EÑEIMAHINAMÍNA reguataha rehóvo kállere pyharekue. Peichahágui reñandu oĩha ndesegíva. Upémarõ repytaite, ha pe ndesegíva opytaite avei. Upéi reho jeývo, pe persóna oho jey nde rapykuéri. Upépe katu reñepyrũma rekyhyje. Péro nemanduʼa sapyʼa peteĩ ne amígo oikoha ag̃ui upégui. Upémarõ reho hógape, ha oavrívo ndéve la okẽ, reike ha tuicha reñetrankilisa.

Ikatu ningo nderehasáiva gueteri koichagua situasiónre. Péro katuete rembohováine umi provléma ijetuʼúva ha ndepyʼapýva. Por ehémplo, ¿reñehaʼãpa hína revense peteĩ devilida, péro nderegueropuʼakapái ha reʼa jey jepi? ¿Nandetravahovéipa are guivéma, ha ijetuʼu ndéve retopa jey hag̃ua reñehaʼãvérõ jepe? ¿Rejepyʼapýpa ndeedáma rupi rehóvo ha reñepyrũma nderasykatu? ¿Térãpa oĩ ambue mbaʼe ndepyʼapýva?

Tahaʼe haʼéva ne provléma, katuete revyʼáta oĩramo peteĩ persóna nerendúva ha nepytyvõva reikotevẽ jave. ¿Reguerekópa peichagua amígo? Si reguereko. Jehová hína ne amígo. Por ehémplo, haʼe núnka ndohejareíri vaʼekue Abrahánpe, ohechaukaháicha Isaías 41:8-13. Pe versíkulo 10 ha 13-pe Jehová opromete entéro isiervokuérape: “Ani rekyhyje, pórke che aime nendive. Ani rejepyʼapy, che hína nde Jára. Che romombaretéta ha roipytyvõta. Tekojojápe che po deréchape añakaramáta nderehe. Che, Jehová nde Jára, rojagarra nde po deréchagui ha haʼe ndéve: ‘Ani rekyhyje, che roipytyvõta’” (TNM).

Jehová ningo tuicha ñanekonsola. Epensamíntena mbaʼépa la Jehová oprometéva ndéve. Pe versíkulo ningo ndeʼíri nde reguataha Jehová ykére ha haʼe ndeguerahaha ipógui. Oimérire upéicha, Jehová oñakaramáta kuri ipo deréchape nde po iskiérdagui. Péro pe téxtope heʼi Jehová oñakaramaha ipo deréchape “nde po deréchagui”, ku nenohẽserõguáicha peteĩ situasión ijetuʼúvagui. Jehová oñakarama jave nde po deréchagui, nemombarete ha heʼi ndéve: “Ani rekyhyje, che roipytyvõta”.

¿Reguerekópa Jehovápe nde Túa ha ne Amígoramo, ha rekonfia haʼe ikatuha nepytyvõ reikotevẽ jave? Jehová añetehápe oñangareko nderehe ha nepytyvõse. Neprovléma jave, térã rehasa peteĩ mbaʼe ijetuʼuetereíva, haʼe ndoipotái rekyhyje. ¿Mbaʼérepa? Pórke nderayhueterei. La Biblia heʼi hese: “Haʼe pyaʼe ñanepytyvõ jahasa asy jave” (Sal. 46:1, TNM).

Heta kristiáno ndaikatúi hesarái umi mbaʼe vai ojapo vaʼekuégui, ha oñeporandu oimépa Ñandejára operdona raʼe chupe. Oiméramo nde reñeñandu  péicha, epensami Job ehémplore. Haʼe orrekonose vaʼekue opeka hague imitãrusúrõ guare (Job 13:26). David avei oñembyasy kuri umi mbaʼe ojapo vaʼekuére yma, ha ojerure asy Jehovápe: “Anína nemanduʼa umi mbaʼe vai ajapo vaʼekuére chemitãrõ guare” (Sal. 25:7, TNM). Ñande ningo entéronte ñane imperfékto, upévare japeka ha ndajahupytýi “Ñandejára rekomimbipa” (Rom. 3:23).

