UJ CALLETA manchay tutaña purishasqaykipi tʼukuriy. Jinallapi reparanki uj runa qhepaykita jamushasqanta. Sayarpajtiyki, chay runapis sayarpallantaj. Usqhayta rejtiykitaj, usqhayta rillantaj. Chaynejpi tiyakoj amigoykej wasinmantaj mayta correnki. Amigoyki punkuta kicharispa yaykuchisojtintaj, niña manchachikunkichu, kausayniykitaj niña wañuypatapichu.

Ichá chay jina chʼampaypi ni jaykʼaj rikukorqankichu. Jinapis ichá waj chʼampaykuna llakichishasunki. Sutʼincharinapaj, ichá ima sajra ruwaytapis atipanaykipaj kallpachakushanki, jinapis chayta ruwashallankipuni. Ichá, unayña mana llankʼayniyojchu kashanki. Mayta kallpachakuspapis mana tariyta atinkichu. Ichá llakikunki machuyapunaykimanta, onqoykunaykimanta ima. Manachayri waj ima llakichishasunki.

Ima chʼampayniyoj kaspapis, mayta kusikuwaj llakiyniykimanta pillawanpis parlarispa, necesitajtiyki yanapasojtin ima, ¿icharí? Imaynatachus Jehová Abrahampa amigon karqa, ajinallatataj qanpatapis Pay amigoyki. Isaías 41:8-13 versiculosqa Abraham Diospa amigon kasqanta nin. Chantá 10, 13 versiculospi Jehová niwanchej: “Ama manchachikuychu, imaraykuchus noqaqa qanwampuni kashani. Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj; justiciata ruwaj paña makiywan sayachillasqaykipuni. Noqaqa paña makiykimanta japʼisoj Señorniyki Tata Dios kani, niykitaj: Ama manchachikuychu; noqa yanapasqayki”, nispa.

Jehová chayta nisqanqa, mayta kallpachawanchej. Imatapunichus niyta munawasqanchejpi tʼukurina. Chunka versiculoqa mana ninchu Jehovawan khuska makinmanta japʼikuspa purishasqanchejta. Jehovawan khuska purishasunman chayqa, Jehová paña makinwan, lloqʼe makinchejta japʼishawasunman. Mana chayman jinataj, Jehovaqa justiciata ruwaj paña makinwan, paña makinchejmanta japʼishawanchej. Mana atipayta atina chʼampaymantapis orqhorqoshawasunman jina. Paña makinchejmanta Jehová japʼishawajtinchej, jinata niwanchej: “Ama manchachikuychu; noqa yanapasqayki”, nispa.

¿Jehová Diosta Amigoykita jinachu, munakuyniyoj Tataykita jinachu qhawanki? ¿Creenkichu llakiypi kashajtiyki yanapasunanta? Jehovaqa cheqamantapuni munakusunki, yanapaytataj munasunki. Chʼampaykunapi kashajtiyki Jehovaqa mana munanchu manchachikunaykita, mayta munakususqanrayku. Cheqamantapuni Payqa “phutiywan mana allin kashajtinchej, usqhayta yanapawanchej” (Sal. 46:1).

Wakenqa ñaupa juchasninkumanta yuyarikullankupuni, tapukunkutaj Dios perdonasqantachus manachus. Ajinapi rikukunki chayqa, cheqa sonqo Jobpi tʼukuriy. Payqa joven kashaspa juchallikusqanta nerqa (Job 13:26). Davidpis, Job jinallataj sientekorqa. Chayrayku Jehovamanta mañakorqa: “Wayna kashaspa juchallikusqasniymanta ama yuyarikuychu, nitaj contraykipi oqharikusqasniymantapis”, nispa (Sal. 25:7). Juchasapas kasqanchejrayku, “Diospa jatun kaynimpa kʼanchayninta mana taripayta” atinchejchu (Rom. 3:23).

Isaías libroj 41 capitulonqa israelitaspaj qhelqasqa karqa. Paykuna maytapuni juchallikusqankurayku, Jehová castigananta nerqa, Babiloniaman apasqa kanankuta saqespa (Isa. 39:6, 7). Chantá nillarqataj pesachikuspa payman kutirikojkunata, kacharichinanta (Isa. 41:8, 9; 49:8). Kunanpis Jehovaqa tukuy sonqo pesachikuspa, kusichiyta munaspa payman kutirikojkunata kikillantataj munakun, khuyakun ima (Sal. 51:1).

Takuya sutiyoj hermanoj kausayninpi tʼukurina. * Payqa khuchichakuymanta millay imasta manaña qhawananpaj, niña sajwakunanpaj ima mayta kallpachakusharqa. Wakin kutistaj chaykunapi urmallajtaj. ¿Imayná pay sientekoj? Pay nin: “May chʼichipaj qhawakorqani, jinapis Jehovamanta perdonta mañakorqani. Paytaj mayta kallpachawarqa”, nispa. ¿Imaynamantá? Ancianosqa nerqanku watejmanta chay imaspi urmaspa, telefononejta paykunata wajyananta. Takuya nin: “Ancianosta mana wajyayta atillarqanichu, wajyajtiytaj mayta kallpachawarqanku”, nispa. Chantá ancianosqa, congregacionesta waturej hermanota nerqanku, Takuyata waturinanta. Waturej hermanotaj, Takuyaman nerqa: “Kaypi kashani, ancianos waturisunayta munasqankurayku. Paykuna munarqanku qanwan parlarinayta”, nispa. Takuya nin: “Sajra imasta ruwashajtiypis, Jehovaqa ancianosnejta yanapawarqa”, nispa. Tiemponmantaj chay millay imasta manaña ruwarqachu, precursor regulartaj karqa, kunantaj Betelpi llankʼashan. Chay hermanota jinallataj Jehovaqa qantapis imapi pantajtiykipis yanapasonqa.

