1, 2. Иегованың бараалгакчылары чүнүң-биле демисел чорудуп турарыл?

 БУРГАНГА шынчы арткан кижилерниң бир дугаары болур Авельдиң үелеринден эгелээш, амгы үеге чедир Иегованың шынчы бараалгакчылары демисел чорудуп турар. Павел элчин еврей христианнарга, олар Иегованың ээ көрнүүшкүнүн болгаш йөрээлдерин чедип алыр дээш, «хилинчекти эң маадырлыы-биле шыдажып» эрткен деп бижээн (Евр. 10:32—34). Павел ол демиселди, чаржыр, хүрежир, чудуруктажып чокшур дээн ышкаш маргылдааларга киржип чораан, бурунгу грек спортчуларның үндүрүп турган күжениишкиннеринге деңнээн (Евр. 12:1, 4). Бис бөгүн оңмас шаңналче чүткүп, маңнажып чоруур бис, ынчангаш дайзыннарывыс бисти өскээр чардыктырарын, мегелээрин, ужур шаварын оралдажып, өөрүшкүвүстен болгаш келир үеде шаңналывыстан чарып каарын кызып турар.

² Бис Эрлик-биле база аңаа чагырткан каржы делегей-биле кадыг-дошкун демиселди чорудуп турар бис (Эф. 6:12). Библияда бо делегейниң «шивээлери» кылдыр адаан чүүлдерниң салдарынга удурланыры биске эргежок чугула. Оларның санынче бо делегейниң өөредиглери, философиязы, ол ышкаш самыын чорук,  таакпылаары, арагалаары база наркотиктерни хүлээри дээн ышкаш кемниг херектер кирип турар. Оон аңгыда бачыттыг бүдүжүвүс-биле болгаш ундарал-биле үргүлчү-ле демисежир ужурга таваржып турар бис (2 Кор. 10:3—6; Кол. 3:5—9).

3. Дайзыннарывыс-биле демисежирин Бурган бисти канчаар өөредип турарыл?

³ Ол хире күштүг удурланыкчыларны тиилээри болдунар бе? Ийе, ынчалза-даа ону кылыры белен эвес. Павел бодун чудуруктажып чокшур кижиге деңнеп: «Агаар шашкылаар дээн кижи дег, анаа-ла хей чогушпайн чор мен» — деп бижээн (1 Кор. 9:26). Чудуруктажып чокшур кижи дег, удурланыкчыларның согуушкуннарын достурар ужурлуг бис. Иегова бисти аңаа өөредип, демиселивиске деткип чоруур. Бодунуң Сөзү таварыштыр Ол биске амы-тынывысты камгалаар сүмелерни берип турар. Библияга үндезилеттинген дептерлер, христиан ужуражылгалар болгаш шуулганнар таварыштыр Ол бисти деткип турар. Алган билиглериңерни ажыглаар-дыр силер бе? Бир эвес чок болза, «агаар шашкылап», дайзыннарыңарга бар-ла күжүңер-биле удурланмайн турар-дыр силер.

4. Бузутка тиилетпес дизе, чүнү канчаар болзувусса эки?

⁴ Дайзыннарывыс кошкай берген үевисти ажыглап, манаваанывыста халдап болур. Ынчангаш үргүлчү-ле серемчилелдиг болур ужурлуг бис. «Бузутка бодуңну бастыртпа, а ону буян-биле бас» — деп, Библия бисти сагындырып турар (Рим. 12:21). «Бузутка бодуңну бастыртпа» дээн сөстерден алырга, бис бузутту тиилеп шыдаар бис. А ону кылыр дизе, демиселди уламчылаары чугула. Бир эвес серемчилелдиг болбайн, демисешпес болзувусса, Эрлик, ооң каржы делегейи болгаш бачыттыг бүдүжүвүс бисти тиилеп каар. Кажан-даа Эрликке силерни дүжүп бээринге чедир коргудуптарын болдурбаңар (1 Пет. 5:9).

5. а) Бурганның йөрээлдери дээш демиселди уламчылаарынга биске чүү дузалаарыл? б) Библиядан кандыг үлегерлерни сайгарып көөр бис?

