1, 2. ¿Imaynatá apóstol Pablo agradecesqa kasqanta rikucherqa Diospa kʼacha yanapayninmanta?

APÓSTOL Pabloqa tukuy sonqo nerqa: “[Diospa] kʼacha yanapaynintaj noqapajqa mana qhasipajchu karqa”, nispa (1 Corintios 15:9, 10 leey). Pabloqa sutʼita yacharqa Diospa khuyakuyninta mana ganakusqanta, nitaj khuyakunapaj jinachu kasqanta ima. Payqa cristianosta qhatiykachayta yachaj.

² Pabloqa niraj wañupushaspa Timoteoman ajinata qhelqarqa: “Graciasta qoni kallpachawaj Cristo Jesús Señorninchejman, imaraykuchus payqa cheqanta ruwajta jina japʼiwarqa, paypa ruwanasnimpi trabajanaypaj churawaspa”, nispa (1 Tim. 1:12-14). ¿Ima ruwaymantataj Pablo parlasharqa? Chaymanta parlaspa Pabloqa Éfeso congregacionmanta ancianosman nerqa: “Chaykunataqa mana manchachikunichu, nitaj wañuytapis; astawanqa kusiywan kawsayniyta tukuchiyta munani Señor Jesucristo kamachiwasqanta juntʼaspa, willaspataj Diospa qhasilla kʼacha yanapaynin evangeliomanta”, nispa (Hech. 20:24).

3. ¿Imatataj Pablo willanan karqa? (26 paginapi dibujota qhawariy).

 ³ ¿Ima sumaj willaykunatataj Pablo runasman willarqa? ¿Imaynatá chay sumaj willaykuna Diospa kʼacha yanapayninta rikucherqa? Pablo Éfeso congregacionmanta hermanosman nerqa: “Qankunaqa ichapis uyarerqankichejña Diosqa qhasilla kʼacha yanapayninta qowasqanmanta qankuna ukhupi ruwanayta juntʼanaypaj”, nispa (Efe. 3:1, 2). Jesusqa, Pabloman nerqa mana judío runasman Diosmanta willananta. Chayraykutaj waj llajtamanta runas Jesucristowan khuska kamachimuyta atinkuman karqa (Efesios 3:5-8 leey). Pabloqa sonqo kʼajaywan Diosmanta willarqa, kay tiempomanta cristianostaj pay jina sonqo kʼajaywan willamunankupaj mayta yachakunkuman. Pabloqa rikucherqa Diospa kʼacha yanapaynin paypaj mana qhasipajchu kasqanta.

4, 5. ¿Imaraykú nisunman janaj pacha reinomanta evangelio, Diospa kʼacha yanapayninwan kikillan kasqanta?

⁴ Kay qhepa pʼunchaykunapi, Diospa llajtanpi kajkunaqa “janaj pacha reinomanta evangelio[ta] tukuynejpi willa[nanku tiyan], tukuy runas yachanankupaj” (Mat. 24:14). Diospa gobiernonmanta sumaj willaykunaqa, Diospa kʼacha yanapaynin evangeliollataj. ¿Imaynapi? Ima bendicionestachus Diospa gobiernon kamachishajtin japʼisunchej chaykunaqa Diospa kʼacha yanapayninrayku kanqa (Efe. 1:3). Pabloqa Diospa kʼacha yanapayninmanta agradecekusqanta rikucherqa sonqo kʼajaywan Diosmanta willaspa. ¿Pablo jinachu ruwashanchej? (Romanos 1:14-16 leey).

⁵ Ñaupaj yachaqanapi yachakorqanchej, juchasapas kaspapis Jehovaj kʼacha yanapayninwan imaymanamanta yanapachikushasqanchejta. Chayrayku runasman willamunanchej tiyan, imaynatachus Jehová munakuyninta rikuchishasqanmanta, imaynatachus chaywan yanapachikunankuta ima. ¿Imaynasmantataj wajkunata yanapasunman Diospa kʼacha yanapayninmanta agradecekunankupaj?

6, 7. Jesús noqanchejrayku wañusqanmanta wajkunaman sutʼinchaspa, ¿imaraykú Diospa kʼacha yanapayninmanta sumaj willaykunata willashasqanchejta nisunman?

