1, 2. Ino mwaapostolo Paulo wakatondezya buti kuti wakalumba akaambo kaluzyalo lwa Leza?

MWAAPOSTOLO Paulo cakusyomeka wakati: “Luzyalo ndwaakandifwida [Leza] tiilwakaba lwabuyo pe.” (Amubale 1 Bakorinto 15:9, 10.) Paulo wakalizyi kabotu kuti tanaakali kweelela kutambula luse lupati lwa Leza, mbwaanga kaindi wakali sikupenzya Banakristo.

² Kumamanino aabuumi bwakwe, Paulo wakalembela mubelesinyina Timoteyo kuti: “Ndilamulumba Kristo Jesu Mwami wesu, ooyo wakandipa nguzu, nkaambo wakandibona kuti ndilasyomeka kwiinda mukundipa mulimo wakucita.” (1Tim. 1:12-14) Ino wakali mulimo nzi ooyu? Paulo wakaambila baalu bamumbungano yaku Efeso mulimo ooyu ncowakali kubikkilizya naakati: “Ibuumi bwangu tandibuboni kuti ncintu ciyandika kapati kulindime, ndiyandisya buyo kuti ndimanizye lweendo lwangu amulimo ooyu ngwaakandipa Mwami Jesu, iwakupa bumboni cakulomya kujatikizya  makani mabotu aaluzyalo lwa Leza.”—Mil. 20:24.

3. Ino mulimo nzi waalubazu Paulo ngwaakapegwa? (Amubone cifwanikiso icili kumatalikilo aacibalo.)

³ Ino ‘makani nzi mabotu’ mwaapostolo Paulo ngaakali kukambauka aakali kutondezya luzyalo lwa Jehova? Wakaambila Banakristo baku Efeso kuti: “Mwakamvwa makani aabubanzi bwaluzyalo lwa Leza mbondakapegwa akaambo kandinywe.” (Ef. 3:1, 2) Paulo wakaambilwa kumwaya makani mabotu kubantu batakali ba Juda kutegwa abalo bakabikkilizyigwe akati kabaabo ibaitwa kuti bakasangane a Kristo mumfwulumende ya Bwami bwabu Mesiya. (Amubale Baefeso 3:5-8.) Mbwaanga wakali musungu kubeleka mulimo ooyu, Paulo wakasiya citondezyo cibotu kapati ku Banakristo bamazuba aano alimwi wakatondezya kuti luzyalo Leza ndwaakatondezya kulinguwe ‘tiilwakaba lwabuyo pe.’

4, 5. Nkaambo nzi ncotukonzya kwaambila kuti “makani mabotu aa Bwami aaya” ncintu comwe buyo ‘amakani mabotu aaluzyalo lwa Leza’?

⁴ Muciindi eeci camamanino, bantu ba Jehova bakapegwa mulimo wakukambauka “makani mabotu aa Bwami aaya . . . munyika yoonse kuti bukabe bumboni kumasi oonse.” (Mt. 24:14) Alimwi mulumbe ooyu ngotumwaya, “makani mabotu aaluzyalo lwa Leza” akaambo kakuti zilongezyo zyoonse nzyotulangila kutambula mubulelo bwa Bwami zilaboola kulindiswe akaambo kaluzyalo lwa Jehova ilutondezyegwa kwiinda muli Kristo. (Ef. 1:3) Sena lwesu kutugama tulamwiiya Paulo mukutondezya kulumba kuluzyalo lwa Jehova kwiinda mukutola lubazu cabusungu mumulimo wakukambauka?—Amubale Baroma 1:14-16.

⁵ Mucibalo cainda, twakaiya mbotugwasyigwa aluzyalo lwa Jehova munzila zinji mbwaanga tuli basizibi. Aboobo tulijisi mukuli kubantu boonse wakusolekesya kusikila mpotugolela kubazyibya mbuli Jehova mbwali mukutondezya luyando lwakwe alimwi ambobakonzya kugwasyigwa lwabo beni. Ino nzibeela nzi zimwi zyaluzyalo lwa Leza nzyotweelede kugwasya bantu kuti babone mboziyandika?

6, 7. Ciindi notupandulwida bantu kujatikizya cinunuzyo, ino muunzila nzi motuli mukumwaya makani mabotu aaluzyalo lwa Leza?

