IMADYIN mon manaakar kad karsada ya lablabi la. Biglan alikas mo ya walay ontutumbok ed sika. No ontunda ka, ontunda met. No pelesan mo, pelesan to met. Kanian batik kad asingger ya abung na kaarom. Nen nilukasan na kaarom so puerta tan pinaloob to ka, akainawa ka.

Nayarin anggapo ni ontan ya agawad sika, balet wala ray kapagaan ed bilay ya nayarin panaaburidoan mo. Alimbawa, kasin walay lalabanan mon kakapuyan mo balet nauulit mon gawaen? Kasin abayag lan anggapoy trabahom tan anggan panoy pananap mo et agka makaromog? Kasin panaaburidoan moy nagawad sika no ontatken ka tan ompan mansakit ka? Odino wala ni arum ya panaaburidoan mo?

Antokaman itan, agta pisalamatan mo no walay napambagaan moy problemam tan makatulong ed sika no kakkaukolan mo? Kasin walay ontan ya kaarom? On wala! Ontan ya kaaro si Jehova. Sikatoy nagmaliw ya kaaro nen Abraham, a singa imbaga to diad Isaias 41:8-13. Diad bersikulo 10 tan 13, ibabaga nen Jehova ed saray lingkor to: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka. Talagan bembenan ta ka ed kawanan a limak unong ed inkatunong ko. Ta siak, si Jehova a Dios mo, so mamemben ed kawanan a limam, say mangibabaga ed sikan, ‘Agka ontatakot. Tulongan ta ka.’”

Agta makapabiskeg iratan ya salita? Imadyin mo pa ya sikan mismo so pangibabagaan nen Jehova ed saya. Agtutukoyen dia ya itatabin ka nen Jehova legan kayon manaakar, anggano balibali komon itan ya isipen. No itatabin to ka, say kawanan ya lima to et akabemben ed kawigin limam. Balet dia, si Jehova et iyuunat toy ‘kawanan a lima to unong ed inkatunong to’ tan bebembenan toy “kawanan a limam,” a singa to ka aagwaten ed mair-irap ya situasyon. Legan ton gagawaen itan, papaseguroan to ka: “Agka ontatakot. Tulongan ta ka.”

Kasin naliliknam ya si Jehova et maaron Ama tan Kaaro ya ontulong ed sika no walay problemam? Iimanoen to ka, nononoten toy pankaabigan mo, tan labay to kan tulongan. No naiirapan ka, labay nen Jehova ya ondeen so liknaan mo lapud inar-aro to ka. Talagan sikatoy “mainomay a nakerewan na tulong diad panaoy gonigon.”​—Sal. 46:1.

Say arum et papairapen day sarili da lapud apalabas ya lingo da tan manduaruwa ra no kasin pinerdona la ra na Dios. No ontan so naliliknam, isip moy matoor ya lakin si Job, ya inamin ton ‘wala  ray kasalanan to nen wala nid kalangweran.’ (Job 13:26) Ontan met so alikna na salmistan si David tan impikasi tod si Jehova: “Agmo la komon nononoten iray kasalanan ko sanen wala ak nid kalangweran tan saray lingok.” (Sal. 25:7) Lapud aliwa tayon perpekto, amin tayo et ‘nankasalanan tan agtayo sarag ya ipatnag so gloria na Dios.’​—Roma 3:23.

Say manunan angipasabian na mensahe na Isaias kapitulo 41 et saray totoo na Dios nensaman. Balbaleg so kasalanan da kanian denesidi nen Jehova ya ukomen ira diad impangiyabuloy ton nibantak irad Babilonia. (Isa. 39:6, 7) Balet sankanonot na Dios ya diad arapen et iliktar to iramay magbabawi tan ompawil ed sikato! (Isa. 41:8, 9; 49:8) Ipapanengneng met natan nen Jehova so ontan kabaleg ya panangasi ed saramay talagan labay dan naawat so pabor to.—Sal. 51:1.

Imanoen so eksperiensya nen Takuya, * ya lalabanan toy marutak ya kagagawan panagbantay na pornograpiya tan masturbasyon. Balet siansia nin nauulit-ulit to iratan. Antoy nalilikna to? “Singa anggapo lan balot so kanak, balet no manpipikasi ak ed si Jehova tan kekerewen koy panamerdona to, ipapaalagey to ak ed impakatumbak.” Panon itan ya gagawaen nen Jehova? Imbaga na saray elder ed kongregasyon di Takuya ya tawagan to ra no bilang naulit to lamet itan. Inamin to: “Aliwan mainomay so ontawag ed sikara, balet kapagno ontawag ak, napapabiskeg ak.” Insan inyeskedyul na saray elder ya ombisitad sikato so manangasikaso na sirkito. Inkuan na manangasikaso na sirkito: “Aliwan nibambana so inyakar ko dia. Wadia ak ta imbaki ak na saray elder. Sikay pinili dan i-shepherding.” Oniay nanonotan nen Takuya: “Siak so mankakasalanan, balet si Jehova so ontutulong ed siak panamegley na saray elder.” Inmaligwas si Takuya anggad sikatoy nagmaliw ya regular payunir tan manlilingkor natan diad branch office. Singa ed sayan agi, ipaalagey ka met nen Jehova no atumba ka.

