SEʻI faapea o loo e savali i le auala tele i le leva o le pō. Ae faafuaseʻi ona e faalogoina se tasi o loo mulimuli atu iā te oe. Pe a e tū, ona ia tū foʻi lea, ae pe a televave lau savali, e faapena foʻi o ia. Ua amata loa ona e momoʻe faatopetope atu i le fale o sau uō o latalata ane. Ina ua tatala mai e lau uō le faitotoʻa ma avatu oe i totonu, ua e lagona le toʻa.

Atonu e leʻi tupu se mea faapena iā te oe, ae e iai mea o le olaga e ono faapopoleina ai oe. O se faaaʻoaʻoga, po o e tauivi e foʻia se vaivaiga, ae o loo faaauau pea ona e faia lenā mea sesē? Pe sa leai sau galuega mo se taimi umi, ma ua faigatā ona maua sau galuega e ui i au taumafaiga? Po o e popole ona ua faasolo ina e matua ma faalētonu lou soifua mālōlōina? Pe e iai se isi mea o loo faapopoleina ai oe?

Po o le ā lava le faafitauli, pe e te lē talisapaia ea le iai o se tasi e mafai ona faasoa atu i ai ou popolega, ma saunia se fesoasoani pe a manaʻomia? Pe e iai sau uō māfana faapena? Ioe, e iai! O Ieova o ia o lau uō, e pei foʻi ona ia faauō ma le augātamā o Aperaamo, e pei ona faamauina i le Isaia 41:8-13. I le fuaiupu e 10 ma le 13, ua fetalai mai Ieova i ana auauna: “Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe. Ou te matuā lagolagoina oe i loʻu lima taumatau o le amiotonu. Auā o aʻu o Ieova lou Atua, o loo uuina lou lima taumatau, o Lē e fai atu iā te oe, ʻAua e te fefe. Ou te fesoasoani iā te oe.’”

Pe e lē faalaeiauina oe i nei upu? Seʻi faaāta le vaaiga o loo faamatala mai e Ieova! E lē o faamatala mai i lenei vaaiga, o loo lua savavali faatasi ma uulima ma Ieova, e ui o se manatu manaia. Pe afai o loo lua savavali ma uulima, e uu e lona lima taumatau lou lima tauagavale. Ae e lē o le tulaga lenā, nai lo o lea o loo faaloaloa atu e Ieova lona “lima taumatau o le amiotonu,” ma uu “lou lima taumatau,” e pei o loo ia tosoina ese oe mai i se tulaga faigatā i le olaga. A o ia faia faapea, ua ia faamalosia oe i lenei faamautinoaga: “Aua e te fefe. Ou te fesoasoani iā te oe.”

Pe e te vaai iā Ieova o se Tamā ma o se Uō alofa e fesoasoani iā te oe pe a e mafatia? E naunau o ia iā te oe, e manatu mamafa i lou tulaga, ma maumauaʻi e fesoasoani iā te oe. Pe a e fesagaʻi ma faigatā, e finagalo Ieova ina ia e lagona le saogalemu, auā e alofa o ia iā te oe. O ia moni “o le fesoasoani sili i taimi o puapuaga.”—Sala. 46:1.

O nisi e latou te faasalaina i latou lava ona o ni amioga sa fai i le taimi ua teʻa, ma taumānatu pe faamata ua faamagaloina i latou e le Atua. Pe afai o lou tulaga lenā, ia mafaufau i le tane faamaoni o Iopu o lē na taʻutino mai ʻmea sesē o lona talavou.’ (Iopu 13:26) Na faapena foʻi faalogona o le faisalamo o Tavita, ma ʻaiʻoi atu iā Ieova: “Aua e te manatua aʻu agasala ma aʻu solitulafono a o ou talavou.” (Sala. 25:7) Talu ai e tatou te lē lelei atoatoa, ua tatou ʻagasala uma ai, ma lē ausia le mamalu o le Atua.’—Roma 3:23.