⁶ Kay tiempopi ashkha runas juchallikuspa mana juchayojchu kasqankuta ninku. Chayraykutaj mana entiendeyta atinkuchu imaraykuchus Jesús runasrayku wañusqanta. Chantapis ashkha runas reparanku imaynachus kausakusqankuwan mana kusisqaschu kasqankuta. Chaywanpis Jehovaj testigosninwan parlasparaj wakenqa entiendenku imachus jucha kasqanta, jucharayku ñakʼarisqankuta, imaraykuchus juchamanta kacharichisqa kayta necesitasqankuta ima. Imachus jucha kasqanta entiendespataj, llampʼu sonqoyoj runasqa juchamanta, wañuymanta kacharichinawanchejpaj Jehová Wawanta kachamusqanmanta yachakuspa mayta agradecekunku. Jehovaqa chayta ruwarqa mayta munakuwasqanchejrayku, kʼacha yanapayninrayku ima (1 Juan 4:9, 10).

⁷ Imatachus Pablo Jehovaj munasqa Wawanmanta nisqanpi tʼukurina, pay nerqa: “[Diosqa wawanpa] yawarninta jichʼasqanwan rantiwarqanchej kacharichisqa kananchejpaj. Juchasninchejtapis pampachallarqataj khuyakuynin may jatun kasqanrayku”, nispa (Efe. 1:7). Jesús noqanchejrayku wañusqanqa Jehovaj munakuyninta rikuchin, kʼacha yanapayninta ima. Mayta  kusikunchej Jesuspa wañuyninpi creejtinchej, juchasninchej pampachasqa kananmanta, sonqonchejpis llimphu kananmanta ima (Heb. 9:14). Chaytaj, ¡allin willaykunapuni! Tukuy runasmantaj willayta munanchej.

8. ¿Imaraykú juchasapa runas Dioswan allinyakuyta necesitanku?

⁸ Jesuspa wañuyninpi mana creejkunataqa, Dios enemigosninta jina qhawan. Chayrayku chay runasman ninanchej tiyan Dioswan amigos kayta atisqankuta. Apóstol Juan nerqa: “Churipi creejqa wiñay kawsayniyoj; Churipi mana creejtajrí kawsaytaqa mana rikonqachu, astawanqa Diospa phiñakuynin paypa patampi kashan”, nispa (Juan 3:36). Mayta kusikunchej Jesuspa wañuyninrayku, Dioswan amigos kayta atisqanchejmanta. Pablo nerqa: “Ñawpa tiempopi Diosmanta karupi karqankichej; yuyayniykichejpi paypa enemigosnin karqankichej, sajra imasta ruwasqaykichejrayku. Kunantajrí Dioswan allinyachisqa kankichej Cristoj cuerpompi, wañuyninnejtataj”, nispa (Col. 1:21, 22).

9, 10. 1) ¿Imatataj Jesús ajllasqa cristianosman kamacherqa? 2) ¿Imaynatá waj ovejasmanta kajkuna ajllasqa cristianosta yanapanku?

⁹ Jesucristoqa kay Jallpʼapi kaj ajllasqa cristianosman “[Dioswan] allinyakuna kasqanta parlana[n]kupaj” kamacherqa. Pablo paykunaman nerqa: “Chay tukuy imaqa Diosmanta jamun, pichus Cristonejta allinyachiwarqayku paywan allinyasqa kanaykupaj, kamachiwarqaykutaj paywan allinyakuna kasqanta parlanaykupaj, paymanta. Kaytaj chay willay: Dios Tata cheqamanta Cristonejta kay pacha runasta pay kikinwan allinyacherqa, runaspa juchasninkuta qonqayman churaspa. Noqaykumantaj kamachiwarqayku chay allinyakuymanta willanaykupaj. Ajina chayqa, Cristoj sutimpi willajkuna kachamusqas kayku, Diospis noqaykunejta parlashanman jina. Chayrayku, mañakuyku Cristoj sutimpi: Dioswan allinyakuychej”, nispa (2 Cor. 5:18-20).

