1, 2. (a) Wanem hard samting nao kasem staka pipol distaem, and wanem nao kamaot from datwan? (b) Wanem nao Isaiah 41:10, 13 talem wea comfortim iumi?

WANFALA sista wea regular pioneer and hasband bilong hem wanfala elder hem sei: “Nomata mitufala evritaem duim olketa spiritual samting, mi savve wari and sorre tumas and datwan gohed for staka year. Datwan mekem mi no savve sleep gud long naet, hem affectim health bilong mi, mi no stap gud witim olketa narawan, and samfala taem mi laek for dae nomoa.”

² Waswe, iu tu feel olsem datfala sista samfala taem? Iumi stap long nogud world bilong Satan, so staka samting savve mekem iumi wari tumas. Olsem wanfala anchor hem stopem boat for muv, wei for wari tumas hem savve mekem man barava wikdaon and stopem hem for gohed long spiritual wei. (Prov. 12:25) Wanem nao samfala samting wea maet mekem man for wari? Maet iu sorre from famili member or fren hem dae or iu kasem bigfala sik or iu kasem persecution. Or maet iu stragol for kasem selen for lukaftarem famili bilong iu. Gogo, wei for wari savve mekem iu wikdaon and iu no hapi tu. Bat God hem willing for helpem iu.—Readim Isaiah 41:10, 13.

3, 4. (a) Taem Bible iusim datfala word “hand,” wanem nao hem savve piksarem? (b) Olketa wanem samting nao savve mekem iumi wikdaon?

³ Plande taem Bible savve story abaotem olketa part long  body for piksarem olketa wei bilong man or samting wea man duim. Olsem example, Bible story abaotem hand winim wan thousand taem. Taem Bible sei samwan strongim hand bilong man, datwan savve minim samwan encouragem hem, hem kamap strong, and hem redi for duim samting. (1 Sam. 23:16, footnote; Ezra 1:6, footnote) Hem savve minim tu hem garem hope for kasem gudfala samting long future.

⁴ Samfala taem, Bible story abaotem wei wea hand bilong man hem wik. Datwan savve minim man wea hem wikdaon or wea hem no garem hope. (2 Chron. 15:7, footnote; Heb. 12:12) Maet man olsem bae laek for givap nomoa. Sapos iu wari tumas or iu barava taed or iu luksavve iu start for wikdaon for duim olketa spiritual samting, hu nao iu savve go long hem for strongim iu? Wanem nao savve strongim iu for gohed moa and for hapi?

5. (a) Taem iumi wari and wikdaon, wanem nao iumi shud duim, and wanem nao iumi shud tingim evritaem? (b) Wanem nao bae iumi storyim long disfala study?

⁵ Readim Zephaniah 3:16, 17. Taem iumi wari and wikdaon, Dadi bilong iumi, Jehovah, hem askem iumi for “putim evri wari bilong [iumi] long hand bilong hem bikos hem tingim [iumi].” (1 Pet. 5:7) Long bifor, Jehovah lukaftarem gud olketa Israelite so hem bae lukaftarem iumi tu. Hem talem olketa hem ‘garem paoa for sevem olketa.’ Hem evritaem laek for helpem olketa wea faithful for worshipim hem. (Isa. 59:1) Long disfala study, bae iumi storyim thrifala example long Bible wea showimaot Jehovah laekem tumas for helpem pipol bilong hem nomata olketa kasem hard taem, and hem garem paoa tu for duim datwan. Example bilong olketa savve strongim iumi tu.

6, 7. Wanem nao iumi savve lanem from disfala story abaotem taem wea olketa Israelite winim olketa Amalekite?

⁶ No longtaem bihaen olketa Israelite kamap free from Egypt, olketa Amalekite kam for attakim olketa. Moses talem Joshua, wanfala man wea no fraet, for leadim olketa Israelite for go faetem olketa. Bat Moses, Aaron, and Hur go ap long wanfala maunten wea olketa savve lukim go olketa wea faet. Waswe, thrifala man hia go long datfala maunten bikos olketa fraet for join insaed datfala faet? Nomoa!

⁷ Moses duim samting wea helpem olketa Israelite for winim olketa Amalekite. Hem holem stik wea God talem hem for tekem and hem apim datfala stik. Taem Moses duim datwan, Jehovah strongim army bilong Israel for faetem olketa Amalekite. Bat taem hand bilong Moses start for taed and hem daonem, olketa Amalekite start for winim olketa Israelite. Aaron and Hur kwiktaem duim samting for helpem Moses. “Tufala tekem kam wanfala ston, and hem sidaon antap. Then Aaron standap wansaed long Moses and apim wanfala hand, and Hur standap narasaed and apim nara hand. Tufala duim olsem mekem hem no daonem hand bilong hem go kasem taem wea sun hem go daon.” Tru nao, God nao strongim olketa Israelite for winim datfala faet.—Ex. 17:8-13.

