IANGOIA bwa aongkoa ko nakonako n te kawai n te nukanibong, ao ko a tii namakina naba te aomata ae ririmwiko. Ngkana ko tei ao e tei naba. Ngkana ko kawaetatako ao e kawaetataa naba. Ao akea bwa ko a biri n ienikuri ni kaea ana auti raoraom ae uakaan. Ngke e kauka te mataroa raoraom ni kariniko, ao e rangi n oki nanom.

Tao ko tuai n aitara raoi ma aei, ma ko a bae n tia n tabeaianga ibukin itera tabeua. N te katoto, iai mamaaram teuana ae ko kan tokanikai iai, ma ko boni kakaraoia naba? E tuai man reke am mwakuri ni kareketianti i nanon te tai ae maan, e ngae ngke ko rangi ni kakorakorako ni kakaaea? Ko tabeaianga ibukin rikirakem ni kara ao kaitaraan aoraki n taai aika imwaim? Ke iai te bwai teuana riki ae karawawatako?

N aki ongeia bwa tera am kangaanga, ma tiaki ko na boni kakaitau ngkana iai ae ko kona ni maroroakin am kangaanga ma ngaia ao e kona ni buokiko n te tai ae ko kainnanoia iai? Iai raoraom ni kaan ae aekan anne? Eng iai! Bon raoraom Iehova ae aekan anne, n aron naba are e riki bwa raoraon te baatua ae Aberaam, ae taekinaki n Itaia 41:8-​13. Ni kibuna 10 ao 13, e kangai Iehova nakon ana toro temanna ma temanna: “Tai maaku bwa I memena iroum. Tai raraoma bwa bon Atuam ngai. N na kakorakorako, eng, N na buokiko. N na boni boutokaiko raoi ni baiu ae te atai ae raoiroi. Bwa I rawea baim ae te atai ngai ae Iehova ae Atuam, are Teuare kangai nakoim, ‘Tai maaku. N na buokiko.’ ”

Tiaki e karauaki nanom n taeka aikai? Ka­taam­ne­ia bwa ko mena i nanon te baere e kabwarabwaraa Iehova ibukira. E aki kaotaki n aei bwa ko nakonako n taubai ma Iehova, e ngae naba ngke e rangi n tamaroa te iango anne. Ngkana arona bwa kam nakonako n taubai, e na rawea baim ae te maing ni baina ae te atai. N oneani mwin anne, e kaenakoa ‘baina ae te atai ae raoiroi’ Iehova ao n rawea “baim ae te atai,” kaanga aron ae e katikiko man am kangaanga i nanoni maium. Ngke e karaoa aei ao e kakorakorako ma te taeka ni karaunano aei: “Tai maaku. N na buokiko.”

Ko nora Iehova bwa te Tama ao te Rao ae tatangira ae e na buokiko n rawawatam? E bon tabeakiniko, e tabeaianga ibukini marurungim, ao e tauraoi ni buokiko. Ngkana ko aitara ma kangaanga, e tangiria Iehova bwa ko na namakina ae ko mano raoi ibukina bwa e rangi n tangiriko. Ti “kai karekea buokara n taai nako mairouna n tain te rawawata.”​—TaiAre. 46:1.

A karawawataia tabemwaang ururingan aroia rimoa, ao a iangoia bwa tao e kabwarai aia bure te Atua ke e aki. Ngkana e riki aei iroum, iangoa te mwaane ae kakaonimaki are Iobi are kaotii ‘ana bure ngke te roro n rikirake ngkoa ngaia.’ (Iobi 13:26) E rinanon naba anne te tia areru are Tawita ao e bubutiia Iehova ni kangai: “Tai uringi au bure ma au kairua ngke te roro n rikirake ngai.” (Tai­Are. 25:7) Ibukin aki kororaoira, ti bane ni “kabwaka ni kaotiotii aroaron te Atua aika moanibaa n raraoi.”​—IRom 3:23.

