1, 2. Ñanyi makatazho apitamo bakalume ba Yehoba?

KUTENDEKELATU ku muntu mutanshi wajinga wa kishinka aye Abela, kufika ne lelo jino, bapopweshi ba kishinka bapita mu makatazho. Mutumwa Paulo wanembejile bena Kilishitu Bahebelu amba ‘bachinchikile ne kupita mu makatazho akatampe’ byo bakebelenga kuba kyaswa muchima wa Yehoba pa kuba’mba ebapeshe. (Hebe. 10:32-34) Paulo waesakenye makatazho apitangamo bena Kilishitu ku makayo akayanga Bangiliki a kwikyombesha nabiji kwenda kwa kupimpauka, kwifina tukono ne kwipuma binkonyi. (Hebe. 12:1, 4) Lelo jino, tuji mu kapeela ka ku bumi kabiji balwanyi betu betwimena ku ntundwa kabiji bakeba kwitulefula pa kuba’mba tubule kwikala na lusekelo ne kubula kukekala na mapesho a kulutwe.

² Patanshi, tubena kulwa (nangwa’mba “kwifina tukono,” tubyambo twa munshi.) na Satana ne ntanda yanji yatama. (Efi. 6:12) Onkao mambo, twafwainwa kuchinuzhuka “bintu byakosa” biji mu ino ntanda. Bino bintu byavwangamo mafunjisho, buntemwa  maana, ne byubilo bikwabo byatama nabiji kuba bulalelale, kupeepa fwanka ne kukizhamo kutoma maalwa ne kwingijisha michi ipendañana. Kabiji twafwainwa kwibikako kushinda bumbulwa kulumbuluka bwetu ne byakonsha kwitulefula.—2 Ko. 10:3-6; Kolo. 3:5-9.

3. Lesa witufunjisha byepi bya kulwa na balwanyi betu?

³ Nanchi twakonsha kushinda bino bintu nyi? Ee, bino kechi kyapeela ne. Byo aambilenga pa bantu bakayanga makayo a kwipuma binkonyi, Paulo waambile kutazha kwi aye mwine amba: “Byo ntaya makofi kechi mpumatu mu mwela ne.” (1 Ko. 9:26) Byonkatu muntu ulwa na binkonyi byo ebikako kushinda ye abena kulwa nanji, ne atweba twafwainwa kwibikako kushinda balwanyi betu. Yehoba witufunjisha kabiji witukwasha pa kuba’mba tushinde balwanyi betu. Witupa Mambo anji muji mikambizho ya kulondela. Kabiji wingijisha mabuku alumbulula Baibolo, kupwila, kubuñana ne kushonkena pa kwitukwasha. Nanchi mwingijisha bintu byo mufunda nyi? Inge mwakankalwa kuba bino, kijitu nobe ‘kupuma mu mwela,’ kechi mubena kupuma mulwanyi wenu ne.

4. Twakonsha kuba byepi pa kuba’mba bubi bubule kwitushinda?

⁴ Balwanyi betu betulukuka kimye kyo twabula ne kuketekela kabiji betupuma kimye kyo twakooka, onkao mambo, twafwainwa kwikala balaba. Baibolo witujimunako’mba: “Kange muleke bubi bwimushindenga ne, bino shindainga bubi na byawama.” (Loma 12:21) Lutundaiko lwa kuba’mba “kange muleke bubi bwimushindenga ne” lumwesha’mba twakonsha kushinda bubi. Twakonsha kuba bino inge twatwajijila kulwa. Bino bakonsha kwitushinda kwi Satana, ntanda yanji yatama ne bumbulwa kulumbuluka bwetu inge twaleka kwizhikijila ne kuleka kulwa. Kange muswishe Satana kwimuzakamisha ne kwimulengela kuponesha maboko enu ne.—1 Pe. 5:9.

5. (a) Ki ka kyakonsha kwitukwasha kutwajijila kulwa pa kuba’mba Lesa etupeshe? (b) Tusakwisamba pa ñanyi bantu banembwa mu Baibolo?

