1, 2. Inyuki Mbôgi Yéhôva i gwé matiñ ma ngui inyu jam li mambot? (Béñge titii i bibôdle bi yigil.)

LIPEP li balegel mañwin jada i loñ Ôland li bi añal mam ma bi tagbe i likoda jada li bakena bibase, li tila le: “U ntehe bôt ba nhaba mambot ma nhoi i mis, téntén ngéda lék i nai. Ndi hala a mbôña bé i makoda makeñi ma Mbôgi Yéhôva. . . . Bôlôm ni boñge ba nhaba bikôti ni malañ, bôda ni bon bôda ba nhaba kidik isi, i i yé mbôñgô i nya kôli, i nek ki bo.” Bôt ba mbéna ti Mbôgi Yéhôva bibégés inyule ba ñengep ‘mbot nya i kôli, ba bak mamoma, ba hôdôk ki manyuu . . . kiki hala a kôli ni bôt ba nsiñge Nyambe miñem.’ (1 Timôtéô 2:9, 10) Ñôma Paul a bé pot inyu bôda, ndi minlélém mi maéba mi mbéñge yak bikristen bi bôlôm.

² Matiñ malam inyu jam li mambot ma yé nseñ inyu bés ba di mbégés Yéhôva, ma bak ki nseñ inyu Djob di mbégés. (Bibôdle 3:21) Maéba Bitilna bi nti inyu mambot ni bienk, ma ñunda loñge loñge le Ñane ngiinda yosôna a bi téé matiñ malam inyu mambot ma bañga yé bagwélél. Jon, di nlama bé pohol mambot ni bienk ndik inyule ma nlémél bés. Ndi di nlama yak wan kii nlémél Nwet Nungingii, le Yéhôva.

3. I Mbén Djob a ti Lôk Israél i niiga bés kii inyu jam li mambot?

 ³ Kiki héga, Mbén Djob a bi ti Lôk Israél i bééna matiñ ma bé sôñ bo le ba kwo bañ ikété ndéñg ni nyega i biloñ bi bé kéña bo. Mbén i bé unda le Yéhôva a ñoo mambot ma ma ñunda bé maselna ipôla munlôm ni muda. I len ini, ba nsébél mahabga ma yé hala ni hop Pulasi le “unisex,” hala wee bôlôm ba nhaba mambot ma bôda, bôda ba habga mambot ma bôlôm. (Añ Ndiimba Mbén 22:5.) Inoñnaga ni maéba Djob a bi ti inyu jam li mambot, di ntibil tehe le Djob a ngwés bé mahabga ma ma mboñ le bôlôm ba pôôna bôda, tole bôda ba pôôna bôlôm. Djob a ngwés bé to mambot ma ma mboñ le bôt ba yi ha bé too nwet a nhaba mo a yé munlôm tole muda.

4. Kii i nla hôla bikristen i yoñ makidik malam inyu jam li mambot?

⁴ Bañga i Djob i gwé matiñ ma nhôla bikristen i yoñ makidik malam inyu jam li mambot. Ba nlama noñ matiñ ma, i ngéda mbéñ ni ngéda sép, ibabé béñge homa ba nyééne, to bilem bi loñ yap. Di gwé bé ngôñ le ba ti bés mbôñgô ñañga u bikila, inyu toñle bés mambot di nlama neebe ni mambot di nlama tjél. Ndi, matiñ ma Bibel mon ma ñéga bés, ma nti ki bés kunde i pohol mambot ma nlémél bés. Di wan le ngim matiñ ma Bibel ma ma nla hôla bés i “wan sômbôl Nyambe, i yi jam li yé loñge, ni li li nlémél nye, ni li li yôni” ngéda di yé pohol mambot di ngwés haba.​—Rôma 12:1, 2.

5, 6. Mahabga més ma nla tinde bôt bape i boñ kii?

⁵ Djob a bi tinde ñôma Paul i yigye nseñ u litiñ li yé ikété kaat 2 Korintô 6:4. (Añ.) Mambot més ma nyelel umbe ntén mut di yé. Ngandak i nla kal umbe ntén mut di yé inoñnaga ni kiki di nene i “bitéé bi mis.” (1 Samuel 16:7) Kiki di yé bagwélél ba Djob, di nyi le lihabga jés li ta bé ndik le di haba mbot i nkola bés, i lémlak ki bés. Ndi, matiñ di nyôñôl ikété Bañga i Djob, ma nlama tinde bés i tjél mambot ma nlôôha nit nyuu, ma ma nyelel bijô bi nyuu, ni ma ma ntôdôl ngôñ malal. Hala a ga sôña bés i haba mambot ma ma nyelel maôñg ma nyuu kiki bo méé ni gwom bi mbôô. Ngéda di nhaba mambot, i mbéda bé le hala a ntééñga bôt, tole ba kahal lep suu homa numpe.

