1, 2. а) Амгы үеде улус кандыг бергелерге таваржып турар база ол чүүл чүге чедирип турар? б) Бурганның Сөзү бисти чүү чүвеге бүзүредип турар?

 УДУРТУКЧУ ашактыг, эгелекчи бир угбавыс мынча деп үлешкен: «Бараалгалга хамаарышкан эки чаңчылдарлыг-даа болзумза, дүвүрел болгаш сагышсырал-биле дыка хөй чылдар иштинде демисежип чоруур мен. Ол чүүл уйгу-дыжымче, кадыымче болгаш өскелер-биле канчаар алдынып турарымче салдар чедирип турар. Чамдыкта кымның-биле-даа чугаалажыксавайн баар мен».

² Мындыг минниишкиннерни миннип чораан силер бе? Эрликтиң каржы делегейинге хөй аар-бергелерге таварышкаш, эмин эрттир дүвүреп, муңгаралга алзып болур бис. Мындыг минниишкиннер корабльдиң эжиндиреринге шаптыктап турар өртег-биле дөмей (У. ч. 12:25). Олар кайыын тыптып кээп болурул? Ажыг-шүжүг ажып эртип, аар аарыг-биле демисежип, акша-төгерик чедишпес үеде өг-бүлеңерни азыраар дээш кызып, чок болза бүзүрелиңер дээш удурланыышкынга таваржып турар чадавас силер. Түңнелинде сагыш-сеткилиңер хоозурап, күш чок апарганыңарны миннир силер. Долгандыр бүгү чүве караңгылап, өөрүшкү чок ышкаш сагындырар. Ынчалза-даа бичии-даа чигзинмеңер: Бурган силерге дузалаар дээш, холун сунарынга белен. (Исайя 41:10, 13 номчувут.)

3, 4. а) «Хол» деп сөстүг сөс каттыжыышкыннарын Библияда канчаар ажыглап турарыл? б) Холдарывыс чүү дээш суларап болурул?

³ Кандыг-бир кижиниң азы Бурганның шынарларын азы кылдыныгларын тайылбырлаарда, Библияда мага-бот кезектериниң  аттарын киирген сөс каттыжыышкыннарын хөй катап ажыглаан. Чижээ, «хол» деп сөстүг сөс каттыжыышкыннары Бижилгеде чүс-чүс катап таваржып турар. «Кандыг-бир кижиниң холун быжыглаары» дээрге ону деткиири болгаш хей-аът киирери дээн уткалыг (1 Хаан. 23:16). Бо сөстер кижиниң келир үеже идегелдиг, өөрүшкүлүг көрүп турарын илередип болур.

⁴ «Хол сулараар» деп сөс каттыжыышкыны чамдыкта кандыг-бир кижиниң идегелин ышкынганын, ундараанын, аймаараанын илередип болур (2 Чыл. 15:7; Евр. 12:12). Ындыг байдалда кижи белени-биле дүжүп бериптер. Бир эвес мага-бодуңарны, сагыш-сеткилиңерни, безин Бурган-биле харылзааңарны кошкадып турар бергелерге таварышкан болзуңарза, сорук киреринге силерге чүү дузалаар? Шупту чүвени ажып эртеринге болгаш өөрүшкүлүг артарынга тура-сорукту кайыын алырыл?

5. а) Бергелер тургустунуп кээрге, оларны канчаар хүлээп ап турар бис, ынчалза-даа чүнүң дугайында сактыр болзувусса эки? б) Чүнү сайгарар бис?

⁵ Софония 3:16, 17 номчувут. Холдарывысты сула салырының, өскээр чугаалаарга, коргуш биле ундаралга алзырының, «хамык сагыш човаашкыннарыңарны» Менче чая кааптыңар деп турар ынакшылдыг Адавыска, Иеговага, ынаныры дээре (1 Пет. 5:7). Туттуруушкунда иудейлерге Бурганның: «Дээрги-Чаяакчының холу чолдая бербээн, ол камгалап шыдаар» — дээн сөстерин кичээнгейге ап болур бис (Иса. 59:1). Үнер арга чок ышкаш байдалдарга безин, Иегова күзел-соруун күүсетсин дээш, чонун быжыглаар күзели-даа, шыдалы-даа бар деп көргүскен үш таварылганы Библиядан сайгарып көөр бис. Ол таварылгалар силерни канчаар быжыктырып болурунуң дугайында эки боданып көрүңер.

6, 7. Израильчилерниң амалик чонну канчаар тиилээнинден кандыг ажыктыг кичээлди шиңгээдип алыр бис?

