PIKSAIM long tingting olsem yu wokabaut long strit long biknait. I no longtaim yu pilim olsem wanpela man i wok long bihainim yu. Taim yu stop, em tu i stop. Taim yu wokabaut hariap hariap, em tu i wokabaut hariap hariap. Yu stat long ran, na yu hariap i go long haus bilong wanpela pren i stap klostu. Taim pren bilong yu i opim dua na tokim yu long go insait long haus, yu sotwin wantaim na pulim win strong na yu amamas olsem nau yu seif.

Ating dispela kain samting i no bin painim yu, tasol ating ol narapela hevi i mekim na yu tingting planti na pret. Ating yu laik daunim wanpela pasin kranki bilong yu, tasol oltaim yu wok long mekim yet dispela pasin. O, ating inap longpela taim yu no gat wok mani na yu traim kain kain rot, tasol yu no painim wanpela wok. O, yu tingting planti long ol sik bai painim yu taim yu kamap lapun. O, ating i gat narapela samting we i mekim yu bel hevi.

Maski yu gat wanem wanem hevi, yu bai amamas tru sapos i gat wanpela man i stap na yu inap tokim em long ol samting i mekim yu wari na tingting planti, na em inap helpim yu. Olsem wanem? Yu gat kain pren olsem? Yes, yu gat! Aisaia 41:8-13 (NW) i tok, Jehova i stap olsem pren bilong yu wankain olsem em i bin i stap pren bilong bilipman Abraham. Long ves 10 na ves 13, Jehova i tokim ol wokman bilong em olsem: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela [“Mi bai mekim stretpela pasin na putim rait han bilong mi i kam holim gut han bilong yu,” NW]. Mi God, Bikpela bilong yupela. Mi save sambai long yupela [“holim rait han bilong yu,” NW] na mi tokim yupela olsem, yupela i no ken pret. Bai mi helpim yupela.”

Olsem wanem? Dispela tok i strongim yu? Tingim olsem yu tu yu insait long tok piksa Jehova i mekim long yumi. Jehova i no tok olsem yu holim han bilong em na wokabaut wantaim em bikos dispela bai makim olsem rait han bilong em bai holim left han bilong yu. Jehova i tok em yet bai “putim rait han” bilong em i kam “holim rait han bilong yu.” I olsem em i pulim yu kamaut long wanpela bikpela hevi, na em i tok: ‘Yu no ken pret. Bai mi helpim yu.’

Olsem wanem? Yu tingim Jehova olsem Papa na Pren i gat pasin laikim na em bai helpim yu long taim bilong hevi? Em i tingim yu tru, na em i laik bai yu stap gut, na em i tingting pinis long helpim yu. Taim sampela samting i putim hevi long yu, Jehova i laik bai yu pilim olsem yu stap seif bikos em i laikim yu tru. “Em i stap klostu na i redi long helpim yumi long taim bilong bikpela hevi.”—Sng. 46:1.

Sampela man i save bel hevi tru long ol rong ol i mekim long bipo na ol i tingting planti olsem God i fogivim ol, o nogat. Sapos yu pilim olsem, orait tingim  stori bilong Jop. Em i “tingting yet long ol sin [em i] bin mekim long taim [em i] yangpela.” (Jop 13:26) Devit tu i bin bel hevi long rong em i mekim long bipo na em i tokim Jehova olsem: “God, yu no ken tingting moa long sin na pasin nogut mi mekim taim mi yangpela yet.” (Sng. 25:7) Yumi olgeta “i bin mekim sin na [yumi] sot long kamapim ol gutpela pasin bilong God.”—Rom 3:23.

Tok i stap long Aisaia sapta 41 em tok God i givim long lain Israel bilong bipo. Ol i bin mekim planti bikpela sin, olsem na Jehova i givim strafe long ol na larim ol birua i kisim ol i go kalabus long Babilon. (Ais. 39:6, 7) Maski i olsem, God i tingim taim bihain we em bai kisim bek sampela bilong lain Israel em ol i tanim bel na kam bek long em! (Ais. 41:8, 9; 49:8) Long nau tu, Jehova i redi long helpim ol manmeri husat i gat strongpela laik long mekim ol samting em God bai orait long en.—Sng. 51:1.

Tingim ekspiriens bilong Takuya. * Em i bin wok strong long lusim pasin bilong lukim ponografi na pilai long sem bilong em. Em i lusim ol dispela pasin, tasol sampela taim em i pundaun long mekim ol dispela pasin. Em i pilim olsem wanem? Em i tok: “Mi pilim olsem mi no gutpela moa, tasol taim mi beten long Jehova na askim em long fogivim mi, i olsem em i save helpim mi long kirap gen na sanap.” Olsem wanem Jehova i helpim Takuya? Ol elda long kongrigesen i tokim Takuya long ringim ol sapos em i kirap gen long mekim dispela pasin. Takuya i tok: “Mi save pret tru long ringim ol, tasol taim mi ringim ol, ol i save mekim ol tok bilong strongim mi.” Bihain, ol elda i stretim rot long wasman sekit i ken mekim sepeding visit long Takuya. Wasman sekit i tokim Takuya olsem: “Mi no kam long lukim yu nating, nogat. Mi kam bikos ol elda i laik bai mi mas kam lukim yu. Ol i makim yu long kisim helpim long dispela visit.” Takuya i tok: “Mi yet i mekim sin, tasol Jehova i helpim mi long rot bilong ol elda.” Takuya i kamap strong gen na em i mekim wok painia, na nau em i mekim wok long wanpela brens ofis. Wankain olsem God i mekim long dispela brata, God bai helpim yu long kirap sanap gen sapos yu pundaun.

