1. Mɛni slɔɔto ngɛ níhi nɛ wa hia kɛ níhi nɛ wa suɔ ɔ a kpɛti?

A PƆƆ demi ke, níhi bɔɔ ko pɛ nɛ adesa hia ngɛ si himi, se adesa suɔ níhi fuu. E ngɛ kaa nɔ́ nɛ nihi fuu li slɔɔto nɛ ngɛ he lo nya níhi nɛ a hia kɛ níhi nɛ a suɔ ɔ a kpɛti. Mɛni slɔɔto ngɛ níhi nɛ wa hia kɛ níhi nɛ wa suɔ ɔ a kpɛti? “Níhi nɛ o hia” a ji níhi nɛ e sa kaa o nine nɛ su nɔ konɛ o nyɛ nɛ o hi wami mi. Ní nɛ ɔmɛ ekomɛ ji niye ní, heha nɔ́, kɛ hwɔ he. “Níhi nɛ o suɔ” ɔ ji níhi nɛ o bua maa jɔ kaa o nine nɛ su nɔ, se tsa pi jamɛ a ní ɔmɛ nɛ ma ha nɛ o hi wami mi.

2. Mɛni ji ní komɛ nɛ nihi suɔ kaa a nine nɛ su nɔ?

² Ke nɔ ko ngɛ ohia ma ko mi ɔ, e slo níhi nɛ e maa suɔ kaa e nine nɛ su nɔ, nɛ ke nɔ ko ngɛ sika ma ko mi ɔ, e slo níhi nɛ e maa suɔ kaa e nine nɛ su nɔ. Ngɛ ohia mahi a mi ɔ, nihi fuu maa suɔ kaa a ma ná sika konɛ a kɛ he fon, moto, aloo zugba nyafii ko. Ngɛ sika mahi a mi ɔ, nihi suɔ kaa a ma he tadehi kɛ bohi nɛ a he jua wa, we nguahi, aloo lɔle nguahi. Se wa ngɛ sika ma mi jio, wa ngɛ ohia ma mi jio, wa ngɛ sika fuu jio, wa be sika fuu jio, wa ma nyɛ ma ná suɔmi kaa wa nine nɛ su he  lo nya níhi fuu nɛ wa hia we aloo eko ɔ, wa be nyɛe ma he ɔ a nɔ.

3. Ke a ke nɔ ko diɔ he lo nya níhi fuu a se ɔ, mɛni lɔ ɔ tsɔɔ?

³ Ke a ke nɔ ko diɔ he lo nya níhi fuu a se ɔ, mɛni lɔ ɔ tsɔɔ? Lɔ ɔ tsɔɔ kaa nɔ ɔ kɛ e juɛmi maa he lo nya níhi a nɔ mohu pe huɛ bɔmi kpakpa nɛ maa hi e kɛ Mawu a kpɛti. Ke nɔ ko diɔ he lo nya níhi fuu a se ɔ, e bua jɔɛ níhi nɛ e ngɛ ɔ a he, be fɛɛ be ɔ, e suɔ kaa e ná fuu kɛ piɛɛ he. Nihi nɛ a be sika fuu, aloo nihi nɛ a he we níhi nɛ a he jua wa po ma nyɛ maa di he lo nya níhi fuu a se. Eko ɔ, jamɛatsɛmɛ ɔmɛ kɛ Matsɛ Yemi ɔ be nɔ́ titli pee ngɛ a si himi mi hu.​—Heb. 13:5.