⁵ Aba babena kulwa pa kuba’mba bashinde, bafwainwa kuyuka ene mambo o babena kulwila. Pa kuba’mba batalwenga bulongo kwi Lesa bafwainwa kuta muchima pa mulaye uji pa Bahebelu 11:6 wa kuba’mba: “Yense usolomoka Lesa wafwainwa kuketekela’mba koaji kabiji ye ufweta aba bamukebesha.” Kyambo kya Kingiliki kya kuba’mba “bamukebesha” kilumbulula kwibikishako kuba kintu na bulume. (Byu. 15:17) Mu Binembelo muji banabalume ne banabakazhi baingijile na ngovu kukeba mapesho a Yehoba. Yakoba, Lechela, Yosefwa ne Paulo bapichile mu bintu bibakookeshenga, bino mu kuchinchika kwabo mwafumine byawama. Twakonsha kulondela byepi bano bantu ba kishinka bana?

6. Ki ka kyakwashishe Yakoba kuchinchika, kabiji bamupesheshe byepi? (Monai kipikichala kitanshi.)

⁶ Mushakulu Yakoba watwajijile kulwa ne kuchinchika mambo watemenwe Yehoba, kunemeka bulunda bwanji na Lesa kabiji wajinga na lwitabilo lwa kine mu mulaye wa Yehoba wa kupesha baana banji. (Nte. 28:3, 4) O ene mambo Yakoba byo ajinga na myaka nobe 100 o ebikijileko bingi kuba’mba atambule mapesho a Lesa kya kuba wisunshile na malaika wialwile nobe muntu. (Tangai Ntendekelo 32:24-28.) Nanchi Yakoba wajinga na ngovu ya kwisunsa na malaika wa bulume nyi? Ine. Bino wakebeshe bingi kwisunsa nanji kabiji wamwesheshe’mba kechi usakukankalwa kushinda ne.  Mu kuchinchika kwanji mwafumine byawama. Bamutumbile jizhina ja kuba’mba Isalela, (jilumbulula’mba “Kwisunsa [Kuchinchika] na Lesa” nangwa’mba “Lesa Usunsañana.”) Yakoba watambwile mapesho a Yehoba onka o tukebapo ne atweba.

7. (a) Ñanyi lukatazho lukatampe lwapichilemo Lechela? (b) Lechela watwajijile byepi na kulwa kabiji bamupesheshe byepi?

⁷ Mukazhanji Yakoba aye Lechela wakebeshe kumona Yehoba byo akafikizha mulaye ye alayile mwatawanji. Bino kwajinga kintu kyamwekelenga kukatazha. Kechi wajinga na baana ne. Pa kyo kya kimye, kubula baana lwajinga lukatazho lukatampe ku banabakazhi. Ki ka kyakwashishe Lechela kutwajijila kuchinchika luno lukatazho lwabayile bingi? Kechi walefwilwe ne. Watwajijile na kulomba kwi Lesa na mukoyo. Yehoba waumvwine milombelo ya kwa Lechela kabiji wamupele baana. Kyo kyalengejile kwamba bino byambo na lusekelo amba: ‘Nalukuta kyakosa kabiji nashinda!’—Nte. 30:8, 20-24.

8. Ñanyi makatazho apichilemo Yosefwa, kabiji twakonsha kufunjilako ka ku byo aubile?

⁸ Bukishinka bwa kwa Yakoba ne Lechela bwakwashishe mwanabo Yosefwa kuyuka bya kuba na meseko a lwitabilo lwanji. Byo afikizhenga myaka 17, bwikalo bwanji bwapimpwilwe. Na mambo a kichima, bakolojanji bamupoteshe mu buzha. Mu kuya kwa kimye, bamukashile mu kaleya kwa kubula mambo mu Ijipita. (Nte. 37:23-28; 39:7-9, 20, 21) Yosefwa kechi walefwilwe nangwa kuzhingila ne kukeba kushinkanya ne. Bino watele muchima pa bulunda bwanji na Yehoba. (Levi 19:18; Loma 12:17-21) Byaubile Yosefwa byakonsha kwitukwasha ne atweba. Nangwa kya kuba bwikalo bwetu bwa ku bwanyike bwakatezhe nangwa pa kino kimye tubena kupita mu makatazho akatampe, twafwainwa kutwajijila kuchinchika. Twafwainwa kuketekela’mba inge twauba bino Yehoba uketupesha.—Tangai Ntendekelo 39:21-23.