O le feʻau o loo i le Isaia e 41, sa faaautū atu i tagata o le Atua i aso anamua. O le matuiā o a latou agasala, na filifili ai Ieova e faasalaina i latou e ala i le ave faaaunuua i Papelonia. (Isa. 39:6, 7) Peitaʻi, na manatu le Atua i le taimi o le a ia laveaʻia ai i latou e salamō ma toe foʻi atu iā te ia. (Isa. 41:8, 9; 49:8) O loo faaalia foʻi e Ieova le alofa mutimutivale iā i latou e naunau moni ina ia maua lona finagalo malie.—Sala. 51:1.

Seʻi manatu i le mea na tupu iā Takuya, * o lē na taumafai e foʻia le masaniga lē mamā o le matamata i ata matagā taufeusuaʻiga ma le taaloalo i ona totogasā. Na iai taimi na ia toe lolo atu ai i na vaivaiga. O ā ni ona faalogona? “Na ou manatu ua ou matuā lē aogā lava, peitaʻi ina ua ou faalatalata atu iā Ieova i le tatalo ma ōle atu i lana faamagaloga, na ia laveaʻia aʻu mai i se tulaga leaga.” Na faapefea ona faia e Ieova lenā mea? Na taʻu atu e toeaina i le faapotopotoga a Takuya iā te ia, pe afai e toe lolo atu i ia vaivaiga, ia telefoni atu. Ua ia taʻutino mai: “E leʻi faigofie le vili atu iā i latou, peitaʻi, pe a ou vili i ai e faamalosia ai aʻu.” Na faatulaga e toeaina se asiasiga faaleoleo mamoe a le ovasia matagaluega iā Takuya. Na taʻu atu e le ovasia matagaluega iā te ia: “E leʻi teʻiteʻi lava ou sau, ae na talosaga mai toeaina ina ia ou asiasi mai. Na latou filifilia oe ina ia e mauaina lenei asiasiga faaleoleo mamoe.” E manatua e Takuya: “Sa ou faia le agasala, ae ua fesoasoani mai Ieova iā te aʻu e ala mai i toeaina.” Na agaʻigaʻi i luma Takuya ma avea ma paeonia sauatoa, ma o loo auauna nei i se ofisa o le lālā. E pei o le mea na tupu i lenei uso, o le a laveaʻia foʻi oe e le Atua mai i se tulaga leaga.

O le leai o se galuega, o le puna lea o popolega o le toʻatele. O nisi ua vāea mai i a latou galuega ma ua matuā faigatā ona suʻe se isi auala e maua ai se alagātupe. Seʻi manatu i ou faalogona pe afai e lē taliaina oe i le tele o fale faigaluega. I na tulaga, e lagona ai e nisi le leai o se uiga mautinoa. E faapefea ona fesoasoani Ieova iā te oe? Atonu e lē faafuaseʻi ona ia aumaia se galuega talafeagai mo oe, ae atonu e fesoasoani iā te oe e manatuaina le faamatalaga lenei a le tupu o Tavita: “Sa ou talavou, a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.” (Sala. 37:25) E tāua oe i le silafaga a Ieova, ma o lona “lima taumatau o le amiotonu” e mafai ona fesoasoani iā te oe e maua mea e te manaʻomia ma auauna pea iā te ia.