4. Mɛni blɔ nɔ Satan guu nɛ e kɛ “níhi nɛ hɛngmɛ dii se” ɔ sisiɔ wɔ?

⁴ Satan guɔ jua yemi blɔ nya tomi nɛ ngɛ je ɔ mi ɔ nɔ kɛ sisiɔ wɔ konɛ wa susu kaa ja wa nine su he lo nya níhi fuu a nɔ loko wa bua maa jɔ. Satan bɔɔ mɔde wawɛɛ kaa e maa ngɔ “níhi nɛ hɛngmɛ dii se” ɔ kɛ sisi wɔ. (1 Yoh. 2:15-17; 1 Mose 3:6; Abɛ 27:20) Wa nine ma nyɛ maa su nɔ́ tsuaa nɔ́ nɛ ngɛ je nɛ ɔ mi ɔ nɔ, se nami ngɛ he jio, se nami be he jio. Anɛ o he nɔ́ ko hyɛ nɛ tsa pi kaa o hia jamɛ a nɔ́ ɔ, se akɛnɛ o na ngɛ tsuapo ko mi aloo bɔ nɛ a plɛ kɛ tsɛ jua ha a he je lo? Anɛ pee se ɔ, o na kaa jinɛ o hia we jamɛ a nɔ́ ɔ lo? Ke wa heɔ níhi nɛ a he hia we ɔ, lɔ ɔ ma nyɛ ma ha nɛ waa pee yeyeeye. Jamɛ a ní ɔmɛ ma nyɛ ma je wa juɛmi kɛ je níhi nɛ wa peeɔ ngɛ Yehowa sɔmɔmi mi ɔ a nɔ. Ní nɛ ɔmɛ ekomɛ ji Baiblo ɔ kasemi, wa he nɛ wa ma dla kɛ ha asafo mi kpehi, asafo mi kpehi kɛ fiɛɛmi nɛ wa maa ya daa. Mo kai kaa bɔfo Yohane bɔ kɔkɔ ke: “Je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa.”

5. Mɛni ma nyɛ maa ba nihi nɛ a diɔ he lo nya níhi fuu a se ɔ a nɔ?

⁵ Satan sume kaa wa sɔmɔ Yehowa, mohu ɔ, e suɔ nɛ wa sɔmɔ Sika. (Mat. 6:24) Nihi nɛ a kɛ a he wami tsuo buaa he lo nya níhi a nya a, a tsui nɔɛ a mi. Jamɛatsɛmɛ ɔmɛ ma nyɛ maa pee yeyeeye, nɛ nɔ́ nɛ pa hí kulaa ji kaa hemi kɛ yemi nɛ a ngɛ ngɛ Yehowa kɛ e Matsɛ Yemi ɔ mi ɔ, mi ma nyɛ ma gbɔjɔ. (1 Tim. 6:9, 10; Kpoj. 3:17) Ngɛ ní dulɔ ɔ he nɔ́ hetomi nɔ́ nɛ Yesu kɛ tsu ní ɔ mi ɔ, e tsɔɔ kaa he lo nya níhi ngɛ kaa mio. Ke a du Matsɛ Yemi wu ɔ ‘ngɛ miohi a mi ɔ, ní kpahi a he akɔnɔ sɛɛ a mi, nɛ a gbee munyu ɔ ngɛ a mi, nɛ a wui yiblii.’​—Mar. 4:14, 18, 19.

6. Mɛni wa kaseɔ ngɛ Baruk sane ɔ mi?

⁶ Mo susu gbalɔ Yeremia e womi ngmalɔ nɛ a tsɛɛ lɛ ke Baruk ɔ he nɛ o hyɛ. Benɛ e piɛ bɔɔ nɛ a ma kpata Yerusalem hɛ mi kaa bɔ nɛ a gba fɔ si ɔ, Baruk bɔni ‘ní nguahi nɛ e be kɛe nɛ a ma kpata a hɛ mi ɔ hlami’ ha e he. Se e sa kaa Baruk nɛ ngɔ e juɛmi kɛ ma níhi nɛ Yehowa wo si kaa e maa pee ha lɛ ɔ pɛ nɔ. Yehowa wo lɛ si ke: ‘Ma ha o he maa je mi.’ (Yer. 45:1-5) Ke Mawu kpata ma a hɛ mi ɔ, e be nɔ ko he lo nya níhi a yi bae. (Yer. 20:5) E be kɛe nɛ a ma kpata je nɛ ɔ hɛ mi, enɛ ɔ he ɔ, pi be nɛ e sa kaa wa bua he lo nya níhi fuu a nya ha wa he ji nɛ ɔ. Yehowa maa baa wa yi ngɛ haomi ngua a mi, se e sɛ nɛ waa hyɛ blɔ kaa e maa baa he lo nya níhi nɛ wa ngɛ ɔ a yi, ke a he jua wa ha wɔ po.​—Abɛ 11:4; Mat. 24:21, 22; Luka 12:15.

