1, 2. Akambo akɔna walɔshana la ekambi wa Jehowa?

 EKAMBI wa Nzambi tshɛ wa kɔlamelo wekɔ lo ndɔ ta, ntatɛ oma le Abɛlɛ onto ɔlɔlɔ polo le anto wa kɔlamelo wa nshi nyɛ. Ɔpɔstɔlɔ Pɔɔlɔ akatɛ Akristo wa la Hɛbɛru dia vɔ “[w]akakikɛ ta dia wolo kaamɛ la asui” etena kakawasalaka la wolo dia mbetawɔma ndo tshɔkwama oma le Jehowa. (Hɛbɛru 10:32-34) Pɔɔlɔ akɛdika ta dialɔ Akristo la ta dia akɛnyi wa tɔkɛnyɔ wa la Ngirika, ɛnyɛlɔ lowango, tshindjiyana ndo mbokana akɔfi. (Hɛbɛru 12:1, 4) Ɛlɔ kɛnɛ, tekɔ lo tasake lowango dia nkondja lɔsɛnɔ ndo tekɔ la atunyi walanga mbekola timba taso ndo tokonya dia nshisha ɔngɛnɔngɛnɔ oma ko kakianɛ ndo difuto diaso dia lo nshi yayaye.

² Tekɔ lo ndɔ ta dioleki wolo kana ‘tekɔ lo tshindjiyana’ la Satana ndo la andja ande. (Ɛfɛsɔ 6:12, nɔtɛ.) Ekɔ ohomba efula sho nshika tanga diaha sho sɛngiyama oma lo wetshelo wa l’andja ɔnɛ, filozofi ndo ditshelo dia kɔlɔ, ɛnyɛlɔ nsala awui wa mindo wa dieyanelo, nnɔ mfɔka, wanu ndo didjoyadjoya. Sho pombaka nto ntetemala ndɔshana la ɔkɔmwɛlɔ ndo wɛɔdu aso hita.—2 Kɔrɛtɔ 10:3-6; Kɔlɔsayi 3:5-9.

3. Ngande watolowanya Nzambi dia ndɔshana l’atunyi aso?

³ Onde sho koka mɛtɛ mbidja otshumba lo ta dialɔso  l’atunyi wa wolo efula asɔ? Eelo, koko ɔsɔ bu dui dia wɔdu! Pɔɔlɔ akayaɛdika la omboki w’akɔfi etena kakandate ate: “Dimi haloke akɔfi ami oko onto lakɔmɔla lɔpɛpɛ.” (1 Kɔrɛtɔ 9:26) Paka oko watɔlɔshanaka omboki w’akɔfi la omboki w’akɔfi okina, mbahombaso ndɔshana la atunyi aso. Jehowa tokimanyiyaka ndo tolowanyaka dia nsala dui sɔ. Nde salaka dui sɔ lo tshimbo ya Bible. Nde tokimanyiyaka nto lo tshimbo ya ekanda aso walembetshiya Bible, nsanganya y’Akristo ndo nsanganya ya weke. Onde wɛ kambaka la wetshelo tshɛ wakondjayɛ oma lɔkɔ? Naka bu, kete wɛ hookoka ndɔshana la atunyi ayɛ tshɛ lo tshɛ ndo wɛ ayonga oko omboki w’akɔfi woka akɔfi ande lo lɔpɛpɛ.

4. Akokaso nsala diaha akambo wa kɔlɔ tɔlɛndja?

⁴ Sho pombaka mambalɛka tena tshɛ. Lande na? Nɛ dia atunyi aso koka tɔlɔsha etena kahatalongamɛ kana keso wɔdu. Bible tɔhɛmɔlaka ndo tokeketshaka etena katatɔ ɔnɛ: “Tɔlɛndjamake la akambo wa kɔlɔ, koko otetemale nɛndja akambo wa kɔlɔ oma lo akambo w’ɛlɔlɔ.” (Rɔmɔ 12:21) Naka sho ntetemala ndɔshana la akambo wa kɔlɔ, sho koka mbidja otshumba! Koko, naka sho ntshika mambalɛ ndo ntshika ndɔsha, kete Satana, andja ande ndo wɛɔdu aso koka todja otshumba. Ɔnkɔnɛ tatohekɔke pondjo. Tɔkɔmɔke ndo tetawɔke dia anya ayɛ nɛmba!—1 Petero 5:9.

