1. Mauri durua gaudia bona ita ura henia gaudia edia idau be dahaka?

NEGA haida idia gwau, taunimanima edia mauri durua gaudia be momo lasi, to edia ura gaudia be momo herea. Taunimanima momo be mauri durua gaudia bona edia ura gaudia edia idau idia lalopararalaia lasi. Edia idau be dahaka? “Mauri durua gaudia” be hegeregere, aniani, dabua bona ruma​—idia be mai anina bada gaudia. Ita “ura gaudia” be hari sibona do oi abia bona do ia ore, to ia be iseda dina ta ta maurina do ia durua lasi.

2. Taunimanima edia ura gaudia haida be dahaka?

² Taunimanima edia ura gaudia be idauidau edia noho dalana hegeregerena. Ogogami tanodia ai, taunimanima momo idia ura moni sisina idia abia mobael fon, motabaik o tano sisina hoia totona. To, taga tanodia ai idia noho taudia momo be idia gaukara goada, dabua namodia, ruma badadia o dava bada motuka idia hoia totona. Nega momo, kohu momo tahua karana ese dika bada ia havaraia​—ta ia tarapua diba bona ia ese kohu momo do ia tahua noho, herevana do ia abia be namo o lasi bona do ia hoia diba eiava lasi.

3. Kohu momo tahua karana ena anina be dahaka?

³ Kohu momo tahua karana ena anina be dahaka? Ena anina be, ta be kohu sibona ia laloa bada, to ena hetura karana Dirava ida ia laloa bada lasi. Unai dainai iena mauri ai kohu momo tahua karana ia atoa guna, bona mai ura bada ida unai ia karaia. Ena be ta ena moni be bada lasi eiava dava bada kohudia ia hoia lasi, to ia be kohu momo tahua tauna ai ia lao diba. Oibe, ogogami taudia danu be kohu momo tahua karana ena tarapu ai idia moru diba bona Basileia do idia tahua guna lasi.​—Heb. 13:5.

4. Satani ese edena dala ai “matana ese idia ura henia gaudia” ia gaukaralaia?

⁴ Satani ese inai tanobada ena bisinesi oreadia amo iseda lalona ia veria, bena do ita abia dae kohu momo tahua karana ese moale korikori ia havaraia. Danu, “matana ese idia ura henia gaudia” amo ta ena lalona ia veria diba. (1 Ioa. 2:15-17; Gen. 3:6; Aon. 27:20) Inai tanobada ai, kohu namodia bona idia dika haraga gaudia idia noho, bona unai kohu haida be iseda matana idia veria diba. Reana TV o stoa ai oi itaia gauna ta ese emu lalona ia veria dainai oi hoia, a? To, gabeai oi laloparara emu mauri ai unai kohu be anina lasi, a? Unai bamona anina lasi kohu tahua karana ese iseda mauri ia ha-aukaia bona hametaua diba. Danu unai ese sibona eda stadi karana, hebou hegaegaelaia bona lao henia karana, bona iseda haroro gaukara ia hadikaia diba. Namona be ita laloatao, aposetolo Ioane ese ita ia sisiba henia, ia gwau: “Tanobada bona ena ura be do ia ore.”

5. Mai edia goada ibounai ida kohu momo idia tahua taudia dekenai dahaka ia vara diba?

⁵ Satani ia ura Taga ena hesiai gaukara ita karaia, to Iehova totona lasi. (Mat. 6:24) Mai edia goada bada ida kohu momo idia tahua taudia be mauri dikana idia noholaia, mataganigani maurina unai, bona Dirava badinaia karana idia rakatania bona hisihisi momo bona lalometau amo idia sibodia idia hahisia. (1 Tim. 6:9, 10; Apok. 3:17) Unai be Iesu ena haheitalai uhe hadoa tauna hegeregerena. Basileia ena sivarai be “ginigini huanai idia hadoa uhe hegeregerena  . . . , inai nega oromana ena lalohekwarahi gaudia bona gau ma haida ura henia bada karana ese ia koidia, bona Basileia ena hereva ia koua bena huahua ia atoa lasi.”​—Mar. 4:14, 18, 19.