7. Mɛni he wa ma susu, nɛ mɛni he je?

⁷ Yesu tsɔɔ wɔ blɔ nɛ hi pe kulaa nɛ wa ma nyɛ maa gu nɔ konɛ wa nine nɛ su wa he lo nya hiami níhi a nɔ nɛ wa juɛmi be níhi nɛ a he hia pe kulaa a, a nɔ jee. E tsɔɔ bɔ nɛ wa maa pee kɛ kua he lo nya  níhi fuu a se dimi kɛ yeyeeye peemi hulɔ. E kɛ ga womi nɛ ɔ ha ngɛ e Yoku ɔ Nɔ Fiɛɛmi ɔ mi. (Mat. 6:19-21) Ha nɛ waa kane Mateo 6:25-34 ɔ nɛ wa susu he nɛ waa hyɛ. Enɛ ɔ ma ha nɛ wa ma ná nɔ mi mami kaa e sa nɛ waa ya nɔ nɛ wa ‘hla Matsɛ Yemi ɔ,’ se pi he lo nya níhi.​—Luka 12:31.

8, 9. (a) Mɛni he je nɛ e sɛ nɛ waa pee yeyeeye tsɔ ngɛ wa hiami níhi a he ɔ? (b) Mɛni Yesu le ngɛ adesahi kɛ a hiami níhi a he?

⁸ Kane Mateo 6:25. Benɛ Yesu de e kaseli ɔmɛ ke ‘a ko hao ngɛ a wami he’ ɔ, nɔ́ nɛ e ngɛ hlae nɛ e tsɔɔ ji kaa a “jɔɔ tsui yemi.” Yesu kaseli ɔmɛ haoɔ a he ngɛ níhi nɛ e sɛ kaa a hao a he ngɛ he ɔ a he. Yi mi tomi kpakpa ko he je nɛ Yesu de mɛ ke a jɔɔ jã peemi ɔ nɛ. Yesu le kaa ke nɔ ko haoɔ e he aloo e peeɔ yeyeeye tsɔ ngɛ e hiami níhi po a he ɔ, lɔ ɔ ma nyɛ ma je nɔ ɔ juɛmi kɛ je huɛ bɔmi nɛ ngɛ e kɛ Yehowa a kpɛti ɔ nɔ. Yesu susuɔ e kaseli ɔmɛ a he wawɛɛ, enɛ ɔ he ɔ, e bɔ mɛ kɔkɔ si eywiɛ sɔuu ngɛ oslaa nɛ ɔ he ngɛ e Yoku ɔ Nɔ Fiɛɛmi ɔ mi.​—Mat. 6:27, 28, 31, 34.

⁹ Mɛni he je nɛ Yesu de wɔ kaa wa ko hao wa he ngɛ nɔ́ nɛ wa maa ye, nɔ́ nɛ wa maa nu, kɛ heha nɔ́ he ɔ? Anɛ ní nɛ ɔmɛ piɛɛ we níhi nɛ a he hia wɔ wawɛɛ ɔ a he lo? A piɛɛ he! Ke wa nyɛ we nɛ wa ná ní nɛ ɔmɛ ɔ, anɛ wa be yeyeeye pee lo? Ngɛ anɔkuale mi ɔ, wa maa pee yeyeeye. Yesu le jã. E le níhi nɛ nihi hia daa ligbi. E le kaa ngɛ “nyagbe ligbi ɔmɛ” a mi ɔ, ‘níhi a mi maa wa’ ha e kaseli ɔmɛ. (2 Tim. 3:1) Níhi nɛ ma ha nɛ si himi ɔ mi maa wa a ekomɛ ji, ní tsumi nɛ be, níhi a he jua nɛ wa, hwɔ, kɛ ohia ngmlikiti. Se kɛ̃ ɔ, Yesu le kaa ‘wami he hia pe ngma, nɛ nɔmlɔ tso ɔ he hia pe heha nɔ.’