¹⁰ Waj ovejasmanta kajkunaqa, ajllasqa cristianosta chay llankʼaypi yanapayta may jatunpaj qhawanku (Juan 10:16). Jesucristoj “kachasqasnin” waj ovejasmanta kajkunaqa, runasman mayta predicashanku, cheqa kajmantataj mayta yachachishanku, Jehovawan amigos kanankupajtaj mayta yanapashanku. Chayta ruwashasqankoqa may sumajpuni, imaraykuchus Diospa kʼacha yanapayninmanta sumaj willaykunata willashanku.

11, 12. ¿Imaraykutaj runaspaj may sumaj Jehovamanta mañakuyta atisqankuta yachakunanku?

¹¹ Ashkha runas Diosmanta mañakunku allin sientekusqankuraykulla. Jinapis mana creenkuchu Dios mañakuykunasninkuta uyarisqanta. Chay runasqa yachakunanku tiyan Jehová mañakuykunata uyarisqanta. Salmista David nerqa: “Qan uyarinki mañakususqankuta. Tukuy runas qanman jamunku. Sajra ruwasqasniyku atipashawajtiyku, contraykipi juchallisqaykuta qan pampachapuwayku”, nispa (Sal. 65:2, 3).

¹² Jesús yachachisqasninman nerqa: “Imallatapis sutiypi mañak[ojtiykichejqa], chayta[...] noqa ruwasaj”, nispa (Juan 14:14). Kayqa rikuchiwanchej, Diospa munayninman jina imallatapis mañakuyta atisqanchejta. Juan qhelqarqa: “Diospi tukuy sonqo atienekunchej. Chayrayku munayninman jinachus imallatapis mañakunchej chayqa, yachanchej pay uyarinawanchejta”,  nispa (1 Juan 5:14). Mana allin sientekunallapajchu Diosmanta mañakunchej, manaqa Diosmanta mañakuspa “kʼacha yanapayninta qoj Diospa ñawpaqenman” qayllaykunchej. Chayta runasman yachacheyqa may sumaj (Heb. 4:16). Runasman imaynatachus mañakunata, pimantachus mañakunata, imastachus mañakunata yachachispaqa, Jehovawan amigos kanankupaj, ñakʼarishajtinku sonqochayta tarinankupaj ima yanapanchej (Sal. 4:1; 145:18).

13, 14. 1) ¿Ima sumaj llankʼaytataj ajllasqa cristianos japʼenqanku? 2) ¿Imastataj ajllasqa cristianos runasrayku ruwanqanku?

¹³ Jehovaqa kʼacha yanapayninta jamoj pʼunchaykunapi astawan rikuchenqa. ¿Imaynamanta? Diosqa 144.000 ajllasqa cristianosman, uj sumaj llankʼayta qonqa, paykuna Cristowan khuska kamachimonqanku. Pablo sutʼincharqa imachus chay llankʼay kasqanta, kayta qhelqaspa: “Diosqa khuyakuynimpi may qhapaj kaspa, munakuwarqanchej may jatun munakuyninwan. Juchasninchejpi wañusqaraj kashajtinchej, Diosqa Cristowan khuskata kawsayta qowarqanchej. Diospa qhasilla kʼacha yanapayninrayku salvasqa kankichej. Diosqa Cristo Jesuswan khuskata kawsarichiwarqanchej, ajinallatataj janaj pachapi paywan khuskata tiyachiwarqanchej. Chayta ruwarqa, jamoj pʼunchaykunapi chay may qhapaj kʼacha yanapayninta rikuchinampaj, Cristo Jesuspi noqanchejwan kʼacha kasqanrayku”, nispa (Efe. 2:4-7).

¹⁴ Jesucristowan khuska ajllasqa cristianos kamachimojtinku, imastachus Jehová paykunaman qonanpi tʼukuriyta mana atillanchejchu (Luc. 22:28-30; Fili. 3:20, 21; 1 Juan 3:2). Jehovaqa paykunaman “jamoj pʼunchaykunapi chay may qhapaj kʼacha yanapayninta” rikuchenqa. Ajllasqa cristianos “mosoj Jerusalén”, Cristoj noviantaj kanqanku (Apo. 3:12; 17:14; 21:2, 9, 10). Paykuna Jesuswan khuska llankʼanqanku ‘nacionesta sanoyachispa’. Runastapis yanapanqanku juchamanta, wañuymantawan kacharichisqa kanankupaj. Juntʼa runasmantaj tukuchenqanku (Apocalipsis 22:1, 2, 17 leey).