Wakenqa mana llankʼayniyoj kaspa llakikunku, waj llankʼaytataj mana tariyta atinkuchu. Tʼukuriytaj ni pi llankʼayta qosojtinku imaynachus sientekusqaykipi. Ajinapi rikukuspa wakenqa pisipaj qhawakunku. ¿Imaynatá Jehová yanapasunkiman? Ichá payqa mana chay ratochu uj llankʼayta qosonqa. Jinapis yanapasunkiman Davidpa nisqanta yuyarinaykipaj. David nerqa: “Noqa wayna karqani, kunantaj machuña kani; ni jaykʼajpis kʼacha runataqa wijchʼusqata rikorqanichu, nitaj wawasnintapis khuyayta mañakojtaqa”, nispa (Sal. 37:25). Jehovaqa may valorniyojpaj qhawasunki, “justiciata ruwaj paña makin[wan]” necesitasqayki kapusunanpaj, payta sirvinallaykipajpuni imataj yanapasonqa.

Sara Colombiapi tiyakun, imaynatachus Jehová yanapasqantataj rikorqa. May rejsisqa empresapi llankʼaspa, ashkha qolqeta ganaj. Jehovapaj  astawan llankʼayta munasqanraykutaj, llankʼayninta saqespa precursora karqa. Nitaj tariyta atillarqachu khuskan pʼunchayllapaj uj llankʼayta. Chayrayku heladosta vendenanpaj uj tiendata kicharerqa, niña qolqeyoj kasqanraykutaj chay tiendata wisqʼaporqa. Pay nin: “Kinsa watatapuni qolqeyku pisiwarqayku, jinapis Jehovaj yanapayninwan ñaupajllamanpuni rerqayku”, nispa. Saraqa kapusqallanwan sonqo juntʼasqa kausakuy may sumaj kasqanta, qʼaya pʼunchaymanta mana llakikunanta ima yachakorqa (Mat. 6:33, 34). Tiemponmantaj ñaupaj patronnin wajyarqa watejmanta llankʼananpaj. Sarataj nerqa: “Khuskan pʼunchayllata llankʼayta munayman. Ajinamanta willayman, tantakuykunaman, jatuchaj tantakuykunaman rinaypaj tiempoyoj kasaj”, nispa. Sara mana ñaupajpi jinañachu ganaspapis, precursorallapuni kashan. Pay nin: “Llakiypi kashaspa, Jehovaj yanapayninta rikorqani”, nispa.

Ashkha runas machuyapushasqankurayku mayta llakikunku. Jubilakunankupaj jinaña kaspataj, tapukunku pisi qolqellawan sumajta kausakuyta atinankutachus manachus. Chantapis llakikullankutaj onqonankumanta. Rey Davidsina, Jehovamanta ajinata mañakorqa: “Ama qhesachawaychu, allin machituña kajtiy. Manaña kallpayoj kajtiypis, ama saqerpariwaychu”, nispa (Sal. 71:9, 18).

¿Imatá ruwankuman machitus aswan qhepamanta mana llakikunankupaj? Jehovapi creeyninkuta kallpachanallankupuni tiyan, necesitasqankuta qonanpitaj atienekunanku tiyan. Jinapis qolqenku kasqanrayku tukuy ima patapi kausakojkunaqa, pisi imasllawanña chayri kapusqallankuwan kusisqa kausakuyta yachakunanku kanqa. Ichá paykunaqa reparanqanku cuerponkupaj ‘aswan allin kasqanta qʼomerkunata mikhuna, wirayachisqa aychata mikhunamanta nisqaqa’ (Pro. 15:17). Jehovata sirviyta ñaupajman churanki chayqa, machitu kashajtiyki ni imamanta pisichisonqachu.

Uj qhariwarmej kausayninkupi tʼukuriy. Sutisninkoqa José, Rose ima. Paykunaqa 65 watasmanta astawan precursores karqanku. Chay wataspitaj llakiykunapi rikukorqanku. Josej warminpa tatan onqoykojtin, tuta p’unchay yanapata necesitasqanrayku paykuna qhawarqanku. Josepis cancermanta operachikorqa, quimioterapia tratamientotataj ruwarqa. Jehovaqa uj qhariwarminejta paykunata yanaparqa. Chay qhariwarmej sutisninkoqa Tony, Wendy ima karqa. Tony, Wendy imaqa, wasinkuta qoyta munarqanku Jehovapaj astawan llankʼaj precursoresman, nitaj alquilertapis cobrayta munarqankuchu. Tony nin: “Yuyarikuni colegiopi kashaspa, ventanamanta rikullajpuni kani Joseta, warmintawan sapa pʼunchay willayman rejta. Sonqo kʼajayniyoj kasqankoqa mayta kusichiwaj, tʼukuchiwaj ima”, nispa. Tony, Wendy ima, Joseman warminmanwan wasinkuta qorqanku. Kay qhepa 15 wataspi Tony, Wendy ima, chay qhariwarmita yanapanku. José, Rose ima 85 watasniyoj jinaña kashanku. Paykunaqa Jehovaj yanapayninta rikorqanku Tonynejta, Wendynejta ima.

Jehová nin: “Ama manchachikuychu; noqa yanapasqayki”, nispa. Payqa qanta “justiciata ruwaj paña maki[nwan]” yanapayta munasunki. ¿Paywan yanapachikunkichu?