IMAHINARON mong naglalakaw ka sa sarong tinampo sa kamatangaan nin banggi. Bigla na sana, narisa mong may nagsusunod sa saimo. Kan magpundo ka, nagpundo man siya. Kan rinikasan mo an lakaw, rinikasan man niya an lakaw niya. Nagdalagan ka na; naghidali kang makaabot sa haraning harong kan amigo mo. Kan buksan kan amigo mo an pinto asin palaugon ka, nakahangos ka nin hararom.

Tibaad dai mo man naeksperyensiyahan an arog kaiyan na sitwasyon; pero may iba pang kahaditan sa buhay an tibaad makapahandal o makapaproblema sa saimo. Halimbawa, may pinaglalabanan ka daw na sarong kaluyahan na imbes na mapangganahan, padagos mo iyan na nagigibo? Haloy ka na daw na mayong trabaho asin maski ginibo mo na gabos, dai ka pa man giraray makakua? Ikinakahadit mo daw an paggurang asin pagkaigwa mo nin mga hilang sa maabot na panahon? O may ibang bagay pa daw na nakakapapurisaw sa saimo?

Ano man an problema, bako daw na napapahalagahan mo kun may saro na mapagsasabihan mo kan mga ikinakahadit mo asin andam na magtabang sa saimo? Igwa ka daw nin arog kaiyan kadayupot na katuod? Igwa nanggad! Si Jehova nagin arog kaiyan na katuod para sa patriyarkang si Abraham asin arog man siya kaiyan sa saimo, siring kan ipinapahiling sa Isaias 41:8-13. Sa mga bersikulo 10 asin 13, nanunuga si Jehova sa saiyang mga lingkod: “Dai ka matakot, huli ta kaibanan mo ako. Dai ka maghadit, huli ta ako an saimong Diyos. Papakusugon taka, iyo, tatabangan taka, talagang kakaputan taka kan sakong tuong kamot nin katanusan. Huli ta ako, si Jehova na saimong Diyos, nagkakapot sa saimong tuong kamot, an Saro na nagsasabi sa saimo, ‘Dai ka matakot. Tatabangan taka.’” (NW)

Bako daw na nakakapakusog sa saimo an mga tataramon na iyan? Imahinaron an saimong sadiri sa ilustrasyon na itinao ni Jehova. Dai digdi ilinaladawan na sabay kamong naglalakaw ni Jehova mantang kapot niya an saimong kamot, baga man magayon na isipon iyan. Huli ta kun arog kaiyan, dapat an tuo niyang kamot an nakakapot sa wala mong kamot. Pero an sabi kan teksto, inuunat ni Jehova an saiyang “tuong kamot nin katanusan” asin kinakaputan an “saimong tuong kamot,” na garo baga hinahawas ka sa sarong masakit na sitwasyon sa buhay. Mantang ginigibo niya iyan, pinapakusog ka niya na sinasabi: “Dai ka matakot. Tatabangan taka.”

Nahihiling mo daw si Jehova bilang sarong mamumuton na Ama asin Katuod na andam na magtabang sa saimo pag nasa masakit kang sitwasyon? Interesado siya sa saimo, nagmamalasakit siya, asin gustong-gusto ka niyang tabangan. Pag nasa kasakitan, gusto ni Jehova na mamatian mong tiwasay ka huling namumutan ka niya. Tunay nanggad na siya “sarong tabang na makukua tulos sa mga panahon nin kasakitan.”—Sal. 46:1, NW.

Padagos na ginigirumdom kan iba an mga nakaagi nindang sala asin iniisip kun baga talagang napatawad  na sinda nin Diyos. Kun arog kaini an sitwasyon mo, isipon an maimbod na si Job na inadmitir na nakagibo siya nin “mga kalapasan kan [siya hoben] pa.” (Job 13:26, An Banal na Biblia) Arog man kaiyan an namatian kan salmistang si David asin nakimahirak siya ki Jehova: “An mga kasalan kan sakong pagkahoben asin an sakong mga kasumbikalan dai [paggirumduma].” (Sal. 25:7, An Banal na Biblia) Huling bako kitang perpekto, gabos kita ‘nagkasala asin dai nakaabot sa kamurawayan nin Diyos.’—Roma 3:23.

