1. Chihandwa muka chatwama havyuma vyavilemu mukuyoya navize yafwila kaha michima yetu?

ETU vatu tunahase kuyoya hakupwa kaha navyuma vyavilemu chakuzeneka vyuma yafwila michima yetu. Vatu vavavulu kavatachikiza chihandwa chatwama havyuma vyavilemu mukuyoya navize yafwila kaha michima yavo. Uno chihandwa muka chatwamaho? “Vyuma vyavilemu mukuyoya” vyapwa vyuma vize mwatela kupwa navyo numba muhase kuyoya, vyakufwana nge vyakulya, vyakuvwala, nazuvo. Kaha “vyuma yafwila michima yetu” vyapwa vyuma vize twasaka, oloze tunahase kuyoya numba katweshi navyoko.

2. Vyuma muka vafwila vatu?

² Vyuma vafwila vatu vyalihandununa kweseka nakuchihela vatwama. Chakutalilaho, mumafuchi akuhutwa vatu veji kufwila kuwana jimbongo jakulanda shinga, nakinga, nachihela chakutungaho zuvo. Oloze mumafuchi aluheto vatu veji kufwila vyuma vyavinene vyakufwana nge zuvo yayinene, naminyau yandando yayinene, navikumba vyandando yayinene.  Chamokomoko nakweshokwo twatwama, vatu vosena vanahase kupwa namuchima wakufwila kupwa navyuma vyavivulu, numba vipwa vyavilemu mukuyoya chipwe nduma, numba tunahase kuvilanda chipwe nduma.

3. Kufwila luheto chalumbununa ika?

³ Uno kufwila luheto chalumbununa ika? Chapwa kusaka kulikungulwila luheto lwaluvulu muchishishisa chakufwila vyuma vyakushipilitu. Muchima kana weji kuyangilila chikuma muvishinganyeka vyetu, kaha mutu eji kufwilanga chikuma vyuma vyakumujimba. Keshi nge mutu wakupita kaha ikiye eji kufwilanga luhetoko, oloze namutu wakuhutwa nahase kupwa namuchima kanou numba tuhu keshi najimbongo jakuvilandako. Echi cheji kulingisa mutu asuvilile vyuma vyaWangana.—Hepe. 13:5.

4. Satana eji kuzachisanga ngachilihi “kufwila chameso” etu?

⁴ Satana anakuzachisa kaye kano mangana tufwelele ngwetu kupwa navyuma vyavivulu cheji kulingisanga mutu alivwise kuwaha kuyoya. Eji kutukunyulanga mangana “kufwila chameso” etu chituzondole. (Yowa. 1, 2:15-17; Kupu. 3:6; Vishi. 27:20) Vaka-kusekasana vanakusololanga vyuma kupwa vyamwaza chikuma mangana vitukunyule. Pamo nayenu mwalandaho lyehi chuma chimwe keshi mwomwo mwachisakile chikumako, oloze mwomwo vamikunywile kuli vaka-kulanjisa. Kutwala muze, mwamwene ngwenu kamwatelele kulanda chuma kanako. Kulanda vyuma vyangana cheji kukaluhwisanga kaha chiyoyelo chetu nakutwenyekesa jimbongo. Vinahase kutwenyekela lwola luze twatelanga kuzachisa kuvyuma vyakushipilitu vyakufwana nge kulinangula Mbimbiliya, nakuliwahisa vyakukunguluka, nakwazananga mumulimo wamuwande. Kaposetolo Yowano atuhuhumuna ngwenyi: “Kaye kali nakuhita hamwe nakufwila chako.”

5. Vyuma muka vinahase kusoloka kuli vatu vaze vafwila kulikungulwila luheto?

⁵ Satana asaka tuzachile Luheto muchishishisa chakuzachila Yehova. (Mateu 6:24) Vatu vaze veji kukilikitanga mangana valikungulwile luheto kavasuuluka mukuyoya chavoko mwomwo vyuma kana vyeji kuvanehelanga ukalu nakuvalingisa vahone kuzovoloka kushipilitu. (Chimo. 1, 6:9, 10; Kuso. 3:17) Echi chalifwana navyuma ahanjikile Yesu muchifwanyisa chamuka-kukuva. Ambile ngwenyi, nge mazu aWangana ‘vanawakuu hamingonga, kaha kufwila chavyuma vyeka nawa navingila mumichima yavo nakukivisa mazu, kaha nawahona kwima mihako.’—Mako 4:14, 18, 19.

