1. Fu san ede wi kan taki dati san wan sma abi fanowdu, a no a srefi leki san wan sma wani?

WAN TU sani nomo de di wan sma abi fanowdu trutru, ma furu sani de di wan sma wani. Furu sma no man si taki san wan sma abi fanowdu, a no a srefi leki san wan sma wani. Den sani di wan sma abi fanowdu na nyanyan, krosi nanga wan presi fu tan. Den sani disi de fanowdu fu di wan sma no man libi sondro den. Na a tra sei, yu abi sani di sma wani, ma den sani disi no de fanowdu fu tan na libi.

2. San na wan tu sani di sma wani?

² A no ala ten sma wani a srefi sani. Fu eksempre, sma di e libi na pôti kondre breiti kaba te den abi nofo moni fu bai wan cel, wan bromfiets noso wan pisi gron. Ma na gudu kondre, a kan taki sma lobi bai diri krosi, bigi oso noso diri wagi. Ma awinsi pe wi e libi, wi musu luku bun taki wi no e feti fu kon abi moro gudu, awinsi wi abi den fanowdu noso awinsi wi man bai den.

3. San a wani taki fu feti baka gudu?

³ O ten wi kan taki dati wan sma e feti baka gudu? Na te a e prakseri nomo fu kon abi gudu na presi fu meki muiti fu kon abi wan bun matifasi nanga Gado. Gudu e kon tron a moro prenspari sani na ini en libi. So wan sma e angri nomo fu bai wan lo sani èn a no de tevrede nanga san a abi fanowdu trutru. A no abi fu de so taki wan sma di e feti baka gudu, abi furu moni noso e bai diri sani. Srefi pôtisma kan feti baka gudu, na presi fu poti a Kownukondre na a fosi presi.​—Hebr. 13:5.

4. Fa Satan e gebroiki „a lostu fu den ai” fu kori wi?

⁴ Satan e gebroiki reklame fu kori wi. A wani meki wi bribi taki wi o de koloku soso te wi e bai sani di no de fanowdu. A sabi fa a musu gebroiki „a lostu fu den ai” fu kori sma (1 Yoh. 2:15-17; Gen. 3:6; Odo 27:20). Na ini a grontapu disi yu kan bai ala sortu moimoi sani. Sonwan fu den wi kan gebroiki heri bun, trawan na lawlaw sani. A pasa wan leisi kaba taki yu bai wan sani, kande fu di yu si en na ini wan reklame noso na wan wenkri, aladi yu no ben abi en fanowdu trutru? Yu ben kon si bakaten taki na somaar yu bai en? Den sortu sani dati e meki a libi fu wi kon moro hebi. Den kan meki taki wi no abi nofo ten moro fu studeri Bijbel, fu sreka gi den konmakandra, fu teki prati na den èn fu go na ini a preikiwroko. No frigiti taki na apostel Yohanes ben warskow wi taki „grontapu e pasa gowe nanga den lostu fu en”.

5. San kan pasa nanga sma di e prakseri nomo fu kon gudu?

⁵ Satan wani taki wi musu dini Gudu na presi fu Yehovah (Mat. 6:24). Sma di e gebroiki ala den ten nanga den krakti fu kon gudu e kon si bakaten taki den no de koloku. Disi de so fu di den e denki densrefi nomo. San moro ogri na taki den e lasi bribi èn den abi furu sari nanga broko-ede (1 Tim. 6:9, 10; Openb. 3:17). Na dati Yesus ben taki di a fruteri wan tori pe a ben agersi a Kownukondre boskopu nanga siri di wan man e sai. A ben taki dati „a wani di sma wani tra sani”, de leki makabon di kan kiri a siri so taki a no e gro èn a no e meki froktu.​—Mark. 4:14, 18, 19.

