-30; Afil. 3:20, 21; 1 Joh. 3:2) Jehova nĩ “akoonania ũrĩa ũtugi wake mũnene ũkĩrĩrĩirie” harĩ o. Magaakorũo marĩ “Jerusalemu ĩrĩa Njerũ,” mũhiki wa Kristo. (Kũg. 3:12; 17:14; 21:2, 9, 10) Nĩ makanyitanĩra na Jesu “kũhonia ndũrĩrĩ” na mehererie arĩa athĩki mehia marĩa maagaire na gĩkuũ, na mamateithie gũtuĩka akinyanĩru.—Thoma Kũguũrĩrio 22:1, 2, 17.

15, 16. Jehova akonia arĩa a “ng’ondu ingĩ” ũtugi wake mũnene na njĩra ĩrĩkũ mahinda mokĩte?

¹⁵ Thĩinĩ wa Aefeso 2:7, tũthomaga atĩ Ngai nĩ akonania ũtugi wake mũnene “hĩndĩ ya mĩtabarĩre ya maũndũ ĩrĩa ĩroka.” Hatarĩ nganja, thĩinĩ wa mũtabarĩre mwerũ Jehova nĩ akonania “ũtugi wake mũnene ũkĩrĩrĩirie.” (Luk. 18:29, 30) Njĩra ĩmwe nene ĩrĩa Jehova akonania ũtugi wake mũnene nĩ kũriũkia andũ arĩa marĩ “thĩinĩ wa Mbĩrĩra.” (Ayub. 14:13-15; Joh. 5:28, 29) Athuri na atumia ehokeku a tene arĩa maakuire Kristo atanaruta igongona na arĩa othe a “ng’ondu ingĩ” makuĩte marĩ ehokeku matukũ-inĩ maya mũico, nĩ makariũkio nĩguo mathiĩ na mbere gũtungatĩra Jehova.

¹⁶ O na andũ arĩa maakuire matoĩ Ngai nĩ makariũkio. Nĩ makaheo mweke wa kwĩnyihĩria ũnene wa Jehova. Johana aandĩkire ũũ: “Na ngĩona akuũ, arĩa anene na anini, marũgamĩte mbere ya gĩtĩ kĩrĩa kĩa ũnene, na ikũnjo ikĩhingũrũo. No gĩkũnjo kĩngĩ gĩkĩhingũrũo; nĩkĩo gĩkũnjo kĩa muoyo. Arĩa akuũ magĩtuĩrũo kuumana na maũndũ marĩa maandĩkĩtwo ikũnjo-inĩ icio kũringana na ciĩko ciao. Narĩo iria rĩkĩruta akuũ arĩa maarĩ thĩinĩ warĩo, na gĩkuũ na Mbĩrĩra ikĩruta akuũ arĩa maarĩ thĩinĩ wacio, na o mũndũ agĩtuĩrũo kũringana na ciĩko ciake.” (Kũg. 20:12, 13) Arĩa makariũkio nĩ makabatara kwĩruta ũrĩa mangĩhũthĩra motaaro marĩa marĩ thĩinĩ wa Bibilia. Ningĩ nĩ makabatara kũrũmĩrĩra mawatho merũ marĩa makaaheanwo thĩinĩ wa “ikũnjo,” marĩa makonania ũrĩa twagĩrĩirũo gũgaikara thĩinĩ wa thĩ njerũ. Jehova gũtũhe mawatho macio merũ nĩ njĩra ĩngĩ akonania ũtugi wake mũnene.

17. Nĩ ũndũ ũrĩkũ twagĩrĩirũo kũririkanaga rĩrĩa tũrahunjia?

¹⁷ Gũkĩra hĩndĩ ĩngĩ o yothe, ihinda rĩrĩ nĩrĩo twagĩrĩirũo kwĩrutanĩria kũhunjia ũhoro ũrĩa mwega wa Ũthamaki, tondũ mũico ũrĩ hakuhĩ. (Mar. 13:10) Ũhoro ũcio mwega wonanagia ũtugi mũnene wa Jehova. Nĩ twagĩrĩirũo kũririkanaga ũguo rĩrĩa tũrahunjia. Muoroto witũ tũkĩhunjia nĩ gũtĩithia Jehova. No twĩke ũguo na njĩra ya kuonia andũ atĩ ciĩranĩro ciothe iria twĩrĩirũo thĩinĩ wa thĩ njerũ, cionanagia ũtugi mũnene wa Jehova.

18, 19. Tũgoocithagia ũtugi mũnene wa Jehova atĩa?

¹⁸ Rĩrĩa tũrahunjia no tũtaarĩrie andũ atĩ rungu rwa Ũthamaki wa Ngai, andũ nĩ makagunĩka biũ na igongona rĩa ũkũũri na o kahora mathiĩ matuĩkĩte akinyanĩru. Bibilia yugaga ũũ: “Ũũmbi guo mwene nĩ ũgaakũũrũo kuuma ũkombo-inĩ wa kũbutha na ũheo wĩyathi ũrĩ na riri wa ciana cia Ngai.” (Rom. 8:21) Ũndũ ũcio ũkaahoteka tu nĩ ũndũ wa ũtugi mũnene wa Jehova.

¹⁹ Tũrĩ na mweke wa kũhunjĩria andũ arĩa mangĩenda gũthikĩrĩria ũhoro wa kĩĩranĩro gĩkĩ gĩa gũcanjamũra kĩrĩ thĩinĩ wa Kũguũrĩrio 21:4, 5: “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.” Nake Jehova ũrĩa ũikarĩire gĩtĩ kĩrĩa kĩa ũnene akiuga: “Atĩrĩrĩ, maũndũ mothe nĩ kũmerũhia ndĩramerũhia.” Ningĩ akiuga: “Andĩka, nĩ gũkorũo ciugo icio nĩ cia kwĩhokeka na nĩ cia ma.” Rĩrĩa twahunjia ũhoro ũcio mwega tũrĩ na kĩyo, nĩ tũgoocithagia ũtugi mũnene wa Jehova.