6. Vyuma muka natulinangula kuli Mbaluke?

⁶ Achitalenu hali Mbaluke uze apwile muka-kusoneka wakapolofweto Yelemiya. Omu Yelusalema yapwile kwakamwihi nakuyinongesa, Mbaluke aputukile “kufwila vyuma vyavinene” vize kavyapwile nanganyoko. Oloze atelele kufwelela kaha kutambula chuma chize amushikile Yehova ngwenyi: “Naukapuluka namwono wove.” (Yele. 45:1-5; kwinyikila chamwishi) Halwola kana Kalunga ayowele kaha vatu muze munganda, oloze kayowele vikumbako. (Yele. 20:5) Shikaho, luno keshi lwola lwakulikungulwila luhetoko, mwomwo tunakupandama kukukuma chakano kaye. Twatela kwijiva ngwetu haluyando lwalunene katweshi kukayovoka navikumba vyetuko, numba vipwa vyandando yayinene chipwe chiku.—Vishi. 11:4, kwinyikila chamwishi; Mateu 24:21, 22; Luka 12:15.

7. Vyuma muka natushimutwila, kaha mwomwo ika?

 ⁷ Yesu atulwezele omu tunahase kutonda vyuma vyavilemu mukuyoya chakuzeneka kufwila luheto luze lunahase kutulingisa tulizakaminenga. Ahanjikile vyuma kana muChihande ChahaPili. (Mateu 6:19-21) Tutangenu nakushimutwila jino hamazu ahali Mateu 6:25-34. Echi nachitukafwa ‘tutondenga Wangana’ keshi vyumako.—Luka 12:31.

8, 9. (a) Mwomwo ika katwatela kulizakamina chikuma havyuma vyavilemu mukuyoyako? (b) Vyuma muka atachikijile Yesu havatu nahavyuma vasaka?

⁸ Tangenu Mateu 6:25. Omu Yesu apwile nakulweza vaka-kumwivwilila ngwenyi, “litwaminenu kulizakaminanga hakuyoya chenu,” chalumbunwine hatoma nge avakanyishile kulizakaminanga. Vapwile nakulizakamina havyuma vize kavatelele kulizakaminako. Yesu ejivile kanawa ovyo avakanyishilile. Kulizakamina lwola lwosena cheji kulingisanga mutu ahone kuhaka mangana kuvyuma vyavilemu vyakushipilitu. Yesu azangile tumbaji twenyi, kahechi chikiko chamulingishile avahuhumune mapapa kawana mukunangula chenyi chahapili.—Mateu 6:27, 28, 31, 34.

⁹ Mwomwo ika Yesu atulwezela tuhone kulizakamina havyuma natulya, nakunwa, nakuvwala? Uno vyuma kana kavyapwa vyavilemu mukuyoyako tahi? Nduma, vyapwa vyavilemu. Nge natuhona kuwana mwakuwanyina vyuma kana, kaha natulizakamina. NaYesu atachikijile vene ngocho. Atachikijile vyuma vasakiwile vatu mukuyoya chavo chahakumbi hakumbi. Kaha nawa atachikijile ukalu navakamona tumbaji twenyi vaze navakayoyela “hamakumbi akukuminyina” omu nakukapwa “lwola lwalukalu.” (Chimo. 2, 3:1) Ukalu kana wapwa kuhona milimo, kutula chavyuma, kuhona vyakulya, nauhutu uze vanakumona vatu. Yesu atachikijile nawa ngwenyi ‘kuyoya chapwa chachilemu kuhambakana kulya, mujimba nawa waulemu kuhambakana vyakuvwala.’

10. Vyuma muka vyavilemu vize Yesu alwezele vaka-kumukavangiza omu avanangwile kulomba?

¹⁰ Kumaputukilo achihande chenyi chahapili, Yesu anangwile vaka-kumwivwilila valombenga Sevo wamwilu avahane vyuma vyakumujimba, ngwavo: “Tuhane kulya chetu chalikumbi lino lyalelo.” (Mateu 6:11) Mujila yikwavo nawa avalwezele valombenga ngwavo: “Tuhane kulya chetu chize chasakiwa hakumbi hakumbi.” (Luka 11:3) Echi kachalumbununa nge twatela kushinganyekanga kaha havyuma vyakumujimbako. Oloze mukulomba chenyi alumbunwine ngwenyi chuma chachilemu shina kulomba Wangana waKalunga wizenga. (Mateu 6:10; Luka 11:2) Hakusaka asuulwise vaka-kumwivwilila, Yesu ahanjikile hangolo atwama najo Yehova uze apwa muka-kutuzakama.

11, 12. Natulinangula ika kuli Yehova omu eji kuzakamanga tujila vamwilu? (Talenu muvwimbimbi wakulivanga.)