9. Kulondela byaubile Yakoba, Lechela ne Yosefwa, twafwainwa kuba byepi pa kuba’mba Yehoba aketupeshe?

⁹ Langulukai pa makatazho o mubena kupitamo akonsha kweseka lwitabilo lwenu. Kampe bemuba nshiji, misalululo nangwa kwimwendeleka. Nangwa bemupamo mambo a bubela na mambo a kichima. Mu kifulo kya kukookesha maboko, vulukai kyakwashishe Yakoba, Lechela ne Yosefwa kutwajijila kwingijila Yehoba na lusekelo. Lesa wibakoseshe ne kwibapesha mambo banemekele bulunda bwabo ne aye. Batwajijile kulwa ne kuba bintu kwesakana na milombelo yabo. Tubena kwikala mu moba apelako a buno bwikalo bwatama, o ene mambo o kyanemena kuba’mba tutwajijile kwikala na lwitabilo lwakosa. Nanchi mubena kwibikako kulwa, ko kuba’mba kwingila na ngovu pa kuba’mba Yehoba emubile bibusa nyi?

10, 11. (a) Twakonsha kutwajijila byepi kulwa pa kuba’mba tukatambule mapesho a Lesa? (b) Ki ka kiketukwasha kufuukula bintu byawama ne kushinda bintu byakonsha kwitulengela kukankalwa kwingijila Lesa?

¹⁰ Ñanyi bintu bimo byo twafwainwa kulwa nabyo pa kuba’mba Lesa etupeshe? Bavula balwa na lukatazho lwa kushinda byubilo bya bumbulwa kulumbuluka bwabo. Bakwabo nabo bebikako kuba’mba batwajijile kutemwa mwingilo wa kusapwila. Nangwa kampe mukeba kutwajijila kuchinchika na mambo a kuba mukolwa kolwa nangwa mumvwa amba mujitu bunke. Bamo kibakatazha kulekelako mambo muntu wibazhingijisha nangwa wibalenga  mambo. Nangwa kya kuba twaingijila Yehoba pa myaka yavula nangwa ne, atweba bonse twafwainwa kutwajijila kwibikako kukana bintu byakonsha kwitulengela kukankalwa kwingijila Lesa ufweta bantu ba kishinka.

¹¹ Ibyo, kechi kyapeela kufuukula bintu byawama ne kwikala mwina Kilishitu walumbuluka ne. Kuba bino kukatazha inge muchima wetu wa bujimbijimbi ubena kwitutwala mungi. (Yele. 17:9) Inge byo byo mumvwa, lombai mupashi wazhila. Lulombelo ne mupashi wazhila byakonsha kwitupa bulume bwa kuba byawama kabiji Yehoba uketupesha. Mwafwainwa kwingijila pa bintu byo mulombapo. Tangainga Baibolo pa juba pa juba ne kwikala na kimye kya lufunjisho lwa pa bunke ne Kupopwela kwa Kisemi.—Tangai Salamo 119:32.

12, 13. Bena Kilishitu babiji balekele byepi byubilo byabo byatama?

¹² Mambo a Lesa, mupashi wanji ne mabuku alumbulula Baibolo byakwasha bena Kilishitu bavula kushinda byubilo bya bumbulwa kulumbuluka bwabo. Mwanyike umo watangile kibaaba kyajinga mu Labainga! wa Kizungu wa December 8, 2003, kya kuba’mba “How Can You Resist Wrong Desires?” (Mwakonsha Kushinda Byepi Milanguluko Yatama?) Waubilepo byepi? Waambile’mba: “Mbena kwibikako kushinda milanguluko yatama. Byo natangile mu kibaaba amba ‘bavula kibakatazha bingi kuleka byubilo byatama,’ kyandengejile kuyuka’mba nanchi kuji balongo bavula bapita mu lukatazho lo mbena kupitamo. Kechi yami yenka ne.” Uno mwanyike wamwenejilemo ne mu kibaaba kyajinga mu Labainga! wa  Kizungu wa October 8, 2003, kya kuba’mba “Alternative Life-Styles—Does God Approve?” (Nanchi Lesa Waswisha Byubilo Byapusana Pusana Bya Kwilaala Nyi?) Waambile’mba kino kibaaba kyaambile’mba bamo luno lukatazho lujitu nobe “mwiba mu mubiji.” (2 Ko. 12:7) Byo batwajijila kwibikako kwikala na byubilo byawama, bakonsha kwikala na luketekelo lwa kulutwe. Onkao mambo, waambile’mba: “Na mambo a bino bishinka, nakonsha kutwajijila kwikala wa kishinka pa juba pa juba. Nsanchila Yehoba pa kwituzhikijila mu ino ntanda yatama.”

