1. Ano an kaibahan han “panginahanglan” ngan “karuyag”?

MAY mga nasiring nga gutiay la an panginahanglan han tawo, pero an iya mga karuyag waray tubtoban. Baga hin damu an diri maaram han kaibahan han materyal nga panginahanglan ngan karuyag. Ano an kaibahan hito? An “panginahanglan” amo an butang nga kinahanglan magkaada ka basi ka mabuhi. An pagkaon, bado, ngan urukyan amo an mga butang nga ginkikinahanglan gud naton. An “karuyag” amo an butang nga karuyag mo magkaada ka, pero diri ito importante ha adlaw-adlaw nga pagkinabuhi.

2. Ano an pipira nga butang nga karuyag han mga tawo?

² An karuyag han mga tawo posible nga magkaiba-iba, depende kon diin hira naukoy. Ha pobre nga mga nasud, bangin karuyag la han damu nga magkaada igo nga kwarta basi makapalit hin celfon, motor, o gutiay nga lote. Ha riko nga mga nasud, bangin karuyag han mga tawo nga magkaada damu ngan magarbo nga bado, daku nga balay, o marahalon nga sarakyan. Hain man hini nga kahimtang, may-ada gud daku nga  peligro nga mahilit-ag ha materyalismo​—an padayon nga paghingyap hin mas damu nga butang, kinahanglan man naton ito o diri ngan maaakos man naton ito o diri.

3. Ano an materyalismo?

³ Ano an materyalismo? Ito an pagpokus ha materyal nga mga butang imbes nga ha espirituwal nga karikohan. An materyalismo nakakaimpluwensya gud ha usa​—ha iya mga hingyap, prayoridad, ngan ha kon ano an importante ha iya kinabuhi. Gin-aaghat kita hito nga maghingyap hin mas damu nga materyal nga panag-iya. Mahimo magin materyalistiko an usa bisan kon diri damu an iya kwarta o namamalit hin marahalon nga mga butang. Bisan an mga pobre mahimo mabiktima han materyalismo, ngan bangin diri na nira magin prayoridad an Ginhadian.​—Heb. 13:5.

4. Paonan-o ginagamit ni Satanas “an hingyap han mga mata”?

⁴ Karuyag ni Satanas nga hunahunaon naton nga importante an pagkaada damu nga materyal nga mga butang basi kita magin malipayon. Salit ginagamit niya an komersyo han kalibotan ngan an “hingyap han mga mata” ha pagdani ha aton, ngan eksperto hiya ha pagbuhat hito. (1 Juan 2:15-17; Gen. 3:6; Prob. 27:20) An kalibotan nagtatanyag han ngatanan nga klase hin materyal nga butang​—tikang ha pinakamaopay tubtob ha waray pulos—​ngan an pipira hito nakakadani gud. May ginpalit ka na ba nga diri mo man kinahanglan, pero ginpalit mo ito kay nadani ka han adbertisment o tungod kay makaruruyag ito pagkit-on ha displey? Kon oo, bangin ha urhi nasantop mo nga puydi ka man ngay-an mabuhi bisan waray ito. An diri importante nga mga butang nakakapasamok ngan nakakapabug-at la ha aton kinabuhi. Mahimo ito makalit-ag ha aton ngan makaulang han aton espirituwal nga mga buruhaton sugad han pag-aram ha Biblia, pagpangandam ngan pagtambong ha mga katirok, ngan regular nga pakigbahin ha ministeryo. Hinumdumi nga hi apostol Juan nagpahamangno: “An kalibotan mawawara pati an mga hingyap hito.”