¹¹ Tangenu Mateu 6:26. Twatela ‘kutala kanawa tujila vamwilu.’ Tujila vapwa vavandende, kaha veji kulyanga mihako, manona, tututu, najindulo. Nge tujila vapwile vavanene ngana mwavatu, kachi veji kulyanga vyakulya vyavivulu kuhambakana vatu. Oloze kaveshi kulima chipwe kukuva mbutoko. Yehova eji kuvahananga vyuma vyasakiwa kuli vakiko. (Samu 147:9) Chipwe ngocho, keshi kuvahana vyakulya mutunwa twavoko. Oloze veji kuyanga nakuvitondatonda, kaha veji kuviwananga.

 ¹² Ngocho, Yesu amwene ngwenyi nge Ise eji kuzakamanga tujila, kaha mwazakama navatu nawa. ^[1] (Petu. 1, 5:6, 7) Keshi kutunehela vyakulyako, oloze hakukilikita chetu mwatukisula mangana tulime nakuwana vyakulya chipwe kuwana jimbongo jakulanda vyakulya. Kaha nge tuli muukalu chikuma, nahase kutuzakama kuhichila mukala mutu. Numba tuhu Yesu kavulukile vyakutondela tujila mwakusavalako, oloze Yehova avahana uhashi wakutunga maswa akusavalamo. Yehova nahase kutukafwa nayetu tuwane zuvo yakusavala natanga yetu.

13. Vyuma muka vyasolola nge twapwa tuvavalemu kuhambakana tujila?

¹³ Yesu ahulishile vatu vapwile nakumwivwilila ngwenyi: ‘Uno enu kamwalema kuhambakana tujila vamwiluko numba?’ Hakuhanjika mazu kana, Yesu apwile nakushinganyeka ngwenyi mwahana kuyoya chenyi hali vatu. (Esekesenuko Luka 12:6, 7.) Ndando yakusokola yaKulishitu kavayihanyine kuli tunyama chipwe tujilako, oloze ayihanyine hali etu vatu kaha mangana tukayoye myaka yosena.—Mateu 20:28.

14. Ukalu muka natumona nge natulizakaminanga?

¹⁴ Tangenu Mateu 6:27. Mwomwo ika Yesu ahanjikilile ngwenyi mutu wakulizakamina eshi kuhasa kuhakila kuvite yimwe kukuyoya chenyiko? Mwomwo kulizakaminanga lika kacheshi kutukafwako, oloze nachitulingisa tufwenga washi.

15, 16. (a) Vyuma muka tunalinangula hali Yehova omu eji kuzakaminangamo jitemo? (Talenu muvwimbimbi wakulivanga.) (b) Vihula muka twatela kulihulisa, kaha mwomwo ika?

¹⁵ Tangenu Mateu 6:28-30. Tuvosena twasaka kuvwala uvwalo wamwaza, chikumanyi  hakuya muwande, chipwe kukukunguluka. Uno echi chatela kutulingisa ‘tulizakaminenga havyakuvwala’ tahi? Yesu ahanjikile nawa hachakutalilaho chavyuma atenga Yehova. Tunahase kulinangula hajila jeji kusolokelangamo “jitemo jamuvipapa.” Yesu pamo apwile nakushinganyeka hajitemo jize jeji kusolokanga kanawa. Eji jitemo kajeshi kutunga mahina chipwe uvwalo wavyoko. Oloze kutemwina chajo cheji kutusuulwisanga. “Numba vene Solomone muupahu wenyi wosena, kavwalile uvwalo umwe wakulita natemo yimweko.”

¹⁶ Mwatela kwijiva chishina ahanjikile Yesu, ambile ngwenyi: “Enu vaka-lufwelelo lwalundende, jino kachi nge Kalunga eji kuvwikanga vyuma vyakusoka hamavu . . . , kutala keshi kuhambakana chikuma kumivwika enuko nyi?” Chapundu vene mwamivwika. Olozenyi tumbaji twaYesu kavapwile nalufwelelo lwakukolako. (Mateu 8:26; 14:31; 16:8; 17:20) Vasakiwile kupwa nalufwelelo lwakukola nakupendamina hali Yehova. Nyi ngachilihi etu? Uno twafwelela ngwetu Yehova mwatuhana vyuma vyasakiwa mukuyoya chetu tahi?