Na tofo foʻi Sara mai i Kolomupia i le mana laveaʻi o Ieova. Sa iai sana galuega e pisi ae lelei le totogi i se kamupani taulau manuia. Sa manaʻo o ia e faia le mea sili mo Ieova, o lea na ia faamavae ai mai lana galuega ma amata ona paeonia.  Peitaʻi, e leʻi faigofie ona maua le galuega faavaitaimi na ia manaʻo ai. Na faatū lana tamaʻi fale aisakulimi, peitaʻi na faasolo ina uma ana tupe ma tapuni ai loa le faleoloa. Ua faapea mai Sara: “Ou te faafetaia Ieova ona na mafai ona ou tumau i tausaga e tolu.” Na ia aʻoaʻoina le eseesega o mea taugatā ma mea e manaʻomia moni, ma aua neʻi soona popole i le isi aso. (Mata. 6:33, 34) Mulimuli ane, na vili mai le pule o lana galuega, ma ofo mai le tulaga lea sa ia galue muamua ai. Na ia tali atu i le pule e faatoʻā ia talia lana talosaga, pe afai e galue faavaitaimi, ma maua ai le taimi mo ana mea faaleagaga. E ui lava e leʻi toe telē se tupe na maua e Sara e pei o le taimi muamua, ae o loo mafai lava ona faaauau lana paeonia. Ua ia faapea mai: “Na ou lagona le aao alofa o Ieova.”

O se tasi o popolega sili o le faasolo ina matua. O le toʻatele o tagata ua oo i le tausaga e litaea ai, ma taumānatu ai po ua lava a latou tupe e ola ai i se olaga sologa lelei. Ua latou popole foʻi i faafitauli o le soifua mālōlōina a o faasolo ina matutua. E lē taumatea o Tavita na ʻaiʻoi atu iā Ieova: “Aua e te lafoaʻiina aʻu ina ua ou toeaina; aua e te tuua aʻu ina ua mou atu loʻu malosi.”—Sala. 71:9, 18.

E faapefea la i auauna a Ieova ona maua le lagona mautinoa a o faasolo ina matutua? E manaʻomia ona latou atiaʻe pea le faatuatua i le Atua, ma maufaatuatuaina o ia o le a ia saunia mea e latou te manaʻomia. Pe afai na latou ola i se olaga sologa lelei i tausaga ua mavae, e manaʻomia la ona faafaigofie o latou olaga ma lotomalilie i mea ua maua. Atonu e lelei mo le soifua mālōlōina ma maua le fiafia i le taumafa i se “ipu fualaau faisua,” nai lo o le “povi poʻa peti.” (Faata. 15:17) Pe afai e te uaʻi atu i le faafiafiaina o le finagalo o Ieova, o le a ia tausia oe a o faasolo ina e matua.

Seʻi manatu i le faaaʻoaʻoga a José ma Rose, o ē ua auauna faataimi atoa mo Ieova mo le silia i le 65 tausaga. I le tele o tausaga, sa la tausia le tamā o Rose, o lē na manaʻomia le tausiga i taimi uma. E lē gata i lea, sa onosaia foʻi e José se taotoga ma togafitiga o le kanesa. Pe na faaloaloa mai e Ieova lona aao taumatau e fesoasoani i lenei ulugalii faamaoni? Ioe, ae faapefea? E auala mai iā Tony ma Wendy, o se ulugalii i le faapotopotoga na saunia se fale e nonofo ai i laʻua. Na mananaʻo Tony ma Wendy e ofo fua atu lenei fale i paeonia faataimi atoa. I tausaga ua mavae, na masani ona vaaia e Tony mai i se faamalama o le faleaʻoga, le auai e lē aunoa o José ma Rose i le faiva i le fanua. Na ia talisapaia i laʻua ona o lo laʻua maelega, ma sa iai se aafiaga tele o lenei mea iā te ia. Talu ai o le faaaogāina e lenei ulugalii matutua o o laʻua olaga atoa mo Ieova, na uunaʻia ai Tony ma Wendy e aumai i laʻua e latou te nonofo. Ua 15 nei tausaga talu ona la fesoasoani iā José ma Rose, lea ua silia i le taʻi 80 o laʻua tausaga. Ua manatu lenei ulugalii matutua i le fesoasoani a lenei ulugalii talavou ifo o se meaalofa mai iā Ieova.

Ua faaloaloa mai foʻi e le Atua lona “lima taumatau o le amiotonu” iā te oe. Po o le a e tali atu e ala i le tuu atu o lou lima i Lē o loo folafola mai iā te oe: “Aua e te fefe. Ou te fesoasoani iā te oe”?