¹³ Twayai twisambe pa byapichilemo nyenga umo wa ku United States. Wanembele’mba: “Nsanta bingi pa kwitufunjisha bintu byo tukeba pa kimye kyafwainwa. Mmona kuba’mba bino bibaaba bebinembejiletu amiwa. Pa myaka yavula yapitapo, nebikako kuleka muteeto washikwa Yehoba. Kimye kimo nkeba kuleka kulwa. Nayuka’mba Yehoba uji na lusa kabiji witulekelako mambo, pano na mambo a kuba’mba milanguluko yatama inkosela kabiji kechi neishikwa ne, ndanguluka’mba kafwako wa kunkwasha ne. Ino milanguluko yatama yalengejile bwikalo bwami kutama. . . . Panyuma ya kutanga kibaaba kya kuba’mba ‘Nanchi Muji na “Muchima wa Kuyuka” Yehoba Nyi?’ mu Kyamba kya Usopa kya March 15, 2013, namwene kuba’mba Yehoba ukeba kunkwasha.”

14. (a) Paulo wamonanga byepi bumbulwa kulumbuluka bwanji? (b) Twakonsha kuba byepi pa kuba’mba tushinde byubilo bya bumbulwa kulumbuluka bwetu?

¹⁴ Tangai Loma 7:21-25. Paulo wayukile byo kikatazha kuleka miteeto yatama ya mubiji wa bundengamambo. Nangwa byonkabyo, waketekejile’mba wakonsha kushinda ino miteeto kupichila mu kulomba kimye kyonse ne kuketekela Yehoba, kabiji wajinga na lwitabilo mu kitapisho kya bukuzhi bwa kwa Yesu. Nga atweba kiji byepi? Byo tubena kwibikako kushinda miteeto ya bumbulwa kulumbuluka, twakonsha kushinda. Twakonsha kuba byepi? Kupichila mu kuba byaubile Paulo ne kuketekela mwi Yehoba na muchima yense kechi kuketekela mu bulume bwetu ne, kabiji twafwainwa kwikala na lwitabilo mu bukuzhi.

15. Milombelo yakonsha kwitukwasha byepi kutwajijila kwikala ba kishinka ne kuchinchika meseko?

¹⁵ Bimye bimo, Lesa wakonsha kwituleka pa kuba’mba amone byo tusakuba na lukatazho lo tubena kupitamo. Twakonsha kuba byepi inge atweba bene (nangwa mulongo wetu) wabela kikola kikatampe nangwa bemuba nshiji? Twakonsha kumwesha’mba twaketekela mwi Yehoba na muchima yense ne kutwajijila kwikala ba kishinka ne kwikala na lusekelo ne kukosesha bulunda bwetu ne aye. (Fili. 4:13) Bintu byapitamo bantu bavula, mu kimye kyajingako Paulo ne lelo jino, bimwesha’mba kulomba kwitulengela kwikala na bulume ne kutwajijila kuchinchika.

16, 17. Mwafuukulapo kuba ka?

¹⁶ Diabola ukeba’mba mwikileke kwingijila Lesa ne kukookesha maboko enu. Bino twajijilai ‘kukakachila ku kyawama.’ (1 Tesa. 5:21) Ketekelai kuba’mba mwakonsha kushinda Satana, ntanda yanji yatama ne miteeto ya bundengamambo. Mwakonsha kushinda inge mwaketekela’mba Lesa ukemukwasha.—2 Ko. 4:7-9; Nga. 6:9.

¹⁷ Kyanema pa byonse, twajijilai kulwa, kwisunsa ne kuchinchika. Ketekelai mwi Yehoba na muchima yense amba ‘ukemwitulwila mapesho avula kya kuba kechi mukakajilwa kintu nangwa kimo ne.’—Mala. 3:10.