MANI inai oi laloa. Hanuaboi ai oi sibona be dala dekenai oi raka noho. Oi mamia tau ta be emu murina dekenai ia raka noho. Oi gini neganai, ia danu ia gini. Oi raka haraga neganai, ia danu ia raka haraga. Bena oi heau matamaia; karaharaga emu turana ena ruma dekenai oi lao. Emu turana ese iduara ia kehoa bona oi vareai neganai emu gari mamina ia ore.

Reana oi dekenai unai bamona gauna ta ia vara lasi, to mauri ena hekwakwanai haida dainai oi lalohekwarahi bada. Hegeregere, oi manokalaia gauna ta oi ura hanaia, to oi hekwarahi unai oi karaia totona, a? Oi be lagani momo lalonai gaukara ta oi davaria lasi bona herevana oi hekwarahi gaukara oi tahua, to ta oi davaria lasi, a? Do oi buruka oi lao bona vaira negai do idia vara gorere dainai oi lalohekwarahi, a? Eiava ma gau haida dainai oi lalohekwarahi, a?

Herevana dahaka hekwakwanai do ia vara, to ta dekenai unai hekwakwanai oi herevalaia bona oi ia durua neganai, do oi moale, a? Oi dekenai unai bamona turana namona ta ia noho, a? Oibe. Isaia 41:8-13 ese ia hahedinaraia, Iehova be unai tura namona, ia ese Aberahamo dekenai unai bamona tura karana ia hahedinaraia. Siri 10 bona 13 ai, Iehova ese ena hesiai taudia ia boiria, ia gwau: “Do umui gari lasi, lau be umui dekenai lau noho! Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua. Lau ese umui do lau naria, bona umui do lau hamauria. Lau be Lohiabada, emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.”

Unai hereva ese emu lalona ia hagoadaia, a? Mani oi laloa, oi be Iehova ese ia gwauraia laulau herevana lalonai oi noho. Unai laulau lalonai, oi be Iehova ida oi raka noho lalonai, iena imana oi dogoatao lasi. Herevana oi laloa unai be lalohadai namona. Bema ena imana oi dogoatao bona umui raka, iena imana idibana ese emu imana laurina do ia dogoatao auka. To Iehova be iena imana idibana amo emu imana idibana do ia dogoatao auka, unai be hegeregere emu mauri ai oi lalohekwarahilaia gaudia amo oi ia veria daekau. Unai ia karaia neganai, ia ese inai hereva amo oi ia hagoadaia, ia gwau: ‘Oi gari lasi, lau ese oi do lau durua.’

Bema hekwakwanai ta oi davaria, Iehova be emu lalokau Tamana bona emu Turana dainai ia ese oi do ia durua dalana oi itaia, a? Ia be oi ia laloa bada bona oi do ia durua. Hekwakwanai oi davaria neganai, Iehova ia ura gari mamina oi negea, badina ia be emu turana. Oibe, Iehova be “iseda nega dika negadia ibounai ita dekenai ia noho, ita do ia durua totona.”​—Sal. 46:1.

Taunimanima haida be edia kara gunadia dainai idia lalohisihisi bona idia laloa Dirava be edia dika ia gwauatao eiava lasi. Bema oi be unai bamona oi laloa noho, namona be Iobu, ia ‘uhau neganai ia karaia  gaudia’ ia gwauraia hedinarai tauna, oi laloa. (Iobu 13:26) Salamo torea tauna Davida be unai bamona hemami ia abia danu bona Iehova ia noia, ia gwau: “Lau uhau neganai kara dika lau karaia gaudia, bona egu kerere danu, be mani do oi gwauatao.” (Sal. 25:7) Ita ibounai be goeva dae lasi taudia dainai, ‘Dirava ena hairai ita reaia.’​—Roma 3:23.

Isaia karoa 41 ai ia noho revareva be idaunegai Dirava ena taunimanima ia herevalaia. Idia be kara dika badadia idia karaia, unai dainai Iehova ese idia ia hahemaoro henia totona, ia ese Babulonia ia gaukaralaia bona ena taunimanima idia hadiburaia. (Isa. 39:6, 7) To Dirava ese idia helalo-kerehai bona ia dekenai idia giroa lou taudia do ia hamauria negana ia laloa guna vadaeni. (Isa. 41:8, 9; 49:8) Hari danu be unai bamona, Iehova be mai momokani ida iena ura idia ura karaia taudia ia hebogahisi henidia.​—Sal. 51:1.

Takuya, * ia hekwarahi ponografi itaia karana bona tauanina ena hehuni kahadia gadaralaia karana ia hanaia totona. Unai kara dikadia ia laloa dainai, dina ta ta ai ia lalohisihisi. Edena bamona sibona ia laloa? Ia gwau: “Lau laloa lau be anina lasi, to egu dika gwauatao totona guriguri amo Iehova lau noia neganai, ia ese lau ia abia isi.” Edena dala ai Iehova ese ia durua? Ena Kongrigeisen elda taudia ese ia idia hadibaia bema unai hahetoho ia davaria, idia ia rini henia diba. Takuya ia gwau: “Ia auka idia lau rini henia totona, to idia lau rini henia neganai lau idia hagoadaia.” Bena elda taudia be mamoe vadivadi totona dala idia karaia sekit naria tauna ese Takuya do ia vadivadi henia. Sekit naria tauna ese ia hamaoroa: “Lau mai oi lau itaia totona be ia vara kava gauna lasi. Elda taudia idia ura oi lau vadivadi henia. Oi idia abia hidi inai mamoe vadivadi oi abia totona.” Takuya ia gwau: “Lau kara dika, to Iehova ese elda taudia ia gaukaralaia lau ia durua totona.” Takuya ia gaukara goada dainai, regula painia ia karaia bona hari ia be Betele ai ia gaukara. Unai tadikaka bamona, oi moru neganai Dirava ese oi do ia abia isi.