6. San wi kan leri fu a tori fu Baruk?

⁶ Luku a tori fu Baruk, a sekretarsi fu a profeiti Yeremia. Aladi Yerusalem ben de fu kisi pori, Baruk bigin „suku bigi sani” gi ensrefi di ben o lasi gowe. Ma a wan-enkri sani di Baruk ben musu hori na prakseri na san Yehovah ben pramisi en. Yehovah ben taki: „Mi o meki yu tan na libi” (Yer. 45:1-5). Wi sabi taki Gado no ben o kibri den gudu fu den sma na ini a foto di a ben o pori (Yer. 20:5). Now di wi e doro a kaba fu a grontapu disi, a no a ten fu go suku moro gudu. Wi no musu denki taki te a bigi banawtu doro, den gudu fu wi di warti gi wi kande, o pasa go nanga wi na ini a nyun grontapu.​—Odo 11:4; Mat. 24:21, 22; Luk. 12:15.

7. San wi o go luku now èn fu san ede?

⁷ Yesus gi wi bun rai di kan yepi wi fu feni san wi abi fanowdu na ini a libi. Den rai disi o yepi wi fu no frigiti san prenspari trutru, fu no feti baka gudu èn fu no broko wi ede fu soso. Wi kan feni a rai fu Yesus na ini a takimakandra di a ben hori na tapu Olèif-bergi (Mat. 6:19-21). Wi o leisi wan pisi fu en di skrifi na Mateyus 6:25-34 èn te wi o taki fu en, dan wi o si taki wi musu ’tan suku a Kownukondre’.  Wi no musu suku tra sani.​—Luk. 12:31.

8, 9. (a) Fu san ede wi no musu broko wi ede tumusi nanga san wi abi fanowdu? (b) Fu san ede wi kan taki dati Yesus sabi fa libisma de èn san den abi fanowdu?

⁸ Leisi Mateyus 6:25. Yesus ben sabi taki den arkiman fu en ben e broko den ede nanga sani di no ben de fanowdu. Dati meki a ben taigi den fu ’no broko den ede moro nanga den libi’. Yesus ben sabi fu san ede a taigi den a sani disi. Te wan sma e broko en ede tumusi, awinsi na fu sani di a abi fanowdu, dan dati kan meki taki ala ten en ati de na dyompo. A e frigiti taki na anbegi fu Gado na a moro prenspari sani na ini a libi. Yesus ben lobi den bakaman fu en so te, taki a warskow den gi a sani disi ete fo leisi na ini a takimakandra fu en.​—Mat. 6:27, 28, 31, 34.

⁹ Fu san ede Yesus taigi wi taki wi no musu broko wi ede nanga san wi o nyan, san wi o dringi noso san wi o weri? A no de so taki wi abi den sani disi fanowdu fu tan na libi? Iya, wi abi den fanowdu. Dati meki te wi no abi moni fu bai den, dan wi kan frustan taki wi o broko wi ede. Yesus ben sabi dati tu. A ben sabi heri bun san sma abi fanowdu fu tan na libi ibri dei. Boiti dati, a ben sabi sortu problema ben o miti den bakaman fu en di ben o libi na ini „den lasti dei” pe ’muilek ten ben o de di tranga fu pasa’ (2 Tim. 3:1). A ben o muilek gi den fu feni wroko, moni ben o lasi en waarde, nofo nyanyan no ben o de èn furu fu den ben o pôti srefisrefi. Toku Yesus ben sabi taki ’a libi prenspari moro leki nyanyan èn taki a skin prenspari moro leki krosi’.

10. Soleki fa Yesus leri den bakaman fu en fu begi, dan san musu de a moro prenspari sani na ini den libi?

¹⁰ Na a bigin fu en takimakandra, Yesus ben leri den arkiman fu en taki te den ben e begi, den musu aksi den hemel Tata fu gi den san den abi fanowdu. Den ben musu aksi: „Gi wi a brede di wi abi fanowdu gi a dei disi” (Mat. 6:11). Na wan tra okasi a taigi den baka fu begi gi den sani di den abi fanowdu ibri dei (Luk. 11:3). Ma disi no wani taki dati wi musu denki soso den sani disi wawan. Na ini a srefi begi di Yesus leri den bakaman fu en, a sori taki Gado Kownukondre musu kon na a fosi presi (Mat. 6:10; Luk. 11:2). Fu yepi den arkiman fu en fu no broko den ede tumusi, Yesus sori den taki Yehovah man sorgu heri bun gi ala libisani di a meki.

11, 12. San wi e leri fu a fasi fa Yehovah e sorgu gi den fowru? (Luku a prenki na a bigin fu na artikel.)