⁵ Демиселге тиилээр дизе, ону чүү дээш чорудуп турарывысты утпас ужурлуг бис. Бурганның ээ көрнүүшкүнүн болгаш йөрээлдерин чедип алырын күзээр болзувусса, Еврейлерге 11:6-да сөстерни сактыр ужурлуг бис. Ында: «Бурганче чоокшулап кел чыдар кижи бүрүзү Ол бар деп база Олче чүткүп чоруур улуска Ооң шаңналы турар деп бүзүрээр ужурлуг болгай» — дээн. «Чүткүп чоруур» деп бурунгу грек дылда кылыг сөзү күжениишкиннерниң үзүк-соксаал чогунче болгаш угланыышкынынче айтып турар хевирде турар (Аж.-ч. 15:17). Библияда Иегованың йөрээлдеринче күжениишкиннерин угландырып турган улустуң кайгамчык үлегерлери бар. Иаков, Рахил, Иосиф болгаш Павел сагыш-сеткилди болгаш мага-ботту суларадыптар шенелделерге таваржып турган. Ынчалзажок, туруштуг арткаш, олар элбээ-биле йөрээткен. Оларның үлегеринден чүнү өөренип алыр бис?

6. Иаковка туруштуг артарынга чүү дузалаан база ол дээш ол канчаар шаңнаткан? (Статьяның эгезинде чурукту көрүңер.)

⁶ Иаков өгбе чөптүг-шынныг чорукту үнелеп, Бурганның ооң үре-салгалын йөрээр дээн аазаашкынынга ыяк бүзүреп, Иеговага ынак чораан болгаш, демиселди туруштуу-биле чорудуп турган (Э. д. 28:3, 4). Ынчангаш Иаков чүс харлыг тургаш, Бурганның йөрээлин алыр дээш, шыдаар-ла чүвезин кылып, кижи мага-бодун хүлээп алган дээрниң төлээзи-биле хүрежи берген. (Эге дөс 32:24—28 номчувут.) Таанда Иаков күчүлүг дээрниң төлээзи-биле тутчуптар хире күштүг турган бе? Чок! Ынчалза-даа ол хүрешкени-биле дүжүп бербес деп шиитпирлиг хөөнненип алганын көргүскен. Түңнелинде ооң туруштуг чоруу  шаңналдыг болган. Бурган аңаа «Израиль» («Бурган-биле тутчур» [Бургандан чүткүлдүү-биле чедип ап турар] азы «Бурган хүрежип турар») деп таарымчалыг атты тывыскан. Иаков Иегованың ээ көрнүүшкүнүн болгаш йөрээлин алган. Бис база ындыг үнелиг шаңналды алыксап турар бис.

7. а) Рахил кандыг берге шенелдеге таварышканыл? б) Чүнүң ачызында ол демисежирин уламчылааш, түңнелинде йөрээлди алганыл?

⁷ Иаковтуң ынак кадайы Рахил Иегованың Иаковка берген аазаашкынының күүсеттинерин көрүксеп турган. Ынчалзажок Рахил ажы-төл чок турган. Ол үеде ындыг чүүл ёзулуг човалаң турган. Оон хамаарышпас берге байдалдарга туруштуг артарынга күштү Рахил кайыын ап турганыл? Ол идегелин ышкынмайн, соксаал чок мөргүп, демисежирин уламчылап турган. Иегова Рахилдиң чаннып дилээн мөргүлдерин дыңнааш, аңаа ажы-төлдү хайырлаан. «Мен... адааннаштым — ону ажып алдым!» — деп Рахилдиң өөрээнинде кайгамчык чүү-даа чок (Э. д. 30:8).

8. Иосиф хөй чылдар дургузунда кандыг берге шенелдени ажып эрткенил база ооң хөөнүн канчаар өттүнүп болур бис?

⁸ Иаков биле Рахилдиң туруштуг бооп артканы оглу Иосифке күштүг салдарны чедирип, шенелделерни ажып эртеринге дузалаан. Ол 17 харлыг турда, ооң чуртталгазы бүрүнү-биле өскерилген. Акылары адааргааш, ону кул кылдыр садыпкан. Ооң соонда ол актыг черге нүгүлдеткеш, каш чыл ишти Египеттиң кара-бажыңынга олурган (Э. д. 37:23—28; 39:7—9, 20, 21). Иосиф идегелин ышкынмаан, ол ышкаш акыларынга бак сагыш бодап, өжээн негээр арганы дилевээн. Шак ынчалдыр ол Иегова-биле үнелиг харылзаазын быжыктырып турган (Лев. 19:18; Рим. 12:17—21). Иосифтиң үлегери биске ажыктыг. Бир эвес чашкы үевис берге чораан болза азы амгы байдалывыс үнер арга чок кылдыр сагындырар болза, туруштуг артып, демиселивисти уламчылаары чугула. Ынчан Иегова бисти йөрээр дээрзинге чигзинмес бис. (Эге дөс 39:21—23 номчувут.)