⁶ Бурган израиль чонну Египеттиң кулданыындан хуулгазын арга-биле хостаан соонда, удатпаанда, оларже амалик чон халдай берген. Бурганның чону кандыг арга ажыглааныл? Моисейниң айтыышкыннарын эдерип, Нуннуң эрес-дидим оглу Иисус израиль шеригни баштапкан. Ол үеде Моисей, Аарон, Хур суглар тулчуушкун шөлү көстүп турар тейниң бажынче үне бергеннер. Таанда олар корткаш, дезе берген ол бе? Чок, болбайн канчаар!

⁷ Моисейниң дараазында кылган чүвези израиль чонга тиилээринге дузалаан. Ол холдарынга алыс шын Бурганның даянгыыжын өрү көдүргеш, куду бадырбайн турган. Моисей холдарын көдүрүп алгаш турда, Иегова израильчилерниң холдарын, тиилээр кылдыр, быжыглап турган. Ынчалзажок Моисейниң холдары шылай бергеш, куду бадып эгелээрге, амалик чон израильчилерни тиилеп эгелээн. Ынчан Аарон биле Хур шалыпкыны аажок, «даш эккелгеш, аңаа салып бергеннер. Моисей даш кырынга олуруп аарга, Аарон — бир талазындан, Хур — өске талазындан ооң холдарын көдүрүп алганнар. Ооң холдары хүн ашкыжеге чедир көдүрлү берген турган». Бурган күштүг холу-биле израильчилерни деткиирге, олар тиилеп алган (Хост. 17:8—13).

8. а) Израильге эфиоптар кыжанып эгелээрге, Аса чүнү кылганыл? б) Бурганга ынанырынга хамаарыштыр Асаның үлегерин канчаар өттүнүп болур бис?

⁸ Аса хаанның хүннеринде Иегова холун чолдая бербээн деп база катап шынзыткан. Библияда дыка хөй тулчуушкуннарның дугайында бижээн. Оларның бирээзинге эфиоп Зерахтың хөй санныг аг-шерии киришкен. Ооң шерии, дайынга дадыккан, бир миллион дайынчылардан тургустунган. Эфиоптар Асаның аг-шериин барык ийи катап ажып турган. Аса дүвүреп корткаш, белени-биле холдарын сула салып болур  турган, ынчалза-даа ол дораан-на Иеговадан дуза дилээн. Эфиоптарның шерии дыка күштүг болгаш, оларны тиилээри болдунмас турган, «ынчалза-даа Бурганның шыдавас чүвези чок» (Мф. 19:26). Бурган өндүр улуг күжүн көргүзүп, «эфиоптарны [чүрээ бүгү назынында Дээрги-Чаяакчыга бүрүнү-биле бердинген турган] Асаның... мурнунга чылча шаап» каан (2 Чыл. 14:8—13; 3 Хаан. 15:14).

9. а) Неемияга Иерусалимниң ханаларын катап тударынга чүү шаптыктап шыдавааныл? б) Бурган Неемияның мөргүлүнге канчаар харыылааныл?

⁹ Иерусалимче эглип келгениниң соонда Неемияның чүнү миннип турганын бодап көрүңер даан. Хоорай көңгүс камгалал чок арткан. Неемияның чаңгыс чер чурттуглары аажок ундарап турган. Дайзыннарның кыжаныгларындан сезингеш, иудейлерниң холдары суларап, Иерусалимниң ханаларын катап тударын олар соксадыпкан. Ол чүүл Неемияны аймаарадыпкан бе? Чок! Моисей, Аса болгаш оон-даа өске Иегованың шынчы бараалгакчылары дег, Неемия Бурганга идегеп чаңчыккан турган. Бо удаада ол база шак ынчаар кылган. Үнер арга чок ышкаш байдалда Иегова Неемияның сеткилинден дуза дилээн мөргүлүнге харыылаан. Бурган иудейлерниң сулараан холдарын «бодунуң өндүр улуг күжү-биле, күчүлүг холу-биле» быжыглаан. (Неемия 1:10; 2:17—20; 6:9 номчувут.) Иегова бөгүн база бараалгакчыларын «өндүр улуг күжү-биле» болгаш «күчүлүг холу-биле» быжыглап шыдаар дээрзинге бүзүрээр силер бе?

10, 11. а) Эрлик холдарывысты суларадыр дээш, канчаар оралдажып турарыл? б) Иегова бисти канчаар быжыглап, күш киирип турарыл? в) Бурганның өөредилгези силерге кандыг ажык-дузаны эккеп турарыл?

