KON meki wi taki dati yu e waka na strati latilati neti. Wantronso yu e si taki wan sma e waka na yu baka. Te yu e stop, a sma e stop tu. Te yu e waka moro esi, a sma e waka moro esi tu. Now yu e bigin lon. Yu e lon teleki yu doro na a oso fu wan mati fu yu di e libi krosibei. Te yu mati opo a doro èn a e kari yu kon na inisei, yu ati e sidon baka.

Kande noiti a sani disi pasa nanga yu, ma tra sani kan pasa na ini a libi di kan meki yu bruya. Fu eksempre, kande yu e feti nanga wan swakifasi èn ibri leisi baka yu e meki a srefi fowtu. Noso kande wan heri pisi ten kaba yu no man feni wroko, aladi yu e meki furu muiti. A kan tu taki yu e broko yu ede fu di yu e kon owru èn fu di yu sabi taki yu kan kisi gosontu problema. Noso kande yu e broko yu ede nanga wan tra sani.

Ma awinsi sortu problema yu abi, yu no ben o breiti taki yu abi wan sma di yu kan fruteri sortu broko-ede yu abi èn di kan yepi yu te yu de na nowtu? Yu abi so wan mati? Iya. Yehovah na so wan mati gi yu, neleki fa a ben de wan mati fu a famiri-edeman Abraham, soleki fa skrifi na Yesaya 41:8-13. Na ini vers 10 nanga 13, Yehovah e taigi den futuboi fu en: „No frede, bika mi de nanga yu. No luku leki yu e frede, bika mi na yu Gado. Mi o meki yu kon tranga. Mi o yepi yu trutru. Iya, mi o hori yu nanga mi reti-anu fu retidu. Bika mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’”

Yu no e firi bun te yu e leisi den wortu disi? Pruberi fu si san Yehovah e taigi wi dya. Dyaso yu nanga Yehovah no e hori anu e waka, aladi dati ben o de wan moi sani. Efu yu nanga en ben o hori anu waka, dan en reti-anu ben o hori yu kruktu-anu. Ma na ini den tekst disi, Yehovah e langa en „reti-anu fu retidu” fu grabu „yu reti-anu” hori, leki a wani hari yu puru na ini wan situwâsi di e moro yu. Te a e du dati, dan a e gi yu a deki-ati disi: „No frede. Misrefi o yepi yu.”

Yu e si Yehovah leki wan lobi-ati Tata nanga Mati di o yepi yu te yu e broko yu ede? A lobi yu, a e broko en ede nanga yu èn a wani yepi yu. Te problema e miti yu, dan Yehovah no wani taki yu musu frede fu di a e firi gi yu. „A de klariklari fu yepi wi te wi de na nowtu.”​—Ps. 46:1.

Son sma e tan prakseri den fowtu di den meki èn den e tan aksi densrefi efu Gado gi den pardon. Efu na so yu e firi, dan prakseri a reti-ati  man Yob di ben tan denki ’den fowtu di a ben meki sensi di a yongu’ (Yob 13:26). A psalm skrifiman David ben e firi so tu èn dati meki a begi Yehovah: „No memre den sondu di mi du, noso den fowtu di mi meki di mi ben yongu” (Ps. 25:7). Na so a de nanga ala libisma. Romesma 3:23 e taki dati wi alamala e ’sondu èn wi no man sori a glori fu Gado kwetikweti’.

Den sani di Gado taki na Yesaya kapitel 41 ben de gi en pipel fu owruten. Den ben sondu so furu taki Yehovah bosroiti fu strafu den. Fu dati ede a meki sma tyari den gowe na Babilon leki katiboman (Yes. 39:6, 7). Ma toku Gado ben sabi taki wan ten ben o kon te a ben o frulusu den wan di ben o sori berow èn drai kon baka na en (Yes. 41:8, 9; 49:8). Yehovah e sori a srefi lobi nanga sari-ati gi den wan di e du ala san den man fu prisiri en ati.​—Ps. 51:1.

Luku a tori fu Takuya, * wan brada di ben feti nanga a takru gwenti di a ben abi fu luku porno èn fu prei nanga en syenpresi. Ibri leisi baka a ben e meki a srefi fowtu. Fa a ben e firi? A e taki: „Mi ben fisti gi misrefi èn dati meki mi ben e firi leki mi no de noti. Ma te mi ben e begi Yehovah fu a gi mi pardon, dan a ben e hari mi opo baka.” Fa Yehovah ben e du dati? Den owruman na ini Takuya en gemeente taigi en taki a kan bel den te a ben du a sani disi baka. Takuya e taki: „A ben hebi gi mi fu bel den, ma ibri leisi te mi ben e du dati, mi ben e kisi krakti baka.” Den owruman ben seti sani tu fu meki a kring-opziener go na Takuya. A kring-opziener taigi en: „A no somaar mi kon na yu. Mi kon fu di den owruman ben wani dati. Na yu den wani taki mi kon luku.” Takuya e taki: „Na mi ben e sondu, ma na Yehovah langa en anu fu yepi mi èn a gebroiki den owruman fu du dati.” Takuya ben go na fesi èn te fu kaba a tron wan gewoon pionier. Now a e wroko na wan bijkantoro. Neleki fa a ben de nanga a brada disi, na so Gado o hari yu opo baka te yu fadon.