9. Иаковту, Рахилди болгаш Иосифти өттүнүп, Иегованың йөрээлин алыр дээш, кандыг күжениишкиннерни үндүрер ужурлуг бис?

⁹ Бир эвес кандыг-бир шенелдени ажып эртип азы аар-берге байдалда болзуңарза, канчаарыл? Чөптүг эвес чорукка таваржып, кочуладып азы меге буруудаттырып турар чадавас силер. Черле дүжүп бербеңер! Иаковка, Рахилге болгаш Иосифке Иеговага өөрүшкүлүг бараалгаарынга күштү чүү берип турганын утпаңар! Бурган оларны быжыктырып йөрээген, чүге дизе олар Ооң-биле харылзаазын үнелеп чораан. Олар демисежирин уламчылап, мөргүлдеринге дүүштүр алдынып турган. Бис бо каржы делегейниң сөөлгү хүннеринде чурттап турар бис. Ынчангаш идегеливистен быжыг туттунарынга бисте шупту үндезиннер бар. Иегованың ээ көрнүүшкүнүн чедип алырынга, өскээр чугаалаарга, ол дээш демисежиринге белен силер бе?

10, 11. а) Бурганның йөрээлдери дээш, чүге демисежир ужурлуг бис? б) Чүнүң ачызында бис шын шилилгени кылып, ундаралды тиилеп, өскээр чардыкпайн, Бурганга бараалгап болур бис?

¹⁰ Кандыг таварылгаларда Бурганның йөрээлдери дээш демисежир апаар бис? Хөй улус кандыг-бир бачытче сундугуушкуну-биле демисежип чоруур. Өскелери бараалгалга эки хөөннүг болур дээш кызып турар. Бир улустуң кадыы кошкак, а чамдыктары чааскаанзырап чоруур. Оларның шуптузунга туруштуг чорук херек. Хомудал шыгжап, улустуң оларга удур бачыт кылганын өршээп чадап чоруур христианнар база бар. Алыс шынны чеже-даа чыл билир болзувусса, шынчы кижилерни шаңнап турар Иегова Бурганывыска бараалгаарынга шаптыктаар чүүлдер-биле демисежир ужурлуг бис.

 ¹¹ Ийе, шын шилилгени кылып, христиан орук-биле чорууру белен эвес. Ылаңгыя оп-мегелиг сеткил-чүрээвис бисти шын эвес орукче ыдалап турда, мырыңай берге (Иер. 17:9). Бир эвес бичии-даа бол, багай салдарга алзы бергениңерни эскерзиңерзе, дораан-на ыдыктыг сүлдени дилеп, мөргүңер. Мөргүл болгаш ыдыктыг сүлде силерге Иегованың оруунга артар күштү бээр. Мөргүлдериңерге дүүштүр хөделиңер. Библияны хүннүң-не номчуурун, хууда өөренирин болгаш өг-бүлеңер-биле чүдүлгени доктаамал эрттирерин кызыдыңар. (Ырлар 118:32 номчувут.)

12, 13. Ийи христианнарга багай күзелдер-биле демисежиринге чүү дузалааныл?

¹² Бурганның Сөзүнүң, ыдыктыг сүлдениң болгаш библейжи дептерлерниң дузазы-биле чамдык христианнар шын эвес күзелдерин чедиишкинниг тиилээн. Бир дуңмавыс 2003 чылдың декабрь 8-тиң «Оттуп келиңер!» деп сеткүүлүнге «Бачыттыг күзелдер-биле канчаар демисежирил?» деп статьяны номчаан. Ол аңаа кандыг салдар чедирген? «Мен шын эвес бодалдар-биле демисежип чоруур мен. Ол статьяга „дыка хөй улуска Бурганга таарышпас күзелдер-биле демисежири ылаңгыя берге“ деп номчааш, бодумну делегей чергелиг ха-дуңманың кезээ кылдыр миннинген мен. Ынчан чааскаан эвес мен деп билдим». Дуңмавыска оон ыңай 2003 чылдың октябрь 8-тиң «Оттуп келиңер!» деп сеткүүлүнге «Шын эвес холбаа хевирлерин Бурган чөпсүнүп турар бе?» деп статья дузалаан. Чамдык улуска ол демиселдиң бергези, «тен кадаан» дег, деп чүүлдү статьядан  ол эскерген (2 Кор. 12:7). Чөптүг-шынныг алдынар дээш, карак-кызыл тулчуп чоруур-даа болза, олар келир үеже идегелдиг көрүп болур. «Бо бодал меңээ хүннүң-не Бурганга шынчы артарынга дузалап турар. Бо бузуттуг делегейге чурттап чорааш, бергелерни ажып эртеринге, бодунуң организациязын таварыштыр дузалап турары дээш, Иеговага сеткилимниң ханызындан өөрүп четтирер-дир мен» — деп, ол үлешкен.