10. Benɛ Yesu tsɔɔ e se nyɛɛli ɔmɛ bɔ nɛ a sɔleɔ ha a, mɛni ji nɔ́ nɛ e tsɔɔ kaa e sa nɛ e he nɛ hia mɛ wawɛɛ?

¹⁰ Sisije ɔ, Yesu tsɔɔ e kaseli ɔmɛ kaa e sa nɛ a bi e hiɔwe Tsɛ ɔ konɛ e ha mɛ a he lo nya hiami níhi. E tsɔɔ mɛ kaa a ma nyɛ maa sɔle ke: “Ha wɔ mwɔnɛ ɔ wa daa nya ngma.” (Mat. 6:11) Be kpa ko hu ɔ, Yesu tsɔɔ mɛ kaa a sɔle ke: “Moo da wa daa ligbi hiami níhi a nɔ kɛ ha wɔ wa daa ligbi nya mi ngma.” (Luka 11:3, NW) Se enɛ ɔ tsɔɔ we kaa e sa nɛ waa ngɔ wa juɛmi kɛ ma wa he lo nya hiami níhi pɛ a nɔ. Se ngɛ jamɛ a sɔlemi he nɔ hyɛmi nɔ́ ɔ mi ɔ, Yesu tsɔɔ kaa nɔ́ nɛ e he hia wawɛɛ ji kaa wa maa sɔle konɛ Mawu Matsɛ Yemi ɔ nɛ ba. (Mat. 6:10; Luka 11:2) Akɛnɛ Yesu suɔ kaa e maa ye bua e kaseli ɔmɛ konɛ a jɔɔ yeyeeye peemi he je ɔ, e ha nɛ a kai bɔ nɛ Yehowa hyɛɛ e nibɔ níhi a nɔ ha a.

11, 12. Mɛni wa kaseɔ ngɛ bɔ nɛ Yehowa hyɛɛ hiɔwe lohwe pɛlitsɛmɛ haa a mi? (Moo hyɛ foni nɛ ngɛ ní kasemi ɔ sisije ɔ.)

¹¹ Kane Mateo 6:26. E sa nɛ waa hyɛ “hiɔwe lohwe pɛlitsɛmɛ.” E ngɛ mi kaa hiɔwe lohwe pɛlitsɛmɛ klee we mohu lɛɛ, se a yeɔ ní wawɛɛ nitsɛ. Ngɛ anɔkuale mi ɔ, ke wa hyɛ hiɔwe lohwe pɛlitsɛmɛ a klemi kɛ ní nɛ a yeɔ, nɛ waa kɛ to adesahi a klemi kɛ ní nɛ a yeɔ ɔ he ɔ, wa ma nyɛ ma de ke hiɔwe lohwe pɛlitsɛmɛ yeɔ ní kulaa pe adesahi. Se kɛ̃ ɔ, hiɔwe lohwe pɛlitsɛmɛ pee we ngmɔ. Daa ligbi ɔ, Yehowa haa mɛ a hiami níhi. (La 147:9) Ngɛ anɔkuale mi ɔ, Yehowa kɛ niye ní wui a nya mi! Mɛ nitsɛmɛ nɛ a ya hlaa ní nɛ a yeɔ, se niye ní fuu ngɛ kɛ ha mɛ.

¹² Yesu ngɛ nɔ mi mami kaa ke e hiɔwe Tsɛ ɔ haa hiɔwe lohwe pɛlitsɛmɛ niye ní ɔ, lɛɛ e ma ha adesahi a hiami níhi kokooko. ^[1] (1 Pet. 5:6, 7) E ya be niye ní ngɔe kɛ ba wo wa nya mi, se ke wa pee ngmɔ ɔ, e maa jɔɔ nɔ, nɛ wa ma ná nɔ́ ko  ngɛ mi maa ye, aloo e ma ha nɛ wa ná sika kɛ he wa daa ligbi hiami níhi. Ke wa hia nɔ́ ko ɔ, e ma nyɛ maa wo nihi he wami konɛ a ha wɔ níhi nɛ a ngɛ ɔ eko. E ngɛ mi kaa Yesu de we ke Yehowa peeɔ tsu haa hiɔwe lohwe pɛlitsɛmɛ mohu lɛɛ, se Yehowa ha mɛ nile, ga, kɛ níhi nɛ a kɛ peeɔ tsu kɛ haa a he. Jã kɛ̃ nɛ Yehowa ma nyɛ maa ye bua wɔ konɛ wa ná he ko nɛ waa kɛ wa weku mi bimɛ nɛ hi.