6. Baruku ena sivarai amo dahaka ita dibaia?

⁶ Peroveta tauna Ieremia ena seketere, Baruku mani ita laloa. Idia perovetalaia, Ierusalema be do idia hadikaia, negana ia kahirakahira neganai, Baruku be sibona totona “gau namo herea” ia tahua ​—unai tahua karana be ia noho daudau lasi. To, ia be Iehova ena gwauhamata, “oiemu mauri be oi dekenai do lau henia. Do oi lao gabudia ibounai dekenai oi be do oi heau mauri,” ia laloa lasi. (Ier. 45:1-5) Dirava be ta ena kohu do ia gimaia lasi, bema unai kohu be do idia hadikaia hanuana lalonai ia noho. (Ier. 20:5) Inai nega oromana ena dokonai ita naria noho lalonai, hari, ita sibona totona kohu momo do ita haboua lasi. Namo lasi ita laloa hisihisi badana lalonai, ita dekenai idia noho dava bada kohudia ida ita heau mauri diba.​—Aon. 11:4; Mat. 24:21, 22; Luka 12:15.

7. Dahaka do ita herevalaia bona dahaka dainai?

⁷ Iesu ese ita ia sisiba henia, iseda mauri ai mai anina bada gaudia do ita laloa be namo, to kohu momo do ita tahua lasi o hisihisi bona lalometau dekenai ita sibona do ita hahisia lasi. Unai sisiba be ena Ororo Harorona ai ia gwauraia. (Mat. 6:19-21) Mani Mataio 6:25-34 ai ia noho herevana ita duahia bona laloa.  Bema unai ita karaia, unai ese ita do ia durua ‘Basileia do ita tahua noho,’ to kohu lasi.​—Luka 12:31.

8, 9. (a) Dahaka dainai mauri durua gaudia totona ita lalohekwarahi lasi? (b) Iesu be taunimanima edia mauri bona edia mauri durua gaudia dekenai dahaka ia dibaia?

⁸ Mataio 6:25 duahia. Iesu be ia idia kamonai henia taudia ia hamaoroa, “namo lasi [edia] mauri totona idia lalohekwarahi,” unai be hegeregere idia ia hamaoroa do idia laloa momo lasi. Idia lalohekwarahilaia gaudia do idia lalohekwarahilaia momo lasi. Iesu be badina namona dainai, ia gwau hadokoa. Anina lasi gaudia laloa momo karana ese ta ena lalona ia koua diba, unai ese mauri lalonai mai anina bada gaudia laloa karana ia hadikaia diba danu. Iesu be ena haroro ai, nega foa ena hahediba taudia ia sisiba henia, unai dika ia havaraia diba lalohadaina dekenai idia naria namonamo totona.​—Mat. 6:27, 28, 31, 34.

⁹ Dahaka dainai Iesu ia gwau, aniani, eiava inuinu gaudia, eiava dabua totona do ita lalohekwarahi lasi? Iseda mauri ai unai gaudia be mai anina bada, ani? Bema ia auka unai gaudia ita abia totona, do ita lalohekwarahi, a? Oibe, do ita lalohekwarahi, bona Iesu be unai ia diba. Ia be taunimanima edia dina ta ta ena mauri durua gaudia ia diba namonamo. Unai sibona lasi, to lagani momo murinai ena hahediba taudia be “dina gabediai,” unai be “nega aukadia” lalonai do idia mamia maurina ia diba danu. (2 Tim. 3:1) Unai bamona gaudia do idia vara, hegeregere, taunimanima be edia moni gaukara do idia rakatania, kohu edia davana do ia daekau, aniani do ia ore bona ogogami maurina do ia bada. To, Iesu ia laloparara ‘mauri be aniani ia hereaia bona iseda tauanina ese dabua ia hereaia.’

10. Iesu ese ena murinai idia raka taudia dekenai guriguri dalana ia hadibaia neganai, ia gwau dahaka be mai anina bada?

¹⁰ Iesu ena Ororo Harorona ai, ia ese ena kamonai taudia ia hadibadia, edia dabu gaudia totona edia guba Tamana idia noia diba, do idia gwau: “Mani ai dekenai hari dina ena aniani oi henia.” (Mat. 6:11) Eiava dina ma ta ai inai bamona noinoi dalana ia hadibadia: “Ai dekenai hari dina ena paraoa do oi henia, inai dina ena sikele hegeregerena.” (Luka 11:3) To unai sisiba amo ita dibaia gauna be, namo lasi kohu momo tahua karana ese iseda lalona ia biagua. Unai guriguri lalonai, Iesu ese ia hahedinaraia Dirava ena Basileia do ia mai ita gurigurilaia be namo. (Mat. 6:10; Luka 11:2) Ena hereva idia kamonai henia taudia edia lalona ia hagoadaia totona, Iesu ese Iehova ena Hariharibada karana ia herevalaia.