8. (a) Wanem nao Asa duim taem olketa bilong Ethiopia kam for faetem Judah? (b) Hao nao iumi savve followim example bilong Asa?

⁸ Jehovah iusim paoa bilong hem for helpem pipol bilong hem long taem bilong King Asa tu. Bible story abaotem staka difren army, bat army bilong Zerah, wea hem man bilong Ethiopia, hem nao big winim  eni nara army. Insaed disfala army hem 1,000,000 soldia wea savve tumas hao for faet. Army bilong Asa hem garem 580,000 soldia nomoa. Waswe, Asa hem wari, hem fraet, or wikdaon? Nomoa. Semtaem nomoa Asa askem Jehovah for helpem hem. Long tingting bilong man, maet hem hard for olketa Israelite winim datfala faet. Bat “God savve duim eni samting.” (Matt. 19:26) God iusim bigfala paoa bilong hem for “helpem Asa for winim olketa bilong Ethiopia.” Asa hem “barava faithful long Jehovah long full laef bilong hem.”—2 Chron. 14:8-13; 1 Ki. 15:14.

9. (a) Wanem nao no stopem Nehemiah for buildim bak wall bilong Jerusalem? (b) Wanem nao God duim for ansarem prea bilong Nehemiah?

⁹ Tingim feeling bilong Nehemiah taem hem go long Jerusalem. Hem lukim olketa enemy laek for kam faetem olketa Jew, so olketa stop nao for buildim bak wall bilong Jerusalem. From no eni samting protectim datfala taon, datwan mekem olketa Jew wikdaon. Waswe long Nehemiah? Waswe, hem wikdaon tu? Nomoa! Olsem Moses, Asa, and olketa narawan wea faithful for worshipim Jehovah, Nehemiah hem evritaem depend long Jehovah. So taem diswan happen, hem prea tu long Jehovah for helpem hem and Jehovah ansarem prea bilong hem. God iusim “bigfala paoa” bilong hem for strongim olketa Jew. (Readim Nehemiah 1:10; 2:17-20; 6:9.) Waswe, iu ting Jehovah iusim “bigfala paoa” bilong hem for strongim pipol bilong hem distaem?

10, 11. (a) Wanem nao Satan iusim for mekem iumi wikdaon? (b) Wanem nao Jehovah iusim for strongim iumi? (c) Wanem gud samting nao iu kasem from instruction wea kam from Jehovah?

¹⁰ Satan bae no givap for againstim iumi. Hem bae duim enikaen samting for trae stopem waka bilong iumi. Hem iusim olketa gavman, olketa bigman bilong religion, and olketa apostate for againstim iumi and for talem olketa laea story abaotem iumi. Wanem nao goal bilong hem? Hem laekem iumi for stop for preachim gud nius abaotem Kingdom. Bat Jehovah hem willing and garem paoa for helpem iumi, and tu, hem givim holy spirit bilong hem for strongim iumi. (1 Chron. 29:12) Hem barava important for iumi askem God for givim iumi spirit bilong hem mekem hem strongim iumi for faet againstim Satan and nogud world bilong hem. (Ps. 18:39; 1 Cor. 10:13) Iumi tinghae tu long wei wea Bible savve helpem iumi. Evri month iumi lanem staka samting tu from olketa pablikeson bilong iumi. Zechariah raetem toktok wea stap long Zechariah 8:9, 13 (readim) long taem wea olketa Jew buildim bak wall bilong Jerusalem. Olketa toktok hia hem barava fitim iumi distaem tu.

¹¹ Jehovah strongim iumi long narafala wei tu. Iumi kasem Bible instruction long olketa meeting, assembly, convention, and olketa Bible skul bilong iumi. Olketa samting hia savve helpem iumi for worshipim God from iumi lovem hem, garem olketa spiritual goal, and duim wanem Jehovah laekem. (Ps. 119:32) Waswe, olketa instruction hia wea kam from Jehovah strongim iu?

12. Wanem nao iumi mas duim for gohed strong long spiritual wei?

¹² Jehovah nao helpem olketa Israelite for winim olketa Amalekite and army bilong Ethiopia. And hem strongim Nehemiah and olketa Jew for buildim bak wall bilong Jerusalem. God bae strongim iumi tu for gohed preach nomata iumi kasem olketa hard taem, pipol againstim iumi, and no  interest long message bilong iumi. (1 Pet. 5:10) Jehovah bae no duim mirakol for finisim olketa problem bilong iumi, bat iumi tu mas duim samting. Wanem nao iumi mas duim? Iumi mas readim Bible evriday, prepare for olketa meeting and attendim olketa meeting evri week, gohed duim study seleva and famili worship, and prea evritaem long Jehovah. Iumi mas no letem eni samting for stopem iumi for kasem olketa samting wea Jehovah provaedem for strongim and encouragem iumi. Sapos iu luksavve iu no strong for duim olketa samting hia, askem God for helpem iu. Sapos iu duim olsem, spirit bilong God bae “givim paoa” long iu mekem iu laek for duim olketa samting hia. (Phil. 2:13) Bat wanem nao iu savve duim for strongim olketa narawan?