5. Ano an mahimo mahitabo hadton nagpupokus ha pagkaada damu nga materyal nga butang?

⁵ Karuyag ni Satanas nga magpauripon kita ha Karikohan imbes nga kan Jehova. (Mat. 6:24) Pero kon magpupokus kita ha pagkaada damu nga materyal nga butang ngan pagpatagbaw ha kalugaringon, magigin waray katuyoan an aton kinabuhi. Mas maraot pa gud, madadaot an aton maopay nga relasyon ha Dios ngan magigin masurub-on gud kita. (1 Tim. 6:9, 10; Pah. 3:17) Pariho hito an iginhulagway ni Jesus ha iya ilustrasyon mahitungod han magsarabwag. Han an mensahe han Ginhadian han Dios “nahisabwag ha katunokan . . . , an paghingyap hin iba pa nga butang nakasulod ha ira kasingkasing ngan natabonan an pulong, salit waray ito mamunga.”​—Mar. 4:14, 18, 19.

6. Ano an aton mahibabaroan kan Baruk?

⁶ Tagda hi Baruk, an sekretaryo ni propeta Jeremias. Han hirani na mabungkag an Jerusalem, hi Baruk ‘nangita han dagku nga butang’ para ha iya kalugaringon​—mga pangalimbasog nga waray nagpapadayon nga kapulsanan. Pero an sadang la unta niya laoman amo an iginsaad ha iya ni Jehova: “An imo kinabuhi akon ihahatag ha imo sugad nga dinakpan.” (Jer. 45:1-5) Diri gud papanalipdan ni Jehova an materyal nga mga panag-iya han bisan hin-o ha syudad nga iya bubungkagon. (Jer. 20:5) Samtang nagtitikahirani an kataposan hini nga sistema, diri gud yana an panahon nga magtirok hin damu nga materyal nga butang para ha aton kalugaringon. Diri naton sadang laoman nga an aton mga panag-iya, mationan-o man ito kaimportante o kabirilhon, matatalwas kaupod naton durante han daku nga kasakitan.​—Prob. 11:4; Mat. 24:21, 22; Luc. 12:15.

7. Ano an aton sunod nga hihisgotan, ngan kay ano?

⁷ Gintagan kita ni Jesus han pinakamaopay nga sagdon kon paonan-o magkakaada han aton mga panginahanglan nga diri kita nauulang, nagigin materyalistiko, o nababaraka hinduro. Igin-upod niya ito ha iya Sermon ha Bukid. (Mat. 6:19-21)  Aton basahon ngan usisahon an bahin hito nga nakarekord ha Mateo 6:25-34. An pagbuhat hini magkukombinse ha aton nga kinahanglan naton ‘padayon nga pamilngon an Ginhadian,’ diri an mga butang.​—Luc. 12:31.

8, 9. (a) Kay ano nga diri kita sadang magkinabaraka hin sobra ha mga butang nga aton ginkikinahanglan? (b) Ano an hinbabaroan ni Jesus may kalabotan ha mga tawo ngan han ira mga panginahanglan?

⁸ Basaha an Mateo 6:25, ftn. Hi Jesus nagsiring ha iya mga mamarati: “Ayaw na kamo pagkinabaraka han iyo kinabuhi.” May maopay gud nga rason hi Jesus ha pagsiring hito ha ira kay nababaraka hira ha mga butang nga diri angay kabarak-an. An sobra nga pagkinabaraka, bisan ha mga butang nga ginkikinahanglan gud naton, makakagwara han aton pokus ngan makakatabon han mas importante nga butang​—an aton espirituwal nga panginahanglan. Hinigugma gud ni Jesus an iya mga disipulo salit ha iya sermon upat pa ka beses nga ginpahamangnoan niya hira mahitungod hini nga peligro.​—Mat. 6:27, 28, 31, 34.

⁹ Kay ano nga ginsidngan kita ni Jesus nga diri mabaraka ha aton kakaunon, iinumon, o isusul-ot? Diri ba ito an pipira han aton nangunguna nga mga panginahanglan? Aw, oo. Kon waray kita igo nga kwarta basi magkaada hito, diri ba kita mababaraka? Syempre mababaraka kita, ngan maaram hito hi Jesus. Maaram gud hiya han aton panginahanglan ha adlaw-adlaw. Labot pa hito, maaram hiya nga paglabay hin mga siglo, an iya mga disipulo makakaeksperyensya hin magkuri nga kahimtang tungod kay magkikinabuhi hira ha “kataposan nga mga adlaw” ngan “peligroso nga mga panahon nga makuri pakiangayan.” (2 Tim. 3:1) Ito nga mga kahimtang nag-uupod han kawaray-trabaho, makuri nga ekonomiya, kakulang hin pagkaon, ngan duro nga kapobrehan nga naieksperyensyahan han damu yana. Pero maaram liwat hi Jesus nga “mas importante an kinabuhi kay ha pagkaon ngan an lawas kay ha bado.”