13. Mɛni tsɔɔ kaa wa he jua wa pe hiɔwe lohwe pɛlitsɛmɛ?

¹³ Yesu bi nihi nɛ a ngɛ lɛ tue bue ɔ ke: ‘Anɛ nyɛ he jua wɛ hluu pi lohwe pɛlitsɛmɛ lo?’ Atsinyɛ jemi ko be he kaa Yesu le kaa e be kɛe nɛ e maa ngɔ e wami kɛ fɔ si ha adesahi. (Kɛ to Luka 12:6, 7 ɔ he.) Kristo ba gbo we kɛ kpɔ̃ adebɔ ní kpahi nɛ wami ngɛ a mi ɔ. Yesu ba gbo we ngɛ hiɔwe lohwe pɛlitsɛmɛ a he, mohu ɔ, e ba gbo ngɛ wa he konɛ wa nyɛ nɛ waa hi si kɛ ya neneene.​—Mat. 20:28.

14. Ke nɔ ko peeɔ yeyeeye ɔ, mɛni nɛ e be nyɛe maa pee gblee?

¹⁴ Kane Mateo 6:27. Mɛni he je mɔ nɛ Yesu tsɔɔ kaa ke nɔ ko pee yeyeeye ɔ, e be nyɛe maa tsɔ e kami nya nine kpɔ mi kami kake ɔ? Ejakaa ke wa haoɔ wa he tsɔ ngɛ wa daa ligbi hiami níhi a he ɔ, lɔ ɔ be wɔ ye buae nɛ wa se nɛ kɛ ngɛ je mi. Mohu ɔ, ke wa peeɔ yeyeeye tsɔ ngɛ si himi mi ɔ, lɔ ɔ ma nyɛ ma ha nɛ wa gbo mla.

15, 16. (a) Mɛni wa kaseɔ ngɛ bɔ nɛ Yehowa plɛɔ kɛ hyɛɛ nga nɔ mɔmɔhi a nɔ ha a mi? (Moo hyɛ foni nɛ ngɛ ní kasemi ɔ sisije ɔ.) (b) Mɛni sane nɛ eko ɔ, wa ma bi wa he, nɛ mɛni he je?

¹⁵ Kane Mateo 6:28-30. Wa ti mɛnɔ nɛ ke e na bo loo tade kpakpa nɛ e kɛ maa ya fiɛɛmi, asafo mi kpehi, loo  kpokpa nɔ kpehi ɔ, e bua be jɔe? Se anɛ e sa kaa lɔ ɔ nɛ ha nɛ waa pee “yeyeeye ngɛ heha nɔ́ he” lo? Jehanɛ se hu ɔ, Yesu suɔ kaa wa susu blɔ nɔ nɛ Yehowa guu kɛ hyɛɛ e nine nya ní tsumihi a nɔ ha a he. Wa ma nyɛ maa kase nɔ́ ko ngɛ “mɔmɔhi nɛ ngɛ puɛe ngɛ nga a nɔ” ɔ a he. Eko ɔ, mɔmɔ slɔɔtoslɔɔtohi nɛ a ngɛ fɛu he munyu nɛ Yesu ngɛ tue ɔ nɛ. Mɔmɔhi tsɛ̃ we kpa, a lui bo, nɛ a kpɛ we ní hulɔ. Se a gbaa mɔmɔhi saminyawii! “Salomo kɛ e hɛ mi nyami ɔ tsuo tete sui enɛ ɔmɛ a kpɛti kake he fɛu”!