¹⁰ Христиан ажыл-чорудулгавыстың когун үзер дээн оралдажыышкыннарын Эрлик кажан-даа соксатпас дээрзинге чигзинмейн барып болур бис. Ооң чепсектери — меге биле чагыргаларның, шажын удуртукчуларының болгаш ойталакчыларның талазындан кыжаныглар. Ооң сорулгазы кандыгыл? Холдарывысты сула салыпкаш, Бурганның Чагыргазының дугайында буянныг медээни суртаалдаарын соксадыпсын деп, ол күзеп турар. Ынчалзажок Иегованың ыдыктыг сүлдези-биле бисти быжыглаар күзели-даа, шыдалы-даа бар (1 Чыл. 29:12). Эрлик биле ооң каржы делегейиниң чоргузуп турар шенелделерин ажып эртеринге биске ыдыктыг сүлдеге ынаныры чугула (Ыд. ыр. 17:40; 1 Кор. 10:13). Оон аңгыда бисте ыдыктыг сүлдениң салдары-биле бижиттинген Бурганның Сөзү бар. Оон ыңай ай санында ап турарывыс Библияга үндезилеттинген дептерлерниң дугайында боданып көрүңер. Захария 8:9, 13-те (номчувут) бижээн сөстер Иерусалимниң өргээзин катап тудуп турган үеде бижиттинген-даа болза, олар биске база хамааржып турар.

¹¹ Ол ышкаш бисти христиан ужуражылгаларда, шуулганнарда болгаш организацияның школаларында Бурганның өөредилгези быжыглап турар. Ооң ачызында бис шын хөөннү сайзырадып, бараалгалга хамаарышкан сорулгаларны салып, ол ышкаш янзы-бүрү христиан хүлээлгелерни күүседип шыдаар бис (Ыд. ыр. 118:32). Ындыг өөредилгени күзелдии-биле өөренип турар силер бе?

12. Бараалгалывыска чүткүлдүг артарынга биске чүү дузалаарыл?

¹² Иегова израильчилерге амаликтерни болгаш эфиоптарны тиилээринге, ол ышкаш Неемияга болгаш ооң чаңгыс чер чурттугларынга тудугну төндүреринге күштү берген. Удурланыышкыннар, кижилерниң тоомча чогу болгаш дүвүрелдеривис турза-даа, суртаалдаарын соксатпайн, туруштуг артарынга херек күштү Бурган биске бээр (1 Пет. 5:10). Ийе, Бургандан хуулгаазын манавайн турар бис, ынчалза-даа бистен хамааржыр бүгү чүүлдерни кылыр болзувусса эки. Олче хүннүң-не Бурганның Сөзүн номчууру, ужуражылгаларга белеткенип,  оларны үспези, өг-бүле-биле чүдүлге үезинде болгаш хууда Библияны өөренирде угаан-чүрээвисти Библиядан бодалдар-биле долдурары база кезээде мөргүл таварыштыр Иеговадан дуза дилээри кирип турар. Өске чүткүүшкүннеривиске болгаш сорулгаларывыска Иегованың берип турар бүгү чүүлдеринден күштү болгаш сорук кириишкинни алырынга шаптыктаарын болдурбас ужурлуг бис. Бир эвес холдарыңар сула салдынып, бараалгалыңарның кандыг-бир талазы кошкап эгелээнин эскерип кагзыңарза, Бургандан дузаны дилеңер. Ынчан Ооң сүлдезиниң салдары силерге чүткүүрүнге-даа, хөделиринге-даа дузалаар дээрзин көрүп каар силер (Флп. 2:13). Ынчаарга өскелерниң холдарын канчаар быжыглап болур силер?

13, 14. а) Бир акывыс өөнүң ишти чок апарган соонда канчаар катап күш кирип келгенил? б) Өскелерни канчаар быжыглап болур бис?

¹³ Иегованың ачызында, ёзулуг деткимчениң үндезини болур, сагыш човангыр ха-дуңмавыс бар. Павел элчин: «Ынчангаш сула салдынган холдарыңар болгаш сирилээн дискектериңер быжыктырыңар. Аскак бут кадырлы бербезин, а эттинзин дээш, буттарыңар дорт орук-биле кылаштазын» — деп бижээн (Евр. 12:12, 13). Бирги векте дег, бөгүн база христианнарны кады бүзүрээн ха-дуңмазы быжыглап турар. Бир акывыс кадайын чидиргеш, база өске-даа халаптарга таварышкаш, мынча дээн: «Кандыг шенелделерге таваржырывысче канчаар-даа салдар чедирип шыдавас бис деп чүүлдү билип алдым. Меңээ мөргүл биле Библияны өөренири, сугга дүжүп өлбезинге дузалаар камгалал жиледи дег, апарган. Оон аңгыда мени кады бүзүрээн акы-угбаларым аажок деткип, аргалап турган. Бергелер тургустунарын манавайн, Иегова-биле чоок харылзааны сайзырадып алырының кайы хире чугулазын билдим».