5. a) Ahombaso mbohɔka dia mbetawɔma ndo tshɔkwama oma le Nzambi? b) Anto akɔna watɛkɛtama lo Bible wayangaso nsɛdingola dikambo diawɔ?

⁵ Dia mbidja otshumba, sho pombaka mbohɔka lande na katatalɔsha. Tekɔ lo ndɔsha nɛ dia sho nangaka mbetawɔma ndo tshɔkwama oma le Nzambi. Hɛbɛru 11:6 mbutaka ɔnɛ: “Ɔnɛ layasukanya la Nzambi pombaka mbetawɔ dia nde ekɔ, ndo nde ndjalaka ofutshi wa wanɛ wooyanga l’otema ɔtɔi.” Nyanga Jehowa l’otema ɔtɔi kɛdikɛdi mbidja welo w’efula naka sho nangaka mbetawɔma le nde. (Etsha 15:17) Lo Bible, tekɔ la bɛnyɛlɔ di’amɛna efula dia apami la wamato wakasale dui sɔ. Jakɔbɔ, Rashɛlɛ, Yɔsɛfu, ndo Pɔɔlɔ, vɔ tshɛ wakahomana l’awui waki tshondo y’okakatanu le wɔ lo yimba ndo lo demba. Koko vɔ wakatondoya. Bɛnyɛlɔ diawɔ toshikikɛka dia naka sho mbidja welo, sho la wɔ koka nkondja ɛtshɔkɔ wa Jehowa. Nyɛsɔ tende woho wakokaso nsala dui sɔ.

6. Kakɔna kakakimanyiya Jakɔbɔ dia ntetemala, ndo ngande wakandafutama? (Enda osato wele lo mbɔtwɛlɔ.)

⁶ Jakɔbɔ pami ka kɔlamelo akalɔsha ndo akakikɛ, nɛ dia nde akokaka Jehowa ngandji ndo akɔsaka diɔtɔnganelo diaki lam’asande la Jehowa la nɛmɔ. Nde aki la mbetawɔ k’efula lo daka dia Jehowa dia ntshɔkɔla tokanula tande. (Etatelo 28:3, 4) Etena kaki Jakɔbɔ la ɛnɔnyi 100, nde akalɔshana ndo la ondjelo dia nkondja ɔtshɔkɔ w’oma le Nzambi. (Adia Etatelo 32:24-28.) Onde Jakɔbɔ aki mɛtɛ la wolo wakandakoke ndɔshana la ondjelo wa wolo efula ɔsɔ lo ndamɛ? Ndooko! Koko nde akayashikikɛ ndo akɛnya dia nde akasale la wolo dia nkondja ɔtshɔkɔ! Jehowa akatshɔkɔla Jakɔbɔ l’ɔtɛ w’etete kande ndo akawɔlɛ lokombo Isariyɛlɛ, mbuta ate “ɔnɛ lalɔsha kana latetemala la Nzambi.” Jakɔbɔ akakondja difuto diatatayange ndo sho la wɔ, mbuta ate mbetawɔma ndo tshɔkwama oma le Jehowa.

7. a) Naa dui diasha ɔkɔmwɛlɔ diaki la Rashɛlɛ? b) Kakɔna kakasale Rashɛlɛ, ndo ngande wakandatshɔkwama?

 ⁷ Rashɛlɛ wadi aki Jakɔbɔ la ngandji efula nde la wɔ akalomɔlomɔka dia mɛna woho wakahombe Jehowa nkotsha daka diande le omɛnde. Koko vɔ waki l’okakatanu ɔmɔtshi. Rashɛlɛ aki ekomba, dui sɔ diakashaka wamato waki lo nshi yakafundamaka Bible paa efula. Ngande wakatetemala Rashɛlɛ ndɔsha kaanga mbakinde la dui diakawɔkɔmɔlaka? Ndooko lushi lakandashisha elongamelo. Lo dihole dia nsala ngasɔ, nde akatetemala ndɔsha lo nɔmbaka Jehowa mbala la mbala. Jehowa akoke alɔmbɛlɔ waki Rashɛlɛ wa l’otema ɔtɔi ndo nde akatshɔkwama etena kakandayota ana. Diakɔ diakate Rashɛlɛ ɔnɛ: ‘Lambodja welo efula dia ndɔshana . . . , ko lambodja otshumba!’—Etatelo 30:8, 20-24.

