IMAGINÁ ku bo ta kana anochi lat riba kaya. Diripiente bo ta sinti manera ku un hende ta sigui bo. Ora bo stòp di kana, e tambe ta stòp. Anto ora bo kuminsá kana mas lihé, e tambe ta kana mas lihé. Bo ta kuminsá kore pa bo yega na kas di un amigu den serkania. Ora bo amigu habri e porta i laga bo drenta, bo ta hala un rosea profundo di alivio.

Kisas bo no a yega di pasa den algu asina akí, pero otro preokupashon di bida por duna bo miedu. Por ehèmpel, bo ta luchando pa vense un debilidat pero ta keda kometé e mesun fayo? Bo ta buskando un trabou pa hopi tempu kaba sin por haña un, apesar ku bo a hasi tur bo esfuerso? Bo ta preokupá ku bo ta birando grandi i ku bo por haña problema ku salú? Òf tin algu otro ku ta preokupá bo?

Sea kual sea e problema, lo bo keda kontentu si bo tin un hende ku bo por papia kuné tokante bo preokupashonnan i ku lo por yuda bo ora bo tin mester di esei, no ta bèrdat? Bo tin un amigu asina? Klaru ku sí, bo tin un! Yehova ta un amigu asina pa bo, meskos ku e tabata pa e patriarka Abraham, manera Isaías 41:8-13 ta trese padilanti. Na versíkulo 10 i 13, Yehova ta bisa su sirbidónan: “No tene miedu, pasobra mi ta ku bo; no desmayá [òf, “no sea anshá,” NW], pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia. Pasobra ami ta SEÑOR bo Dios, kende ta sostené bo man drechi, kende ta bisa bo: ‘No tene miedu, lo mi yuda bo.’”

E palabranan akí no ta lanta bo ánimo? Hinka bo mes den e esena ku Yehova ta deskribí pa nos. Aki e no ta menshoná ku bo ta kana man tené ku Yehova, aunke esei riba su mes lo ta algu masha plasentero. Si bo ta kana man tené ku Yehova, su man drechi lo ta teniendo bo man robes. Pero en bes di esei Yehova ta saka su “man drechi di hustisia” i kue “bo man drechi” tene. Ta komo si fuera e ta hala bo saka for di un situashon difísil di bida. Anto segun ku e ta hasi esei, e ta fortalesé bo i sigurá bo: “No tene miedu, lo mi yuda bo.”

Bo ta mira Yehova komo un Tata i un Amigu ku ta stima bo, kende lo yuda bo ora bo ta den angustia? E ta interesá den bo, ta preokupá pa bo bienestar i ta determiná pa yuda bo. Ora bo ta pasa difikultat, Yehova ke pa bo sinti bo safe pasobra e ta sintié mashá pegá na bo. E ta realmente “un yudansa ku por ser hañá fásilmente durante angustia.”—Sal. 46:1, NW.

Algun hende ta keda tormentá nan mes pa motibu di fayonan ku nan a kometé den pasado i ta duda ku Dios a pordoná nan. Si esei ta e kaso ku bo, pensa riba e hòmber fiel Yòb, kende a atmití e fayonan ku el a kometé den su pasado. (Yòb 13:26) E salmista David tambe tabatin sintimentu di kulpa i a roga Yehova: “No kòrda e pikánan di mi hubentut, ni mi transgreshonnan.” (Sal. 25:7) Komo ku nos ta imperfekto, nos tur ‘ta peka i no por reflehá e gloria di Dios.’—Rom. 3:23.

E mensahe na Isaías kapítulo 41 tabata originalmente pa e pueblo antiguo di Dios. Nan a peka asina tantu ku Yehova a disidí di kastigá nan i laga nan ser hibá den eksilio na Babilonia. (Isa. 39:6, 7) Apesar di esei, Dios tabata pensa riba e tempu ku lo el a libra esnan ku lo a arepentí i bolbe serka dje. (Isa. 41:8, 9; 49:8) Awe Yehova ta mustra e mesun miserikòrdia na esnan ku di kurason ke haña su aprobashon.—Sal. 51:1.

Laga nos wak e eksperensia di Takuya. * E tabata lucha pa vense e kustumbernan impuru di wak pornografia i praktiká masturbashon. Hopi biaha, el a sufri rekaida. Kon el a sintié? El a bisa: “M’a sinti ku mi no bal nada, pero ora m’a hasi orashon na Yehova i a rog’é pa su pordon, el a lanta mi ariba.” Kon Yehova a hasi esei? E ansianonan di su kongregashon a bis’é pa bèl nan asina ku e sufri un rekaida. El a atmití: “No tabata fásil pa yama nan, pero tur biaha ku mi a hasié, nan a fortalesé mi.” Despues e ansianonan a traha un sita pa e superintendente di sirkuito hasié un bishita di pastoreo. E superintendente di sirkuito a bisa Takuya: “No ta pa kasualidat mi ta aki. Mi ta aki pasobra e ansianonan tabata ke pa mi ta aki. Nan a skohe abo pa bo haña un bishita di pastoreo.” Takuya a bisa: “Ami tabata esun ku a peka, pero tòg Yehova, mediante e ansianonan, a yuda mi.” El a progresá te ku e por a kuminsá traha pionero regular, i awor e ta sirbi na un sukursal. Meskos ku e ruman hòmber akí, Dios lo yuda bo ora bo faya.

