PANUNOTEM a magmagnaka iti kalsada iti tengnga ti rabii. Pagammuan ta nadlawmo nga adda mangsursurot kenka. No sumardengka, sumardeng met. No partakam ti magna, partakanna met. Timmarayka ket napanka iti balay ti gayyemmo nga adda iti asideg. Idi pinastreknaka, kasta unay ti bang-armo.

Mabalin a saanmo pay a napadasan dayta, ngem adda dagiti pakaseknan iti biag a mabalin a pakadanagam. Kas pagarigan, adda kadi pagkapuyan a lablabanam ngem kanayon latta a maaramidmo? Nabayag kadin nga awan trabahom ket saanka a makabirok uray no kasano ti panangikagumaam? Madanaganka kadi ta lumakay wenno bumaketkan ken kumapkapuyen ti salun-atmo? Wenno adda pay sabali a pagdandanagam?

Aniaman ti problemam, saan kadi nga agyamanka no adda pangibagaam kadagiti pakadanagam ken makatulong kenka no kasapulam? Adda kadi kasta a gayyemmo? Wen, adda! Ni Jehova ket kasta a gayyem, a kas idi ken Abraham, a mabasa iti Isaias 41:8-13. Iti bersikulo 10 ken 13, kuna ni Jehova kadagiti adipenna: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg. Ta siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”

Saan kadi a makapabileg dagita a sasao? Iladawanmo a sika a mismo ti pangibagbagaan ni Jehova iti dayta. Saan a nailadawan ditoy nga agkibkibinkayo a magmagna ken ni Jehova, nupay nagsayaat a panunoten dayta. No koma agkibkibinkayo, ti makannawan nga imana ig-iggamanna ti makannigid nga imam. Ngem saan a kasta. Ti “makannawan nga ima ti kinalinteg” ni Jehova ig-iggamanna “ti makannawan nga imam,” a kasla iyaonnaka manipud iti narigat a kasasaad ti biag. Bayat nga ar-aramidenna dayta, patibkerennaka babaen kadagitoy a sasao: “Dika agbuteng. Siak tulongankanto.”

Ibilangmo kadi ni Jehova kas naayat nga Ama ken Gayyem a tumulong kenka no marigatanka? Interesado kenka, maseknan iti kasasaadmo, ken determinado a tumulong kenka. No maipasangoka iti rigat, kayat ni Jehova a natalged ti riknam ta ipatpategnaka. Talaga a “maysa a saranay a sisasagana a masarakan bayat dagiti riribuk.”—Sal. 46:1.

Dadduma ti mariribukan iti napalabas a kamalida ket pampanunotenda no pinakawan met laengen ida ti Dios. No kasta ti kasasaadmo, panunotem ti matalek a lalaki a ni Job, a nangbigbig ‘kadagiti biddut ti kinaagtutubona.’ (Job 13:26) Kasta met ti narikna ni David ket impakaasina ken Jehova: “Dagiti basol ti kinaagtutubok ken dagiti iyaalsak O dika lagipen.” (Sal. 25:7) Gapu ta imperpektotayo, amintayo ket “nagbasol ken agkurang iti dayag ti Dios.”—Roma 3:23.

Ti mensahe iti Isaias kapitulo 41 ket immuna a naibaga kadagiti nagkauna nga adipen ti Dios. Gapu ta nakaro ti basolda, dinusa ida ni Jehova ket impalubosna a maipanda idiay Babilonia. (Isa. 39:6, 7) Ngem pampanunoten latta idi ti Dios ti tiempo nga isalakanna dagidiay agbabawi ken agsubli kenkuana! (Isa. 41:8, 9; 49:8) Ipakita met ni Jehova ita ti kasta nga ayat ken kinamanangngaasi kadagiti napasnek a manggun-od iti anamongna.—Sal. 51:1.

Usigentayo ti kapadasan ni Takuya. * Ikagkagumaanna idi a labanan ti dakes nga ugali a panagbuya iti pornograpia ken masturbasion. Nupay kasta, maulit-ulit a maaramidna dagita. Ania ti nariknana? “Nariknak nga awan serserbik, ngem no agkararagak ken Jehova tapno dumawat iti pammakawan, bangonennak manipud iti nakaitublakak.” Kasano nga inaramid dayta ni Jehova? Imbaga dagiti panglakayen a kakongregasion ni Takuya a tawaganna ida no maaramidna manen dagita. Inaminna: “Narigat para kaniak ti tumawag kadakuada, ngem no tumawagak, mapatibkerak.” Kalpasanna, inyurnos dagiti panglakayen a bisitaen ti manangaywan iti sirkito ni Takuya. Imbaga ti manangaywan iti sirkito kenkuana: “Saan laeng a naiparna nga immayak. Addaak ta kayat dagiti panglakayen nga umayak. Pinilida a sika ti masarungkaran.” Malagip ni Takuya: “Agbasbasolak, ngem tinulongannak latta ni Jehova, babaen kadagiti panglakayen.” Idi agangay, rimmang-ay ni Takuya, nagbalin a regular pioneer, ken agserserbi itan iti maysa a sanga nga opisina. Kas iti kapadasan daytoy a kabsat, bangonennaka ti Dios manipud iti nakaitublakam.