¹⁶ Mɛni Yesu ngɛ hlae maa tsɔɔ ɔ? E de ke: ‘Hyɛ bɔ nɛ Mawu mia nga a saminyayoo ha! Anɛ Mawu be nyɛe nɛ e pee enɛ ɔ kɛ be nɔ ha nyɛ lo? Oo, nyɛ hemi kɛ yemi pi sãasãa!’ Mawu maa pee ha wɔ hluu tsɔ! Se e he hia nɛ Yesu kaseli ɔmɛ a hemi kɛ yemi ɔ mi nɛ wa. (Mat. 8:26; 14:31; 16:8; 17:20) E he hia nɛ a ná hemi kɛ yemi kɛ hɛ kɛ nɔ fɔmi nɛ mi wa ngɛ Yehowa mi. Wɔ hu nɛɛ? Anɛ hemi kɛ yemi nɛ wa ngɛ ngɛ Yehowa mi kaa e ma nyɛ ma ha wɔ wa hiami ní ɔ mi wa wawɛɛ lo?

17. Mɛni ma nyɛ ma puɛ waa kɛ Yehowa wa kpɛti?

¹⁷ Kane Mateo 6:31, 32. E sɛ nɛ waa pee wa ní kaa “ma je li” ɔmɛ nɛ a be hemi kɛ yemi ngɛ wa hiɔwe Tsɛ nɛ e ngɛ suɔmi, nɛ e hyɛɛ nihi nɛ a hlaa Matsɛ Yemi ɔ kekle ɔ a nɔ ɔ. Ke wa bɔɔ mɔde kaa wa ma bua ‘níhi nɛ ma je li ɔmɛ dii se’ ɔ a nya ha wa he ɔ, waa kɛ Yehowa wa kpɛti ma nyɛ ma puɛ. Se wa ma nyɛ ma ná nɔ mi mami kaa ke wa peeɔ níhi nɛ e sa kaa waa pee ɔ, Yehowa be wɔ sie, mohu ɔ, e ma ha wɔ ní kpakpahi nɛ wa hia a tsuo. Ke wa yaa nɔ nɛ wa ‘jaa Mawu’ ɔ, lɔ ɔ ma ha nɛ wa bua  maa jɔ “nya mi ngma, kɛ heha ní” nɛ wa ngɛ ɔ he.​—1 Tim. 6:6-8.

18. Mɛni Yehowa le ngɛ wa ti nɔ tsuaa nɔ he, nɛ mɛni e maa pee ha wɔ?

¹⁸ Kane Mateo 6:33. E sa nɛ Kristo kaseli ɔmɛ nɛ a ngɔ Matsɛ Yemi ɔ kɛ pee nɔ́ titli ngɛ a si himi mi. Ke wa pe jã a, lɛɛ kaa bɔ nɛ Yesu de ɔ, Mawu kɛ “ní nɛ ɔmɛ tsuo maa piɛɛ he ngɔ ha” wɔ. Mɛni he je nɛ Yesu de jã a? E tsɔɔ nya ngɛ kuku nɛ sɛ hlami ɔ mi ke: ‘Nyɛ Tsɛ nɛ ngɛ hiɔwe ɔ le kaa ní nɛ ɔmɛ tsuo a he hia nyɛ.’ Yehowa le níhi nɛ wa ti nɔ fɛɛ nɔ hia loko wɔ nitsɛmɛ po wa juɛmi baa jamɛ a ní ɔmɛ a nɔ. (Filip. 4:19) E le wa tade ɔmɛ aloo wa bo ɔmɛ a kpɛti nɔ́ nɛ ma hia kekle. E le niye ní nɛ wa maa hia, nɛ e le kaa e sa nɛ waa kɛ wa weku mi bimɛ nɛ ná he ko nɛ waa hi. Yehowa ma ha nɛ wa nine maa su wa hiami níhi a nɔ kokooko.

