1, 2. ¿Kunatsa Jehová Diosan Testigonakapajj Biblian ewjjtʼanakaparjam isthaptʼasipjje? (Aka janankir foto uñjjattʼam).

HOLANDA markan qellqata mä periodicojja, iglesia pʼeqtʼirinakajj mä tantachäwipar sarasajj kunjam isisitäpjjänsa uka toqet akham sänwa: “Janiw suma isthapitäpkänti, lupi urun jukʼampïnwa” sasa. Ukampis uka pachpa periodicojj Jehová Diosan Testigonakapat akham sarakïnwa: ‘Testigonakajj jachʼa tantachäwinakapar suma isthaptʼataw sarapjje, chachanakasa jiskʼa yoqall wawanakasa, taqeniw saconi, corbatani ukham sarapjje. Warminakasa, imill wawanakasa jichhak uñstir faldanakanïpkchisa, janiw jiskʼa faldanak uchasipkiti’ sasa. Ukham sum isthaptʼasipjjatapat niya sapa kutiw jaqenakajj Testigonakat sum parlapjje. Cristianonakajj Diosan servirinakapjamaw amuyumpi jan ‘sinti jiljañampi’ isisipjjañapa sasaw apóstol Pablojj säna (1 Tim. 2:9, 10). Uka arunakampejj warminakatsa Pablojj parlaskchïnjja, cristiano chachanakas uka arunakarjamaw sarnaqapjjañaparaki.

² Jehová Diosan servirinakapjamajja, Biblian ewjjanakaparjam isthaptʼasiñasajj wali wakiskiriwa, Jehová Diosas sum isthaptʼasiñaswa munaraki (Gén. 3:21). Taqe Kunjjaru Munañani Jehová Diosajja, servirinakapan kunjam isthaptʼasipjjañapsa muni uk Diosan Arupajj sum qhanañchi. Ukhamasti, kuna  istï uchaskañäni ukajj janiw jiwasan munañasarjamäñapäkiti, jan ukasti Jehová Diosatakjamäñapawa.

3. Isisiñ toqetjja, ¿kunsa Moisesan Leyipat amuysna?

³ Israelitanakajj jakapkäna uka cheqankir markanakajja, wachoq jucha lurañanakanwa sarnaqapjjäna, ukampis israelitanakarojj Moisesan Leyipaw jarkʼaqäna. Uka Leyirjamajja, mä warmejj janiw chachan isip uchasiñapäkänti, ni mä chachas warmin isip uchasiñapäkänti, ukanakajj janipuniw Jehová Diosatakejj walïkänti. Jichhürunakanjja, jaqenakan isisitapanjj janiw chachati jan ukajj warmicha ukajj amuyasjjeti (Deuteronomio 22:5 liytʼañataki). ¿Kunsa Moisesan Leyipat amuysna? Kuna isitï mä chacharojj warmjam uñjayki jan ukajj mä warmirojj chachjam uñjayki ukajj Jehová Diosatakejj janipuniw walïkiti.

4. ¿Kunas cristianonakarojj isisiñ toqet sum amuytʼasiñatak yanaptʼaspa?

⁴ Kunjamsa isisiñasa uk amuytʼañatakejja, Biblian ewjjanakapaw yanaptʼistaspa. Uka ewjjtʼanakarjamaw kawkhantï jakasktan ukansa, thaya cheqansa, juntʼu cheqansa sarnaqañasa. Costumbresajj mayjäkchi ukasa, uka ewjjtʼarjamaw sarnaqañasaraki. Kuna issa uchasiñasa, kuna issa jan uchasiñasäkaraki uk qhanañchir mä lista utjañap janiw suyañasäkiti. Jan ukasti Biblian ewjjtʼanakaparjamaw sarnaqañasa. Ukaw wakiski ukarjam sum isthaptʼasiñatak yanaptʼistani. “Kunatejj askïki, kunatejj Diosarojj kusisiyki, qʼomäkaraki” ukham isisiñatakejja, Bibliankir kawkïr ewjjtʼanakapas yanaptʼistaspa uk jichhajj uñjañäni (Rom. 12:1, 2).

5, 6. ¿Kunjamsa suma isthaptʼasitasajj jaqenakar yanaptʼaspa?

⁵ Apóstol Pablojj Diosan amuytʼayatäsinwa 2 Corintios 6:4 (liytʼañataki) qellqatan jikjjataski uka arunak qellqäna. Kunjamsa isistan uk uñjasaw jaqenakajj kunjam jaqëtansa uk amuyapjjani (1 Sam. 16:7). Diosan servirinakapjamajja, janiw kunatï jiwasar gustkistu ukak uchasiñasäkiti. Jan ukasti Biblian ewjjtʼanakaparjamajj janiw sinti tʼeqe isinaksa, jiskʼa isinaksa uchasiñasäkiti. Mä arunjja, kuna isinakatï maynir jan walinak amuyaykaspa uka isinak janiw uchasiñasäkiti. Janirakiw mayninakajj jiwasar uñjasin maysar uñtapjjañaps munktanti.