15, 16. ¿Imaynatataj Jehová kʼacha yanapayninta waj ovejasmanta kajkunaman rikuchillanqataj?

¹⁵ Efesios 2:7 versiculoqa Dios kʼacha yanapayninta jamoj pʼunchaykunapi rikuchinanta nin. Chay tiempopitaj tukuy runas Diospa “qhapaj kʼacha yanapayninta” rikonqanku (Luc. 18:29, 30). Jehovaqa kʼacha yanapayninta rikuchillanqataj wañusqasta kausarichispa (Job 14:13-15; Juan 5:28, 29). Jesús niraj wañupushajtin cheqa sonqo qharis, warmis ima wañupojkuna, kay qhepa pʼunchaykunapi waj ovejasmanta kaj cheqa sonqo wañupojkunapis, Jehová Diosta sirvinankupaj kausarimonqanku.

¹⁶ Diosta mana rejsispa wañoj ashkha runas, kausarimullanqankutaj. Juan qhelqarqa: “Rikullarqanitaj wañusqasta juchʼuyta, jatunta Diospa ñawpaqempi sayashajta. Chantá libros kicharisqa karqanku, jinallataj waj libropis kicharikorqa. Chayqa kawsay libro karqa. Chay wañusqastaj juzgasqa karqanku, imamantachus librospi qhelqasqa kasqanmanta, ruwasqankuman jina. Mama qochaqa chaypi wañusqa kajkunata jaywaporqa. Wañuypis, ukhu pachapis chaypi wañusqa kajkunata jaywapullarqataj. Sapa uj runataj juzgasqa karqa ruwasqasninman jina”, nispa (Apo. 20:12, 13). Kausarimojkunaqa Jehovamanta yachakuyta, kamachejninkuta jinataj qhawayta atenqanku. Paykunaqa Bibliaj  yuyaychaykunasninmanta, mosoj librospi leyesmanta yachakonqanku, chayman jina kausakuyta ima. Chay mosoj kamachiykunanejta, Jehovaqa kʼacha yanapayninta rikuchillanqataj.

17. Diosmanta willashaspa, ¿imatataj yuyarikunanchej tiyan?

¹⁷ Kay pachaj tukukuynin qayllitapiña kashan. Chayrayku Diospa gobiernonmanta sumaj willaykunata mana jaykʼaj jina willamunanchej tiyan (Mar. 13:10). Chantapis yuyarikunanchej tiyan, sumaj willaykunata willashaspaqa Diosta jatunchananchej kasqanta. ¿Imaynatá chayta ruwasunman? Jehovaj kʼacha yanapayninraykulla mosoj pachapi bendicionesta japʼinanchejta, runasman willaspa.

18, 19. ¿Imaynatá Jehovaj kʼacha yanapayninta jatunchanchej?

¹⁸ Runasman Diosmanta willashaspa, Jesucristo kamachimushajtin wañuyninwan yanapachikuyta atisqankuta, pisimanta pisitaj juntʼa runaman tukunankuta ima sutʼincharisunman. Biblia nin: “Tukuy kay pachapis ismuypa atiyninmanta kacharichisqa kanqa, Diospa kacharichisqa wawasninwan khuska jatun kusiypi kanampaj”, nispa (Rom. 8:21). Kaytaj, Diospa kʼacha yanapayninraykulla kanqa.

¹⁹ Tukuyman imatachus Apocalipsis 21:4, 5 versiculospi nisqanta willayta atinchej. Chaypi nin: “[Diosqa] tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa. Jehová kamachina tiyanapi tiyashan, nintaj: “Noqa tukuy imata mosojyachini”, nispa. Nillarqataj: “Kayta qhelqay, imaraykuchus kay palabrasqa maychus kajpuni, cheqataj kanku”, nispa. Sonqo kʼajaywan kaymanta willamuspaqa, Jehovaj kʼacha yanapayninta jatunchanchej.