1, 2. ¿Baʼax tu beetaj apóstol Pablo yoʼolal le nojoch utsil eʼesaʼab tiʼoʼ?

APÓSTOL Pabloeʼ yéetel u jaajil u yóol tu yaʼalaj: «Maʼ chéen kunel úuchik u yeʼesikten [Jéeoba] u nojoch utsiliʼ» (xok 1 Corintoiloʼob 15:9, 10). Pabloeʼ u yojel kaʼacheʼ maʼ tu náajmatik ka chʼaʼabak óotsilil tiʼ tumen Jéeoba, tumen letiʼeʼ ku chʼaʼpachtik kaʼach le máaxoʼob meyajtik Diosoʼ.

² Le maʼ yaʼab tiempo u bin u kíimiloʼ, Pabloeʼ tu tsʼíibtaj tiʼ Timoteo: «Kin tsʼáaik u diosboʼotikil tiʼ Cristo Jesús k-Yuumtsil, máax tu tsʼáajten páajtalil; tumen tu yilaj chúukaʼan in wóoleʼ tu kʼubéentajten junpʼéel meyaj» (1 Tim. 1:12-14). ¿Máakalmáak le meyaj kʼubéentaʼab tiʼaʼ? Pabloeʼ tu yaʼalaj tiʼ le ancianoʼob yanoʼob Éfesooʼ: «Maʼatech in wilik in kuxtal bey jach nojoch baʼaleʼ, utiaʼal ka páajchajak in kʼuchul tu xuul le bej tsʼaʼan in wáalkabtoʼ yéetel in tsʼoʼokbesik le meyaj tu tsʼáajten Yuumtsil Jesusoʼ: in chúukaʼan  kʼaʼaytik u maʼalob péektsilil u nojoch utsil Dios» (Bax. 20:24).

3. ¿Baʼax jatsʼuts meyajil tsʼaʼab tiʼ Pablo? (Ilawil le dibujo yaan tu káajbal le xookaʼ.)

³ ¿Baʼax le u maʼalob péektsilil u yutsil Dios tu kʼaʼaytaj le apóstol Pablooʼ? Letiʼeʼ tu yaʼalaj tiʼ le cristianoʼob yanoʼob Éfesooʼ: «Tsʼoʼok a wuʼuyikeʼex u tsikbaltaʼal tsʼaʼaben in beet in j-kanan ayikʼalil utiaʼal ka in weʼesteʼex u nojoch utsil Dios» (Efe. 3:1, 2). Jesuseʼ tu yaʼalaj tiʼ le apóstol Pablo ka u kʼaʼayt le maʼalob péektsil tiʼ le máaxoʼob maʼ judíoʼoboʼ utiaʼal ka béeyak u binoʼob xan gobernar yéetel Jesús teʼ kaʼanoʼ (xok Efesoiloʼob 3:5-8). Pabloeʼ jach tu tsʼáaj u yóol kʼaʼaytaj yéetel tu pʼatajtoʼon junpʼéel jach maʼalob ejemplo. Letiʼeʼ tu yeʼesaj yéetel u kuxtaleʼ «maʼ chéen kunel» úuchik u yeʼesaʼal tiʼ tumen Dios u nojoch utsiliʼ.

4, 5. ¿Baʼaxten k-aʼalik le ‹u maʼalob péektsilil le Reinooʼ› láayliʼ letiʼe ‹u maʼalob péektsilil u nojoch utsil Diosoʼ›?

⁴ Teʼ kʼiinoʼobaʼ tiʼ toʼoneʼ tsʼoʼok xan u yaʼalaʼal ka k-kʼaʼayt «u maʼalob péektsilil le Reino [...] tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob[oʼ]» (Mat. 24:14). Le baʼax k-kʼaʼaytikaʼ láayliʼ letiʼe «u maʼalob péektsilil u nojoch utsil Dios[oʼ]». ¿Baʼaxten k-aʼalikaʼ lelaʼ? Tumen tuláakal le bendicionoʼob ken u taas le Reinooʼ chéen ku béeytaloʼob yoʼolal u nojoch utsil Dios (Efe. 1:3). Pabloeʼ utiaʼal u yeʼesik tiʼ Dios jach ku tsʼáaik u graciasil tiʼ yoʼolal u nojoch utsileʼ jach tu tsʼáaj u yóol kʼaʼaytaj. ¿Kux túun toʼon táan wa k-beetik jeʼex Pabloeʼ? (Xok Romailoʼob 1:14-16.)

