1. Antoy pandumaan na nakaukolan tayo tan say labay tayo?

SAY kuan da et daiset labat iray nakaukolan na too, balet agmanunda iray labay to. Ompatnag ya dakel so agmakaamta ed pandumaan na saray nakaukolan ya materyal tan saray labay. Antoy pandumaan da? Say “nakaukolan” et samay bengatlan nepeg ya walad sika lapud akapende ditan so bilay mo. Naakan, kawes, tan panayaman—saraya so talagan nakaukolan ed bilay. Say “labay” et samay bengatlan pipirawaten mo, balet nabilay ka met anggano anggapo.

2. Anto ray bengatlan labay na totoo?

² Nayarin nanduruma so labay na totoo, depende ed lugar ya panaayaman da. Diad saray mairap ya bansa, nayarin say pirawat labat na dakel et nawalaan na kuartan isaliw na cell phone, luganan, odino melag ya dalin. Diad mayayaman iran bansa, nayarin say labay da et nawalaan na mabmablin kawes, mas baleg ya abung, o mas mablin luganan. Balet mayaman man o mairap itayo, nayari  tayon napatitan na materyalismo, ya dakdakel so labay tayon naala, kaukolan tayo man iratan o andi tan balanglan sarag na bulsa tayo o andi.

3. Anto so materyalismo?

³ Anto so materyalismo? Say pananap lan pananap na saray materyal imbes ya saray espiritual ya kayamanan. Say materyalismo et onggagapo ed pilalek, prayuridad, tan say akasentroan na bilay. Patuboen na satan so pilalek tayon nawalaan na dakel ya kayarian. Say toon materyalistiko et nayarin aliwa met ya makuarta o mansasaliw na ankabli. Anggan saray mairap bilay et nayarin magmaliw ya materyalistiko tan agda niyuna so pananap ed Panarian.​—Heb. 13:5.

4. Panon ya uusaren nen Satanas so “pilalek na mata”?

⁴ Uusaren nen Satanas so komersyalismo na mundo pian panisiaen itayo ya maliket so bilay no dakel so materyal ya kayarian tayo, anggano agtayo nakaukolan iratan. Amta to no anto ray labalabay ya ‘pilaleken na mata.’ (1 Juan 2:15-17; Gen. 3:6; Pro. 27:20) Walad mundo so amin lan klase na materyal a bengatla, manlapud sankarakepan ya anggad samay anggapoy usar, say arum et makapaingganyo ed mata. Asalim lay angaliw na sakey a bengatla, aliwan lapud kaukolan mo itan noagta arakepan ka labat nen impatalastas o in-display? Kasin naisip mo lanlamang ya nabilay ka met anggano anggapo itan? Saray ontan ya bengatlan agnakaukolan et gawaen da labat ya komplikadoy bilay tan pabelat labat. Magmaliw iratan ya patit tan lapud saratan et ompan napaulyanan tayo lay espiritual a rotina tayo ya panagaral na Biblia, pamparaan tan iyatendi ed aral, tan pibiang a regular ed ministeryo. Tandaan so impasakbay nen apostol Juan: “Say mundo tan say pilalek na satan et naandi.”

5. Antoy nayarin nagawa ed saramay uupoten day biskeg da pian nawalaay dakel ya kaykayarian?

⁵ Labay nen Satanas ya manpaaripen tayo ed Kayamanan imbes ya diad si Jehova. (Mat. 6:24) Say pansusumpalan na saramay uupoten day biskeg dad pantitipon na kaykayarian et balanglan bilay ya walay magangganon liket lapud nanaala day labay da, odino bilay ya napnoy ermen tan pakakadismaya lapud arawrawi liknaan dad Dios. (1 Tim. 6:9, 10; Apo. 3:17) Singa itan ed samay ilustrasyon nen Jesus nipaakar ed tomatanem. Nen “nitanem ed kasabitan” so mensahe na Panarian, “say pampilalek ed arum ni ran bengatla so mangaapekta ed puso ra tan manasakbong ed salita, kanian ag-itan manbunga.”—Mar. 4:14, 18, 19.