¹¹ Leisi Mateyus 6:26. Wi musu „luku den fowru di e frei na loktu bun”. Den meti disi pikin, ma den e nyan furu froktu, siri, insekt nanga woron. Te yu luku en bun, dan den e nyan moro wan libisma srefi. Toku den no abi fu wroko gron noso prani siri fu kan feni nyanyan. Yehovah e gi den ala san den abi fanowdu (Ps. 147:9). Wi sabi taki Yehovah no e poti a nyanyan na ini den mofo. Nyanyan lai, ma den srefi musu go suku en.

¹² Yesus ben sabi taki efu en hemel Tata e sorgu gi fowru, dan seiker a o sorgu gi libisma tu ^[1] (1 Petr. 5:6, 7). Yehovah no o poti nyanyan na ini wi mofo, ma a o blesi wi gi a muiti di wi e meki fu prani sani so taki wi kan feni a nyanyan di wi abi fanowdu. A e blesi wi tu te wi e wroko moni fu bai den sani di wi abi fanowdu ibri dei. Te wan nowtu de, a kan  gi trawan deki-ati fu prati san den abi nanga wi. Na ini a takimakandra fu en, Yesus no ben taki fu a fasi fa fowru e feni wan tanpresi. Ma wi sabi taki Yehovah gi den a koni fu man bow den eigi nesi èn fu sabi san den kan gebroiki fu du dati. Sobun, Yehovah kan yepi wi tu fu feni wan bun oso gi wi nanga wi osofamiri.

13. Fa wi sabi taki wi warti moro fowru di e frei na loktu?

¹³ Baka dati Yesus aksi den arkiman: ’Unu no warti moro den fowru di e frei na loktu?’ Kande fu di Yesus ben sabi taki a ten ben doro taki a ben o dede gi libisma, meki a ben taki a sani disi. (Luku Lukas 12:6, 7.) A frulusu-ofrandi fu Krestes no ben de gi tra libisani. Yesus no dede gi den fowru di e frei na loktu, ma a dede gi wi so taki wi kan kisi têgo libi.​—Mat. 20:28.

14. San wan sma di e broko en ede, no man du noiti?

¹⁴ Leisi Mateyus 6:27. Fu san ede Yesus taki dati wan sma di e broko en ede nanga sani, no kan meki en libi kon pikinso moro langa? We, awinsi wi e broko wi ede nanga san wi abi fanowdu ibri dei, toku wi no o libi moro langa. Na presi fu dati, wi o syatu a libi fu wi.

15, 16. (a) San wi e leri fu a fasi fa Yehovah e sorgu gi den leilibromki na ini a sabana? (Luku a prenki na a bigin fu na artikel.) (b) Sortu aksi wi musu poti gi wisrefi èn fu san ede?

¹⁵ Leisi Mateyus 6:28-30. Ala sma wani moi krosi, spesrutu te a abi fu du nanga na anbegi fu wi, soleki te wi e go na ini a preikiwroko, na den konmakandra noso na den kongres. Ma disi wani  taki dati wi musu ’broko wi ede nanga san wi o weri?’ Yesus e poti wi prakseri baka na a fasi fa Yehovah e sorgu gi den sani di a meki. Wi kan leri furu fu „den leilibromki na ini a sabana”. Kande Yesus ben prakseri den difrenti sortu moi leili soleki gladiool nanga tulp. Den bromki disi no abi fu nai krosi, ma toku den moi kefalek. „Srefi Kownu Salomo di ben abi someni glori no ben weri so moi leki wan fu den bromki disi”!

¹⁶ Luku san Yesus taki dya: „Gado e meki den sani di e gro na ini a sabana weri so moi . . . Efu dati de so, dan a de seiker taki a o gi unu di no e bribi nofo, sani fu weri, a no so?” Wi kan de seiker taki a o du disi! Ma a bribi fu den bakaman fu Yesus ben swaki pikinso (Mat. 8:26; 14:31; 16:8; 17:20). Dati meki den ben musu tranga a bribi fu den èn den ben musu leri fu frutrow moro na tapu Yehovah. Fa a de nanga wi? O tranga wi e bribi taki Yehovah wani sorgu gi wi èn taki a man du dati tu?