⁵ Teʼ xook máanikoʼ t-kaneʼ kex j-kʼebanoʼoneʼ yaʼab baʼaxoʼob k-kʼamik yoʼolal u nojoch utsil Dios. Lelaʼ unaj u péeksikoʼon k-kaʼans tiʼ uláakʼ máakoʼob bix u yeʼesik yaabilaj Jéeoba yéetel baʼax unaj u beetkoʼob utiaʼal ka yaabiltaʼakoʼob xan tumen Dios. ¿Baʼax unaj k-kʼaʼaytik tiʼ le máakoʼob utiaʼal ka u tsʼáaʼob xan u graciasil tiʼ Dios yoʼolal u nojoch utsiloʼ?

6, 7. ¿Bix k-eʼesik u nojoch utsil Dios ken k-kʼaʼayt u kuxtal Jesús tu kʼuboʼ?

⁶ Teʼ kʼiinoʼobaʼ yaʼab máakoʼobeʼ maʼ jelaʼan u yilik u kʼebantaloʼobiʼ. Le oʼolal maʼ tu naʼatkoʼob u kʼaʼanaʼanil u kuxtal Jesús tu tsʼáajoʼ. Chéen baʼaleʼ yaan xan uláakʼ máakoʼobeʼ maʼ kiʼimak u yóoloʼob yéetel le bix u kuxtaloʼoboʼ. Yaʼab tiʼ le máakoʼoboʼ hasta u tsikbaloʼob yéetel u j-jaajkunajoʼob Jéeobaeʼ ku kʼuchul u naʼatoʼob baʼax le kʼebanoʼ, bix u kʼaskúuntik u kuxtal máak yéetel baʼax unaj u beetkoʼob utiaʼal ka xuʼuluk u palitsiltaʼaloʼob tumen le kʼebanoʼ. Le máaxoʼob uts u puksiʼikʼaloʼoboʼ ken u naʼatoʼob baʼax le kʼebanoʼ ku tsʼáaikoʼob gracias tiʼ Jéeoba úuchik u túuxtik u Hijo utiaʼal ka u jáalkʼabtoʼon tiʼ le kʼeban yéetel tiʼ le kíimiloʼ. Ku kʼuchul u naʼatoʼob xaneʼ lelaʼ ku béeytal yoʼolal u yaabilaj yéetel u nojoch utsil Dios (1 Juan 4:9, 10).

⁷ Le ka tʼaanaj Pablo tu yoʼolal Jesús, u Hijo Jéeobaeʼ, tu yaʼalaj: «Tumen yaʼab u yeʼesik xan u nojoch utsileʼ, tsʼoʼok u boʼotik k-jáalkʼabtaʼal yéetel u kʼiʼikʼel u Paal, jach beyoʼ, tu yoʼolal xan lelaʼ tsʼoʼok u perdonartaʼal k-kʼebanoʼob» (Efe. 1:7). Le u kuxtal Jesús tu kʼuboʼ ku chíikbesik u nojoch yaabilaj yéetel bukaʼaj u nojoch utsil Dios. Jach ku líiʼsik k-óol k-ojéeltik wa k-tsʼáaik k-fe tiʼ u kuxtal Jesús tu kʼuboʼ, jeʼel u perdonartaʼal k-kʼebanoʼobeʼ yéetel jeʼel u yantaltoʼon junpʼéel maʼalob conciencia tu táan Jéeobaeʼ (Heb. 9:14). ¿Máasaʼ lelaʼ junpʼéel baʼax jach maʼalob ka k-tsʼáa u yojéelt u maasil?

8. ¿Baʼaxten unaj u tsʼáaik u fe le máakoʼob tiʼ u kuxtal Jesús tu kʼuboʼ?