8. Ekakatanu akɔna waki la Yɔsɛfu, ndo ngande wende ɛnyɛlɔ k’ɔlɔlɔ le so?

⁸ Ondo ɛnyɛlɔ ka kɔlamelo ka Jakɔbɔ nde la Rashɛlɛ kaki la shɛngiya le Yɔsɛfu ɔnawɔ ndo kakayookimanyiya etena kakinde l’ekakatanu lo lɔsɛnɔ. Etena kaki Yɔsɛfu la ɛnɔnyi 17, lɔsɛnɔ lande lakatshikitana tshɛ lo tshɛ. Anango wakawokaka kandjema, wakoosondja lo lɔhɔmbɔ. L’ɔkɔngɔ wa laasɔ, nde akasale ɛnɔnyi efula lo lokanu l’Edjibito, kaanga mbakinde komonga l’onongo. (Etatelo 37:23-28; 39:7-9, 20, 21) Koko Yɔsɛfu kɔkɔmɔ kana nɛmba ndo nde konyanga dia nsɔmbɔya. Lande na? Nɛ dia Yɔsɛfu akɔsaka diɔtɔnganelo diaki lam’asande la Jehowa la nɛmɔ ndo akayasha lɔkɔ l’otema ande tshɛ. (Akambo w’ase Lɛwi 19:18; Rɔmɔ 12:17-21) Ɛnyɛlɔ ka Yɔsɛfu koka tokimanyiya. Oyadi kaanga takadiɛnɛ l’awui wa kɔlɔ lo dikɛnda diaso kana lɔsɛnɔ laso la kakianɛ lekɔ lo mɛnama oko bu l’elongamelo, sho pombaka ntetemala ndɔsha ndo aha mpekɔ. Naka sho nsala ngasɔ, kete sho koka monga l’eshikikelo dia Jehowa ayotɔtshɔkɔla.—Adia Etatelo 39:21-23.

9. Ngande wakokaso mbokoya Jakɔbɔ, Rashɛlɛ ndo Yɔsɛfu?

 ⁹ Ɛlɔ kɛnɛ, sho la wɔ pombaka mbikikɛ ehemba wa wolo. Mbeyaka monga ko wɛ ekɔ lo diɛnɛ l’ɔtɛ wakosalɛwɔ akambo wele keema losembwe, wekɔ lo kokanɛ kɔlɔ kana wekɔ lo kɔnyɔla kana l’ɔtɛ wakooka onto ɔmɔtshi kandjema. Lo dihole dia wɛ nkɔmɔ, ohɔ kɛnɛ kakakimanyiya Jakɔbɔ, Rashɛlɛ ndo Yɔsɛfu dia ntetemala kambɛ Jehowa l’ɔngɛnɔngɛnɔ. Nzambi akaakeketsha ndo akaatshɔkɔla nɛ dia vɔ wakɔsaka diɔtɔnganelo diaki lam’asawɔ la nde la nɛmɔ efula. Vɔ wakatetemala ndɔsha kana mbidja welo ndo nsala akambo lo yoho yɔtɔnɛ la alɔmbɛlɔ awɔ. Lam’ele tekɔ lo nsɛna lo nshi y’ekomelo, ekɔ ohomba sho nkeketsha elongamelo kaso ka lo nshi yayaye! Onde wɛ ekɔ suke dia ndɔsha, mbuta ate nsala la wolo dia mbetawɔma le Jehowa?

10, 11. a) Lande na kahombaso ndɔsha dia nkondja ɛtshɔkɔ wa Nzambi? b) Kakɔna kayotokimanyiya dia nsala ɛsɔnwɛlɔ w’amɛna?

¹⁰ Lande na kahombaso ndɔsha dia nkondja ɛtshɔkɔ wa Nzambi? Dui dimɔtshi ele, lam’ele tekɔ anto wele keema kokele, mbeyaka monga ko tekɔ lo ndɔshana la nsaki mɔtshi ya kɔlɔ. Amɔtshi wekɔ lo ndɔsha dia monga la kanyi ya dimɛna lo dikambo di’esambishelo ndo akina wekɔ lo ndɔshana la ekakatanu wendana la yoonge kana la woho wayaokawɔ ompoko. Akina nto mongaka l’okakatanu dia dimanyiya anto wambowasalɛ kɔlɔ. Oyadi edja kakɔna kambotokambɛ Jehowa, sho tshɛ pombaka ndɔshana la awui watodjɛ wekamu dia kambɛ Nzambi, ɔnɛ lafuta akanga wa kɔlamelo.