¹⁴ Тулчуушкун үезинде Аарон биле Хур Моисейниң холдарын көдүрүп алгаш турган. Бис база өскелерни деткип, оларга дузалажыр аргаларны дилээр болзувусса эки. Кымнарга? Чижээ, назылап кыраан, аараан, өг-бүлезиниң удурланыышкынынга таварышкан, чоок кижизин чидирген, чок болза чааскаанзырап чоруур улуска дузалап болур бис. Оон ыңай аныяк христианнарны быжыглап болур бис, чүге дээрге оларны долгандыр улус үргүлчү бачыт кылырынче чыгап азы бо делегейге «чедиишкин» чедип алырынче: дээди эртем-билиглиг, бай-шыдалдыг болурунче азы ажыл-агыйынга депшииринче деткип турар (1 Фес. 5:11, 14; 3:1—3). Хурал залынга чугаалажып, азы телефоннажып тургаш, суртаалдап чорааш азы чемненип тургаш өскелерге сонуургалды канчаар илередип болуруңарны боданып көрүңер.

15. Бистиң сорук киирер сөстеривис өскелерже кандыг салдар чедирип болурул?

¹⁵ Асаның чайынналчак тиилелгезиниң соонда Азария медээчи болгаш чон ону: «А силер кадыг-быжыг болуңар, холуңар суларавазын, чүге дээрге кылган ажыл-херээңер дээш шаңнал алыр силер» — деп деткээн (2 Чыл. 15:7). Ол кыйгы Асаны алыс шын чүдүлгени катап тургузарынга шиитпирлиг хемчеглерни хүлээринче оттурган. Сорук киирер сөстериңер өскелерниң сеткил-чүрээн хөлзедип, Иеговага бараалгалынга оон-даа хөйнү кылырынче оттуруп болур (У. ч. 15:23). Ужуражылга үезинде бүзүрелди быжыглаар харыыларыңар өскелерже күштүг салдар чедирип болур деп кажан-даа утпаңар.

16. Удуртукчулар Неемияны өттүнүп, акы-угбаларывыстың холдарын канчаар быжыглап турарыл? Кады бүзүрээн акы-угбаларывыстың бирээзи силерге канчаар дузалааныл? Чижектен чугаалап көрүңерем.

¹⁶ Неемия болгаш аңаа дузалап турган улус ажылды уламчылап шыдаар кылдыр, Иегова оларның холдарын быжыглаан. Иерусалимниң ханалары 52 хонук иштинде туттунган! (Неем. 2:18). Неемия тудугну  удуртуп турганындан аңгыда, ханаларны катап тударынга идепкейлиг киржип турган (Неем. 5:16). Бөгүн удуртукчулар Неемияны өттүнүп, организациявыстың тудуг ажылдарынга азы тус черниң Хурал залының хандырылгазынга болгаш ашталгазынга киржип турар. Ол сагыш човангыр акылар суртаалчылар-биле кады суртаалдап, оон аңгыда, ундараан улустуң холдарын быжыглаары-биле, кадарчы ажылын кылып чоруур. (Исайя 35:3, 4 номчувут.)

17, 18. Бир эвес бергелер болгаш сагышсыралдар бисти хөме ап турар болза, чүү чүвеге чигзинмес болзувусса эки?

¹⁷ Акы-угбаларывыс-биле эгин кожа бараалгап тургаш, оларның-биле чаңгыс эп-биле оон-даа күштүг каттыжар бис. Оон артык, ёзулуг өңнүктерни тып ап, Бурганның Чагыргазының башкарылгазынга бисти кайгамчыктыг йөрээлдер манап турар дээрзинге оон-даа шынзыгар бис. Өскелерни быжыглап тургаш, оларга аар-берге шенелделерни ажып эртеринге, ол ышкаш келир үеже бүзүрелдиг болгаш өөрүшкүлүг кылдыр көөрүнге дузалап турар бис. Өскелерни деткиир болзувусса, ол чүүл бараалгалывыска идепкейлиг болурунга болгаш Бурганның белеткээн йөрээлдеринден карак салбазынга дузалаар. Шак ынчаар боттарывыстың холдарывыс база быжыгар.

¹⁸ Эрткен үеде янзы-бүрү байдалдарда шынчы бараалгакчыларын Иегованың канчаар деткип база камгалап турганының дугайында боданып тургаш, Аңаа бүзүреливисти болгаш идегеливисти быжыглаар бис. Ынчаарга, амгы үеде аар-берге үелерни ажып эртип турар болзуңарза, холдарыңар суларавазын! Иеговага үргүлчү мөргүп чоруңар. Ол силерни күчүлүг холу-биле быжыглазын, а келир үеде Чагырганың йөрээлдерин силерге элбээ-биле хайырлазын (Ыд. ыр. 72:23, 24).