⁸ Wa le máakoʼob maʼ tu tsʼáaikoʼob fe tiʼ u kuxtal Jesús tu kʼuboʼ, Jéeobaeʼ ku yilkoʼob bey u enemigoʼobeʼ. Le apóstol Juanoʼ tu tsʼíibtaj: «Le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ, le máax maʼ tu yuʼubik u tʼaan le Paaloʼ maʼ ken u yil le kuxtaloʼ, baʼaxeʼ u pʼujaʼanil Dios kun pʼáatal tu yóokʼol» (Juan 3:36). ¿Máasaʼ jach ku kiʼimakkúuntik k-óol k-ojéeltik jeʼel u páajtal k-amigotik Dios yoʼolal u kuxtal Jesús tu kʼuboʼ? Pabloeʼ tu yaʼalaj: «Teʼexeʼ náach yanileʼex kaʼach tiʼ Dios yéetel u enemigoʼex tumen chʼiikil a tuukuleʼex kaʼach tiʼ le baʼaloʼob kʼaastakoʼ; baʼaleʼ beoraaʼ Dioseʼ tsʼoʼok u beetik a kaʼa biskabaʼex tu yéetel tu yoʼolal u luʼumkabil wíinklil le máax kíimoʼ» (Col. 1:21, 22).

9, 10. 1) ¿Baʼax meyajil tu kʼubéentaj Jesús tiʼ le yéeyaʼanoʼoboʼ? 2) Le uláakʼ tamanoʼoboʼ, ¿bix u yáantik le sukuʼunoʼob yéeyaʼanoʼoboʼ?

⁹ Jesucristoeʼ tsʼoʼok u kʼubéentik tiʼ le sukuʼunoʼob yéeyaʼanoʼob ka u kʼaʼaytoʼob u maʼalob péektsilil «u kaʼa biskuba máak tu yéetel» Dios. Le apóstol Pablooʼ tu yaʼalaj tiʼ le sukuʼunoʼob yéeyaʼanoʼob teʼ yáax siglooʼ: «Tiʼ Dios u taal tuláakal baʼal; tu yoʼolal Cristoeʼ, letiʼeʼ tsʼoʼok u yáantkoʼon k-kaʼa bisba tu yéetel, tsʼoʼok xan u kʼubéentiktoʼon u meeyjil u kaʼa biskuba máak tu yéetel. Leloʼ u kʼáat u yaʼaleʼ Dioseʼ, tu yoʼolal Cristoeʼ, táan u kaxtik ka u kaʼa bisuba tuláakal wíinik tu yéetel; letiʼeʼ maʼ tu chʼaʼaj en cuenta le baʼaxoʼob kʼaastak u beetmoʼob tu contraoʼ, yéetel tsʼoʼok u kʼubéentiktoʼon ka k-kʼaʼayt u péektsilil u kaʼa biskuba máak tu yéetel. Le oʼolaleʼ, toʼoneʼ túuxtaʼanoʼon tʼaan tu kʼaabaʼ Cristo, u kʼáat u yaʼaleʼ bey Dios ku kʼáat óolal tiʼ le máakoʼob yéetel k-chiʼoʼ. Tumen túuxtaʼanoʼon tʼaan tu kʼaabaʼ Cristoeʼ táan k-kʼáat óoltik: ‹Bisabaʼex tu kaʼatéen yéetel Dios›» (2 Cor. 5:18-20).

¹⁰ Le «uláakʼ tamanoʼob[oʼ]» ku yilkoʼob bey junpʼéel nojoch privilegio u yáantkoʼob kʼaʼaytaj le sukuʼunoʼob yéeyaʼanoʼoboʼ (Juan 10:16). Le uláakʼ tamanoʼob ku tʼaanoʼob tu kʼaabaʼ Cristoaʼ táan u beetkoʼob u maas yaʼabil le kʼaʼaytajaʼ yéetel táan u yáantkoʼob le máakoʼob u kanoʼob u jaajiloʼ yéetel bix jeʼel u kaʼa biskubaʼob yéetel Dioseʼ. Lelaʼ junpʼéel bix u chúukaʼan kʼaʼaytaʼal u maʼalob péektsilil u nojoch utsil Dios.