Umi mbaʼe oĩva Isaías kapítulo 41-pe, ojeskrivi vaʼekue umi israelítape g̃uarã. Haʼekuéra hembiapo vaieterei kuri, upévare Jehová heʼi okastigataha ha opermititaha umi babilonio ogueraha chupekuéra hetãgui (Is. 39:6, 7). Upéicharõ jepe, Jehová opromete olivrataha entéro umi oñarrepentívape ha oñemoag̃ui jeýva hese (Is. 41:8, 9; 49:8). Koʼág̃arupi avei, Jehová ohayhu ha oiporiahuvereko umi persóna oñarrepentívape ha oñehaʼãva ojapo umi mbaʼe haʼe oguerohorýva (Sal. 51:1).

Ñapensamíntena oiko vaʼekuére peteĩ ermáno héravare Tomás. * Haʼe ningo ojepokuaa vaʼekue ohecha pornografía ha ojejavyky. Heta vése oñehaʼã oheja koʼã mbaʼe vaiete, péro hoʼa jey jepi. ¿Mbaʼéichapa oñeñandu upévare? Haʼe heʼi: “Añandu chekyʼaitereiha ha ndavaleiha mbaʼeverã. Péro añemboʼévo Jehovápe ha ajerurévo chupe tacheperdonami, haʼete haʼe chemopuʼã jeýva”. ¿Mbaʼéichapa Jehová ojapo upéva? Umi ansiáno ikongregasiongua heʼi Tomáspe ohenói hag̃ua chupekuéra káda ves ke hoʼa jey pe mbaʼe vaípe. Haʼe omombeʼu: “Ijetuʼueterei ningo chéve ahenói chupekuéra. Upéicharõ jepe ahenói, ha upéva chepytyvõ agueropuʼakave hag̃ua che devilida”. Upéi umi ansiáno ojapo arréglo ikatu hag̃uáicha pe superintendénte de sirkuíto ovisita Tomáspe. Pe superintendénte heʼi chupe: “Ndahaʼéi che aju reínteva nerendápe. Jehová oipota rupínte aime koʼápe. Haʼe oipota rerresivi ko visíta de pastoréo”. Tomás heʼi: “Che ningo peteĩ pekadór, péro Jehová chepytyvõ”. Tiémpo rire, Tomás ohejaite umi mbaʼe vai ojapóva ha oiko chugui prekursór rregulár. Koʼág̃a katu oservi peteĩ sukursálpe. Jehová oipytyvõ haguéicha ko ermánope, haʼe ikatu avei nepytyvõ rejapo jave ivaíva.

Oĩ ermáno ojepyʼapyetereíva operde haguére itraváho ha ndaikatúi ojuhu ótro. Epensamíntena mbaʼéichapa reñeñandúta reikóramo reheka nde travahorã, péro nderejuhúi. Upéva katuete ndepyʼapýta. ¿Mbaʼéichapa Jehová nepytyvõta? Ndahaʼéi omeʼẽtava ndéve ensegída peteĩ traváho iporãva. Péro ikatu nemomanduʼa rréi David heʼi vaʼekuére: “Che chemitã vaʼekue, ha koʼág̃a katu chetujáma, péro núnka ndahecháiva Ñandejára oheja reíramo peteĩ hembiapo porãvape, ni ifamíliape oikórõ ojerure upérupi hoʼumi vaʼerã” (Sal. 37:25, TNM). Jehová ningo ndevaloraiterei, ha ipo deréchape oñakaramáta nderehe, ikatu hag̃uáicha rehupyty reikotevẽmíva resegi hag̃ua reservi chupe.