An mensahe sa Isaias kapitulo 41 inot na isinurat para sa suanoy na banwaan nin Diyos. Magabat na marhay an pagkakasala ninda kun kaya pinadusahan sinda ni Jehova paagi sa pagdara sa sainda bilang bihag sa Babilonya. (Isa. 39:6, 7) Pero kasabay kaiyan, nanuga pa man giraray an Diyos na ililigtas niya idtong magsusurulsol asin mabalik sa saiya! (Isa. 41:8, 9; 49:8) Ipinapahiling man ni Jehova ngunyan an siring na pagkamuot asin pagkahirak sa sinserong mga tawo na gustong makamtan an saiyang pag-uyon.—Sal. 51:1.

Pag-isipan an eksperyensiya ni Takuya, * na pinagmaigutan na halion an maati niyang bisyo nin paghiling nin pornograpiya asin masturbasyon. Pero, pirmi pa man giraray siyang minabalik sa dati niyang gibo. Ano an namatian niya? Sinabi niya: “Pagmati ko, talagang dai akong kuwenta; pero kan mamibi ako ki Jehova para maghagad nin tawad, garo ibinangon niya ako sa pagkabagsak ko.” Paano iyan ginibo ni Jehova? Sinabi kan mga elder sa kongregasyon ni Takuya na apudan niya sinda sa telepono pag nadara siya giraray kan kaluyahan niya. Inadmitir niya: “Nasasakitan akong mag-apod sa sainda, pero pag ginigibo ko iyan, napapakusog ako.” Dangan, inareglar kan mga elder sa paraataman nin sirkito na masungko sa pagpastor si Takuya. Sinabi sa saiya kan paraataman nin sirkito: “Dai nagkataon sana na yaon ako digdi. Gusto kan mga elder na magdigdi ako. Pinili ka ninda para makaulay taka sa pagdalaw ko.” Nagigirumduman ni Takuya: “Ako na an nagkasala, pero ako pa an tinabangan ni Jehova paagi sa mga elder.” Nag-uswag an espirituwalidad ni Takuya sagkod na nagin siyang regular payunir asin naglilingkod siya ngunyan sa sarong sangang opisina. Arog kan naeksperyensiyahan kan brother na ini, ibabangon ka nin Diyos sa saimong pagkabagsak.

Ikinakahadit man kan dakul an kawaran nin trabaho. An iba nawaran nin trabaho asin nadidipisilan na makahanap nin bagong malalaugan. Isipa an mamamatian mo kun dakul nang amo an nagsayuma sa saimo. Huli kaini, namamatian kan iba na dai na sindang halaga. Paano ka matatabangan ni Jehova? Tibaad dai ka man niya tatawan tulos nin marahay na trabaho, pero matatabangan ka niyang girumdumon an mga sinabi ni Hading David: ‘Aki pa ako kaidto, asin ngunyan gurang na; alagad dai ko pa nahiling na pinabayaan [ni Jehova] an matanos na tawo o na an saiyang mga aki nakilimos nin tinapay.’ (Sal. 37:25, An Marahay na Bareta Biblia) Iyo, mahalaga kang marhay ki Jehova, asin paagi kan saiyang “tuong kamot nin katanusan,” matatabangan ka niyang magkaigwa kan mga kinakaipuhan mo para padagos kang makapaglingkod sa saiya.