¹¹ Lo mɛtɛ, koka monga dui dia wolo efula dia monga Okristo ndo dia nsala ɛsɔnwɛlɔ w’amɛna, djekoleko etena kalɔshanaso la nsaki yaso ya kɔlɔ. (Jɛrɛmiya 17:9) Naka ndo wɛ mbele l’ekakatanu ɛsɔ, kete nsala dɔmbɛlɔ ndo lɔmba Jehowa nyuma kande k’ekila. Dɔmbɛlɔ ndo nyuma k’ekila koka kokimanyiya dia monga la wolo wa nsala kɛnɛ kele ɔlɔlɔ ndo oma laasɔ, wɛ koka nkondja ɛtshɔkɔ wa Nzambi. Yashikikɛ dia nsɛna lo yoho yɔtɔnɛ la alɔmbɛlɔ ayɛ. Sala la wolo dia mbadiaka Bible lushi tshɛ, ndo yatshungwɛ etena ka salaka wekelo w’onto ndamɛ ndo ɔtɛmwɛlɔ wa lo nkumbo.—Adia Osambo 119:32.

12, 13. Ngande wakakimanyiyama Akristo ahende dia mbahemɛ nsaki ya kɔlɔ?

¹² Tekɔ la bɛnyɛlɔ efula diɛnya woho wakakimanyiya Ɔtɛkɛta wa Nzambi, nyuma kande ndo ekanda aso w’Akristo anangɛso la akadiyɛso dia mbahemɛ nsaki ya kɔlɔ. Ɔna ɔmɔtshi lele l’ɛnɔnyi dikumi l’ɛmɔtshi akadia sawo diele l’ɔtɛ a dui ɔnɛ “Comment résister aux mauvais désirs?” diakatondjama lo Réveillez-vous ! wa Ngɔndɔ ka dikumi l’ahende 8, 2003. Kakɔna kakandasale? Nde mbutaka ate: “Lekɔ lo ndɔsha dia mbahemɛ tokanyi ta kɔlɔ. Etena kakamadia lo sawo sɔ ɔnɛ ‘le anto efula, ta dialɔshawɔ dia mbahemɛ nsaki ya kɔlɔ diekɔ wolo efula,’ dui sɔ diakakimanyiya dia ndjaoka ɔnɛ tekɔ efula. Aha dimɛ oto.” Ɔna ɔsɔ akakondja nto wahɔ oma lo sawo diele l’ɔtɛ a dui ɔnɛ: “Dieu approuve-t-il les mœurs différentes ?” diakatondjama lo Réveillez-vous ! wa Ngɔndɔ ka dikumi 8, 2003. Lo sawo sɔ nde akashihodia ɔnɛ, le anto amɔtshi ta sɔ diekɔ dia lushi tshɛ oko “tɛndɛ lo demba.” (2 Kɔrɛtɔ 12:7) Koko, lam’ele vɔ wekɔ lo ntetemala ndɔsha dia monga la lɔkɛwɔ la pudipudi, vɔ mongaka l’elongamelo ka dimɛna ka lo nshi yayaye. Nde akate ate: “L’ɔtɛ wa dui sɔ,  dimi mbɔsaka dia lushi tshɛ leta, dimi kokaka ntshikala la kɔlamelo. Lekɔ la lowando efula le Jehowa l’ɔtɛ wakambande la okongamelo ande dia tokimanyiya dia mpandɔ lushi tshɛ oma lo dikongɛ nɛ dia kɔlɔ.”