6. Anton leksion so naaralan tayod si Baruc?

⁶ Nonoten pay Baruc, say sekretaryo nen propeta Jeremias. Nen magano lan nagawa imay nipasakbay ya kaderal na Jerusalem, si Baruc et ginmapon ‘mananap na angkakabaleg a bengatla’ parad sarili to—saray bengatlan agmanbayag. Say pinirawat to labat komon et say pakaawat ed samay impromisa nen Jehova ed sikato: “Abuloyan ta kan makaliktar a mabilay.” (Jer. 45:1-5; paimanod leksab) Seguradon ag-isalba na Dios so kaykayarian na siopaman diad syudad ya deralen to. (Jer. 20:5) Legan ya manasingger so anggaan na sayan sistema na mundo, aliwan natan so panaon pian mantipon lan mantipon na materyal iran bengatla parad sarili tayo. Agtayo ilaloan ya walay antokaman ya kayarian ya nisalba tayod baleg ya kairapan, anggano mabmabli o importante iratan ed sikatayo.—Pro. 11:4, paimanod leksab; Mat. 24:21, 22; Luc. 12:15.

7. Anto ni aralen tayo, tan akin?

⁷ Angiter si Jesus na sankaabigan ya simbawa no panon itayon nawalaan na saray nakaukolan ed bilay balet ta siansia nin akapokus, aliwan materyalistiko, odino ag-alablabas  ya mapaga. Kaiba iyan bilin ed samay Sermon tod Palandey. (Mat. 6:19-21) Basaen tan talosan tayoy kabiangan na satan ya akasulat ed Mateo 6:25-34. Komon ta pakiwasen itayo na satan ya ‘itultuloy ya anapen so Panarian,’ aliwan saray materyal a bengatla.—Luc. 12:31.

8, 9. (a) Akin ya agtayo nepeg ya panaburidoan ya maong iray bengatlan nakaukolan tayo? (b) Antoy amta nen Jesus nipaakar ed totoo tan saray nakaukolan da?

⁸ Basaen so Mateo 6:25. Nen imbaga nen Jesus ed saray ondedengel ed sikato ya ‘agla ra mapagpaga ed bilay da,’ singa to ibabagan “tundaan da lay manaburido.” Pampapagaan da ray bengatlan agda nepeg komon ya pampagaan. Imbaga nen Jesus ya tundaan da la itan—tan walay maabig ya rason. Say alablabas ya pampaga o panaburido, anggan diad saray nepeg met ya pampagaan, et nayarin mangapag na nonot na sakey tan agla makapampokus, nalingwanan to la no antoy mas importante ed bilay, saray espiritual a bengatla. Sankanonot nen Jesus iray disipulo to kanian diad sermon to et amipat to ran pinasakbayan nipaakar ed sayan mapeligron tendensia.—Mat. 6:27, 28, 31, 34.

⁹ Akin ya imbaga nen Jesus ya agtayo la panaburidoan no antoy kanen, inumen, tan isulong tayo? Agta importante iratan ed bilay? On! Agta natural labat ya manaburido tayo no anggapoy pakasarag tayon nawalaan na saratan? On natural labat, tan amta nen Jesus itan. Amta to iray inagew-agew ya nakaukolan na totoo. Amta to met iray mairap ya kipapasen ya arapen na saray disipulo to ya manbilay diad “kaunoran iran agew,” ya “mapeligro tan mair-irap a panaon.” (2 Tim. 3:1) Dakel so andian na trabaho, mabmabli iray sasaliwen, kulang so naakan, tan agaylay irap so bilay. Balet amta met nen Jesus ya ‘mas importante so bilay nen say naakan tan say laman nen say kawes.’

10. Nen imbangat nen Jesus iray papatumbok to no panon so manpikasi, antoy imbaga to ya nepeg a sankaimportantian ed bilay da?

¹⁰ Diad bandad gapo na sermon nen Jesus, imbangat to iray ondedengel ed sikato ya kerewen dad Ama ra ed tawen ya ikdan to ray nakaukolan dan materyal. Imbaga ton ipikasi ra: “Ikdan mo kami na kanen mi ed sayan agew.” (Mat. 6:11) Odino oniay impangibaga to diad sananey ya pankanawnawa: “Ikdan mo kami na kanen mi ed kada agew unong ed nakaukolan mi.” (Luc. 11:3) Balet aglabay ya ibaga na satan ya say naynay lan sankanonot tayo et saray materyal ya nakaukolan tayo. Diad satan lanlamang ya modelon pikakasi, imbaga nen Jesus ya unonan ipikasi tayo so isabi na Panarian na Dios. (Mat. 6:10; Luc. 11:2) Pian paseguroan iray ondedengel ed sikato, impaimano to so agnaparaan ya ehemplo nen Jehova bilang Manangitarya.