11, 12. Ichil k-kʼaʼaytik le maʼalob péektsiloʼ, ¿baʼaxten táakaʼan k-kaʼansik tiʼ le máakoʼob bix unaj u oraroʼoboʼ?

¹¹ Yaʼab máakoʼobeʼ ku oraroʼob tumen ken tsʼoʼokkeʼ ku yuʼubikubaʼob maas maʼalobil, pero u jaajileʼ maʼatech u creertikoʼob wa jach tu jaajil ku yuʼubik Dios u oracionoʼob. Le oʼolal unaj k-kaʼansiktiʼobeʼ Jéeobaeʼ ku yuʼubik k-oración. Davideʼ tu tsʼíibtaj: «[¡]Tumen ka wuʼuyik [k-oración]! Tuláakal yóokʼol kaab ku taal tiʼ teech. K-kʼasaʼaniloʼobeʼ ku tsʼáanchaʼatikoʼon, baʼaleʼ techeʼ ka [perdonartik] le kʼebanoʼoboʼ» (Sal. 65:2, 3).

¹² Jesuseʼ tu yaʼalaj tiʼ u disipuloʼob: «Wa ka kʼáatkeʼex wa baʼax tiʼ le Taataoʼ letiʼeʼ yaan u tsʼáaikteʼex tin kʼaabaʼ» (Juan 16:23). Yéetel le tʼaanoʼobaʼ Jesuseʼ tu tsʼáaj naʼatbileʼ wa le baʼax k-kʼáatik yaan yil yéetel baʼax uts tu tʼaan Dioseʼ letiʼeʼ yaan u yuʼubik k-oración. Apóstol Juaneʼ tu yaʼalaj: «Toʼoneʼ k-kʼubmaj k-óol tiʼ Dioseʼ de ke jeʼel baʼalak ka k-kʼáattiʼ jeʼex uts tu tʼaaneʼ, letiʼeʼ yaan u yuʼubik» (1 Juan 5:14). Toʼoneʼ jach kiʼimak k-óol ikil k-tsʼáaik u yojéelt le máakoʼoboʼ le oracionoʼ maʼ chéen junpʼéel baʼal ku tsʼáaik jeetsʼelil tiʼ máakiʼ, baʼaxeʼ junpʼéel baʼax ku yáantkoʼon utiaʼal k-natsʼikba «tiʼ u trono Dios, le máax eʼesik nojoch utsil tiʼ máakoʼ» (Heb. 4:16).  Ken k-kaʼans tiʼ le máakoʼob bix unaj u oraroʼob, tiʼ máax unaj u oraroʼob yéetel baʼax unaj u kʼáatkoʼob ken orarnakoʼobeʼ, k-áantkoʼob u amigotoʼob Jéeoba yéetel utiaʼal ka líikʼik u yóoloʼob ken yanaktiʼob problemaʼob (Sal. 4:1; 145:18).

13, 14. 1) ¿Baʼax jatsʼuts privilegioil kun antal tiʼ le yéeyaʼanoʼob maʼ kun xáantaloʼ? 2) ¿Tiʼ baʼax kun áantaj le yéeyaʼanoʼoboʼ?

¹³ Jéeobaeʼ maas yaan u yeʼesik u nojoch utsil teʼ túumben luʼumoʼ. ¿Bix ken u beetil? Letiʼeʼ yaan u tsʼáaik tiʼ le 144,000 kun binoʼob teʼ kaʼan junpʼéel jatsʼuts privilegiooʼ. Le ka tʼaanaj tiʼ lelaʼ le apóstol Pablooʼ tu yaʼalaj: «Dioseʼ jach nojoch u chʼaʼ óotsilal, yéetel tumen jach nojoch le yaabilaj tu yeʼesajtoʼonoʼ, tu kuxkíintoʼon junmúuchʼ yéetel Cristo kex kimenoʼon kaʼach tu yoʼolal k-siʼipiloʼob (teʼexeʼ yoʼolal nojoch utsil salvartaʼabeʼex). Baʼaleʼ maʼ chéen leloʼ, Dioseʼ tu múuchʼ líiʼsoʼon yéetel tu múuchʼ kukíintoʼon teʼ kaʼanilbeʼen kúuchiloʼob junmúuchʼ yéetel Cristo Jesusoʼ, beyoʼ teʼ yóokʼol kaab kun taaloʼ yaan u yeʼesiktoʼon u píitmáanjaʼan nojoch utsil tu yoʼolal le utsul modos tu yeʼesajtoʼon junmúuchʼ yéetel Cristo Jesusoʼ» (Efe. 2:4-7).