Peteĩ ermána hérava Sara oikóva Colómbiape, ohecha mbaʼeichaitépa Jehová oipytyvõ chupe. Ko ermána ombaʼapo vaʼekue peteĩ emprésa tuicha ha iñimportántevape, ha ogana porã upépe. Péro haʼe oservi porãseve Jehovápe. Upévare opensa oheja itraváho ikatu hag̃uáicha ojapo iprekursorádo.  Péro Sara oikotevẽ peteĩ traváho de médio día ikatu hag̃uáicha oñemantene, ha ijetuʼu chupe ojuhu hag̃ua upéva. Upémarõ omoĩ peteĩ eladeriaʼi, péro saʼi saʼípe oso ha ombotýmante la inegósio. Sara heʼi: “Tres año pukukue ijetuʼu la che situasión. Péro Jehová mediánte, aaguanta”. Umi mbaʼe ohasáva ko ermána oipytyvõ chupe ohechakuaa hag̃ua mbaʼépa añetehápe oikotevẽ ha mbaʼépa noikotevẽi. Avei haʼe oñehaʼãmbaite ani hag̃ua ojepyʼapy pe ótro diarãre (Mat. 6:33, 34). Peteĩ vuéltape, ipatronkue ohenói Sárape ha oofrese chupe el mísmo traváho oreko vaʼekue yma. Haʼe heʼi chupe oaseptataha pe traváho sólamente ombaʼapótarõ médio día, ha oñepermitítarõ chupe osẽ predikasiónpe ha oho rreunionhápe. Pe karai oasepta la Sara ojeruréva. Koʼág̃a Sara noganái ymave guaréicha, péro osegi oservi de prekursóra. Haʼe heʼi ohechakuaa hague mbaʼéichapa Jehová oipytyvõ kuri chupe ohasárõ guare pe situasión ijetuʼuetéva.

Heta avei oĩ ojepyʼapýva pórke ijedáma ohóvo ha koʼẽrõitéma ojehuvila vaʼerã. Ikatu opensa hikuái orekótapa sufisiénte ikatu hag̃uáicha oñemantene ha oiko porãmi. Oĩ voi umi oñekevrantáva oúrõ g̃uarã hasy. Oiméne upévare David ojerure rakaʼe Jehovápe: “Ñandejára, anína cherejarei ko chetuja rire. Anína chereja cheaño koʼág̃a nachembaretevéimarõ” (Sal. 71:9, 18, TNM).

¿Mbaʼépa ojapo vaʼerã Jehová siervokuéra ijedámava ohóvo, ani hag̃ua ojepyʼapyeterei henonderãre? Osegi vaʼerã ojerovia Jehováre ha ndodudái vaʼerã haʼe siémpre omeʼẽtaha chupekuéra oikotevẽva. Oĩ umi ipláta vaʼekue ha odisfruta umi lúhogui. Peichagua persóna oñehaʼã vaʼerã oikokuaa sensillomínte, ha oñekontenta umi mbaʼe orekomívarente. Ikatu voi ohechakuaa hikuái, “jaiko rangue jaʼu soʼo porã” ikuentaveha “jaʼu verduramínte” (Prov. 15:17, TNM). Ñañehaʼãramo ñamotenonde Jehová servísio, haʼe katuete oñenkargáta jahupyty hag̃ua umi mbaʼe ñaikotevẽva ñandeedave vove.

Ñapensamína oiko vaʼekuére José ha Rósare. Haʼekuéra oservíma de tiémpo kompléto mas de 65 áño. Koʼã tiémpope ombohovái heta mbaʼe ijetuʼúva. Por ehémplo, ára ha pyhare oñangareko kuri hikuái Rosa túare. Upéi José ou ikánser, ojopera ha ojapouka kimioterápia. ¿Mbaʼéichapa Jehová ombohasa ipo derécha ko matrimóniope ikatu hag̃uáicha ombohovái koʼã situasión ijetuʼuetéva? Haʼe ojevale ótro matrimóniore, hérava Tony ha Wendy. Haʼekuéra oreko peteĩ departaménto oofreséva oiko hag̃ua pype prekursorkuéra, ha ndokovrái alkilér. Tony oguerohoryeterei José ha Rósape pórke iguápo hikuái Ñandejára servísiope. Haʼe imanduʼa oike tiémpope koléhiope, pe ventána guive pyʼỹinte ohechámi chupekuéra opredikávo upérupi. José ha Rosa ningo hetaiterei tiémporema oservi Jehovápe, upévare Tony ha Wendy omeʼẽ chupekuéra pe departaménto oiko hag̃ua. Umi 15 áño ohasávape haʼekuéra oipytyvõ José ha Rósape, koʼág̃a orekómava 85 áñorupi. José ha Rosa heʼi voi Tony ha Wendy haʼeha peteĩ rregálo Jehová omeʼẽva chupekuéra.

Upéicharõ, aníkena ñanderesarái Jehová oprometeha ñandéve: “Ani rekyhyje, che roipytyvõta”. Jehová ningo ombohasa ñandéve ipo. ¿Reñakãramátapa hese?