11, 12. Antoy naaralan tayo ed paraan na pangaasikaso nen Jehova ed saray ontitikyab ya manok? (Nengnengen so litratod gapo na artikulo.)

¹¹ Basaen so Mateo 6:26. ‘Imanoen tayon maong iray ontitikyab a manok.’ Melmelag ira balet dakdakel so kakanen dan prutas, bukel, insekto, odino bigis. Aliwan singa say too, say kakanen da et mas ambelat nen say laman da. Balet agda kaukolan so manbukalkal na dalin tan mantanem na bukel pian walay naakan da. Itatarya nen Jehova so amin ya nakaukolan da. (Sal. 147:9) Siempre, agto isusubo ed sikara so kanen da! Kaukolan dan anapen itan, balet dakdakel so naromog da.

¹² Parad si Jesus, imposiblin say Ama ton walad tawen et mangitarya na naakan ed saray manok balet ta agto asikasoen iray ontan ya manunan nakaukolan na totoo. ^[1] (1 Ped. 5:6, 7) Agto isuboy naakan ed sikatayo, balet nayarin bendisyonan to ray sagpot tayon mantanem odino mananap na kuartan isaliw  na saray nakaukolan tayo ed kada agew. Tan nayarin pakiwasen toy arum ya mangiter na walad sikara no mankakkaukolan tayo. Anggaman ag-imbaga nen Jesus ya itataryaan nen Jehova na panayaman iray ontitikyab ya manok, inikdan to ra na nisipor ya abilidad, dunong, tan saray nausar dad panggawa na ubong da. Natulongan itayo met nen Jehova ya makaromog na magenap ya panayaman na pamilya tayo.

13. Antoy prueba ya mas mabli itayo nen saray ontitikyab ya manok?

¹³ Tinepetan nen Jesus iray ondedengel ed sikato: “Agta mas mabli kayo ni nen [saray ontitikyab ya manok]?” Nayarin say sankanonot nen Jesus et say magano lan pangiter toy bilay to parad totoo. (Ikomparay Lucas 12:6, 7.) Ag-intarya so dondon bagat nen Kristo parad arum ni ran mabilay ya pinalsa. Inatey si Jesus, aliwan parad saray manok, noagta parad sikatayo pian makapambilay itayo ya anggapoy anggaan.—Mat. 20:28.

14. Antoy agbalot nagawaan na toon mapagpaga?

¹⁴ Basaen so Mateo 6:27. Akin ya imbaga nen Jesus ya say toon mapagpaga et agto naaruman na anggan sankasiko so dukey na bilay to? Lapud say alablabas ya panaburido ed inagew-agew iran nakaukolan tayo et ag-ontulong pian naparukey so bilay tayo. Imbes, nayarin mamatikey laingen itan na bilay tayo.

15, 16. (a) Antoy naaralan tayo ed paraan na pangaasikaso nen Jehova ed saray lirio ed uma? (Nengnengen so litratod gapo na artikulo.) (b) Anto ray nayarin itepet tayod sarili tayo, tan akin?

¹⁵ Basaen so Mateo 6:28-30. Siopad sikatayo so agmalabay ya nawalaan na marakep ya kawes, lalo la no mibiang tayod ministeryo  odino onatendid saray aral tan asemblea? Anggano ni, nepeg tayo kasin ‘pampagaan so ikawes tayo’? Impaimano lamet nen Jesus iray palsa nen Jehova. Dia et dakel so naaralan tayo ed itsura na saray “lirio ed uma.” Nayarin say walad nonot nen Jesus et saray nanduruman rosas a singa lirio—amin da et mararakep. Agda kaukolan so mandait o manggaway kawes da. Balet marakdakep ed mata iray rosas da! “Anggan si Solomon, a sankayamanan lan too, et ag-akapankawes na singa sakey ed saraya”!

¹⁶ Malinlinew so labay ya ibaga nen Jesus: “No kakawesan na Dios iray tanaman ed uma . . . , agta mas lalon kawesan to kayo, sikayo ran kulang so pananisia yo?” Seguradon gawaen to itan! Balet singa kulang na pananisia iray disipulo nen Jesus. (Mat. 8:26; 14:31; 16:8; 17:20) Kaukolan day mas mabiskeg ya pananisia tan talek ed si Jehova. Sikatayo ey? Panon kabiskeg so pananisia tayo ya labay tan sarag nen Jehova ya itarya iray nakaukolan tayo?

