1, 2. Fa na apostel Paulus sori taki a ben de nanga tangi taki Gado sori en bun-ati?

NA APOSTEL Paulus ben kan taki nanga en heri ati: „A bun-ati di [Gado] sori mi no ben de fu soso.” (Leisi 1 Korentesma 15:9, 10.) Fosi Paulus ben frufolgu den Kresten. Sobun, a ben sabi heri bun taki a no fu di a ben wroko fu en noso fu di a ben frudini en meki Gado sori en bigi sari-ati.

² Syatu fosi Paulus dede, a skrifi Timoteyus: „Mi e taki Krestes Yesus, wi Masra, tangi. Na en gi mi krakti, fu di a si mi leki wan sma di e gi yesi na Gado ala ten. Dati meki a poti mi fu du wan wroko gi en” (1 Tim. 1:12-14). San ben de a wroko dati? Paulus taigi den owruman fu a gemeente na Efeise: „Mi no e si mi libi leki wan prenspari sani. A wan-enkri sani di mi wani na fu lon a streilon te na a kaba èn fu klari a wroko di Masra Yesus gi mi fu du. A wroko dati na fu preiki finifini fu a bun nyunsu taki Gado e sori sma bun-ati.”​—Tori 20:24.

3. Sortu spesrutu wroko Paulus ben kisi fu du? (Luku a prenki na a bigin fu na artikel.)

 ³ San na a „bun nyunsu” di Paulus ben preiki èn fa disi ben yepi sma fu si taki Gado sori den bun-ati? A taigi den Kresten na Efeise: „Unu yere taki mi kisi a frantwortu fu yepi unu, so taki Gado kan sori unu bun-ati” (Ef. 3:1, 2). Paulus ben kisi a wroko fu fruteri sma di no ben de Dyu a bun nyunsu taki den srefi ben kan kisi na okasi fu tiri makandra nanga Krestes na ini a Mesias Kownukondre. (Leisi Efeisesma 3:5-8.) Paulus, di ben e preiki a bun nyunsu fayafaya, na wan moi eksempre gi Kresten na ini a ten disi. A ben sori taki a no „fu soso” Gado ben sori en bun-ati.

4, 5. Fu san ede wi kan taki dati ’a bun nyunsu fu a Kownukondre’ na a srefi leki a bun nyunsu di e taki dati „Gado e sori sma bun-ati”?

⁴ Na ini a ten disi fu a kaba, a pipel fu Yehovah kisi a wroko fu preiki „a bun nyunsu disi fu a Kownukondre . . . na heri grontapu, so taki sma fu ala kondre kan yere dati, èn dan a kaba o kon” (Mat. 24:14). A boskopu disi di wi e fruteri sma na a srefi leki ’a bun nyunsu di e taki dati Gado e sori sma bun-ati’. Fu san ede wi kan taki dati? Fu di ala den blesi di wi e howpu fu kisi te a Kownukondre e tiri, o kon fu di Yehovah sori wi bun-ati nanga yepi fu Krestes (Ef. 1:3). Paulus ben de nanga tangi taki Yehovah sori en bun-ati èn dati meki a ben e preiki fayafaya. Wi e teki na eksempre fu Paulus?​—Leisi Romesma 1:14-16.

⁵ Na ini a tra artikel wi ben leri fa wi leki sondusma e kisi wini fu den difrenti fasi fa Yehovah sori sma bun-ati. Fu dati ede wi abi a frantwortu fu meki ala muiti fu fruteri sma fa Yehovah e sori a lobi fu en èn fa den kan kisi wini fu dati. Na sortu fasi wi kan yepi sma fu de nanga tangi taki Gado sori den bun-ati na difrenti fasi?

6, 7. Te wi e fruteri sma fu a lusu-paiman, dan fa wi e preiki a bun nyunsu taki Gado sori wi bun-ati?

⁶ Na ini a grontapu disi, sma no e kisi konsensi fonfon te den e du sondu. Dati meki furu sma no e si taki den abi a lusu-paiman fanowdu. Na a tra sei, moro nanga moro sma di e libi leki fa den srefi wani, kon si taki den no de koloku trutru. Furu sma no e frustan san na sondu, fa a abi krakti na wi tapu èn san wi musu du fu kon fri fu sondu. Ma na te den e taki nanga Yehovah Kotoigi, dan fosi den e kon frustan dati. Reti-ati sma breiti te den yere taki na fu di Yehovah abi bigi lobi èn a ben wani sori wi bun-ati, meki a seni en Manpikin kon na grontapu fu frulusu wi fu sondu nanga dede.​—1 Yoh. 4:9, 10.

⁷ Luku san Paulus taki fu Yehovah en lobi Manpikin: „Nanga yepi fu Yesus wi kon fri. A pai a lusu-paiman nanga a brudu fu en. Na so wi e kisi pardon fu wi sondu, bika Gado e sori wi bun-ati pasa marki” (Ef. 1:7). A frulusu-ofrandi fu Krestes na a moro bigi buweisi taki Gado lobi wi èn taki a sori wi bun-ati pasa marki. Wi e firi bun te wi kon sabi taki efu wi e bribi na ini a frulusu-ofrandi fu Yesus, wi o kisi pardon fu wi sondu èn wi o abi wan krin konsensi (Hebr. 9:14). Iya, disi na bun nyunsu di wi musu fruteri trawan!