⁶ Munyika eeyi bantu mobacita kufwumbwa ncobayanda, cibi tabaciboni kuba cintu ceelede kutantamukwa, cakuti bamwi tabazyi kuti tweelede kunununwa. Pesi bantu banji lino balibonena kuti, ikucita zintu kufwumbwa mbwayanda muntu takuleteli lukkomano lwini-lwini pe. Bunji bwabantu tabamvwisyi kuti naa cibi ninzi, mbocitujatikizya, alimwi ancotweelede kucita kutegwa tunununwe kubuzike bwacibi, mane kusikila babandika a Bakamboni ba Jehova kujatikizya makani aaya. Babombe myoyo balakatalusyigwa kuzyiba kuti Jehova, akaambo kaluyando lwakwe lupati alimwi aluzyalo lwakwe, wakatuma Mwanaakwe anyika kuti azyootununune kuzwa kucibi alimwi alufwu.—1Joh. 4:9, 10.

⁷ Naakali kwaamba kujatikizya Mwana wa Jehova uuyandwa kapati, Paulo wakalemba kuti: “Kwiinda mulinguwe twakaangununwa acinunuzyo cabulowa bwayooyo, inzya, ikulekelelwa kwamilandu yesu, akaambo kaluzyalo lwa Leza lunji kapati.” (Ef. 1:7) Cituuzyo cacinunuzyo ca Kristo ncitondezyo cipati kapati caluyando Leza ndwajisi kulindiswe alimwi citondezya mboluli lupati luzyalo lwakwe. Eelo kaka cilaumbulizya kuzyiba kuti, ikuti twaba alusyomo mubulowa lwa Jesu, zibi zyesu zilakonzya kulekelelwa alimwi inga twaba amanjezyeezya aasalala! (Heb. 9:14) Aaya  makani mabotu kapati ngotweelede kwaambila bamwi!

8. Ino nkaambo nzi bantu basizibi ncobeelede kuyanzana a Leza?

⁸ Tujisi mukuli wakuzyibya bantu kuti balakonzya kuba acilongwe a Mulengi wabo. Ciindi bantu nobatanatalika kusyoma mucituuzyo ca Jesu, Leza ubabona kuti mbaasikondonyina. Mwaapostolo Johane wakalemba kuti: “Ooyo uumusyoma Mwana ulaabuumi butamani; ooyo uutamuswiilili Mwana takabuboni buumi pe, pele bukali bwa Leza bulakkalilila aalinguwe.” (Joh. 3:36) Cikkomanisya ncakuti, cituuzyo ca Kristo cipa kuti bantu bacikonzye kuyanzana a Leza. Paulo wakati: “Nywebo nomwakazandukide kuli Leza alimwi nomwakali basinkondonyina akaambo kakuti mwakali kuyeeya buyo milimo mibi, lino wamuyanzanya amubili wanyama wayooyo kwiinda mulufwu lwakwe.”—Kol. 1:21, 22.

9, 10. (a) Ino mukuli nzi Kristo ngwaakapa banabokwabo ibananike? (b) Ino iba “mbelele zimbi” babagwasya buti banabokwabo ibananike?

⁹ Kristo wakapa banabokwabo ibananikidwe aanyika eeco Paulo ncaakaamba kuti “mulimo wakuyanzanya.” Ciindi naakali kupandulula makani aaya, Paulo wakalembela Banakristo bananike bamumwaanda wamyaka wakusaanguna kuti: “Zintu zyoonse zizwa kuli Leza, ooyo wakatuyanzanya kulinguwe mwini kwiinda muli Kristo akutupa mulimo wakuyanzanya, nkokuti kwiinda muli Kristo, Leza wakali kuyanzanya nyika kulinguwe mwini, katacibapi mulandu wazibi zyabo, alimwi wakatupa mulumbe waluyanzano oolu. Aboobo tuli baiminizi ibali mubusena bwa Kristo, cili mbuli kuti Leza ulakombelezya kwiinda mulindiswe. Mbotuli mubusena bwa Kristo tumulomba kuti: ‘Amuyanzane a Leza.’”—2Kor. 5:18-20.

¹⁰ Iba “mbelele zimbi” bacibona kuba coolwe kugwasya banabokwabo ibananikidwe mumulimo ooyu. (Joh. 10:16) Mbwaanga balabeleka kabali baiminizi ba Kristo, bajisi cibeela cipati mukuyiisya bantu kasimpe kakumuuya alimwi akubagwasya kuba acilongwe a Jehova. Eeci ncibeela ciyandika kapati camulimo iwakupa bumboni cakulomya kujatikizya makani mabotu aaluzyalo lwa Leza.