13, 14. (a) Wanem nao helpem wanfala brata bihaen waef bilong hem dae? (b) Wanem nao iumi savve duim for strongim olketa narawan?

¹³ Insaed organization bilong Jehovah evriwea long world, iumi garem olketa brata and sista wea savve encouragem iumi. Aposol Paul sei: “Strongim olketa hand wea wik and olketa knee wea seksek. Gohed wakabaot followim stretfala road.” (Heb. 12:12, 13) Olketa Christian long first century helpem each other. Pipol bilong Jehovah distaem tu duim sem samting. Olsem example, wanfala brata wea waef bilong hem dae and hem kasem olketa nara hard taem sei olsem: “Iumi no savve chusim wanem test nao bae kasem iumi, wanem taem nao test bae kasem iumi, or haomas taem nao bae iumi kasem test. Prea and wei for study seleva hem olsem wanfala laef jacket wea helpem mi for no draon. And from olketa brata and sista sapotim mi datwan barava comfortim mi. Mi luksavve hem important tumas for fren gud witim Jehovah bifor iumi kasem eni hard taem.”

¹⁴ Aaron and Hur helpem Moses taem tufala sapotim hand bilong hem long taem wea olketa Israelite faetem olketa Amalekite. Distaem, iumi tu savve helpem and sapotim olketa narawan. Samfala brata and sista bilong iumi olketa olo, garem problem saed long health, famili againstim olketa, olketa lonely, or famili member hem dae. Iumi savve strongim tu olketa young wan wea kasem hevi for duim olketa nogud samting, or for aftarem bignem long disfala world. (1 Thess. 3:1-3; 5:11, 14) Duim samting wea showimaot iu tingim olketa narawan long Kingdom Hall, long ministry, taem iufala kaikai tugeta, or taem iufala story long telephone.

15. Hao nao toktok bilong iumi savve encouragem olketa brata and sista?

¹⁵ Bihaen Asa winim datfala big army bilong Ethiopia, profet Azariah encouragem hem and olketa Israelite olsem: “Iufala mas no fraet or wikdaon bikos iufala bae kasem reward for samting wea iufala duim.” (2 Chron. 15:7) Diswan encouragem Asa for duim samting for mekem olketa Israelite worshipim moa Jehovah. Long distaem, gudfala toktok wea iumi talem savve encouragem olketa narawan and helpem olketa for gohed worshipim Jehovah. (Prov. 15:23) And tu, olketa gudfala koment wea iumi givim long olketa meeting savve encouragem olketa brata and sista.

16. Wanem nao olketa elder savve duim for followim example bilong Nehemiah? Storyim eni experience wea wanfala brata or sista hem helpem iu.

¹⁶ Jehovah helpem Nehemiah and olketa Jew for buildim bak wall bilong Jerusalem, and olketa finisim diswan insaed 52 day nomoa!  (Neh. 2:18, footnote; 6:15, 16) Nehemiah no lukluk nomoa taem olketa narawan duim datfala waka olsem wanfala boss. Hem waka witim olketa for buildim bak wall bilong Jerusalem. (Neh. 5:16) Staka elder followim example bilong Nehemiah taem olketa waka long olketa construction project or klinim and fixim olketa Kingdom Hall. And tu, olketa duim shepherding kol long olketa brata and sista and waka witim olketa long ministry.—Readim Isaiah 35:3, 4.

17, 18. Taem iumi garem olketa problem and wari, wanem nao iumi mas duim?

¹⁷ Taem iumi waka tugeta witim olketa brata and sista datwan strongim wei wea iumi wan mind. Iumi fren gud tu witim each other and iumi barava sure iumi klosap nao for kasem olketa blessing anda long rul bilong Kingdom. Taem iumi strongim olketa wea wikdaon, iumi helpem olketa for gohed strong nomata olketa kasem hard taem and for gohed garem hope for future. Datwan strongim iumiseleva tu and helpem iumi for tingim hope bilong iumi for future.

¹⁸ Taem iumi tingim wanem Jehovah duim for helpem and protectim pipol bilong hem long bifor, datwan strongim faith and trust bilong iumi long hem. So taem iu garem olketa problem and iu wari, no letem olketa samting hia for mekem iu wikdaon! Sapos iu prea long Jehovah for helpem iu, hem bae strongim iu and helpem iu for kasem olketa blessing bilong Kingdom.—Ps. 73:23, 24.