Taunimanima momo be idia gaukara lasi dainai, idia lalohisihisi. Haida be edia moni gaukara amo idia doko bona moni gaukara ma ta abia totona idia lalohekwarahi. Kampani momo oi tohoa to emu pepa idia abia dae lasi neganai, unai ena hemami mani oi laloa. Unai bamona ia vara neganai, taunimanima haida be sibona idia matauraia lasi. Iehova ese edena dala ai oi do ia durua? Ia ese moni gaukara be oi dekenai do ia henia lasi, to oi do ia durua King Davida ena hereva oi laloatao totona: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Sal. 37:25) Oibe, Iehova be oi ia laloa bada bona ia oi hesiai henia totona, iena imana idibana amo oi do ia durua.

Colombia ai ia noho taihu ta ladana Sara ese Iehova ena heduru ia mamia. Ia be pei badadia idia abia kampani ta dekenai ia gaukara. Herevana moni gaukara ia karaia to ia ura iena hesiai gaukara ia habadaia, unai dainai ena moni gaukara ia rakatania bona painia gaukara ia karaia. Pat-taim gaukara abia totona, ia be mai ena hekwarahi. Unai dainai stoa maragina ta ia haginia bona ice-cream sibona ia hoihoilaia to gabeai moni dekenai ia hegeregere lasi  dainai ena stoa ia koua. Sara ia gwau: “Lagani toi idia hanaia, to Iehova lau tanikiu henia badina ia ese lau ia durua lau haheauka totona.” Taga maurina bona ita dekenai idia noho gaudia be hegeregere edia idau ia lalopararalaia bona unai ese ia durua kerukeru totona ia lalohekwarahi lasi totona. (Mat. 6:33, 34) To gabeai, guna ia gaukara kampani ena biaguna ese ia rini henia badina ia ura ena gaukara dekenai ia giroa lou. Sara ese ia hadibaia ia ura pat–taim gaukara ia karaia bona ena hesiai gaukara karaia totona dina haida sibona ia gaukara be hegeregere. Herevana Sara be pei bada ia abia diba lasi, to painia gaukara ia karaia noho. Gau ibounai lalonai, ia gwau: “Iehova ena lalokau heduruna lau mamia.”

Taunimanima ese idia lalohekwarahilaia gauna ta be buruka. Momo be idia buruka dainai, bema moni gaukara idia rakatania, edena bamona moni dalana ai sibona idia durua diba. Danu idia lalohekwarahi badina idia buruka lao noho lalonai gorere idauidau do idia davaria diba. Davida danu be Iehova dekenai unai bamona noinoi ia gwauraia, ia gwau: “Lauegu buruka dinadia neganai lau do oi rakatania lasi. Egu goada be ia ore lao neganai, lau dekena amo do oi siri lasi.”​—Sal. 71:9, 18.

Edena dala ai Iehova ena hesiai taudia edia buruka negana ai idia gari lasi diba? Namona be idia hahedinaraia idia be Dirava idia abidadama henia bona abia dae ia ese edia dabu gaudia do ia henia. Oibe, lagani momo lalonai kohu bona moni momo maurina idia noholaia, to edia mauri lalonai edia noho dalana idia haidaua bona kohu momo lasi maurina idia noholaia. Bona idia davaria, “vamu namo herea” lasi to “raisi sibona” ania karana idia moalelaia bona unai be namo badina edia tauanina do ia durua diba. (Aon. 15:17) Bema Iehova hamoalea karadia oi atoa guna, herevana emu buruka negana lalonai ia ese oi do ia durua.

Mani Jose bona Rose edia ekspiriens oi laloa. Idia be lagani 65 lalonai Iehova idia hesiai henia. Lagani momo idia hanaia vadaeni, idia be Rose ena tamana idia naria, ia gorere dainai daba ela bona hanuaboi ia badinai idia noho be namo. Danu, Jose ese kensa muramura bona kemoterapi ia haheaukalaia noho be namo. Iehova ese iena imana idibana amo ena abidadama hesiai taudia ia durua, a? Oibe. To edena dala ai unai ia karaia? Edia kongrigeisen lalonai idia noho headava tau bona hahine Tony bona Wendy ese edia ruma ena kahana ta be idia dekenai idia henia. Tony bona Wendy idia ura painia taudia ibounai dekenai unai ruma ena kahana idia henia davana lasi. Lagani haida gunanai, sikuli ai Tony be ena klas rum windo amo Jose bona Rose do ia itadia idia be hanaihanai haroro gaukara do idia lao totona do idia raka hanai. Edia gaukara goada karana ia moalelaia bona unai ese ia durua bada ena mauri ia haidaua totona. Ia itaia unai tadikaka burukana bona iena hahine be edia mauri lalonai Iehova idia hesiai henia. Unai ese Tony bona Wendy ia hagoadaia dainai, idia boiridia edia ruma dekenai idia noho totona. Lagani 15 lalonai, Tony bona Wendy ese edia mauri lagani 85, Jose bona Rose, idia naria. Unai buruka taudia rua ese headava matamata taudia edia heduru karana idia gwauraia, Iehova ena harihari gaudia.

Dirava be iena imana idibana amo oi ia durua noho. Oi danu ese ena heduru oi abia dae bona emu imana be ia dekenai oi henia, a? Badina ia gwauhamata, ia gwau: “Do umui gari lasi, lau ese umui do lau durua.”