11, 12. Iehova ese guba manudia ia naria dalana amo dahaka ita dibaia? (Laulau ginigunana herevalaia.)

¹¹ Mataio 6:26 duahia. Namona be guba manudia ita itaia namonamo. Idia be mauri gaudia maragidia sibona, to au huahua, uhe, manumanu maragidia bona biluga momo idia ania. Oibe, bema manu ena bada be ita taunimanima bamona, idia ania gaudia ena bada ese taunimanima idia ania gaudia ena bada ia hereaia. To aniani abia totona tano idia geia lasi bona uhe idia hadoa lasi. Iehova ese edia dabu gaudia ibounai ia henia. (Sal. 147:9) Momokani, ia ese edia uduna dekenai aniani ia atoa lasi. Idia sibona idia lao aniani idia tahua, to aniani be momo herea.

¹² Iesu ia diba ena guba Tamana ese manu edia aniani do ia henia, to taunimanima edia dabu gaudia do ia henia lasi be maoro lasi. ^[1] (1 Pet. 5:6, 7) Ia ese aniani be eda uduna ai do ia atoa lasi, to aniani abia totona eda hadohado gaukara o moni gaukarana amo dina ta  ta ena heduru gauna ita abia dalana do ia hanamoa. Ita dabu negadiai, ia ese ma haida ia gaukaralaia diba ita idia durua totona. Ena be Iesu ese guba manudia edia ruma karaia dalana ia gwauraia lasi, to Iehova ese aonega, diba bona edia ruma karaia gaudia ia henia, sibodia edia noho gabuna idia karaia totona. Unai hegeregerena, Iehova ese ita ia durua eda ruma bese totona ruma ita karaia diba.

13. Dahaka ese ia hamomokania ita ese guba manudia ita hereaia?

¹³ Iesu ese ena kamonai taudia ia hamaoroa: “Umui ese [guba manudia] umui hereaia, ani?” Momokani, Iesu ia diba ia be kahirakahira ena mauri do ia henia taunimanima hamauria totona. (Luka 12:6, 7 sekea.) Keriso ena mauri davalaia boubouna be mauri gaudia idaudia totona ia henia lasi. Iesu be guba manudia totona ia mase lasi, to ita dainai ia mase unai amo mauri hanaihanai ita abia diba.​—Mat. 20:28.

14. Lalohekwarahi tauna ese dahaka do ia karaia diba lasi?

¹⁴ Mataio 6:27 duahia. Dahaka dainai Iesu ia gwau ia lalohekwarahi tauna ese ena mauri sisina ia halataia diba lasi? Badina dina ta ta ai eda mauri durua gaudia lalohekwarahilaia kava karana ese eda mauri ia halataia diba lasi. To lalohekwarahi momo ese eda mauri ia hakwadogia diba.

15, 16. (a) Iehova ese flaoaflaoa ia naria dalana amo dahaka ita dibaia? (Laulau ginigunana herevalaia.) (b) Ita sibona dekenai dahaka henanadai ita henia diba bona dahaka dainai?

¹⁵ Mataio 6:28-30 duahia. Ita ibounai ita ura haroro gaukara ai, kongrigeisen heboudia bona hebouhebou badadia totona dabua namodia  ita hahedokilaia, ani? Unai dainai, “dabua totona [ita] lalohekwarahi” be namo, a? Iesu ese ita ia hadibaia lou Iehova ese ia havaraia gaudia ita laloa totona. Hari inai kahana ai “tano ena flaoaflaoa” edia toana amo diba do ita abia. Iesu be reana flaoaflaoa mai hairaidia ia laloa. Idia be sibona totona idia gaukara lasi, eiava dabua idia turia lasi. To idia be hairai momokani. “Solomona ena hairai ibounai danu ese unai [flaoaflaoa] edia hairai ia hereaia lasi.”

¹⁶ Iesu ena hereva ena anina be inai: “Dirava ese tano ena tubutubu gaudia ia hahairaia. . . . Vadaeni umui abidadama maragimaragi taudia e, Dirava ese umui dekenai dabua do ia henia lasi, a?” Ita abia dae ia ese unai do ia karaia. To Iesu ena hahediba taudia edia abidadama be ia maragi. (Mat. 8:26; 14:31; 16:8; 17:20) Namona be edia abidadama idia hagoadaia bona Iehova dekenai idia tabekau. To ita be edena bamona? Iehova ia ura bona ia hegeregere eda dabu gaudia ia henia totona, unai dainai eda abidadama ena bada be edena bamona?