8. Fu san ede sondu libisma musu kon bun baka nanga Gado?

⁸ Wi abi a frantwortu fu fruteri sma taki den kan tron wan mati fu a Mekiman fu den. Efu sma no e sori bribi na ini a frulusu-ofrandi fu Yesus, dan Gado e si den leki en feanti. Na apostel Yohanes ben skrifi: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yoh. 3:36). Ma wi breiti taki a frulusu-ofrandi fu Krestes meki taki sma kan kon bun baka nanga Gado. Paulus ben taki: „Iya, wan ten ben de taki unu no ben sabi Gado. Unu ben kon de feanti fu en, bika na soso ogri unu ben prakseri fu du. Ma now di Krestes dede fu gi en libisma skin leki ofrandi, Gado meki unu kon bun baka nanga en.”​—Kol. 1:21, 22.

9, 10. (a) Sortu frantwortu Krestes gi den salfu brada fu en? (b) Fa den „tra skapu” e yepi den salfu brada?

⁹ Paulus ben taki dati Krestes gi den salfu brada fu en di de na grontapu „a wroko fu fruteri sma fa den kan kon bun baka nanga [Gado]”. A ben taigi den salfu Kresten disi: ’Ala sani komoto fu Gado di meki wi kon bun baka nanga en nanga yepi fu Krestes. A gi wi a wroko fu fruteri sma fa den kan kon bun baka nanga en. Wi e fruteri sma taki Gado meki libisma kon bun baka nanga en nanga yepi fu Krestes èn taki a no hori den sondu fu den na prakseri. A gi wi a wroko fu fruteri sma fa den kan kon bun baka nanga en. Wi na boskopuman di e teki presi gi Krestes. Sobun, leki sma di e teki presi gi Krestes, wi e begi unu: „Kon bun baka nanga Gado.” A de neleki Gado e gebroiki wi fu begi unu disi.’​—2 Kor. 5:18-20.

¹⁰ Den „tra skapu” e si en leki wan grani fu yepi den salfu brada nanga a preikiwroko disi (Yoh. 10:16). Fu taki en leti, leki boskopuman fu Krestes den e du a moro bigi pisi fu a wroko fu leri sma a tru anbegi èn fu yepi den fu tron wan mati fu Yehovah. Disi na wan fu den prenspari sani di wi e du te wi e preiki finifini taki Gado e sori sma bun-ati.

11, 12. Fu san ede a de bun nyunsu gi sma te den yere taki den kan begi Yehovah?

¹¹ Furu sma e begi fu di a e meki den firi bun, ma den no e bribi trutru taki Gado e arki den begi fu den. Dati meki den musu kon sabi taki Gado na „a sma di e arki begi”. A psalm skrifiman David ben skrifi: „Yu na a sma di e arki begi. Na yu ala sortu sma o kon suku yepi. Den fowtu fu mi furu so te, taki mi no man tyari den. Na yu o tapu den sondu fu wi.”​—Ps. 65:2, 3.

¹² Yesus ben taigi den bakaman fu en: „Ala sani di unu e aksi na ini mi nen, mi o du” (Yoh. 14:14). Disi wani taki dati wi kan aksi Gado „ala sani”, solanga a e kruderi nanga a wani fu en. Yohanes e gi wi a dyaranti: „Wi sabi taki awansi san wi e aksi en, a e yere wi, solanga a e kruderi nanga a wani fu en” (1 Yoh. 5:14). A bun fu leri sma taki begi a no wan sani di e meki sma firi bun nomo, ma na wan moi fasi fa wi kan „go na fesi a kownusturu fu Gado di e sori wi bun-ati” (Hebr. 4:16). Te wi e leri den taki den musu begi na a yoisti fasi, taki den  musu begi a yoisti Gado èn taki den musu aksi den yoisti sani, dan wi kan yepi den fu kon moro krosibei na Yehovah èn fu kisi trowstu te den de na nowtu.​—Ps. 4:1; 145:18.

13, 14. (a) Sortu moi grani den salfu Kresten o kisi na ini a ten di e kon? (b) Sortu moi wroko den salfuwan o du gi libisma?

¹³ A no na ini na ogri grontapu disi nomo Yehovah o sori sma bun-ati, ma a o sori bun-ati tu na ini a nyun grontapu. Gado o gi den 144.000 salfu Kresten di o tiri makandra nanga Krestes na ini en hemel Kownukondre, wan moi grani. Paulus ben taki fu den: „Gado abi bun furu sari-ati èn a lobi wi trutru. Fu dati ede a meki wi kon na libi makandra nanga Krestes, aladi den fowtu fu wi ben meki wi de leki dede sma. Sobun, na bun-ati fu Gado meki unu kisi frulusu. Boiti dati, a meki wi alamala kon na libi èn a meki wi alamala teki presi na ini hemel, fu di wi de wán nanga Krestes Yesus. Dan a o sori wi bun-ati pasa marki na ini den ten di e kon, fu di a abi sari-ati nanga wi di de wán nanga Krestes Yesus.”​—Ef. 2:4-7.