E kaineti moa te rongorongo are n Itaia mwakoro 41 nakoia ana aomata te Atua ake rimoa. E rangi ni kakaiaki aia bure ngaia are e a iangoia Iehova bwa e na motiki taekaia bwa a na kairaki nako Baburon bwa taenikai. (Ita. 39:6, 7) Ma e ngae n anne, e iaiangoa te Atua te tai are e na kamaiuia iai naake a na rairi nanoia ao n okiria! (Ita. 41:8, 9; 49:8) E kaota naba te nanoanga ae rangi ni bati ae aron anne Iehova ni boong aikai, nakoia naake a kani karekea akoaia irouna.​—TaiAre. 51:1.

Iangoa rongorongon Takuya * are kataia n tokanikai i aon aroaro aika aki itiaki ae matakuakinan te bwaitingako ao kumekumean ana bwai ni kakariki. Ma e okioki teuaei ni karaoi arona aikai. Tera ana namakin? “I namakina ae ai bon akea bongau, ma ngkana I tataro nakon Iehova ni butiia kabwaraan au bure, ao e mwaneairake mani mamaarau.” E kangaa Iehova ni karaoa anne? E kaungaaki Takuya irouia unimwaane n ana ekaretia bwa e na kawariia ngkana e a manga karaoi arona akekei. E taku: “E kangaanga kawaraia ma ngkana I karaoia ao I kakorakoraaki iai.” Imwina, a a baireia unimwaane bwa e na kawaraki Takuya ni kaungaaki iroun te mataniwi n te aono ae uarereke. E taku te mataniwi aei: “Ko na aki mimi n rokou bwa a tangirai unimwaane bwa N na kawariko. A rineiko bwa N na kawariko ni kaungako.” E ururing ni kangai Takuya: “Bon te tia bure ngai, ma e ngae n anne, e anganai te ibuobuoki Iehova rinanoia unimwaane.” E rikirake n te onimaki Takuya ni karokoa ae e a urekura bwaiania ao e a beku ngkai n te aobiti n tararua. N aron ae riki nakon te tari te mwaane aei, e na mwaneikorake naba te Atua mani mamaaram.

Oin raoi tabeaiangaia aomata aika bati bon akean te mwakuri ni kareketianti. A kabaneaki man aia mwakuri tabemwaang ao e a kangaanga kakaaean aia anga riki teuana ni karekemwane. Iangoia bwa tera am namakin ngkana ko aki butimwaeaki n te tabo ni kammwakuri teuana ma teuana. A bwara nanoia tabeman ngkana e riki anne. E na kangaa ni buokiko Iehova? Tao e na aki waekoa ni karekea am mwakuri ae bon tau, ma tao e na buokiko n uringa ana taeka te Uea are Tawita aei: “Te ataeinimwaane ngai ngkoa ao I a kara ngkai, ma I tuai man nora te aomata ae raoiroi ae kaakaki taekana, ke natina aika bubutii te amwarake.” (TaiAre. 37:25) Eng, e iangoiko Iehova bwa ko rangi ni kakawaki irouna, ao e kona ni buokiko ni ‘baina ae te atai ae raoiroi’ ni karekei baika ko kainnanoi bwa ko aonga n teimatoa ni beku ibukina.