17. Dahaka ese eda hetura karana Iehova ida ia hadikaia diba?

¹⁷ Mataio 6:31, 32 duahia. Namona be “tanobada taudia” edia kara ita tohotohoa lasi, idia be lalokau guba Tamana, edia mauri lalonai Basileia idia atoa guna taudia ia naria tauna unai, idia abidadama henia lasi. “Bema tanobada taudia ese idia tahua goadagoada noho” gaudia ita haboua, unai ese eda hetura karana Iehova ida ia hadikaia diba. To, ita diba momokani bema kara maorona ita badinaia​—iseda mauri lalonai Dirava ena ura ita atoa guna​—Iehova ese ita do ia hanamoa. Iseda Dirava badinaia karana ese ita do ia durua,  unai amo do ita abia dae iseda “aniani, dabua bona noho gabuna” be hegeregere.​—1 Tim. 6:6-8.

18. Iehova be ita dekenai dahaka ia dibaia bona ita totona dahaka do ia karaia?

¹⁸ Mataio 6:33 duahia. Namona be hanaihanai Keriso ena hahediba taudia ese edia mauri lalonai Basileia idia laloa guna. Bema unai bamona ita karaia, “unai gaudia ibounai be [ita] dekenai do ia henia.” Dahaka dainai Iesu be unai bamona ia hereva? Siri 32 ai ia gwau: “Emui guba Tamana ia diba umui be unai gaudia umui abia be namo,” anina be eda dabu gaudia. Iehova ese eda dabu gaudia hegeregere aniani, dabua bona ruma ia laloa vadaeni, ena be ita do lalohadailaia lasi. (Fil. 4:19) Ia diba eda dabua ena kahana dekenai edena do ia dika guna. Danu ia diba eda ruma bese ena bada hegeregerena, edena bamona ruma ita abia be namo bona dahaka do ita ania. Iehova ese eda dabu gaudia korikoridia be ita dekenai do ia henia momokani.

19. Dahaka dainai vaira nega ai do idia vara gaudia totona ita lalohekwarahi lasi?

¹⁹ Mataio 6:34 duahia. Mani oi laloa Iesu be nega iharuana ia gwau: “Umui lalohekwarahi lasi.” Ia ura dina ta ena lalohekwarahi gauna sibona do ita laloa​—ita abia dae momokani Iehova ese ita do ia durua. Bema ta be vaira nega ai do ia vara gauna ia lalohekwarahilaia kava, ia be sibona dekenai ia tabekau to Dirava dekenai lasi, bona unai ese ena hetura karana Iehova ida ia hadikaia diba.​—Aon. 3:5, 6; Fil. 4:6, 7.

20. (a) Iehova oi hesiai henia totona edena bamona tahua gaudia oi atoa? (b) Dahaka do oi karaia emu mauri oi haidaua totona?

²⁰ Kohu momo tahua karana dainai, Basileia gaudia ita dadaraia be anina lasi. To, namona be Basileia totona tahua gaudia ita atoa. Hegeregere, pablisa be momo lasi kongrigeisen ta dekenai oi lao diba, a? Eiava painia gaukara oi karaia diba, a? Bema oi be painia ta, Basileia Evanelia Sikuli oi lalohadailaia noho, a? Eiava oi ura Betele bona rimout trensleisen gaukarana oi durua? Eiava emu gabu ai Konstraksen o Kingdom Hall haginia gaukarana oi durua, a? Namona be inai bamona tahua gaudia do oi laloa bena edena dala ai emu noho dalana do oi haidaua diba unai bamona Basileia gaukarana ta lalonai oi vareai totona. Mai emu lalona ibounai ida unai oi gurigurilaia bona inai maua ladana “Edena Bamona Emu Mauri Do Oi Haidaua” itaia, bona dala oi tahua edena dala ai unai bamona tahua gauna oi hagugurua diba.

21. Dahaka ese oi do ia durua Iehova kahirakahira oi lao totona?

²¹ Badina namona dainai, Iesu ese ita ia hagoadaia Basileia do ita tahua guna, to kohu lasi. Unai hadibaia herevana ita badinaia neganai, iseda dabu gaudia do ita laloa momo lasi. Unai bamona ita karaia neganai, ita be Iehova kahirakahira do ita lao bona ia dekenai ita tabekau bona inai tanobada ese ia halasia lalona veria gaudia do ita dadaraia, ena be iseda moni ia hegeregere. Iseda noho dalana ita haidaua karana ese ita do ia durua “mauri korikorina ita dogoatao auka” totona.​—1 Tim. 6:19