¹⁴ Maʼ xaaneʼ maʼ tu páajtal k-tuukul tiʼ le bukaʼaj baʼaxoʼob u preparartmaj Jéeoba tiʼ le máaxoʼob yéeyaʼanoʼob utiaʼal u binoʼob reinar yéetel Jesús teʼ kaʼanoʼ (Luc. 22:28-30; Fili. 3:20, 21; 1 Juan 3:2). Tiʼ le máaxoʼob yéeyaʼanoʼoboʼ Jéeobaeʼ ‹yaan u yeʼesik u píitmáanjaʼan nojoch utsil›. Letiʼobeʼ yaan u táakpajloʼob teʼ «túumben Jerusalén» ku keʼetel yéetel u novia Cristooʼ (Apo. 3:12; 17:14; 21:2, 9, 10). Letiʼobeʼ yaan xan u táakpajloʼob yéetel Jesús «utiaʼal u tsʼaʼakal u kajnáaliloʼob le luʼumoʼoboʼ». Yaan u yáantkoʼob Jesús utiaʼal u jáalkʼabtik máak tiʼ le kʼeban yéetel tiʼ le kíimiloʼ, beyoʼ tuláakal máak yaan u pʼáatal perfectoil (xok Apocalipsis 22:1, 2, 17).

15, 16. ¿Bix ken u yeʼesil u nojoch utsil Jéeoba tiʼ le «uláakʼ tamanoʼob[oʼ]»?

¹⁵ Efesoiloʼob 2:7, ku yaʼalikeʼ «teʼ yóokʼol kaab kun taaloʼ» Dioseʼ yaan u yeʼesik u nojoch utsil. Ku yaʼalik xaneʼ teʼ kʼiinoʼob jeʼeloʼ tuláakal le máaxoʼob kun antaloʼob way Luʼum kun ilik «u píitmáanjaʼan nojoch utsil» Diosoʼ (Luc. 18:29, 30). Junpʼéel bix ken u yeʼesil Jéeoba u nojoch utsiloʼ letiʼe ken u kaʼa líiʼs le máaxoʼob yanoʼob «tu tsʼuʼ le luʼum» wa le máaxoʼob kimenoʼoboʼ (Job 14:13-15; Juan 5:28, 29). ¿Máaxoʼob kun kaʼa kuxkíintbiloʼob? Letiʼe xiiboʼob yéetel koʼoleloʼob kíimoʼob antes u kʼubik u kuxtal Jesusoʼ bey xan le «uláakʼ tamanoʼob» chúukpaj u yóoloʼob yéetel kíimoʼob teʼ tu tsʼook kʼiinoʼobaʼ. Le kaʼa jaats máakoʼobaʼ yaan u kaʼa kuxkíintaʼaloʼob utiaʼal u seguer u meyajtikoʼob Jéeoba.