17. Anto so nayarin maneral na relasyon tayod si Jehova?

¹⁷ Basaen so Mateo 6:31, 32. Agtayo nepeg ya aligen iray totoo ed “saray nasyon,” ya aliwan malet so pananisia da ed maaron Ama a walad tawen ya mangaasikaso ed saramay iyuuna dad bilay da so Panarian. Say pantipon na amin ya bengatlan “panseseetan ya anapen na saray nasyon” et nayarin maneral na relasyon tayod si Jehova. Balet makapanmatalek itayo ya no gawaen tayo so nepeg tayon gawaen—iyuna ed bilay iray espiritual ya bengatla—ag-isiblet nen Jehova ed sikatayo no antoy maong. Say ‘debosyon tayo ed Dios’ so nepeg ya mamakiwas ed sikatayon mankontento la no walay “naakan  tan kawes” tayo, odino walay pambilay tan panayaman tayo.—1 Tim. 6:6-8.

18. Antoy amta nen Jehova nipaakar ed kada sakey ed sikatayo, tan antoy gawaen to?

¹⁸ Basaen so Mateo 6:33. Nepeg a say lanang ya iyunad bilay na saray disipulo nen Kristo et say Panarian. No gawaen tayo itan, imbaga nen Jesus ya “sarayan amin a bengatla et niarum” ed sikatayo. Akin et nayarian ton ibaga itan? Impaliwawa to diad akaunan bersikulo: “Amta na Ama yod tawen a nakaukolan yo irayan amin,” saray talagan importantid bilay. Mainomay ya amtaen nen Jehova no antoy nakaukolan na kada sakey—naakan, kawes, tan panayaman—antis tayo nin naamtaan iratan. (Fil. 4:19) Amta to no dinan ed saray kawes tayo so onsublay ya ondaan. Amta to no anto ray kaukolan tayon kanen tan no antoy dugarugan panayaman tayo, base ed kabaleg na pamilya tayo. Seguroen nen Jehova ya nitarya no anton talagay nakaukolan tayo.

19. Akin ya agtayo nepeg a pampagaan no antoy nayarin nagawa ed arapen?

¹⁹ Basaen so Mateo 6:34. Imanoen ya imbaga lamet nen Jesus: “Agkayon balot mapagpaga.” Labay ton isipen tayo no antoy kaukolan tayo labat ed sakey agew—ya matalek a tulongan itayo nen Jehova. No say sakey et alablabas ya mapaga ed no antoy nagawa ed arapen, ompan manmatalek lad sarili to imbes ya diad Dios, tan satan so nayarin maneral na relasyon tod si Jehova.—Pro. 3:5, 6; Fil. 4:6, 7.

20. (a) Antoy nayarin iplanom diad panlilingkor mod si Jehova? (b) Panon mon napasimpli bilay mo?

²⁰ Anggapoy maabig ya nagunggona no paulyanan iray kimey na Panarian pian napansiansia labat so maluhon panagbilay. Imbes, manggawa tayo na saray planon nipaakar ed espiritual. Alimbawa, sarag mo kasi onalis ed kongregasyon ya baleg so pankaukolan parad saray manangipalapag na Panarian? Sarag mo kasi manpayunir? No payunir ka la, kasin ninonot mo lay man-aplay ed School for Kingdom Evangelizers? Sarag mo kasi man-part time commuter diad Bethel o diad remote translation office? Sarag mo kasi manboluntaryo ed Local Design/Construction, mankimey a part-time diad panagpaalagey na saray Kingdom Hall? Isipen no panon mon napasimpli bilay mo tan mas makapibiang kad saray kimey parad Panarian. Pannonotan mo imay walad kahon ya “ No Panon Mon Napasimpli Bilay Mo,” tan gapoan mo lan gawaen no anto ray nakaukolan pian nasumpal so planom.

21. Antoy ontulong pian mas onapit kad si Jehova?

²¹ Walay maabig ya rason no akin ya imbangat nen Jesus ya anapen tayo so Panarian, aliwan saray materyal a bengatla. No gawaen tayo itan, agtayo kaukolan ya pampagaan iray nakaukolan tayon materyal. Mas onapit tayo ed si Jehova no manmatalek tayod sikato tan agtayo pagustoan so amin ya pilalek tayo odino saliwen so amin a bengatlan iyoopresi na mundo, anggano walay isaliw tayo. Say pamasimpli ed bilay tayo natan et makatulong pian ‘nabembenan tayon malet so tuan bilay’ diad arapen.—1 Tim. 6:19.