10. Han gintutdoan ni Jesus an iya mga sumurunod kon paonan-o mag-aampo, ano an iya ginsiring nga sadang magin pinakaimportante ha ira kinabuhi?

¹⁰ Antes unabihon ni Jesus ini nga sagdon, gintutdoan niya an iya mga mamarati nga mag-ampo ha ira langitnon nga Amay nga tagan hira han ira materyal nga mga panginahanglan. Hiya nagsiring nga puydi hira maghangyo: “Tagi kami hin pagkaon para yana nga adlaw.” (Mat. 6:11) Ha iba liwat nga kahimtang, ginsidngan utro hira ni Jesus nga ig-ampo an ira mga panginahanglan ha adlaw-adlaw. (Luc. 11:3) Pero ini nga sagdon diri nagpapasabot nga paghihinunahunaon na la naton pirme an materyal nga mga butang. Hito gihapon nga modelo nga pag-ampo, ginpabug-atan ni Jesus nga mas importante an pag-ampo nga umabot an Ginhadian han Dios. (Mat. 6:10; Luc. 11:2) Basi diri magkinabaraka an iya mga mamarati, sunod nga ginpabug-atan niya an pagin masasarigan ni Jehova sugad nga Paratagana.

11, 12. Ano an aton hibabaroan han paagi ni Jehova ha pagmangno ha mga tamsi? (Kitaa an retrato ha tinikangan hini nga artikulo.)

¹¹ Basaha an Mateo 6:26. Kinahanglan naton ‘obserbaran hin maopay an mga tamsi.’ Bisan kon gudtiay ito nga linarang, damu an ira ginkakaon nga prutas, liso, insekto, o ulod. Ngani, kon an mga tamsi pariho kadaku ha tawo, mas damu an ira ginkakaon kay ha aton. Pero, diri hira nag-uuma ngan nagtatanom basi makakaon. Gintataganahan hira ni Jehova han ngatanan nira nga ginkikinahanglan. (Sal. 147:9) Syempre diri niya iginhuhungit ha ira an pagkaon! Bisan kon hura an pagkaon, kinahanglan nira ito pamilngon.

¹² Maaram gud hi Jesus nga kon an iya langitnon nga Amay nagtatagana hin pagkaon ha mga tamsi, imposible nga diri Hiya magtagana han nangunguna nga panginahanglan han mga tawo. ^[1] (1 Ped. 5:6, 7) Diri niya ihuhungit ha aton an pagkaon, pero mahimo niya bendisyonan an aton mga pangalimbasog ha pagtanom basi makakaon o ha pagtrabaho basi makapalit han aton adlaw-adlaw nga panginahanglan. Kon kulang an aton  panginahanglan, mahimo niya pagiuson an iba nga tagan kita. Bisan kon waray unabiha ni Jesus an pagtagana hin urukyan para ha mga tamsi, gintagan ito ni Jehova hin kinaiya, abilidad, ngan mga materyales ha paghimo hin salag. Mabubuligan liwat kita ni Jehova nga magkaada hin angayan nga urukyan para ha aton pamilya.

13. Ano an pamatuod nga mas importante kita kay ha mga tamsi?

¹³ Hi Jesus nagpakiana ha iya mga mamarati: “Diri ba mas importante kamo kay ha [mga tamsi]?” Posible gud nga ginhuhunahuna ni Jesus nga diri na mag-iiha isasakripisyo niya an iya kinabuhi para ha mga tawo. (Itanding an Lucas 12:6, 7.) An halad-lukat han Kristo waray itagana para ha iba nga linarang. Hi Jesus waray mamatay para ha mga tamsi, lugod namatay hiya para ha aton basi kita magkaada kinabuhi nga waray kataposan.​—Mat. 20:28.