¹³ Tɔsɛdingole ndo ɛnyɛlɔ ka kadiyɛso kɛmɔtshi ka l’États-Unis. Nde akafunde ate: “Lambolanga nyokaloya losaka lo woho watoshanyu mbala tshɛ paka mbo ya ndɛ yele la so ohomba ndo l’etena kahombama. Mbala tshɛ dimi mbokaka dia asawo anɛ wakafundama paka dikambo diami. L’edja k’ɛnɔnyi efula, lakalɔshanaka la nsaki ka kɔlɔ ka dui dimɔtshi diahetsha Jehowa. Lo tena dimɔtshi, lakayange mpekɔ ndo ntshika ndɔsha. Dimi mbeyaka dia Jehowa mbokanaka kɛtshi ndo dimanyiyanaka, koko lam’ele lekɔ la nsaki ka kɔlɔ kɛsɔ ndo lekɔ lo ndjasha efula lɔkɔ, dimi haakihetsha, lekɔ lo mboka dia haakoke nongola ekimanyielo kande. Ta dia lushi la lushi sɔ diekɔ la shɛngiya lo awui tshɛ wa lo lɔsɛnɔ lami. . . . L’ɔkɔngɔ wa mbadia sawo diele l’ɔtɛ a dui ɔnɛ: ‘‘Onde wɛ ekɔ la “otema wa mbeya” Jehovah?’ lo Tshoto y’Etangelo ya Ngɔndɔ ka sato 15, 2013, lakashihodia mɛtɛ dia Jehowa nangaka kimanyiyami.”

14. a) Ngande wakayaoke Pɔɔlɔ lo kɛnɛ kendana la akambo wakalɔshanaka la nde? b) Ngande wakokaso mbidja otshumba lo ta dialɔso la wɛɔdu aso?

¹⁴ Adia Rɔmɔ 7:21-25. Pɔɔlɔ ndamɛ akeyaka dia kokaka monga dui dia wolo dia ndɔshana la nsaki ya kɔlɔ ndo la wɛɔdu. Koko, nde aki l’eshikikelo dia nde akakokaka mbidja otshumba lo ta sɔ naka nde nɔmba Jehowa, ndjaɛkɛ le nde dia nkondja ekimanyielo ndo monga la mbetawɔ lo olambo wa Yeso. Ko kayotota lo dikambo diaso? Onde sho koka mbidja otshumba lo ta dialɔso la wɛɔdu aso? Eelo, naka sho mbokoya Pɔɔlɔ ndo ndjaɛkɛ tshɛ lo tshɛ le Jehowa, aha lo wolo aso hita ndo monga la mbetawɔ lo oshinga w’etshungwelo.

15. Ngande wakoka Jehowa tokimanyiya dia ntshikala la kɔlamelo la ntondo k’ehemba ndo mbikikɛ?

¹⁵ Tena dimɔtshi Nzambi koka mbetawɔ dia sho mɛnya woho wayakiyanyaso mɛtɛ lo dikambo dimɔtshi. Ɛnyɛlɔ, naka sho kana onto ɔmɔtshi la lo nkumbo kaso ambotata hemɔ ka wolo kana wambotosalɛ dui dimɔtshi aha la losembwe, ngande wayotosala? Naka sho ndjaɛkɛka tshɛ lo tshɛ le Jehowa, kete tayowɔlɔmba dia tosha wolo wele la so ohomba dia ntshikala la kɔlamelo, ntetemala monga l’ɔngɛnɔngɛnɔ ndo nkeketsha diɔtɔnganelo diasaso la nde. (Filipɛ 4:13) Bɛnyɛlɔ di’Akristo efula, wa lo nshi y’edjedja ndo wa nshi nyɛ, diambɛnya dia dɔmbɛlɔ kokaka tokeketsha ndo tosha dihonga diele la so ohomba dia ntetemala mbikikɛ.

16, 17. Kakɔna kamboyoyashikikɛ dia nsala?

¹⁶ Diabolo nangaka kɛna wɛ ambɔkɔmɔ, ambohekɔ kana ambɔlɛndja anya. Ɔnkɔnɛ, yashikikɛ dia “kukut[ɛ] kɛnɛ kele ɔlɔlɔ.” (1 Tɛsalɔnika 5:21) Wɛ koka mbidja otshumba lo ta dialɔso la Satana, andja ande wa kɔlɔ ndo oseka nsaki tshɛ ka kɔlɔ! Wɛ koka mbidja otshumba naka wɛ ndjaɛkɛ tshɛ lo tshɛ le Nzambi dia nde kokeketsha ndo kokimanyiya.—2 Kɔrɛtɔ 4:7-9; Ngalatiya 6:9.

¹⁷ Ɔnkɔnɛ tetemala ndɔ ta. Tetemala mbidja welo. Tetemala ndɔsha. Tetemala, tohekɔke. Wɛ koka monga l’eshikikelo dia Jehowa “[ayoko]hongolɛ ɔtshɔkɔ polo ndo ndooko ɛngɔ kahombama.”—Malaki 3:10.