Dakel so nanaaburido lapud anggapoy trabaho da. Say arum et naandian na trabaho tan naiirapan ya makaromog na napangalaay pambilay. Antoy naliknam no anggapoy empleyadon mangawat ed sika? Diad ontan ya situasyon, say arum et naandian la na respeto ed sarili da. Panon kan tulongan nen Jehova? Nayarin agto ka ikdan a tampol na balibalin trabaho, balet ipanonot tod sika imay naeksperiensya nen Arin David: “Nensaman et ugaw ak ni tan natan et matatken ak la, balet anggapo ni anengneng kon matunong ya apaulyan, odino saray ananak to a mipapayabol na naakan.” (Sal. 37:25) On, mabmabli ka ed si Jehova, tan diad panamegley na ‘kawanan a lima to unong ed inkatunong to,’ natulongan to kan naromog iray nakaukolan mo pian makapantultuloy kan manlingkor ed sikato.

Si Sara ya taga Colombia et alikna toy mabiskeg ya pakayari nen Jehova. Sikatoy mantratrabaho ed sakey a kabkabat ya kompanya tan baleg so sueldo, balet uupoten na satan so panaon tan  biskeg to. Lapud labay ton dakel so nagawaan to parad si Jehova, inmekal ed trabaho to tan nampayunir. Balet agtampol akaromog na part-time ya trabahon nakaukolan to. Walay impaalagey ton melag ya lakoay ice cream balet kalkalnan naupotan na puonan kanian apilitan ya isarado la. “Taloy taon so linmabas, balet tinulongan ak nen Jehova, kanian ayarian ko,” kuan nen Sara. Naaralan ton ibiig no anto ray nakaukolan to tan agto nakaukolan, tan agpanaburidoan so onsublay ya agew. (Mat. 6:33, 34) Asabi panaon, sikatoy tinawagan na datin boss to tan imbaga ton ipawil da ed samay datin trabaho to. Imbaga to ya part-time labat ya trabaho so awaten to tan no ikdan da na time off parad espiritual iran aktibidad to. Anggaman aliwan singa dati ya balbaleg so naaalmo nen Sara, sikatoy makakapantultuloy ya payunir. Diad saratan ya amin ya naeksperiensya to, inkuan to, “Aliknak so maaron panangasikaso nen Jehova.”

Say sakey nin panaaburidoan ya maong et say itatatken. Iisipen na dakel ya totoon asabi da lay edad ya panagretiro no kasin walay magenap ya pambilay da. Pampapagaan da met ya ompan mansakit ira diad itatken da. Seguradon si David so angipikasid saya ed si Jehova: “Agmo ak komon ipupulisay anggan sano matatken ak la; agmo ak papaulyan sano makapuy ak la.”​—Sal. 71:9, 18.

Kanian panon ya nalikna na saray lingkor nen Jehova so seguridad no matatken la ra? Kaukolan ya tuloytuloy dan pabiskegen so pananisia ra ed Dios tan matalek iran itarya to iray nakaukolan da. Siempre, no diad dakel iran taon et asali day mainawan panagbilay, nayarin kaukolan dan pasimplien so bilay da tan mankontento ed daiset. Napruebaan da ya say pangan na “pisipising” nen say “karne na pinataban baka” et mas makapaliket tan mas maong ed laman da! (Pro. 15:17) No say manunan iisipen mo et say pamaliket ed si Jehova, itarya to ray nakaukolan mo anggan matatken ka la.

Imanoen tayoy eksperiensya nen José tan Rose, a masulok ya 65 taon iran nanlingkor ya full-time ed si Jehova. Pigay taon dan inasikaso so ama nen Rose, a kaukolan toy bantayan ya 24-oras. Si José et mairap met so kipapasen to, ta diad saman et naoperaan lapud kanser tan manpapa-chemotherapy. Kasin tinulongan nen Jehova iyan matoor ya sanasawa? On. Panon balet ey? Panamegley nen Tony tan Wendy. Sayan sanasawan kakongregasyon da et walay apartment da tan impanayam da ra ditan. Labay di Tony tan Wendy ya panayamen ditan iray payunir ya anggapoy bayar. Nen haiskul ni si Tony, nanenengneng tod bintana si José tan Rose ya regular ya manpupulong. Naar-aro to ra lapud naimano toy inkaseseg da, tan balbaleg so epekto na satan ed sikato. Inusar na sayan sanasawa so interon bilay da parad si Jehova, kanian apakiwas si Tony tan Wendy ya tulongan ira. Labinliman taon la ya tutulongan day José tan Rose, ya natan et masulok da lan 80. Parad sayan maedad lan sanasawa, say panutulong ed sikara na mas ugaw nin sanasawa et regalo nen Jehova.

Iyaawat met nen Jehova ed sika so ‘kawanan a lima to unong ed inkatunong to.’ Kasin iyawat mo met ed sikato so limam, ta impromisa ton, “Agka ontatakot. Tulongan ta ka”?