¹³ А Каттышкан Штаттарда чурттап чоруур угбавыс мынча деп бижээн: «Чогуур үезинде херек дептерлерни берип турарыңар дээш өөрүп четтирип тур мен. Сактырымга, статьяларны хууда меңээ бижээн ышкаш. Хөй чылдар дургузунда Иегованың көөр хөңнү чок чүүлдерин кылыксаар күштүг күзел-биле тулчуп чоруур мен. Чамдыкта дүжүп бериксээм кээр. Иегова энерелдиг болгаш өршээринге белен деп билир мен, ынчалза-даа ол багай күзелимден адырылбаан шаамда, база аңаа көөр хөөн чок чорукту сайзырадып шыдавайн турар болганымда, Иегованың дузазынга төлеп чок деп, бодаар мен. Бо үзүк-соксаал чок демисел амыдыралымның бүгү талаларынга дээштиг-дир. [...] 2013 чылдың март 15-тиң „Таңныыл суургазында“ „Иегованы билип турар чүректиг апарган силер бе?“ деп статьяны номчааш, Ооң меңээ херек кырында дузалажыксап турарын тода билип каан мен».

14. а) Павел демиселиниң дугайында чүнү бижээнил? б) Бачыттыг сундугуушкуннарывысты канчаар тиилеп болур бис?

¹⁴ Римчилерге 7:21—25 номчувут. Павел бачыттыг бүдүштүң күзелдери-биле болгаш шын эвес сундугуушкуннар-биле демисежириниң кайы хире бергезин бодунуң кежинге көрген. Ынчалза-даа Иеговага мөргүл таварыштыр ынанып, Иисус Христостуң бачыттан хостаар өргүлүнге бүзүрээр болза, ол демиселге тиилеп шыдаар дээрзинге ол чигзинмейн турган. А бистиң дугайывыста чүнү чугаалап болурул? Бис база бачыттыг бүдүжүвүстүң күзелдери-биле демиселге тиилеп болур бис. Канчаар? Павелдиң үлегерин эдерип, бодувустуң эвес, а Иегованың күжүнге ынанып, төлевирге бүзүреливисти илередип тургаш, тиилеп болур бис.

15. Шенелделерни ажып эртеринге болгаш шынчы артарынга мөргүл биске канчаар дузалап турарыл?

¹⁵ Чамдыкта берге байдалывыстың бисти кайы хире дүвүредип турарын көргүзер кылдыр, Бурган күзеп турар. Чижээ, бис (азы чоок улузувустуң бирээзи) аар аарый берген азы чөптүг эвес чорукка таварышкан дижик. Бир эвес шынчы артарынга база Бурганга бараалгаарынга чүткүлдүг хөөннү болгаш өөрүшкүнү чидирбес дээш, Иеговадан күштү мөргүп дилээр болзувусса, Аңаа бүрүнү-биле ынанып турарывысты көргүзер бис (Флп. 4:13). Мөргүл биске моон-даа соңгаар туруштуг артарынга күштү болгаш бүзүрелди берип болур дээрзин Павелдиң-даа, бистиң-даа үевисте Бурганның хөй бараалгакчыларының үлегери көргүзүп турар.

16, 17. Чүнү канчаарынче шиитпирлиг хөөннендиңер?

¹⁶ Демисежирин соксаткаш, дүжүп бериптериңерни Эрлик четтикпейн манап турар. «Буяндан туттунуңар» деп кыйгыны эдериңер (1 Фес. 5:21). Эрликти, ооң каржы делегейин болгаш бачыттыг бүдүжүңерни тиилеп шыдаар силер деп, черле чигзинмеңер. Тиилээр дизе, Бурган силерни быжыглап шыдаар деп чүүлге ыяк бүзүрээри чугула (2 Кор. 4:7—9; Гал. 6:9).

¹⁷ Чүү-даа боор болза, демисежирин уламчылаңар. Дүжүп бербеңер. Холуңар сула салбаңар. Иегова «силерже ачы-буянын сыңырар чер чок кылдыр харамнанмайн бадырып» бээр дээрзинге бүзүреңер (Мал. 3:10).