14. Ano an diri mahihimo han tawo bisan kon magkinabaraka hiya?

¹⁴ Basaha an Mateo 6:27. Kon sugad, kay ano nga nagsiring hi Jesus nga an tawo nga pirme nababaraka diri makakadugang bisan gutiay la nga kahilaba han iya kinabuhi? Tungod kay an sobra nga pagkinabaraka ha aton adlaw-adlaw nga panginahanglan diri makakabulig nga maghilawig an aton kinabuhi; lugod, mahimo ito magpahalipot han aton kinabuhi.

15, 16. (a) Ano an aton hibabaroan ha paagi han pagmangno ni Jehova ha mga bukad ha kapatagan? (Kitaa an retrato ha tinikangan hini nga artikulo.) (b) Ano an mahimo naton igpakiana ha aton kalugaringon, ngan kay ano?

¹⁵ Basaha an Mateo 6:28-30. Hin-o an nadiri nga magkaada maopay nga bado, labi na kon nakikigbahin ha espirituwal nga mga buruhaton sugad han pagsangyaw o pagtambong ha mga katirok ngan asembleya? Pero sadang ba kita ‘mabaraka  han aton igbabado’? Ginpapahinumdoman kita utro ni Jesus mahitungod ha mga linarang ni Jehova. Hini nga takna, damu an aton hibabaroan may kalabotan ha pagkahimo han “mga bukad ha kapatagan.” Bangin nahunahuna ni Jesus an mga bukad ha kapatagan sugad han hyacinth, tulip, ngan iba pa​—ini ngatanan maopay gud an pagkadisenyo. Ini nga mga linarang diri kinahanglan maghimo hin inulang ngan magtahi hin bado para ha ira kalugaringon. Pero ini nga mga bukad makaruruyag gud pagkit-on! Ngani, “hi Solomon, bisan kon harangdon, waray makagbado hin sugad kaopay han mga bukad”!

¹⁶ Hibaroi an punto han ginsisiring ni Jesus: “Kon ginbabadoan han Dios an mga tanom ha kapatagan . . . , diri ba mas pagbabadoan gud kamo, kamo nga gutiay an pagtoo?” Sigurado nga bubuhaton gud ito han Dios! Kondi baga hin kulang hin pagtoo an mga disipulo ni Jesus. (Mat. 8:26; 14:31; 16:8; 17:20) Kinahanglan nira hin mas marig-on nga pagtoo ngan pagsarig kan Jehova. Kumusta man kita? Mationan-o karig-on an aton pagtoo ha abilidad ni Jehova ha pagtagana ha aton ngan ha iya hingyap ha pagbuhat hito?

17. Ano an posible makadaot han aton relasyon kan Jehova?

¹⁷ Basaha an Mateo 6:31, 32. Diri naton sadang subaron an “mga tawo ha kalibotan” nga diri natoo nga an aton mahigugmaon nga Amay ha langit nagtatagana hadton nangangalimbasog nga unahon ha ira kinabuhi an iya Ginhadian. An pangalimbasog nga magkaada han ngatanan nga “gintitinguha gud han mga tawo ha kalibotan” makakadaot han aton relasyon kan Jehova. Pero kon hihimoon naton an angay naton buhaton​—unahon an espirituwal nga mga butang ha aton kinabuhi—​makakasarig gud kita nga ihahatag ni Jehova an makakaopay para ha aton. An aton “debosyon ha Dios” sadang magpagios ha aton nga  magin kontento ha “pagkaada hin ginkakaon, ginsusul-ot, ngan gin-uukyan.”​—1 Tim. 6:6-8.

