1. Anni i nadduman na kawagattam ta kayà tam?

 BADDI kanu laman i kawagan na tolay, ngem awan tu adde na kayàna. Ari nga ammu na magaru i nadduman na material nga kawagadda ta kayàda. Anni i naddumanna? I “kawagan” ay gannug nga mawagmu tapenu matoleka, kagitta na makan, sinnun, anna paddianan​—importante ira yatun. I “kayà” ay gannug nga karagatammu, ngem ari nga kawagan ta inaggaw nga pattolay.

2. Anni i karuan nga kayà na totolay?

² Nadduruma i kayà na totolay, depende ta lugar nga paddianadda. Ta mariga nga nasa-nasion, magayaya ngana i aru nu egga paggatadda tu cell phone, motor, onu baddi nga lote. Ta mariku gapa nga lugu-lugar, aru i mayà ta mangini-ngina nga sinnun, mas dakal nga balay, onu makasta nga takay. Egga i peligro na maski anni taw nga situasion​—silu na materialismo, anna i pakkaraga nga mapeggan tu mas aru paga nga material nga ganna-gannug—kawagattam onu maski ari, anna nu egga paggatattam onu awan.

3. Anni i materialismo?

³ Anni i materialismo? Yaw i pabbalin tu okupadu ta material nga ganna-gannug imbes nga espiritual. Nakagamù i materialismo ta karagatan, prayoridad, anna fokus na tadday ta pattolena. Yatun i mamaguyu nittam nga makkaraga tu aru nga material nga pakkukua. Ari tu mawag nga mariku onu gumatang tu mangini-ngina nga gannug i tolay tapenu makagi nga materialistiko yaya. Awayyana gapa nga masilu na materialismo maski i mariga nga totolay tapus ariadda ngana nga alegan tu ollu i Pappatulan.​—Heb. 13:5.

4. Kunnasi nga usan ni Satanas i “gannug ira nga makatenta ta mata”?

⁴ Usu-usan ni Satanas i sistema na komersio ta mundo tapenu mangurug tam nga kawagan i mas aru nga material nga ganna-gannug tapenu magayaya i pattoletam. Malalaki yaya nga usan i “gannug ira nga makatenta ta mata.” (1 Juan 2:15-17; Gen. 3:6; Prov. 27:20) Iyawa na mundo i ngamin nga klase na ganna-gannug​—importante onu maski awan tu kuentana​—nga kuruga makatenta i karuan. Nakagatakka ngana kari tu tadday nga gannug, ari nga megafu ta kawagammu, nu ari megafu ta advertisement onu displey? Tapus, nanonomu nga makapattoleka gabbalaman maski nu awan yatun? I kunnatun nga ari importante nga ganna-gannug, pabbalinanna laman tu komplikadu i pattoletam anna mamakadammo nittam. Masilu anna meyawawanna ittam yatun ta espiritual nga rutina tam nga paggigiammu ta Biblia, papprepara anna pagatende ta study ira, anna regular nga pallayyagayya. Daddammattam i nitabarang ni apostol Juan: “Mapawan i mundo tuange ta ngamin nga egga taw nga karagatan na totolay.”

5. Anni i mesimmu ta nangiyusa ta siki-sikadda ta pagunnug tu material nga ganna-gannug?

⁵ Kayà ni Satanas nga mappa-aripan ittam ta Kinariku imbes nga kani Jehova. (Mat. 6:24) Ngem nattuppal ta miserable nga pattolay i nangiyusa ta siki-sikadda ta pagunnug tu material nga ganna-gannug tapenu mapagayaya i baggida. I mas marake paga, napagurayadda i espiritualidadda anna napannu ira tu daddam anna problema. (1 Tim. 6:9, 10; Nep. 3:17) Kagittana yatun i kinagi ni Jesus ta ilustrasionna meyannung ta mabbini. Turi ta i mensahe na Pappatulan ay “nekanna ta kasitan, . . . Ta i avvuru-vurung ta neravvunan nga attolay, aya ta kukua ira, anna ta pakkaraga ta karuan ira nga ganna-gannug i makagurun ta uvovug; yatun tu ari ira nga makapavvunga.”​—Mar. 4:14, 18, 19.