⁶ Sum isthaptʼasiñäni, qʼoma isimp isthaptʼasiñäni ukhajja, wali respetompiw jaqenakajj Jehová Diosan servirinakapar uñjapjjestani. Maysa toqetjja, jaqenakajj Jehová Diosat yatjjatañwa munapjjaspa, Diosan markaparus jukʼampiw respetapjjarakispa, yatiyktan uksa istʼañ munapjjarakispawa.

7, 8. ¿Kawkhanakansa suma isthaptʼatäñasa?

⁷ Jehová Dios nayraqatansa, jilat kullakanak nayraqatansa, jaqenak nayraqatansa, Jehová Diosar jachʼañchkirwa isthaptʼasiñasa, isisitasajj kuntï yatiyktan uk jachʼañchañapawa (Rom. 13:8-10). Diosan arunakap yatiyir sarañatakisa, tantachäwinakar sarañatakisa, kunjam issa uchasisktan uk sumwa amuytʼasiñasa. Isisitas uñjasajja, jaqenakajj Diosan serviripätas jankʼakiw amuyapjjañapa (1 Tim. 2:10). Maysa toqet ak amtañasarakiwa, mä kasta isejj mä markan suma uñjatäspawa, ukampis yaqha cheqan janiw ukham uñjatäjjaspati. Ukatwa Jehová Diosan Testigonakapajj taqe cheqansa, mayninakar jan lanktʼasiyirjam isisiñasa.

⁸ (1 Corintios 10:31 liytʼañataki). Jachʼa tantachäwinakar sarkañäni ukhajja, isisitasajj sumäñapawa. Janiw kunjamtï akapachankir jaqenakajj isisipki ukham isisiñasäkiti.  Jachʼa tantachäwi janïr qalltkipansa, tukuyjjepansa, isisitasajj sumäñapapuniwa, qorpachasiñ utar sarkasasa ukat mistkasasa suma isthaptʼatäñasawa. Ukhamäni ukhajja, ‘Jehová Diosan Testigopätwa’ sañ janiw ajjsarkañäniti, Bibliatsa jan ajjsartʼasaw yatiyarakiñäni.

9, 10. Isisiñ toqetjja, ¿kunjamsa Filipenses 2:4 qellqatajj yanaptʼistaspa?

⁹ (Filipenses 2:4 liytʼañataki). Isisitasajj jilat kullakanakar yanaptʼiti janicha ukjja, ¿kunatsa amuytʼañasa? Jehová Diosan servirinakapajj Pablon arunakaparjam sarnaqañatakiw chʼamachastanjja, jupajj sänwa: “Aka oraqen jucha lurañanakajj jumanakan utjki ukanakasti jan utjkjjpanti: jan khitis yaqhampi wachoqa juchan sarnaqpati, janirak qʼañu luräwinaksa lurpati, janirak jañchipan munañanakapsa” sasa (Col. 3:2, 5). Yaqhep jilat kullakanakajja, qʼañu luräwinak lurañwa jaytawayapjje, ukanak armañatakejj inas jichhakam chʼamachasisipkchi. Jiwasatï isisiñ toqet jan sum amuytʼasksna ukhajja, uka jilat kullakanakatakejj Biblian ewjjtʼanakapar istʼañasa, jan wali luräwinak jaytañas chʼamakïspawa (1 Cor. 6:9, 10). Ukhamajja, kunatï uka jilat kullakanakarojj yanaptʼkaspa ukwa lurañasa.

¹⁰ Jilat kullakanakamp Jehová Diosar servisajja, qʼañu luräwinak luriri jaqenakampejj janiw chikachasktanti. Jiwasatï sum isthaptʼasiñäni ukhajja, tamansa, yaqha cheqanakansa Diosan markapan qʼomäñapatakiw yanaptʼañäni. Kuna kasta issa uchasiñäni uk jiwasas amtañasäkchejja, janiw isisitasampejj mayninakar lanktʼasiyañasäkiti. Ukhamatwa  mayninakan amuyunakapasa, arsutanakapasa, luratanakapasa Dios nayraqatan qʼomäni (1 Ped. 1:15, 16). Amtapuniñäni, munasiñajj “janiw kuna jan walsa lurkiti, janirakiw kunsa jupatakiki munirïkiti” (1 Cor. 13:4, 5).