17. San kan pori a matifasi di wi abi nanga Yehovah?

¹⁷ Leisi Mateyus 6:31, 32. Wi no musu de leki „den grontapusma” di no e bribi taki wi lobi-ati hemel Tata man sorgu gi den wan di e poti en Kownukondre na a fosi presi. Efu wi ben o feti baka ’ala den sani di den grontapusma e feti fu kisi’, dan wi ben o pori a matifasi di wi abi nanga Yehovah. Wi kan bribi taki te wi e du san Yehovah e aksi fu wi èn wi e poti na anbegi fu en na a fosi presi, dan a o gi wi san wi abi fanowdu. Te wi e „dini Gado fayafaya” tu, dan wi o de tevrede  nanga ’nyanyan, krosi noso wan presi fu tan’.​—1 Tim. 6:6-8.

18. San Yehovah sabi fu ibriwan fu wi èn san a o du gi wi?

¹⁸ Leisi Mateyus 6:33. Ala ten a Kownukondre musu de a moro prenspari sani gi bakaman fu Krestes. Te dati de so, dan soleki fa Yesus taki ’wi o kisi ala den tra sani tu’. Fu san ede a ben kan taki dati? Na ini vers 32 a e taki: „Un Tata na hemel sabi taki unu abi ala den sani disi fanowdu.” A sabi taki wi musu nyan, wi musu abi krosi èn wi musu abi wan presi fu tan. Ala den sani disi a sabi, srefi fosi wi sabi dati (Fil. 4:19). A sabi sortu krosi fu wi no o bun fu weri moro. A sabi san wi musu nyan fu tan gosontu èn sortu oso o bun gi wi nanga wi osofamiri fu tan. Yehovah o sorgu taki wi feni san wi abi fanowdu trutru.

19. Fu san ede wi no musu broko wi ede tumusi nanga san o pasa tamara?

¹⁹ Leisi Mateyus 6:34. Dyaso Yesus e taki baka: „Noiti un musu broko un ede.” A no wani taki wi e broko wi ede nanga den sani fu tamara, ma ibri dei wi musu abi a frutrow taki Yehovah o yepi wi. Efu wan sma e broko en ede tumusi nanga san o pasa tamara, dan kande a o bigin frutrow tapu ensrefi na presi fu frutrow tapu Gado. Disi kan pori a matifasi di a abi nanga Yehovah.​—Odo 3:5, 6; Fil. 4:6, 7.

20. (a) San yu wani du moro na ini a diniwroko? (b) San yu kan kenki na ini yu libi fu du moro gi Yehovah?

²⁰ A ben o de wan don sani efu wi ben o feti fu kon abi wan gudu libi na presi fu suku a Kownukondre fosi. Na a anbegi fu wi musu kon na a fosi presi. Fu eksempre, yu kan froisi go na wan gemeente pe moro Kownukondre preikiman de fanowdu? Yu man tron wan pionier? Efu yu e pionier kaba, yu prakseri fu gi yu nen gi a Skoro gi Kownukondre preikiman? Yu man go yepi wan tu dei na Betel noso na wan vertaal kantoro? Yu kan gi yu nen na a bow-kantoro so taki yu kan yepi bow Kownukondre zaal wan tu dei na ini a wiki? Prakseri fa yu kan seti yu libi na so wan fasi taki yu kan abi moro ten fu horibaka gi a Kownukondre. Luku a faki di nen „ San yu kan kenki na ini yu libi fu du moro gi Yehovah?”, dan begi Yehovah fu a yepi yu. Baka dati du ala san yu man fu kan du moro.

21. San o yepi yu fu kon moro krosibei na Yehovah?

²¹ Yesus ben abi leti di a taigi wi fu suku a Kownukondre èn fu no suku tra sani. Te wi e du dati, dan noiti wi o abi fu broko wi ede nanga san wi abi fanowdu. Wi o kon moro krosibei na Yehovah fu di wi e frutrow na en tapu. Wi no o gridi fu kon abi sani noso fu bai iniwan sani di de fu bai na ini a grontapu disi, srefi efu wi abi a moni fu bai den. Te wi e kenki son sani na ini wi libi fu kan du moro gi Yehovah, dan wi o man „grabu a trutru libi hori bun steifi”.​—1 Tim. 6:19.