6. Anni i magigiammu tam kani Baruk?

⁶ Ikonsidera tam si Baruk, i sekretario ni profeta Jeremias. Turi ta aranni ngana nga matuppal i neprofesiya nga kadaral na Jerusalem, namegafu nga “alegan [ni Baruk] i atannang ira nga ganna-gannug” para ta baggina​—nga ari gamma nabalor. Ngem mas nga iniddanamanna nakuan i gannug nga nipromesa ni Jehova sa: “Ipamavulukku nga mepaliag i inangomu.” (Jer. 45:1-5; ftn.) Siguradu nga ari nga ipaliag ni Jehova i maski anni nga material nga pakkukua ta siudad nga daralanna. (Jer. 20:5) Megafu ta umara-aranni ittam ngana ta pangultimuan na sistema na ganna-gannug, ari nga yaw i tiempo tapenu magunnug tu mas aru nga material para ta baggi tam. Ariattam nakuan ekspektan nga kavulu tam ta mepaliag ta dakal nga ziga i anni laman nga pakkukua tam, maski nu talaga nabalor onu mangina yatun.​—Prov. 11:4, ftn.; Mat. 24:21, 22; Luc. 12:15.

7. Anni i tumunug nga gigiammuattam, anna ngatta?

⁷ Nangiyawa si Jesus tu kapianan nga tabarang  tapenu mapeggattam tu kawagan ira ta pattolay nga ariattam mabbalin tu materialistiko. Kasali yaw ta tabaranna ta Sermon ta Bakulug. (Mat. 6:19-21) Bibbigan anna alippawatattam i partena nga nakarekord ta Mateo 6:25-34. Yatun i mangumbinsi nittam nga ‘alegan i Pappatulan,’ ari nga material ira.​—Luc. 12:31.

8, 9. (a) Ngatta ariattam nakuan kuruga mavurung ta ganna-gannug nga kawagattam? (b) Anni i ammu ni Jesus meyannung ta totolay anna ta kawagadda?

⁸ Bibbigan i Mateo 6:25. Turi ta kinagi ni Jesus ta maggigginna sa nga “arian nu nga kavurungan i meyannung ta attolay nu,” gittana ikakkagina nga “ari kamu mavurung.” Mavurung ira ta ganna-gannug nga ari mabba kawagan nga kavurungadda. Kinagi ni Jesus nga iyemmadda yatun—anna egga makasta nga rasonna. I pavvuru-vurung nga ari mabba kawagan, onu maski ta talaga nga kawagan ay makadaral ta fokus na tadday nga tolay anna makagurun ta mas importante nga espiritual nga ganna-gannug. Kuruga ikavurungan ni Jesus i disipulosna ira yari tu mami-appana paga ira sinabarangngan ta sermonna meyannung taw nga delikadu nga tendensia.​—Mat. 6:27, 28, 31, 34.

⁹ Ngatta kinagi ni Jesus nga ariattam kavurungan nu anni i kanan, onu inuman, onu passinnuttam? Ari kari tu talaga kawagan yatun ta pattolay? Siempre gapa! Nu awan nittam yaw ira, ari kari tu mavurung ittam? Siguradu nga mavurung ittam, anna ammu ni Jesus yatun. Ammuna i kagaggaw nga kawagan na totolay. Ammuna paga i mariga nga situasion nga arubangan na disipulosna ira nga mattolay ta “ziga-riga ta pangurianan ira nga aggaw.” (2 Tim. 3:1) Kasali tatun i kawan na trabahu, pangngina na magatang, pabbisin, anna kuruga mariga nga pattolay nga maekspiriensa na aru. Ngem ammu ni Jesus nga ‘mas mangina i inango anne ta makan anna mas mangina i baggi anne ta sinnun.’

10. Turi ta sinudduan ni Jesus i disipulosna nga makimallo, anni i kinagina nga pinaka-importante nakuan ta pattoleda?

¹⁰ Nige na sermonna, nituddu ni Jesus ta maggigginna sa nga kiddawadda ta nelangitan nga Yama i pisikal ira nga kawagadda, nga awayyada nga makimallo: “Iddan nakami ta kanan nga mawag mi toye nga aggaw.” (Mat. 6:11) Onu kagitta na kinagina ta kabalin na sermonna: “Iyawa mu nikami i kanan nga mawag mi ta kaggaggaw.” (Luc. 11:3) Ngem arianna kaya kagian nga material nga ganna-gannug i kanayun nga egga ta nono tam. Tatun gapa nga modelo nga pakimallo, nipoppollu ni Jesus nga nipakimallo i dattal na Pappatulan na Dios. (Mat. 6:10; Luc. 11:2) Tapenu memammo i nono na maggigginna sa, kinagi ni Jesus nira i awan tu kagittana nga pakawayya ni Jehova bilang Minangngiyawa.