18. Ano an hinbabaroan ni Jehova ha kada tagsa ha aton, ngan ano an iya bubuhaton para ha aton?

¹⁸ Basaha an Mateo 6:33. Kinahanglan unahon pirme ha kinabuhi han mga disipulo han Kristo an Ginhadian. Kon bubuhaton naton ito, hi Jesus nagsiring nga “ini ngatanan [nga iba pa nga butang] idudugang” ha aton. Kay ano nga nakakasiguro hito ni Jesus? Iginsaysay niya ito ha nahiuna nga bersikulo: “An iyo Amay ha langit maaram nga ginkikinahanglan niyo ini ngatanan,” karuyag sidngon, an mga panginahanglan ha kinabuhi. Maaram gud hi Jehova kon ano an panginahanglan han kada tagsa may kalabotan ha pagkaon, bado, ngan urukyan antes pa naton ito mahibaroan. (Fil. 4:19) Maaram hiya han aton tagsa nga bado nga diri na magagamit. Maaram hiya kon ano an aton ginkikinahanglan nga pagkaon ngan urukyan, depende han kadaku han aton pamilya. Sisiguruhon ni Jehova nga may-ada kita han aton gud ginkikinahanglan.

19. Kay ano nga diri kita sadang mabaraka ha posible nga mahitabo ha tidaraon?

¹⁹ Basaha an Mateo 6:34. Tigamni nga ha ikaduha nga higayon hi Jesus nagsiring: “Ayaw gud kamo kabaraka.” Karuyag niya nga atubangon naton an mga problema la ha tagsa nga adlaw​—bug-os nga nasarig nga bubuligan kita ni Jehova. Kon sobra nga nagkikinabaraka an usa ha mahitatabo ha tidaraon, bangin sumarig na hiya ha iya kalugaringon imbes nga ha Dios, ngan makakaapekto gud ito ha iya relasyon kan Jehova.​—Prob. 3:5, 6; Fil. 4:6, 7.

20. (a) Ano nga tumong an mahimo mo kab-uton ha pag-alagad kan Jehova? (b) Ano an puydi mo himoon basi mapasimple an imo kinabuhi?

²⁰ Diri gud maaramon nga isakripisyo naton an mga buruhaton para ha Ginhadian basi la magkaada o matipigan an damu nga materyal nga butang. Lugod, sadang kita mangalimbasog nga magkab-ot hin espirituwal nga mga tumong. Pananglitan, mahimo ka ba bumalhin ha kongregasyon nga mas daku an panginahanglan hin magwarali han Ginhadian? Puydi ka ba magpayunir? Kon usa ka nga payunir, nagpaplano ka ba pag-aplay ha School for Kingdom Evangelizers? Mahimo ka ba magboluntaryo sugad nga part-time commuter ha Bethel o ha remote translation office? Puydi ka ba magboluntaryo ha Local Design/Construction, mag-alagad hin part-time ha mga proyekto han pagpanukod hin Kingdom Hall? Hunahunaa kon ano an puydi mo himoon basi mapasimple an imo kinabuhi ngan mas makapokus ha mga buruhaton han Ginhadian. Tagda an kahon nga “Kon Paonan-o Mapapasimple an Imo Kinabuhi,” ngan pag-ampo kan Jehova para han giya. Katapos, himoa an ginkikinahanglan nga mga pitad basi makab-ot an imo tumong.

21. Ano an mabulig ha imo nga magin mas duok kan Jehova?

²¹ May maopay gud nga rason hi Jesus nga gintutdoan kita niya nga pamilngon an Ginhadian, diri an mga butang. Kon bubuhaton naton ito, diri gud kita mababaraka mahitungod han aton materyal nga mga panginahanglan. Nagigin mas duok kita kan Jehova kon nasarig kita ha iya ngan ginpupugngan naton an aton kalugaringon nga sundon an ngatanan naton nga hingyap o paliton an ngatanan nga butang nga gintatanyag han kalibotan, bisan kon maaakos naton ito. An pagpasimple han aton kinabuhi yana mabulig ha aton nga ‘makaptan hin marig-on an totoo nga kinabuhi’ nga hirani na umabot.​—1 Tim. 6:19.