TIBONE ngeliso lengcondvo uhamba esitaladini ebusuku. Usahamba, uve shengatsi kunemuntfu lokulandzelako. Nawutsi uyema, lomuntfu lokulandzelako naye eme. Nawuphakamisa tinyawo, naye aphakamise tinyawo. Bese uyagijima, ucondze endlini yemngani wakho. Lomngani wakho nakavula umnyango akungenisa endlini, uve kutsi hhemu!

Kungenteka awukake wabhekana nasimo lesifana nalesi, kodvwa letinye tintfo letikukhatsatako ekuphileni tingase tikwente wesabe. Bukhona yini butsakatsaka lolwisana nabo? Sekwendlule sikhatsi lesidze yini ungawutfoli umsebenti ngisho nobe wetama kamita kuwufuna? Kuyakukhatsata yini kutsi uyakhula ngeminyaka futsi utawubhekana netinkinga temphilo esikhatsini lesitako? Nobe kukhona yini lokunye lokukucindzetelako ekuphileni?

Nobe ngabe nguyiphi inkinga lobhekana nayo, angeke yini sewukujabulele kuba nemuntfu lotsite longamtjela tintfo letikukhatsatako nalongakusita? Unaye yini umngani lonjalo? Yebo unaye! Jehova ungumngani lonjalo kuwe futsi abengumngani lonjalo naku-Abrahama, njengobe kusho incwadzi ya-Isaya 41:8-13. Emavesini 10 na-13, naku Jehova lakusho etincekwini takhe: “Ngako-ke ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite, ngiyakukubamba ngesandla sami sekudla lesilungile. Ngobe mine nginguSimakadze, Nkulunkulu wakho, lobamba sandla sakho sangesekudla, atsi kuwe: ‘Ungesabi, ngitakusita.’”

Awakucinisekisi yini lamavi? Asesitsi Jehova ukhuluma nawe njengobe asho lamavi. Lapha, akusho kutsi uhamba naJehova ukubambe ngesandla mbamba, nanobe loko bekungajabulisa. Kube bewuhamba naye akubambe ngesandla, sandla sakhe sangesekudla besingabamba sandla sakho sangekencele. Esikhundleni saloko, Jehova uletsa ‘sandla sakhe sangesekudla lesilungile’ bese ubamba “sandla sakho sangesekudla,” kube shengatsi ukutakula ekucindzetelekeni lobhekene nako ekuphileni. Njengobe enta njalo, uyakucinisekisa utsi: “Ungesabi, ngitakusita.”

Jehova unguBabe lonelutsandvo neMngani yini kuwe, longakusita nawucindzetelekile? Uyakukhatsalela, uyacabanga ngenhlalakahle yakho futsi uyafuna kukusita. Nawubhekene nebumatima, Jehova ufuna utive uvikelekile ngobe wena naye ninebuhlobo lobusedvute. Vele “utfolakala alusito ekuhluphekeni.”​—Hla. 46:1.

Labanye batikhatsata ngaloko labakwentile esikhatsini  lesendlulile futsi bayatibuta kutsi Nkulunkulu ubatsetselele yini. Nangabe nawe utiva ngaleyo ndlela, cabanga ngaJobe lowetsembekile lowawavuma ‘emacala etono lekatenta asemusha.’ (Jobe 13:26) Umhlabeleli Davide wabhekana nesimo lesifanako futsi wancenga Jehova watsi: ‘Ungatikhumbuli tono tami, netiphambeko tebusha bami.’ (Hla. 25:7) Ngesizatfu sekutsi sinesono, sonkhe ‘sonile futsi sikhashane kakhulu nenkhatimulo yaNkulunkulu.’​—Rom. 3:23.

Umlayeto loku-Isaya sehluko 41, ekucaleni wawubhalelwe bantfu baNkulunkulu bangesikhatsi lesendlulile. Bebone kangangekutsi Jehova waze wancuma kukhipha sehlulelo sekutsi batsatfwe bayotfunjwa eBhabhulona. (Isa. 39:6, 7) Ngisho nangaleso sikhatsi, Nkulunkulu abecabanga ngesikhatsi lapho atawukhulula khona labo labebatawuphendvuka babuye kuye. (Isa. 41:8, 9; 49:8) Jehova ukhombisa umusa lofanako lamuhla kulabo labaphendvuka ngebucotfo.​—Hla. 51:1.

Cabanga ngaloko lokwenteka kuTakuya, * lobeketama kulwisana nemkhuba lomubi wekubuka titfombe letikhombisa kungcola nekushaya indlwabu. Kodvwa bekehluleka kulwisana nalomkhuba. Wativa njani? Utsi: “Ngangitiva ngingafaneleki, kodvwa nangithantaza kuJehova ngimcele kutsi angitsetselele, abengisita kakhulu.” Abemsita njani Jehova? Labadzala ebandleni laTakuya bamkhutsata kutsi abatsintse noma nini, nakehluleka kulwisana nalomkhuba. Utsi: “Kwakumatima kutsintsana nabo kodvwa nakwentekile ngakhuluma nabo, ngangitfola emandla.” Ngemuva kwaloko, bazalwane labadzala bahlela kutsi umbonisi wesigodzi avakashele Takuya. Lombonisi wesigodzi nakafika kuTakuya watsi: “Akukamane nje kwatentakalela kutsi ngite lapha. Ngite ngobe kufuna labadzala belibandla. Bakhetse kutsi ngivakashele wena.” Takuya uyakhumbula: “Kwakungimi lobekenta sono, kodvwa Jehova asebentisa labadzala belibandla, abefuna kungisita.” Takuya wachubeka atfutfuka wate waba lihlahlandlela lelivamile futsi nyalo ukhonta ehhovisini leligatja. Njengobe kwenteka kulomzalwane, nawe Nkulunkulu utakusita ubhekane nesimo lesimatima.