11, 12. Nkaambo nzi ncaali makani mabotu kuzyiba kuti bantu balakonzya kupaila kuli Jehova?

¹¹ Bantu banji balapaila nkaambo kucita boobo kubapa kulimvwa kabotu, pele tabasyomi ncobeni kuti Leza ulaiswiilila mipailo yabo. Beelede kuzyiba kuti Jehova ngu ‘Sikuswiilila mipailo.’ Sintembauzyo Davida wakalemba kuti: “Yebo Ooswiilila mipailo, bantu bamisyobo yoonse bayooboola kulinduwe. Zinyonyoono zyangu zyandivwulila kapati, pele yebo ulazivwumba nsotoko zyesu.”—Int. 65:2, 3.

¹² Jesu wakaambila basikwiiya bakwe kuti: “Ikuti mwalomba cili coonse muzina lyangu, ndiyoocicita.” (Joh. 14:14) Cakutadooneka, majwi aakuti “cili coonse,” aamba cintu cili coonse iceendelana akuyanda kwa Jehova. Johane utusyomezya kuti: “Oolu ndolusyomo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.” (1Joh. 5:14) Eelo kaka cilakkomanisya kuyiisya bantu makani aaya, aakuti mupailo taluli buyo lugwasyo lwamumizeezo, pele ninzila mbotu kapati yakusikila Jehova ‘kucuuno cabwami caluzyalo lwakwe’! (Heb. 4:16) Kwiinda mukubayiisya kupaila munzila yeelede, kupaila kumuntu weelede, alimwi akupailila zintu zyeelede, tulakonzya  kubagwasya kuti babe balongwe ba Jehova alimwi akuumbulizyigwa muziindi zyamapenzi.—Int. 4:1; 145:18.

13, 14. (a) Ino nzyoolwe nzi zitaliboteli kapati nzyobayoopegwa bananike kumbele? (b) Ino mulimo nzi mubotu kapati bananike ngobayoocitila bantu?

¹³ Luzyalo lwa Jehova luyoozumanana kubako bweende bwazintu bubyaabi oobu bwakumana. Naakali kwaamba kujatikizya coolwe cilibedelede Leza ncaakapa ba 144,000, ibaitwa kuyoolela a Kristo mu Bwami bwakwe bwakujulu, Paulo wakalemba kuti: “Leza ulaaluse kapati, akaambo kaluyando lwakwe lupati ndwajisi kulindiswe, wakatupa buumi antoomwe a Kristo, noliba leelyo notwakafwide mumilandu—nkaambo mubwini mwafwutulwa aluzyalo lwa Leza. Kunze lyaboobo, wakatubusya antoomwe anguwe akutukkazika antoomwe anguwe mumasena aakujulu katukamantene a Kristo Jesu, kutegwa mubweende bwazintu bwiindene-indene ibuboola Leza akatondezye luzyalo lwakwe luzwide zintu zibotu zitalivwulili kwiinda mukututondezya lubomba lwakwe swebo notukamantene a Kristo Jesu.”—Ef. 2:4-7.

¹⁴ Nciyumu ikweezyeezya zintu zibotu Jehova nzyababambilide Banakristo bananike ciindi baakukkala azyuuno zyabwami kuti balele antoomwe a Kristo kujulu. (Lk. 22:28-30; Flp. 3:20, 21; 1Joh. 3:2) Kujatikizya mbabo, Jehova ‘uyootondezya luzyalo lwakwe luzwide zintu zibotu zitalivwulili.’ Mbambabo ibayooba “Jerusalemu Mupya,” nabwiinga wa Kristo. (Ciy. 3:12; 17:14; 21:2, 9, 10) Bayoobelekela antoomwe a Jesu “kuponya masi,” akusololela bantu bamvwida kububambe ibuyoobapa kuti baangununwe kubuzike bwacibi, lufwu alimwi akubagwasya kuti balondoke.—Amubale Ciyubunuzyo 22:1, 2, 17.

15, 16. Ino mbuti Jehova kumbele mbwatiikatondezye luzyalo lwakwe ‘kumbelele zimbi’?