Furu sma e broko den ede te den no abi wroko. Te son sma e lasi den wroko, a muilek gi den fu feni wroko baka. Denki fa yu ben o firi te yu e suku wroko èn ibri leisi baka sma e taigi yu taki den no man yepi yu. A sani disi kan meki son sma lasi-ati. Fa Yehovah kan yepi yu? Kande a no e sorgu wantewante taki yu feni wroko, ma a kan yepi yu fu prakseri den wortu fu Kownu David: „Mi ben de wan yongu man, ma now mi kon owru. Toku mi no si noiti taki Gado libi wan reti-ati sma en wawan. Noiti mi no si taki den pikin fu en e waka e suku nyanyan” (Ps. 37:25). Iya, Yehovah e si yu leki wan sma di warti gi en èn nanga en „reti-anu fu retidu”, a kan yepi yu fu feni san yu abi fanowdu fu tan dini en.

Sara di e libi na Kolombia si fa Yehovah yepi en. A wroko di a ben e du gi wan bigi bedrijf ben e aksi furu fu en, ma a ben e meki furu moni. Toku a gowe libi a wroko fu di a ben wani du  moro gi Yehovah èn a bigin pionier. Ma a no ben makriki fu feni wan wroko pe a no ben abi fu wroko ala dei. Ne a opo wan pikin wenkri pe a ben e seri ijscream. Ma te fu kaba a no ben abi moni moro èn a ben abi fu tapu a wenkri. Sara e taki: „Dri yari langa mi tan sondro wroko, ma Yehovah yepi mi fu horidoro.” Sara leri fu si san a abi fanowdu trutru èn fu no broko en ede nanga tamara (Mat. 6:33, 34). Baka wan pisi ten a basi pe a ben e wroko fosi, bel en èn a aksi en fu kon du a srefi wroko baka, di a ben e du fosi. Sara taigi en taki a ben o wroko gi en soso te a no ben o abi fu wroko aladei èn te a ben o kisi ten fu go na a preikiwroko noso na den konmakandra. Aladi Sara no e wroko so furu moni moro leki fosi, toku a man tan pionier. A taki dati na ini a muilek ten dati, a firi fa Yehovah yepi en.

Wan tra sani di e meki taki sma e broko den ede, na te den e kon owru. Furu sma di e go nanga pensyun e aksi densrefi efu den o abi nofo moni so taki den no abi fu pina. Den e broko den ede tu nanga den gosontu problema di den kan kisi te den e kon owru. A kan taki na David ben begi Yehovah: „No trowe mi gowe te mi kon owru. No gowe libi mi te mi e kon swaki.”​—Ps. 71:9, 18.

San kan yepi futuboi fu Yehovah fu no broko den ede te den e kon owru? Den musu leri fu sori bribi na ini Gado èn fu frutrow na en tapu taki a o gi den san den abi fanowdu. A tru taki a muilek fu du dati efu fosi den ben abi furu moni fu bai ala san den wani. Now den o abi fu kenki a fasi fa den ben gwenti libi èn den musu de tevrede nanga san den abi. Den o kon si taki a kan switi tu fu nyan „wan preti nanga gruntu” na presi fu nyan „wan fatu mankaw” èn kande dati moro bun gi a gosontu srefi (Odo 15:17). Efu yu e du ala san yu man fu meki Yehovah breiti, dan a o sorgu gi yu srefi te yu kon owru.

Luku a tori fu José nanga Rose di de na ini a furuten diniwroko moro leki 65 yari. Ala den yari dati difrenti sortu problema miti den. Den ben musu luku a papa fu Rose di ben abi sorgu fanowdu dei nanga neti. José ben musu du wan oparâsi tu fu di a ben abi kanker èn a ben musu kisi chemotherapie. Yehovah ben langa en anu fu yepi a trowpaar disi di dini en someni yari langa? Iya, ma fa a du dati? Tony nanga Wendy, wan trowpaar na ini a gemeente fu den, ben abi wan kamra gi den. Tony nanga Wendy ben wani taki pionier tan na ini a kamra disi sondro fu pai. Tony kan memre taki di a ben e go na skoro ete, a ben e si fa José nanga Rose ben gwenti go na ini a preikiwroko. A ben lobi den fu di den ben de fayafaya preikiman èn disi ben naki en ati. Fu di na owru trowpaar disi ben wroko den heri libi gi Yehovah, meki Tony nanga Wendy ben wani taki den kon tan nanga den. Na ini den 15 yari di pasa, den yepi José nanga Rose di abi sowan 85 yari. Na owru brada nanga sisa disi e si a yongu trowpaar leki wan kado fu Yehovah.

Gado e langa en „reti-anu fu retidu” gi yu tu èn a e pramisi: „No frede. Misrefi o yepi yu”? Yu srefi o langa yu anu tu fu hori en?