E namakina mwaakan Iehova ni kakamaiu Sara ae maeka i Colombia. E mwakuri neiei n te kambwana ae bubura boona iai ao e bane angiin ana tai iai. Ma e kani kabatiaa riki ana tai ni beku ibukin Iehova, ngaia are e a buubai man ana mwakuri ao e a bwaiania. Ma e aki waekoa n reke te mwakuri ae e na itera n tai iai. E katea ana titooa ae uarereke ibukin te ice-cream, ma e a moanna n ruuti teutana imwin teutana ao e a riai ni kainna. E taku Sara: “Tenua au ririki n arou aei, ma I karabwaa Iehova bwa I nanomwaaka iai.” E a ataa te kaokoro i marenani baika bobuaka ma baika boni kainnanoaki, ao e aki riai n raraomaeakina te bong are imwina. (Mat. 6:33, 34) N tokina, e a kaoaki iroun ana tia kammwakuri are mai mwaina ao n anganaki nakoana are rimoa. E kaotia neiei bwa e tii kukurei ngkana e itera n tai ni mwakuri ao n anganaki ana motirawa ibukini baika irekereke ma ana onimaki. E ngae ngke e a karako ana karekemwane Sara n aron are rimoa, ma e kona n teimatoa ni bwaiania. E taku imwin rinanoani baikai: “I namakina bain Iehova ae tatangira.”

Te bwai teuana riki ae rangi ni katabeaianga bon te kara. A bati aika uritaea ao a raraoma bwa e na tau aia mwane ae a na toronibwai iai ni maiuia ke e aki. A raraoma naba ibukini kangaanga nakoni marurungia ngkai a a rikirake ni kara. N taraana bon Tawita are butiia Iehova ni kangai: “Tai teweainako ngkana I a kara, ao tai kaaki taekau ngkana e a kerikaaki korakorau.”​—TaiAre. 71:9, 18.

A na kangaa ngkanne ana toro Iehova n namakina te mano raoi n aia tai ni kara? A riai n teimatoa ni karikirakea onimakinan te Atua, ao ni kakoauaa raoi ae e na katauraoi baika kainnanoi ibukini maiuia. Ni koauana, ngkana a a tia ni maiu ni kaubwai n itera tabeua i nanon ririki aika bati, tao a a riai ni kabebetei maiuia ao n rauaki n aia bwai aika karako. A bae n ataia ae e kakukurei ao tao ni kamarurung riki kanakin “te raurau ae kanoana aroka aika kakanaki” nakon “te kao mwaane ae kamarikaaki”! (TaeRab. 15:17) Ngkana ko kaatuua am iango ni kakukureian Iehova, e na boni katauraoi baika ko kainnanoi n am tai naba ni kara.

Iangoa rongorongoia José ma Rose ake a kabwanina aia tai ni beku ibukin Iehova i nanon 65 tabun te ririki. I nanon ririki aika bati, a riai n tabeakina taman Rose are e kainnanoa tararuaakina n taai nako. Irarikina, e rinanon te korokoro ibukin te kaentia José ma bwainnaorakiana. E a tia Iehova ni kaenakoa baina ae te atai nakoia taanga aika kakaonimaki aikai? Eng, ma n te aro raa? Bon rinanoia taangan Tony ma Wendy ae kaain te ekaretia, ake a angania José ma Rose aia ruu ae a na maeka iai. A kukurei Tony ma Wendy n anganako aia ruu n akea boona nakoia bwaiania aika kabwanina aia tai ni beku. N ririki ake mai mwaina ngke e reirei Tony n te kauarinan, e nonoriia José ma Rose bwa a katoatai ni karaoa te mwakuri ni minita. E tatangiriia taanga aikai man noran ingaingan nanoia, ao e rangi ni korakora rotakina iai. A kaungaaki Tony ma Wendy bwa a na kamaekaia n aia auti taanga aika kara aikai, kioina ngkai a kabanei maiuia ibukin Iehova. I nanon 15 te ririki n nako, a a tia naakai ni buokiia José ma Rose, ake ai 80 tabun aia ririki ngkai. A iangoia taanga aika kara aikai bwa bon te bwaintituaraoi mairoun Iehova te ibuobuoki mairouia taanga aika ataei aikai.

E kaenakoa te Atua ‘baina ae te atai ae raoiroi’ nakoim naba. Ko kukurei ni kaenakoa baim nakon Teuare beritana nakoim aei: “Tai Maaku. N na Buokiko”?