11, 12. ¿Kunjamsa Eclesiastés 3:1, 7 qellqatajj amuytʼasirïñatak yanaptʼistu?

¹¹ Diosan servirinakapajj kuna issa uchasipjjani uk amuytʼapki ukhajja, ‘taqe kun lurañatakejj mä horasa utjatapwa’ amuyapjje (Ecl. 3:1, 17). Kunjamtï yatktanjja, thaya horasa, juntʼu horasa, juyphi pacha, jallu pacha ukhamaw utji, sapa markansa janiw mä kikpajj jakasktanti, ukatwa taqenejj mä kikpa isi jan uchasktanti. Ukampis Jehová Diosajj isisiñ toqet ewjjtʼkistu ukajj janipuniw mayjtʼkiti (Mal. 3:6).

¹² Juntʼu cheqanjja, yäparu isthaptʼasiñajj chʼamakïspawa. Ukampis sinti tʼeqe jan ukajj ancho isinak jan uchasiñatak chʼamachastan ukhajja, jilat kullakanakasajj wali askitwa uñjapjjestu (Job 31:1). Kunapachatï mä playaru jan ukajj mä piscinaru sarañäni ukhajja, umar mantañatak isisajj mayninakar jan lanktʼasiyirjamäñapawa (Pro. 11:2, 20). Akapachankir jaqenakajj sinti jiskʼa isinaksa umar mantañatakejj uchasipkchejja, jiwasajj janiw ukham uchasiñasäkiti, jan ukasti kuntï uchasktan ukajj Jehová Diosaruw jachʼañchañapa.

13. Isisiñ toqetjja, ¿kunjamsa 1 Corintios 10:32, 33 qellqatajj yanaptʼistaspa?

¹³ Bibliankir yaqha jiskʼa tʼaqaw isisiñ toqet sum amuytʼasiñatakejj yanaptʼarakistaspa. Ukarjamajja, mayninakan concienciapar jan waltʼaykaspa uka isinak janiw uchasiñasäkiti (1 Corintios 10:32, 33 liytʼañataki). Jilat kullakanakan concienciapsa, Diosar jan servipki ukanakan concienciaps janipuniw jan waltʼayañ munktanti. Pablojj akham sänwa: “Sapa mayniw jiwasanakajj jaqe masisatak taqe kunansa sumäñasa, jupan iyawsañapajj jiltañapataki. Cristosa janiw jupa kikparojj kusisiyaskänti” sasa (Rom. 15:2, 3). Jesusajj jupan askip thaqhañat sipansa mayninakaruw yanaptʼirïna, ukatjja Jehová Diosan munañap lurañaw jupatak nayrankäna, jiwasajj jupatwa yateqasiñasa. Ukhamajj mayninakar Diosan arunakap yatiyañ munstan ukhajja, isisitasajj sumäñapawa.

14. Isisitanakapampi Jehová Diosar jachʼañchañjja, ¿kunjamsa awk taykanakajj wawanakapar yanaptʼapjjaspa?

¹⁴ Cristiano awk taykanakajja, Biblian ewjjtʼanakaparjam sarnaqapjjañapatakiw wawanakapar yanaptʼapjjañapa. Ukatsti, Jehová Diosatakjam isthaptʼasiñwa yatichapjjañapa, maysa toqetjja awk taykanakajj Jehová Diosatakjamaw isthaptʼasipjjañaparaki (Pro. 22:6; 27:11, NM). ¿Kunjamsa awk taykanakajj Jehová Diosar respetañsa, Biblian ewjjanakaparjam sarnaqañsa wawanakapar yanaptʼapjjaspa? Awk taykanakatï sum isthaptʼasipjjanejja, wawanakapajj jupanakat yateqapjjarakiniwa. Ukatwa kawkinsa, kunjamsa suma isinak jikjjatapjjaspa uk munasiñampi wawanakapar amuytʼayapjjañapa. Wawanakajja, janiw jupanakar gustki uka isik alasipjjañapäkiti, jan ukasti Jehová Dios nayraqatan kawkïr isinakas walïspa uk ajlliñwa yateqapjjañapa.

15. ¿Kunas suma amtanakar puriñatakejj yanaptʼistaspa?

¹⁵ Jehová Diosar jachʼañchir amtanakar puriñatakiw Bibliajj yanaptʼistu. Ukhamäkchi ukasa, uchaskañäni uka isejj jiwasar  gustatapwa uñachtʼayani. Alkañäni uka isejj janiw mayninakan isip kikpapunïkaniti. Ukampis uchaskañäni ukajj sumäñapawa, qʼomäñaparakiwa. Kawkhantï jikjjatasktan ukatakjamaw isthaptʼasiñasaraki, ukatsti jakasktan uka cheqan janiw jan walit uñjatäñapäkarakiti.