Planti manmeri i no gat wok mani, olsem na ol i tingting planti na bel hevi. Ol bos i rausim sampela wokman, olsem na sampela i hatwok tru long painim narapela wok mani. Tingim: Yu bai pilim olsem wanem sapos olgeta bosman long nupela wok mani bilong yu i rausim yu long wok? Dispela i save mekim na sampela man i pilim olsem gutnem bilong ol i bagarap. Olsem wanem Jehova inap helpim yu? Ating em i no inap hariap long givim wok mani long yu, tasol em inap kirapim yu long tingim tok bilong King Devit: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.” (Sng. 37:25) Yu spesel long ai bilong Jehova, olsem na em bai “mekim stretpela pasin na putim rait han bilong [em] i kam” helpim yu long kisim ol samting yu nidim bambai yu inap mekim yet wok bilong em.

Sara em wanpela sista i stap long Kolambia, na em i gat wanpela ekspiriens long olsem wanem Jehova i lukautim em. Sara i holim bikpela wok mani long wanpela kampani i gat biknem, na em i save kisim  bikpela pe. Tasol em i laik givim bikpela strong na haptaim bilong em long mekim wok bilong Jehova, olsem na em i lusim wok mani na em i mekim wok painia. Em yet i kirapim wanpela pat taim wok, tasol dispela wok i no kamap gut. Em i wokim liklik stua bilong salim aiskrim, tasol isi isi mani bilong em i pinis, olsem na em i pasim stua. Sara i tok: “Mi stap nating inap 3-pela yia, tasol mi tenkyu tru long Jehova olsem mi inap sanap strong na karim hevi.” Sara i lain long skelim wanem ol samting em i nidim na wanem ol samting em i no nidim, na em i no ken tingting planti long ol samting bilong neks de. (Mat. 6:33, 34) Bihain, olpela bos long kampani em i wok long en long bipo i ringim em na tokim em long i go mekim gen wankain wok em i mekim long bipo. Sara i tokim bosman olsem em bai wok sapos ol i tok orait long em inap wok sampela de tasol, na sampela de i bilong em long mekim wok lotu. Maski Sara i no kisim bikpela mani long dispela wok olsem em i kisim long pastaim, em i mekim yet wok painia. Sara i tok: “Mi pilim tru han bilong Jehova long lukautim mi.”

Narapela samting i mekim ol man i tingting planti em hevi bilong kamap lapun. Taim ol man i winim krismas bilong ritaia long wok, planti bilong ol i wari olsem nogut ol bai sot long mani bilong lukautim ol yet. Na tu, ol i tingting planti long ol sik bai painim ol taim ol i kamap lapun. Devit i tokim Jehova olsem: “Nau mi lapun pinis na mi no gat strong moa, orait nogut yu lusim mi na givim baksait long mi.”—Sng. 71:9, 18.

Olsem wanem ol wokman bilong Jehova inap pilim olsem ol i stap gut maski ol i lapun? Ol i mas bilip tru olsem God bai lukautim ol long ol samting ol i nidim. Sapos ol i holim planti mani kago long pastaim, orait nau ol i mas sotim na lain long holim liklik kago tasol. Ating ol bai luksave olsem ol i amamas moa na helt bilong ol i kamap gutpela moa taim ol “i kaikai kumu tasol” na abrusim pasin bilong “kaikai mit bilong bulmakau.” (Snd. 15:17) Sapos yu tingting tasol long mekim Jehova i belgut, em bai lukautim yu long nau na long taim yu kamap lapun.

Tingim José na Rose, em tupela marit i mekim wok bilong Jehova fultaim winim 65 yia. Inap planti yia, ol i stap wantaim papa bilong Rose long de olgeta na lukautim em. Na tu, José i kisim operesen na kimoterapi bilong stretim sik kensa. Yu ting Jehova i putim rait han bilong em i go bilong helpim dispela tupela marit? Yes! Tasol em i lukautim tupela olsem wanem? God i yusim Tony na Wendy, em tupela marit long kongrigesen husat i givim wanpela apatmen long José na Rose. Tony na Wendy i laik givim rum long ol painia oltaim na ol bai i no rentim. Long ol yia bipo taim Tony i stap long haiskul, em i save sindaun long klasrum na lukluk i go ausait long windo na lukim José na Rose i go aut oltaim long autim tok. Tony i laikim tru pasin bilong tupela long givim bel long autim tok, na dispela i helpim em tru long sait bilong bilip. Tony na Wendy i amamas long lukautim José na Rose bikos tupela i givim laip olgeta bilong tupela long mekim wok bilong Jehova. Inap 15 yia nau, ol i helpim José na Rose—long nau tupela i gat 85 krismas samting. José na Rose i pilim tru pasin helpim bilong Tony na Wendy, na ol i tingim dispela olsem presen i kam long Jehova.

God i laik “putim rait han” bilong em i kam helpim yu tu. Olsem wanem? Yu bai givim han bilong yu long Man husat i tok promis olsem: “Yu no ken pret. Bai mi helpim yu”?