¹⁶ Yaan xan u kaʼa kuxkíintaʼal u millonesil máakoʼob maʼ béeychaj u kʼaj óoltikoʼob Jéeoba antes u kíimloʼobiʼ. Le apóstol Juanoʼ tu yaʼalaj: «Le máaxoʼob kimenoʼob kaʼachoʼ, le nuuktakoʼoboʼ bey xan le mejentakoʼoboʼ, tin wilaj waʼalakbaloʼob tu táan le tronooʼ, ka chóolaʼab le rolloʼoboʼ. Baʼaleʼ chóolaʼab uláakʼ rollo, u rolloil le kuxtaloʼ. Le kimenoʼob túunoʼ juzgartaʼaboʼob tu yoʼolal le baʼax tu beetoʼoboʼ, jeʼex tsʼíibtaʼanil teʼ rolloʼoboʼ. Le kʼáaʼnáab xanoʼ tu kʼubaj le kimenoʼob yaan ichiloʼ; le kíimil yéetel le Muknaloʼ tu kʼuboʼob xan le kimenoʼob yaan ichiloʼoboʼ. Ka juzgartaʼab cada juntúul máak tu yoʼolal le baʼax tu beetoʼ» (Apo. 20:12, 13). Le máaxoʼob kun kaʼa kuxkíintbiloʼobaʼ yaan u béeytal u kaanbaloʼob tiʼ Jéeoba yéetel u yantaloʼob yáanal u gobernación. Letiʼobeʼ yaan u béeytal u kaanbaloʼob yéetel u beetkoʼob baʼax ku yaʼalik le Bibliaoʼ bey xan le baʼax ken u yaʼal le túumben «rolloʼoboʼ».  Tuláakal le baʼax ken u yaʼal le rolloʼobaʼ junpʼéel bix ken u yeʼesil Jéeoba u nojoch utsil tiʼ toʼon.

17. ¿Baʼax unaj k-chaʼik en cuenta ken kʼaʼaytajnakoʼon?

¹⁷ Bejlaʼeʼ maas kʼaʼabéet k-kʼaʼaytik le baʼaxoʼob ken u beet le Reinooʼ tumen tsʼoʼok u jach náatsʼal le xuʼulsajiloʼ (Mar. 13:10). Maʼ unaj u tuʼubultoʼoneʼ le baʼax k-kaxtik ken kʼaʼaytajnakoʼoneʼ letiʼe k-beetik u nojbeʼenkúuntaʼal Jéeobaoʼ. ¿Bix k-beetik lelaʼ? Letiʼe ken k-aʼal tiʼ tuláakal le máakoʼob teʼ kʼaʼaytaj de ke tuláakal le baʼaxoʼob jatsʼutstak kun antaltoʼon teʼ túumben yóokʼol kaaboʼ, chéen yaan u béeytal yoʼolal u nojoch utsil Jéeoba.

18, 19. ¿Bix k-eʼesik nojbaʼal k-ilik u nojoch utsil Jéeoba?

¹⁸ Ken kʼaʼaytajnakoʼoneʼ jeʼel u páajtal k-tsolik tiʼ le máakoʼoboʼ tu yáanal u Reino Dios nuʼuktaʼan tumen Cristoeʼ tuláakal máak ken u kʼam le utsiloʼob tu taasaj u kuxtal Jesús tu kʼuboʼ. Tsʼoʼoleʼ jujunpʼíitil kun bin u pʼáatal minaʼan u kʼebanoʼob. Le Bibliaoʼ ku yaʼalik: «Le baʼaloʼob beetaʼanoʼoboʼ maʼ kun seguer u palitsiltaʼaloʼob tumen le kʼeban yéetel le kíimiloʼ, baʼaxeʼ yaan u yantaltiʼob u kiʼichkelem jáalkʼabtajil u paalal Dios» (Rom. 8:21). Le bendicionoʼobaʼ chéen yaan u béeytaloʼob yoʼolal u nojoch utsil Jéeoba.

¹⁹ Yaantoʼon u jatsʼuts privilegioil k-aʼalik tiʼ le máakoʼob u jatsʼuts promesa Dios yaan teʼ Apocalipsis 21:4 yéetel 5: «Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob». Jéeoba, le Máax kulukbal teʼ trono xanoʼ, tu yaʼalaj: «¡Ile!, yaan in túumbenkuntik tuláakal baʼal». Ku yaʼalik xan: «Tsʼíibte, tumen le tʼaanoʼobaʼ jaajtak yéetel jach yaan u béeytaloʼob». Wa ku chúukpajal k-óol k-tsikbalt le jatsʼuts baʼaxoʼob ken u beet Jéeobaoʼ yaan k-eʼesik nojbaʼal k-ilik u nojoch utsil.