¹⁵ Kulugwalo lwa Baefeso 2:7, tubala kuti luzyalo lwa Leza luyootondezyegwa “mubweende bwazintu bwiindene-indene ibuboola.” Cakutadooneka, mubweende bwazintu bupya ibwa Jehova anyika kuyooba “luzyalo lwakwe luzwide zintu zibotu zitalivwulili.” (Lk. 18:29, 30) Cimwi cacitondezyo cipati caluzyalo lwa Jehova ilutaliboteli iciyoocitika anyika, mbubuke bwabantu kuzwa ‘muzyuumbwe.’ (Job. 14:13-15; Joh. 5:28, 29) Baalumi abamakaintu basyomeka bansiku ibakafwa kacitanapegwa cipaizyo calufwu lwa Kristo, kubikkilizya abaabo boonse “bambele zimbi” ibafwa cakusyomeka muziindi eezyi zyamamanino, bayoobusyigwa kutegwa bakazumanane kumubelekela Jehova.

¹⁶ Mamiliyoni aabantu ibakafwa kabatamuzyi Leza, abalo bayoobusyigwa. Bayoopegwa coolwe cakulibombya kubweendelezi bwa Jehova. Johane wakalemba kuti: “Ndakabona bafwu, ibapati abaniini, kabaimvwi kumbele lyacuuno cabwami, eelyo mabbuku aakuvwunga akavwungululwa. Pele ibbuku lyakuvwunga limbi lyakavwungululwa; eeli ndibbuku lyabuumi. Mpoonya bafwu bakabetekwa kweelana azintu eezyo zilembedwe mumabbuku aakuvwunga aayo, kweelana amilimo yabo. Lino lwizi lwakabaleka bafwu ibakali mulindulo, alwalo lufwu a Cuumbwe zyakabaleka bafwu ibakali mulinzizyo, eelyo aaba bakabetekwa umwi aumwi kweelana amilimo yakwe.” (Ciy. 20:12, 13) Bwini mbwakuti, aabo ibayoobusyigwa bayooyandika kwiiya mbobeelede kutobela njiisyo zya Leza izijanika mu Bbaibbele. Kuyungizya waawo, bayooyandika kutobela malailile mapya aagwasya aanooli “mumabbuku aakuvwunga” aanootondezya zyeelelo zya Jehova iziyandika kutegwa muntu azumanane kupona mubweende  bwazintu bupya. Kuyubununwa kwazintu iziyoojanika mumabbuku aakuvwunga aaya cinooli citondezyo acimbi caluzyalo lwa Jehova.

17. Ino ncinzi ncotweelede kuyeeya ciindi notutola lubazu mumulimo wakukambauka?

¹⁷ Mamanino mbwaayaabuswena, mulimo wesu ngwakukambuka makani mabotu aa Bwami, akuzumanana kucita boobo kwiinda lyoonse. (Mk. 13:10) Cakutadooneka, makani mabotu atondezya luzyalo lwa Jehova. Tweelede kwaayeeya makani aaya ciindi notutola lubazu mumulimo wakukambauka. Makanze eesu twanookambauka ngakulemeka Jehova. Tulakonzya kucita oobu kwiinda mukutondezya bantu kuti zisyomezyo zyoonse kujatikizya zilongezyo zyanyika mpya, ninzila Jehova mwatondezya luzyalo lwakwe lutaliboteli.

18, 19. Ino mbuti mbotumutembaula Jehova akaambo kaluzyalo lwakwe?

¹⁸ Ciindi notukambaukila bamwi, tulakonzya kupandulula kuti mubulelo bwa Bwami bwa Kristo, bantu bayoogwasyigwa cakumaninina acituuzyo cacinunuzyo alimwi banooyaabulondoka asyoonto-syoonto. Bbaibbele lyaamba kuti: “Zilenge azyalo ziyakwaangununwa kubuzike bwakubola akuba alwaanguluko lwabulemu bwabana ba Leza.” (Rom. 8:21) Eeci ciyookonzyeka buyo kwiinda muluzyalo lwa Jehova lulibedelede.

¹⁹ Tulijisi coolwe cipati cakubandika abantu ibayanda kuswiilila kucisyomezyo ncotujana kulugwalo lwa Ciyubunuzyo 21:4, 5 ilwaamba kuti: “[Leza] uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.” Mpoonya Jehova, ooyo uukkede acuuno cabwami waamba kuti: “Amubone! Ndilengulula zintu zyoonse kuti zibe zipya.” Alimwi, waamba kuti: “Kolemba, nkaambo majwi aaya alasyomeka alimwi ngamasimpe.” Ciindi notubakambaukila bamwi makani mabotu aaya cabusungu, ncobeni tutembaula Jehova akaambo kaluzyalo lwakwe!