Bantfu labanyenti kuyabakhatsata kungawutfoli umsebenti. Labanye balahlekelwa ngumsebenti futsi kube matima kutfola imali labangatiphilisa ngayo. Cabanga kutsi bewungativa njani nawubatse ufuna umsebenti ungawutfoli? Labanye bantfu nabakulesimo, batikhandza bangakahlonipheki. Jehova angakusita njani? Kungenteka angakuniketi umsebenti lokahle ngaleso sikhatsi, kodvwa angakusita ngekutsi ukhumbule lokwashiwo yiNkhosi Davide nayitsi: “Bengingumntfwana, manje sengimdzala, angizange sengimbone lolungile alahliwe, ngisho nebantfwabakhe abahambi bacela kudla.” (Hla. 37:25) Jehova ukubona uligugu kuye, futsi ‘ngesandla sakhe sekudla lesilungile,’ angakusita utfole lokudzingako kute uchubeke umkhonta.

Sara, lohlala eColombia wawabona emandla aJehova ekusindzisa. Abesebentela inkapane leyatiwa kakhulu. Ngisho nobe abesebenta kamatima, lenkapane beyimholela kahle. Nobe kunjalo,  bekafuna kwentela Jehova lokuncono, ngako wawuyekela lomsebenti wacala kuba lihlahlandlela. Kodvwa akuzange kube melula kutfola umsebenti latawusebenta kuwo emalanga latsite evikini. Wacala kutsengisa i-ice cream kodvwa kancane kancane waphelelwa yimali futsi wayekela kuyitsengisa. Sara utsi: “Kwaphela iminyaka lemitsatfu, kodvwa ngiyambonga Jehova ngekungisita ngikhone kubeketela.” Wafundza kwehlukanisa emkhatsini wetintfo latifunako netintfo latidzingako, nekutsi angakhatsateki ngelilanga lelilandzelako. (Mat. 6:33, 34) Ngekuhamba kwesikhatsi, inkapane labeyisebentela yamcela kutsi abuye emsebentini atowenta lomsebenti labewenta kucala. Wabatjela kutsi utawukhona kusebenta kuphela emalanga latsite evikini nanangabe batamnika sikhatsi sekuya emihlanganweni. Nanobe Sara angasayiholi imali labeyihola ekucaleni, uyachubeka alihlahlandlela. Kuko konkhe lokwenteke kuye, utsi: “Ngasibona sandla selutsandvo saJehova.”

Lokunye lokukhatsata bantfu kakhulu, kukhula ngeminyaka. Bantfu labanyenti nabefika eminyakeni yemhlalaphansi bayakhatsateka kutsi batawuba nayo yini imali leyenele letabenta baphile kahle. Baphindze bakhatsateke ngesimo sabo semphilo njengobe bakhula. Kungako Davide ancenga Jehova watsi: “Ungangilahli esikhatsini sebudzala bami, ungangikhohlwa nase ngiphelelwa ngemandla.”​—Hla. 71:9, 18.

Ngako-ke, tinceku taJehova tingativa njani tivikelekile nasetikhulile? Kufanele tichubeke tikhombisa kukholwa kuNkulunkulu, tetsembe kutsi utatinakekela tidzingo tato. Nangabe betiphila imphilo lentofontofo kuleminyaka leyendlulile, kungase kudzingeke tente kuphila kwato kube melula futsi tenetiswe yimali lencane. Tingase titfole kutsi kudla “umbhidvo” esikhundleni ‘senyama lenonile’ kungaba mnandzi futsi mhlawumbe kungaba kudla lokulungele imphilo yato. (Taga 15:17) Nangabe uchubeka ujabulisa Jehova, utakunakelela ngisho nobe sewukhulile ngeminyaka.

Cabanga ngaJosé naRose, lasebakhonte Jehova emsebentini wasikhatsi sonkhe iminyaka lengetulu kwa-65. Kuleminyaka leyendlulile, bebanakekela uyise waRose lebekadzinga kunakwa sonkhe sikhatsi. José kwakudzingeka abeketelele buhlungu nekuhlindvwa ngenca yemdlavuza kanye nemakhemikhali labekawasebentisela kuwelapha. Jehova uselulele yini sandla sakhe sekudla lesilungile kuboJosé naRose? Yebo. Ngayiphi indlela? Wasebentisa boTony naWendy bantfu labashedene ebandleni, lababaniketa indlu yekuhlala. Bebavele bafisa kuhlalisa emahlahlandlela kulendlu ngaphandle kwekuwacashisela. Eminyakeni leminyenti leyendlulile, Tony nakabuka ngelifasitelo lasesikolweni labefundza kuso, abevame kubona José naRose baya ensimini. Wabatsandza ngesizatfu sekutsi bebakhutsele futsi loko kwaba nemtselela lomuhle kuye. Kubona kutsi laba labakhulile banikele kuphila kwabo kuJehova, kwenta boTony naWendy kutsi babanikete lendlu. Sekuphele iminyaka lengu-15 basita José naRose, nyalo labaseminyakeni yabo-80 budzala. Lolusito labalutfolile kuboTony naWendy, balutsatsa njengesipho lesivela kuJehova.

Nawe Nkulunkulu ukuniketa ‘sandla sakhe sekudla lesilungile.’ Wena utasibamba yini sandla saLoyo lokwetsembisa kutsi: “Ungesabi, ngitakusita”?