17. Vyuma muka vinahase kwenyeka usoko wetu naYehova?

¹⁷ Tangenu Mateu 6:31, 32. Katwatela kulondezeza “vaka-mafuchi” vaze kavafwelela ngwavo Setu wamwilu mwavazakama mukuyoya chavo nge navahaka kulutwe vyuma vyaWangana. Kulikungulwila vyuma vyakumujimba chinahase kwenyeka usoko wetu naYehova mwomwo “vyosena evi vikiko vyuma veji kufwilanga chikuma vaka-mafuchi.” Oloze twatela kufwelela ngwetu nge natuhaka vyuma vyakushipilitu kulutwe mukuyoya  chetu, kaha Yehova keshi kutumina vyuma vyamwazako. “Muchima wakuzachila Kalunga” watela kutulingisa tusuuluke “navyakulya nauvwalo” tuli nawo, chipwe “zuvo.”—Chimo. 1, 6:6-8; kwinyikila chamwishi.

18. Vyuma muka atachikiza Yehova hali mutu himutu, kaha eji kulinga ngachilihi?

¹⁸ Tangenu Mateu 6:33. Tumbaji vaKulishitu vatela kuhaka Wangana waKalunga kulutwe mukuyoya chavo. Nge natulinga ngocho, kaha mazu aYesu nawatesamo akwamba ngwenyi, “evi vyuma vikwavo vyosena navakamihanavyo.” Mwomwo ika ahanjikilile mazu kana? Alumbunwine kanawa muvesi yinafumuho ngwenyi: “Senu wamwilu atachikiza ngwenyi nayenu mwasakiwa vyuma vyosena evi.” Vyuma kana shina vize vyasakiwa mukuyoya chetu. Yehova nahase kutachikiza vyuma vyasakiwa kumutu himutu vyakufwana nge vyakulya, vyakuvwala, nazuvo, shimbu kanda nayetu vavene tuvitachikize. (Fwili. 4:19) Atachikiza nalwola vinahase kupulika vyakuvwala vyetu. Ejiva vyakulya tunakusakiwa nazuvo yize tunahase kutwama natanga yetu. Yehova eji kumona chikupu lwola atela kutuhana vyuma kanevi.

19. Mwomwo ika katwatela kulizakamina havyuma navikasoloka kulutweko?

¹⁹ Tangenu Mateu 6:34. Yesu ahanjikile kamuchivali ngwenyi: “Kanda namulizakamina.” Asakile ngwenyi tuhone kulizakamina vyalikumbi lyahamene nakufwelela ngwetu Yehova mwatukafwa. Nge mutu mwalizakamina chikuma vyakulutwe, kaha nahase kulifwelela livene muchishishisa chakupendamina hali Kalunga. Echi chinahase kwenyeka usoko wenyi naYehova.—Vishi. 3:5, 6; Fwili. 4:6, 7.

20. (a) Milimo muka yaWangana mwatela kufwila kuzata? (b) Vyuma muka munahase kulinga mangana mwashiwiseko chiyoyelo chenu?

²⁰ Chapwa chakuhenga kuhaka kulutwe vyuma vyakumujimba muchishishisa chakuzata vyuma vyaWangana. Mujila muka tunahase kuhaka vyaWangana kulutwe? Chakutalilaho, tunahase kuya nakuzachila kuze kunakusakiwa chikuma vaka-kwambulula Wangana, chipwe kuzata upayiniya. Nge mwapwa lyehi muvapayiniya, munahase kulisonekesa kuya kuShikola yaVaka-Kwambulula Wangana. Munahase kulisuula hamakumbi amwe kuyanga nakuzachila hamutango chipwe haofesi yavaka-kwalumuna, chipwe kuzata naLipatimende Lyatala haMulimo waKutunga, chipwe kukafwa haZuvo yaWangana vanakutunga. Shinganyekenu vyuma munahase kulinga mwashiwiseko chiyoyelo chenu mangana muzate chikuma milimo yaWangana. Talenu lipwata “ [lya]Mwakwashiwishila Chiyoyelo Chenu,” kaha kavangizenu vyuma kana mangana mutesemo vyuma muli nakufwila.

21. Vyuma muka navimikafwa mupandame kuli Yehova?

²¹ Vyuma tunashimutwila vikiko vyalingishile Yesu atulweze ngwenyi tutondenga Wangana, keshi vyumako. Shikaho katwatela kulizakamina vyachiyoyelo chetuko. Kufwelela muli Yehova chikiko nachitupandamisa kuli ikiye, keshi kundupukila mukutondatonda vyuma vyamukayeko, numba tupwa najimbongo jakuvilanda chipwe nduma. Kwashiwisa chiyoyelo chetu oholyapwa nachitukafwa “kulinjilila kukuyoya chamwenemwene.”—Chimo. 1, 6:19.