Algun hende ta sufri di ansiedat pasobra nan a pèrdè trabou i tin problema pa haña un otro manera pa gana nan pan di kada dia. Imaginá kon lo bo sinti bo ora bo solisitá vários kaminda sin haña trabou. Den tal situashon, tin hende ta pèrdè nan rèspèt propio. Kon Yehova por yuda bo? Kisas lo e no duna bo un trabou ideal mesora, pero sí lo e por yuda bo kòrda riba e palabranan di Rei David, kende a bisa: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.” (Sal. 37:25) Sí, bo ta presioso den bista di Yehova, i ku su “man drechi di hustisia” e por yuda bo haña loke bo tin mester pa sigui sirbié.

Sara, kende ta biba na Colombia, a mira kon Yehova a usa Su poder pa yud’é. E tabata traha na un kompania prestigioso, i nan tabata paga bon. Ma su trabou tabata eksigí hopi di su tempu  i energia. Pero e kier a hasi mas pa Yehova, i p’esei el a disidí di kita for di trabou i kuminsá traha pionero. Sinembargo, tabata difísil pa e haña e trabou partaim ku e tabatin mester. El a habri un lugá di bende eiskrim, pero pokopoko sèn a kaba lag’é, i el a hañ’é ta sera e lugá. El a bisa: “Tres aña largu a pasa, pero danki na Yehova, mi por a perseverá.” El a siña distinguí kosnan di luho for di kosnan ku e tabatin mester i pa no ta anshá pa e dia di mañan. (Mat. 6:33, 34) Ku tempu, su eks doño di trabou a yam’é i a ofresé su trabou bieu atrobe. El a bisa e doño ku lo e aseptá solamente si ta trabou partaim i si e por haña tempu liber pa e dediká na su aktividatnan spiritual. Awe e no ta gana mesun tantu ku e tabata gana ántes, pero sí e por sigui traha pionero. Ora Sara ta kòrda riba e tempu difísil ei, e ta bisa: “Mi a sinti kon Yehova tabata sostené mi ku amor.”

Algun hende ta mashá preokupá pa motibu ku nan ta birando grandi. Hopi hende, ora nan yega edat pa baha ku penshon, ta duda si nan lo tin sufisiente sèn pa hiba un biba kómodo. Tambe nan ta preokupá ku e problemanan di salú ku nan por haña nan kuné. Kasi sigur tabata David kende a roga Yehova lo siguiente: “No benta mi afó den tempu di behes; no bandoná mi ora mi forsa ta faya.”—Sal. 71:9, 18.

Kon sirbidónan di Yehova por sinti nan sigur ora nan ta di edat? Nan mester sigui kultivá fe den Dios i konfia ku lo e perkurá pa nan nesesidatnan. Naturalmente, si ántes nan tabata hiba un bida mas kómodo, awor kisas nan lo mester simplifiká nan bida i keda kontentu ku ménos den sentido material. Nan por bin realisá ku “un tayó di bèrdura” en bes di “un toro gòrdá” lo por ta mas plasentero i mihó pa nan salú. (Pro. 15:17) Si bo enfoke ta pa agradá Yehova, lo e proveé pa bo asta den bo behes.

Tuma por ehèmpel e kaso di José ku Rose, kendenan tabatin mas ku 65 aña ta sirbi Yehova tempu kompleto. Durante vários aña, nan mester a kuida Rose su tata kende tabatin mester di kuido 24 ora pa dia. Ademas, José tabatin kanser i mester a operá i haña tratamentu di kimo. Yehova a saka su man drechi pa yuda e pareha kasá fiel akí? Sí, pero kon? Yehova a yuda nan mediante Tony ku Wendy, un pareha kasá di nan kongregashon. Nan tabatin un apartamento ku nan kier a hasi disponibel pa pioneronan di tempu kompleto sin kobra hür. Hopi aña promé, tempu Tony tabata bai skol sekundario, e tabata wak for di bentana di skol i mira kon José ku Rose tabata bai sirbishi regularmente. E tabata atmirá e zelo ku nan tabatin, i esei a hasi un impakto profundo riba dje. Debí ku Tony ku Wendy a mira kon e pareha biehitu akí a dediká henter nan bida na Yehova, nan a sinti nan motivá pa ofresé e pareha akí e apartamento. Pa e último 15 añanan, nan ta yudando José ku Rose, kendenan awor tin mas o ménos 85 aña di edat. E rumannan di edat akí ta konsiderá e yudansa di Tony ku Wendy un regalo for di Yehova.

Yehova ta saka su “man drechi di hustisia” pa bo tambe. Abo tambe lo saka bo man pa Esun ku ta sigurá bo: “No tene miedu, lo mi yuda bo”?