¹⁴ Nownowde wi no man kaba frustan sortu moi sani Yehovah o du gi den salfu Kresten te den e sidon na tapu kownusturu fu tiri makandra nanga Krestes na ini hemel (Luk. 22:28-30; Fil. 3:20, 21; 1 Yoh. 3:2). Spesrutu gi den salfu Kresten disi, Yehovah ’o sori bun-ati pasa marki’. Den o de „a nyun Yerusalem” di de a trowmisi fu Krestes (Openb. 3:12; 17:14; 21:2, 9, 10). Makandra nanga Yesus, den o „dresi den pipel”. Den o meki taki sma di e gi yesi na Gado kon fri fu sondu nanga dede èn den o yepi den fu tron sma di no abi nowan fowtu.​—Leisi Openbaring 22:1, 2, 17.

15, 16. Fa Yehovah o sori den „tra skapu” bun-ati na ini a ten di e kon?

¹⁵ Na Efeisesma 2:7 wi e leisi taki „na ini den ten di e kon”, Gado o sori sma bun-ati. Wi kan de seiker taki den sma di o libi na ini a nyun grontapu fu Gado, o si fa „a o sori wi bun-ati pasa marki” (Luk. 18:29, 30). Wan fu den moro moi fasi fa Yehovah o sori a bun-ati fu en, na te a o wiki dedesma komoto fu a Grebi (Yob 14:13-15; Yoh. 5:28, 29). Reti-ati man nanga uma di dede fosi Krestes gi en libi leki wan ofrandi èn den „tra skapu” di dede na ini den lasti dei disi, o kon na libi baka fu kan dini Yehovah go doro.

¹⁶ Milyunmilyun sma di dede sondro fu sabi Gado, o kisi wan opobaka tu. Den o kisi na okasi fu teki Yehovah leki den Tiriman. Yohanes ben skrifi: „Mi si den dede sma, den heihei sma nanga den mofinawan, e tanapu na fesi a kownusturu èn bukulolo ben e opo. Ma wan tra bukulolo ben e opo tu. Disi na a buku fu libi. Den krutu den dede sma fu den sani di den du, soleki fa skrifi na ini den bukulolo. Dan a se lusu den dede sma di ben de na ini en èn dede nanga Grebi lusu den dede sma di ben de na ini den. Ne a krutu ibriwan fu den dede sma fu den sani di den du” (Openb. 20:12, 13). Ma den wan di kisi wan opobaka o abi fu leri fu du san Gado taki soleki fa a skrifi na ini Bijbel. Boiti dati, den o abi fu du den nyun sani tu di skrifi na ini „den bukulolo”. Den bukulolo disi o sori wi fa Yehovah wani taki sma musu libi na ini a nyun grontapu. Sobun, ete wan fasi fa Yehovah o sori wi  bun-ati na a ten dati, na taki a o meki wi kon sabi den nyun sani disi.

17. San wi musu hori na prakseri te wi e preiki a bun nyunsu?

¹⁷ Now di a kaba de so krosibei, a prenspari srefisrefi fu preiki a bun nyunsu fu a Kownukondre (Mark. 13:10). Soleki fa wi si, dan a bun nyunsu di wi e preiki e yepi sma fu si fa Yehovah e sori bun-ati. Na disi wi musu hori na prakseri te wi e du a preikiwroko. A moro prenspari sani fu san ede wi e preiki na fu di wi wani gi Yehovah grani. Wi kan du disi te wi e fruteri sma taki na a bun-ati fu Yehovah meki wi o man kisi ala den moi sani di a pramisi fu du na ini a nyun grontapu.

18, 19. Fa wi kan prèise Yehovah gi a bun-ati di a e sori sma?

¹⁸ Te wi e preiki gi sma, dan wi kan sori den taki te Krestes Kownukondre e tiri, libisma o kisi wini dorodoro fu a frulusu-ofrandi èn safrisafri den o tron sma di no abi nowan sondu moro. Bijbel e taki: „Den sani di Gado meki, kon fri fu wan skin di e dede. Na so den o kon fri na wan tumusi moi fasi leki pikin fu Gado” (Rom. 8:21). A wan-enkri fasi fa wi kan kisi den blesi disi, na fu di Yehovah sori wi bun-ati pasa marki.

¹⁹ Wi abi a grani fu fruteri iniwan sma di wani arki a moi sani disi di skrifi na Openbaring 21:4, 5: „[Gado] o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.” Dan Yehovah, a sma di e sidon na tapu a kownusturu, e taki: „Luku, mi e meki ala sani kon nyun.” A e taki tu: „Skrifi, bika den wortu disi tru èn sma kan bribi den.” Te wi e preiki a bun nyunsu disi fayafaya, dan wi e prèise Yehovah gi a bun-ati di a e sori sma.