Nahiling ni Sara, na nakaistar sa Colombia, kun paano siya tinabangan ni Jehova. Halangkaw an suweldo niya sa sarong dakulang kompanya pero nauubos kaiyan an saiyang panahon. Gusto niyang  gumibo nin urog pa para ki Jehova, kaya nag-resign siya sa trabaho asin nagpayunir. Pero, dai siya tulos nakakakua nin part-time na trabaho na kaipuhan niya. Nagtugdok siya nin sadit na tindahan nin ice cream pero nalugi iyan. Sinabi ni Sara: “Tulong masakit na taon an uminagi, pero salamat ki Jehova ta nakatagal ako.” Nanudan niya an pagkakaiba kan luho sa talagang kaipuhan niya. Dai na man siya naghahadit dapit sa masunod na aldaw. (Mat. 6:33, 34) Sa kahuri-hurihi, inapudan siya kan dati niyang amo asin pinapabalik siya sa dati niyang posisyon sa trabaho. Sinabi niya na part-time na trabaho an hinahanap niya asin aakuon niya sana iyan kun tutugutan siyang magbakasyon sa aldaw kan saiyang espirituwal na mga gibuhon. Mas hababa na an suweldo ni Sara kisa kan sa dati, pero padagos man siyang nakakapagpayunir. Sa gabos na nangyari sa buhay niya, sinabi ni Sara: “Namatian ko an mamumuton na kamot ni Jehova.”

An paggurang an saro pang ikinakahadit nin dakul. Dakul na nasa edad nang magretiro an nahahadit kun may igo sindang kuwarta para magin komportable sa natatada pa nindang buhay. Ikinakahadit man ninda an posibleng magin mga hilang ninda mantang naggugurang. Posibleng si David an saro na nakimahirak ki Jehova: ‘Dai mo man lugod ako ipagsikwal sa panahon kan sakuyang pagkagurang; kun an sakuyang kusog matapos na, dai mo ako pagpabayaan.’—Sal. 71:9, 18.

Paano magigin tiwasay an mga lingkod ni Jehova dawa naggugurang na sinda? Kaipuhan nindang padagos na pakusugon an saindang pagtubod sa Diyos, na nagtitiwalang itatao niya sa sainda an saindang mga pangangaipo. Siyempre, kun naeksperyensiyahan ninda an nagkapirang luho sa buhay kan dakul pa sindang kuwarta, kaipuhan na nindang manudan na mamuhay nin simple asin makontento sa dikit na materyal na bagay. Tibaad madiskubre nindang mas masiram asin mas marahay pa ngani sa salud ninda an pagkakan nin “putaheng gulay” kisa sa “pinatabang toro”! (Tal. 15:17, NW) Kun mapokus ka sa paglilingkod ki Jehova, itatao niya sa saimo an mga kaipuhan mo sagkod sa saimong paggurang.

Pag-isipan an halimbawa ni José asin Rose na naglingkod ki Jehova nin bilog na panahon sa laog nin labing 65 taon. Sa pag-agi nin mga taon, kinaipuhan nindang asikasuhon an ama ni Rose, na nangangaipong bantayan sa gabos na oras. Kinaipuhan man na tagalan ni José an pagpaoperar saka pagpa-chemotherapy sa hilang niyang kanser. Iinunat daw ni Jehova an saiyang tuong kamot sa maimbod na mag-agom na ini? Iyo, pero paano? Paagi ki Tony asin Wendy, mag-agom na kakongregasyon ninda na kagsadiri kan apartment na iniistaran ninda. Iinaalok ni Tony asin Wendy nin daing bayad an apartment sa mga payunir. Nagigirumduman ni Tony na kan siya nasa hayskul, natatanaw niya sa bintana kan saindang eskuwelahan si José asin Rose na regular na naghuhulit. Nagustuhan niya an pagigin maigot kan mag-agom sa ministeryo asin dakula an nagin epekto kaiyan sa saiya. Huling nahiling ni Tony asin Wendy na ginamit kan may edad nang mag-agom an saindang bilog na buhay sa paglilingkod ki Jehova, napahiro sinda na paistaron an mga ini sa saindang apartment. Sa nakalihis na 15 taon, tinabangan ninda si José asin Rose, na sa ngunyan pareho nang mga nasa 85 anyos. Para ki José asin Rose, regalo sa sainda ni Jehova si Tony asin Wendy.

Iinuunat man ni Jehova sa saimo an saiyang “tuong kamot nin katanusan.” Iuunat mo man daw an saimong kamot asin makapot sa Saro na nanunuga sa saimo: “Dai ka matakot. Tatabangan taka”?