11, 12. Anni i magigiammu tam ta panangngal ni Jehova ta mammanu ira? (Innan i letratu ta gafu na artikulo.)

¹¹ Bibbigan i Mateo 6:26. “Innan nu i mammanu ira.” Maski baraddi ira nga pinaratu, aru i kanadda nga prutas, vuku-vukal, insekto, anna tuggì onu ulag. Kakuruganna, nu kagitta na tolay laman i kadakalda, mas aru i kanadda anne ta totolay. Ngem ariadda mawag nga makkokkog anna mammula para ta kanadda. Si Jehova i mangiyawa ta ngamin nga kawagadda. (Sal. 147:9) Siempre, ari gapa metuvu nira i kanadda! Mawag nga alegadda yatun, ngem napakaru yatun nga makan.

¹² Para kani Jesus, imposible nga iyawa ni Jehova i kanan na mammanu ira  tapus arianna iyawa i kawagan na totolay. ^[1] (1 Ped. 5:6, 7) Arianna nga ipay i makan ta mismu nga simu tam, ngem bendisionanna i appursigi tam nga mammula onu mattrabahu tapenu makagatang tu kawagan ta kagaggaw. Ta tiempo nga talaga makawag ittam, awayyana nga paguyuan i tanakuan tapenu uffunan ittam. Maski nu ari kinagi ni Jesus nga meddan tu paddianan i mammanu ira, iniddan ira ni Jehova tu abilidad, pakawayya, anna materiales nga kawagadda ta pagangngua tu umù. Uffunan gapa ittam ni Jehova nga makaleg tu paddianan para ta familia tam.

13. Anni i mamakurug nga mas mangina ittam anne ta mammanu ira?

¹³ Kinagi ni Jesus ta maggigginna sa: “Mas mangina kamu paga anne ta mammanu ira!” Siguradu nga egga ta nono ni Jesus i pangiyawana ta inangona para ta totolay. (Ikumpara i Lucas 12:6, 7.) Ari nga neyawa i tavvu ni Cristo para ta anni laman nga tanakuan nga pinaratu ira. Ari nga natay si Jesus para ta mammanu ira, ngem natay yaya para nittam tapenu makapattoletam nga magayaya adde noka.​—Mat. 20:28.

14. Anni i ari vuluvuga nga makua na tolay nga mavuru-vurung?

¹⁴ Bibbigan i Mateo 6:27. Ngatta kinagi ni Jesus nga ari mapa-apaddu na tolay i attolena megafu ta avvuru-vurunna? Megafu ta ari gamma nga umapaddu i pattoletam ta ari mepangngo nga avvuru-vurung ta kawagattam ta kagaggaw. Pababbanna lallagu i inango tam.

15, 16. (a) Anni i magigiammu tam ta panangngal ni Jehova ta lirio ira ta tana-tana? (Innan i letratu ta gafu na artikulo.) (b) Anni ira iyavu tam ta baggi tam, anna ngatta?

¹⁵ Bibbigan i Mateo 6:28-30. Sinni kari i  ari mayà ta makasta nga sinnun, neerulay nu usattam ta espiritual ira nga aktibidad​—pallayyagayya onu pagatende ta study anna asembli ira? Maski nu kunnatun, mawag kari nga ‘kavurungattam i meyannung ta passinnun’? Nangiyawa mangana si Jesus tu ilustrasion meyannung ta kingngua ni Jehova, i “lappaw ira ta tana-tana.” Awayyana nga egga ta nono ni Jesus i makakkasta ira nga lappaw nga lirio kagitta na gladiolus, hyacinth, iris, anna tulip​—nga nadduruma i kastada. Ari mawag nga maddage anna magangngua onu mabburda tu sinnudda yaw ira nga pinaratu na Dios. Ngem makapabbaw i kastada! “Maski paga gari si Patul Solomon ta kariku na ay ari nga nassinnun tu kagitta na kasta na tadday toye ta lappaw ira”!

¹⁶ Ariammu kattamman i punto na kinagi ni Jesus: “Nu sinnunan paga na Dios tu makasta i kaddo ta tana-tana, yammanno mabba nikamu! . . . Ari kari nga mas paga i paninnun na Dios nikamu?” Siguradu yatun! Ngem makafi i pangurug na disipulos ni Jesus. (Mat. 8:26; 14:31; 16:8; 17:20) Mawag nga mas nga pasikannadda i pangurug anna pattaloda kani Jehova. Kunnasi gapa nittam? Masikan kari i pangurug tam nga karagatan anna egga pakawayya ni Jehova nga iyawa i kawagattam?