19. Mɛni he je nɛ e sɛ nɛ waa pee yeyeeye ngɛ níhi nɛ ma nyɛ maa ba hwɔɔ se ɔ a he ɔ?

¹⁹ Kane Mateo 6:34. Mo kadi kaa Yesu de ekohu ke: “Nyɛ ko hao nyɛ he.” E he ye wawɛɛ kaa Yehowa maa ye bua wɔ, enɛ ɔ he ɔ, e suɔ kaa wa tsu ligbi fɛɛ ligbi hiami níhi pɛ a he ní. Ke nɔ ko peeɔ yeyeeye tsɔ ngɛ níhi nɛ maa ba hwɔɔ se ɔ a he ɔ, eko ɔ, e kɛ e hɛ be Mawu nɔ fɔe, mohu ɔ, e maa bɔ mɔde kaa lɛ nitsɛ e ma tsu níhi a he ní, nɛ enɛ ɔ ma nyɛ ma puɛ e kɛ Yehowa a kpɛti.​—Abɛ 3:5, 6; Filip. 4:6, 7.

20. (a) Mɛni oti ko nɛ o suɔ kaa o kɛ maa ma o hɛ mi ngɛ Yehowa sɔmɔmi mi? (b) Mɛni o ma nyɛ maa pee konɛ o si himi nɛ pee kpokploo?

²⁰ Ke nɔ ko je e juɛmi ngɛ Matsɛ Yemi ɔ he níhi a se dimi nɔ, nɛ e ya di he lo nya níhi fuu a se ɔ, e nine maa nyɛ si. E sa nɛ waa di Mawu jami mi níhi a se mohu. Kaa nɔ hyɛmi nɔ́ ɔ, anɛ o ma nyɛ maa hia kɛ ho asafo ko nɛ Matsɛ Yemi fiɛɛli fuu a he hia ngɛ mi ɔ mi ya lo? Anɛ o ma nyɛ ma sɔmɔ kaa blɔ gbalɔ lo? Ke o ngɛ sɔmɔe kaa blɔ gbalɔ ɔ, anɛ o susu Sukuu Kɛ Ha Matsɛ Yemi Sane Kpakpa Fiɛɛli ɔ he hyɛ lo? Anɛ o ma nyɛ ma ya ye bua ngɛ Betel, loo asafo ɔ gbi sisi tsɔɔmi he ko ligbi komɛ lo? Anɛ o ma nyɛ maa hla ligbi komɛ nɛ o ya ye bua nihi nɛ a maa Matsɛ Yemi Asahi kɛ Kpe Peemi Asahi ɔ lo? Mo susu níhi nɛ o ma nyɛ maa pee konɛ o si himi nɛ pee hlɛhlɛɛhlɛ nɛ o nyɛ nɛ o tsu babauu ngɛ Matsɛ Yemi ní tsumihi a mi ɔ a he. Moo sɔle nɛ o susu daka nɛ e yi ji “ Bɔ Nɛ O Ma Plɛ Kɛ Pee O Si Himi Kpokploo Ha” a he, nɛ o pee níhi nɛ ma ha nɛ o su oti nɛ o kɛ ma o hɛ mi ɔ he.

21. Mɛni maa ye bua mo konɛ o nyɛ nɛ o hɛ mo kɛ su Yehowa he?

²¹ Yi mi tomi kpakpa he je nɛ Yesu tsɔɔ wɔ kaa wa hla Matsɛ Yemi ɔ, se pi he lo nya níhi ɔ nɛ. Ke wa peeɔ jã a, e he be hiae nɛ waa pee yeyeeye ngɛ wa he lo nya hiami níhi a he. Wa he we nɔ́ fɛɛ nɔ́ nɛ je ɔ peeɔ ɔ, ke wa ngɛ sika nɛ waa kɛ ma nyɛ ma he po. Wa ngɔɔ wa hɛ kɛ fɔɔ Yehowa nɔ, nɛ wa hɛɛ wɔ kɛ suu e he haa. Ke wa pee wa si himi kpokploo amlɔ nɛ ɔ, lɔ ɔ maa ye bua wɔ nɛ hwɔɔ se ɔ, wa nine maa su “wami nɛ ngɛ kɛ yaa neneene ɔ nɔ.”​—1 Tim. 6:19.