Adu ti madanagan no awan trabahoda. Dadduma ti naawanan iti trabaho ket marigatanda nga agbirok iti sabali a pagsapulanda. Panunotem no ania ti mariknam no saandaka nga inawat dagiti nagaplayam. No kasta ti mapasamak, kumapuy ti pakinakem ti dadduma. Kasano a mabalin a tulongannaka ni Jehova? Mabalin a saannaka a dagus nga ikkan iti napintas a trabaho, ngem mabalin a tulongannaka babaen ti panangipalagipna kenka iti napaliiw ni Ari David: “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.” (Sal. 37:25) Wen, ipatpategnaka ni Jehova, ket babaen iti ‘makannawan nga imana ti kinalinteg,’ matulongannaka a manggun-od iti kasapulam tapno agtultuloy nga agserbika kenkuana.

 Narikna ni Sara a taga-Colombia ti tulong ni Jehova. Nangato idi ti sueldona ngem adu nga oras ti busbosenna iti trabahona iti maysa a mabigbigbig a kompania. Ngem kayatna nga ad-adu ti maaramidanna para ken Jehova isu a nagikkat iti trabahona ket nagpayunir. Ngem saan a dagus a nakabirok iti part-time a trabaho. Nangipatakder iti bassit a paglakuan iti ice-cream ngem nalugi isu nga inserrana dayta. “Tallo a tawen ti limmabas, ngem agyamanak ken Jehova ta nakapagibturak,” kuna ni Sara. Nasursurona a pagdumaen no ania ti luho ken no ania ti kasapulan ken saannan a pakadanagan ti sumaruno nga aldaw. (Mat. 6:33, 34) Idi agangay, tinawagan ti dati nga amona ket intukonna ti dati a trabahona. Imbagana a part-time laeng a trabaho ti awatenna ken awatenna laeng dayta no mapatgan ti kiddawna nga aldaw a saan nga agtrabaho tapno maaramidna dagiti naespirituan nga aktibidadna. Nupay basbassit nga amang ti sueldo ni Sara, agtultuloy latta a payunir. Iti amin a napadasanna, kinunana, “Nariknak ti naayat nga ima ni Jehova.”

Ti panaglakay wenno panagbaket ti sabali pay a pakadanagan. Adu ti tumataengan ket pampanunotenda no adda umanay a pagbiagda. Madanaganda met maipapan iti kumapkapuy a salun-atda. Mabalin a ni David idi ti nangipakaasi ken Jehova: “Saannak nga ibelleng iti tiempo ti kinalakay; inton agkapuyen ti bilegko, saannak a baybay-an.”—Sal. 71:9, 18.

Kasano ngarud a saan a pakadanagan dagiti adipen ni Jehova ti panaglakay wenno panagbaket? Masapul nga itultuloyda a pabilgen ti pammatida iti Dios ken agtalekda nga ipaayna dagiti kasapulanda. Siempre, no napadasanda idi ti nasayaat a biag, mabalin a masapul a pasimplienda ti biagda ken makontentoda iti basbassit. Mabalin a makitada nga ad-adda a makapasalun-at no manganda iti “putahe a natnateng” ngem iti “toro a pinalukmeg.” (Prov. 15:17) No ipamaysam ti agserbi ken Jehova, ipaayna ti kasapulam uray inton nataengankan.

Alaentayo a pagarigan da José ken Rose, a nakapagserbin ken Jehova iti amin a tiempo iti nasurok a 65 a tawen. Iti adu a tawen, masapul a 24 nga oras nga aywananda ti tatang ni Rose. Naoperaan met ni José gapu iti kanser ken nagpa-chemotherapy. Inyawat kadi ni Jehova ti makannawan nga imana iti daytoy matalek nga agassawa? Wen, ngem kasano? Inusarna da Tony ken Wendy, agassawa a kakongregasionda a nangipaay iti pagnaedanda nga apartment. Kayat da Tony ken Wendy nga ipaay a libre ti apartment kadagiti payunir. Adu a tawenen ti napalabas, manipud iti tawa iti eskuelaanna idi hayskul, makitkita ni Tony a kanayon a mapan mangasaba ti agassawa a da José ken Rose. Ipatpategna ida gapu iti regtada, ket dakkel ti epekto dayta kenkuana. Gapu ta nakitada nga inusar dagitoy nga agassawa ti biagda para ken Jehova, natignay da Tony ken Wendy a mangaywan kadakuada. Iti napalabas a 15 a tawen, tinulonganda da José ken Rose, nga agtawen itan iti agarup 85. Para kada José ken Rose, ibilangda ti tulong da Tony ken Wendy kas sagut a naggapu ken Jehova.

Iyaw-awat met ti Dios kenka ti ‘makannawan nga imana ti kinalinteg.’ Iyawatmo met kadi ti imam ket iggamam ti ima Daydiay nangikari kenka: “Dika agbuteng. Siak tulongankanto”?