17. Anni i awayyana nga makadaral ta relasiottam kani Jehova?

¹⁷ Bibbigan i Mateo 6:31, 32. Ariattam nakuan parigan i “Hentil ira” onu totolay na nasa-nasion nga awan tu kurug nga pangurugda ta minaggiddu nga Yama tam, nga mangikavurung ta mangipoppollu tu interes na Pappatulan. Madaral i relasiottam kani Jehova nu magunnug tam tu ganna-gannug  nga kavurungan na totolay ta mundo. Mattalo ittam lallagu nga nu kuattam i kawagan nga makua​—pangipoppollu ta espiritual ira nga gannug ta pattoletam​—ari nga iyetu ni Jehova i mapia nittam. Megafu ta “makadios nga debosiottam,” makontento tam ngana ta kegga na “kanan anna passinnut-tam,” onu paddianan.​—1 Tim. 6:6-8.

18. Anni i ammu ni Jehova meyannung ta kada tadday nittam, anna anni i kuanna para nittam?

¹⁸ Bibbigan i Mateo 6:33. Mawag nga kanayun nga ipoppollu na disipulos ni Cristo i Pappatulan ta pattoleda. Nu kuattam yatun, kinagi ni Jesus, “iyawa na ngamin paga i mawag” tam. Ngatta nakagina yatun? Niyesplikana ta tumunug nga bersikulo: “Ammu na Yama nu ta langi tu mawag nu ngamin danaw,” kayàna kagian i kawagattam ta pattolay. Ammu ni Jehova i kawagan na kada tadday nittam​—makan, passinnun, anna paddianan, nige paga nga awagattam yatun. (Fil. 4:19) Ammuna nu anni nga sinnuttam i tumunug nga maddana. Ammuna i kawagan nga kanattam, anna nu anni i mepangngo nga paddianattam depende ta kadakal na familia tam. Siguraduan ni Jehova nga malà tam nu anni i talaga nga kawagattam.

19. Ngatta ari tam nakuan mavurung ta mesimmu ta mappange?

¹⁹ Bibbigan i Mateo 6:34. Kinagi mangana ni Jesus: “Arian nu nga kavurungan.” Kayàna nga arubangattam i pakavurungattam laman ta kada aggaw—nga kuruga mattalo nga uffunan ittam ni Jehova. Nu kuruga mavuru-vurung i tolay ta posible nga mesimmu ta mappange, baka mattalo yaya ta baggina imbes nga ta Dios, anna makadaral yatun ta relasionna kani Jehova.​—Prov. 3:5, 6; Fil. 4:6, 7.

20. (a) Anni i awayyana nga espiritual ira nga addetammu ta passerbi kani Jehova? (b) Anni i makuam tapenu mapasimplem i pattolem?

²⁰ Awan tu kuentana nu isakrifisio tam i interes na Pappatulan para laman ta materialistiko nga pattolay. Gumawà tam lallagu tu espiritual ira nga addetan. Angngariganna, awayyam kari magali ta kongregasion nga dakal i pakawaganna? Makapappayunir ka kari? Nu payunir ka ngana, kayàmu kari magiskuela ta School for Kingdom Evangelizers? Awayyam kari masserbi nga part-time commuter, nga manguffun ta Bethel onu ta remote translation office? Awayyam kari mabboluntario ta Local Design/Construction, onu mappart-time ta pappataddag tu Kingdom Hall? Pannonopammu nu kunnasim nga mapasimple i pattolem tapenu mas aru i tiempom ta aktibidad para ta Pappatulan. Makimallo ka tapus pannonopammu i kahon nga “ Nu Kunnasi Pasimpleyan i Pattolem,” anna pegafuanan ngana i dakkua ira tapenu matuppal yaw nga addetan.

21. Anni i mamaddukko nittam kani Jehova?

²¹ Makasta i rason ni Jesus nu ngatta nitudduna nittam nga alegan i Pappatulan, ari i material ira. Nu kuattam yatun, ari ittam nga mavurung ta material ira nga kawagattam. Maddukko tam kani Jehova gukaban na pattalo tam sa anna ariattam pamagustu ta kada kayà tam onu paggatang ta kada gannug nga melaku, maski nu egga paggatattam. Makoffun nu pasimpleyattam ngana i pattoletam tapenu ‘mala tam i kurug nga pattolay’ ta mappange.​—1 Tim. 6:19.