16. ¿Kunatsa yäparu sum isthaptʼasiñasa?

¹⁶ Yäpar isthaptʼasiñatak suma isinak jikjjatañajj chʼamakiwa. Jichhak uñstir isinakakwa jila parte jaqenakajj tiendanakan aljapjje. Ukatwa suma faldanaka, vestidonaka, blusanaka jikjjatañajj chʼamakïspa. Jan sinti tʼeqe pantalonanaka, saconaka jikjjatañas chʼamakïspawa. Jiwasar suma isinaka jikjjatañatak chʼamachasir uñjasajja, jilat kullakanakajj wal kusisipjjani. Isisitasampi Jehová Diosar kusisiyatas yatisajja, jiwasas kusisirakiñäniwa, ukaw taqe kunat sipans jukʼamp wakiskirejja.

17. ¿Kun uñjasas mä jilatajj sunkha jilayasiniti janicha uk amtaspa?

¹⁷ ¿Jilatanakan sunkhanïpjjañapajj walikïskiti? Moisesan Leyiparjamajja, nayra tiempon taqe chachanakaw sunkhanïpjjañapäna. Ukampis cristianonakajj janiw Moisesan Leyiparjamajj sarnaqjjtanti ni uka Leyirjamas phoqjjtanti (Lev. 19:27; 21:5; Gál. 3:24, 25). Yaqhep markanakanjja, sunkhanïñajj walikïskiwa, ukampis jaqenakamp sum uñjayasiñatakejja jilatanakan sunkhanakapajj qʼoma, suma khuchurtʼata ukhamäñapawa. Ukhamäni ukhajja, Diosan Arup yatiyapkani ukhajj jaqenakajj istʼapjjaniwa. Diosan markapan walja luräwinïpki uka jilatanakat yaqhepajj sunkhanïpjjewa. Ukhamäkchisa yaqhep jilatanakajj jan sunkhanïñwa amtapjje (1 Cor. 8:9, 13; 10:32). Yaqhep markanakanjja, chachanakajj janiw sunkha jilayasipkiti. Uka markanakan Testigonakan sunkha jilayasipjjañapajj jan walit uñjatawa. Mä jilatatï sunkha jilayasispa ukhajja, jaqenakajj uk uñjasin janiw Jehová Diosar jachʼañchañ munapkaspati, sunkha jilayasir jilatas mayninakan uñchʼukitaw sarnaqaspa (Rom. 15:1-3; 1 Tim. 3:2, 7).

18, 19. Isisiñ toqetjja, ¿kunjamsa Miqueas 6:8 qellqatajj yanaptʼistaspa?

¹⁸ Jehová Diosajja, janiw kunjam issa uchasiñasa kunjam issa jan uchasiñasäki uk mä lista churkistuti. Jan ukasti Biblian utjki uka yatichäwinakarjam amtañaswa muni, ukatwa Jehová Diosar wal yuspärtanjja. Ukhamasti kuna issa uchasiñäni kunjamsa isthaptʼasiñäni uk amuytʼkasajja, Diosar sirvkasin altʼat chuymanïtaswa uñachtʼayañasa (Miq. 6:8).

¹⁹ Jehová Diosajj qolläna Diosawa, Biblian jikjjataski uka yatichäwinakapas jiwasan askisatakiwa. Altʼat chuymanïñäni ukhajja, uka yatichäwinakarjamaw sarnaqañäni. Ukatsti kunanakatï mayninakar jan waltʼayki ukarjam jan isthapisiñatakisa, mayninakan ewjjanakap katoqasiñatakis altʼat chuymanïñajj yanaptʼarakistaniwa.

20. Suma isthaptʼasitasajja, ¿kunjamsa jaqenakar yanaptʼaspa?

²⁰ Jehová Diosar servitasajj qhanaw isisitasan amuyasiñapa. Jupajja, kunjamsa sarnaqañasa uk Biblia toqew ewjjtʼistu. Uka ewjjtʼanak phoqañatakejj taqe chuymaw chʼamachasiñasa. Taqe jilat kullakanakar sum isthaptʼasiñatak chʼamachasir uñjañajja, wali kusiskañawa. Ukaw Jehová Diosar jakʼachasipjjañapatak jaqenakar yanaptʼi. Isisitanakapampejj Jehová Diosaruw jachʼañchapjje, Juparus kusisiyapjjarakiwa. Sum isthapisisajja, wali sum isthapisiri Diosaruw jachʼañchasktanjja (Sal. 104:1, 2).