⁶ Ngéda mambot més ma yé mbôñlak loñge, ma bak mapubi, ma undga ki le di nkon Djob woñi, bésbomede di bak ñengek loñge, bôt ba nla pala ti bés lipém kiki bagwélél ba Nwet Nungingii le Yéhôva. Hala a nla yak ôt bo i gwélél Djob di mbégés. Jam lipe li yé le, lihabga jés lilam li nti ntôñ wés lipém. Hala a nla tinde bôt bape i emble ñwin u niñ di nlona bo.

7, 8. Imbe ngéda i tôbôtôbô di nlama haba mambot ma kôli?

⁷ Di gwé pil u gwéha di nlama saa i pañ Djob jés lipubi, i pañ bilôk bikéé gwés i pes mbuu bi bôlôm ni bi bôda, ni i pañ bôt ba libôga jés, le di haba mambot ma ma nyidis ñañ nlam di nke añal, ma tinak ki Yéhôva lipém. (Rôma 13:8-10) I boñ hala i yé nseñ téntén ngéda di yé gwel minson nwés mi bikristen kiki bo i ke makoda, tole i ke likalô. Di nlama haba mambot ma ma “kôli ni [bôt] ba nsiñge Nyambe miñem.” (1 Timôtéô 2:10) Maliga ma yé le, mbot i nla ba loñge inyu ngim homa, ndi i ba bé loñge inyu homa numpe. Jon, ni nkoñ isi wonsôna, bagwélél ba Djob ba mboñ mahabga  map le ma kiha ni bilem bi loñ, inyu boñ le ba bane bañ mut ngok baagene.

⁸ Añ 1 Korintô 10:31. Ngéda di nke makoda més makeñi, di nlama haba mambot ma kôli, ha inyu biundba bé, to inyu noñ mahabga mabe ma ma yé len i nkoñ isi. To di njôp i ndap bakén, to di mpam, to di yé tégbaha yañga ngéda i bisu tole i mbus likoda li ndôn, mambot més ma nlama bé nene wengoñle di nyoñ bé ngéda i bôñgôl mo. Ibale di noñ maéba mana, di ga ba maséé i kal bôt le di yé Mbôgi Yéhôva. Di ga ba ki bebee i añal ñañ nlam ibale pôla i nene.

9, 10. Inyuki maéba ma kaat Filipi 2:4 ma mbéñge mambot di nhaba?

⁹ Añ Filipi 2:4. Inyuki bikristen bi nlama badba too mambot map ma ntééñga bikristen bipe? Njom yada i yé le, bagwélél ba Djob ba mboñ biliya bi ngui i noñ litiñ li Bibel lini le: “Nola ni bijô binan bi yé hana ’isi [inyu] ndéñg, ni nyega, ni nkañ minheña.” (Kôlôsé 3:2, 5) Di gwé bé ngôñ le hala a ba ndutu inyu bilôk bikéé i noñ maéba mana. Bebeg le lôk kéé i bôlôm ni i bôda i i bi tjôô niñ i ndéñg, tole i ngi jok ni minhéña mimbe. (1 Korintô 6:9, 10) Di gwé bé ngôñ le mam ma lédél bo, hala nga?

¹⁰ Ngéda di yé ipôla lôk kéé yés i bôlôm ni i bôda i pes mbuu, mahabga més ma nlama hôla le likoda li ba homa het mahoñol mabe ma ta bé. I nlama ba hala ngéda di yé lôñni bo i makoda, yak ngéda di yé lôñni bo i bahoma bape. Di gwé kunde i pohol mambot di nhaba. Ndi bés bobasôna di gwé mbegee i haba mambot ma ma mboñ le hala a  tômbôl bape i tééda libak jap li ngi nsohi, ni i noñ matiñ mapubi ma Djob i bibôñol, i bipôdôl ni i mahoñol. (1 Pétrô 1:15, 16) Bañga gwéha “i nyeege bé jam, . . . i nyiñil bé ndigi yomede” loñge.​—1 Korintô 13:4, 5.

11, 12. Limbe jam di kôli hoñol i ngéda di mpohol mambot di nhaba?

¹¹ Ngéda ba nsômbôl pohol mambot map, bagwélél ba Djob ba nyi le “ntéak ngéda u yé inyu hiki hop ni inyu hiki nson.” (Ñañal 3:1, 17) I yé maliga le mahéñha ma ngéda ni ma bikék ma nla lona mahéñha mu mambot di nhaba. Yak mahéñha ikété biniñ bi bôt ni bigwel moo bi ntihba mambot di nhaba. Ndi matiñ ma Yéhôva ma nhéñha bé inyule di yé i ngéda mbéñ tole ngéda sép.​—Malaki 3:6.

¹² I ngéda lék i yé, i nla ba ndutu i boñ le mambot més ma yidis libak jés, ma bak ma kôli, ma undga ki le di gwé yi i bagal mam. Jon bilôk bikéé bi bôlôm ni bi bôda bi nkon maséé i ngéda di ntjél mambot ma nsude bés, tole ma ma néhi kayéle nyuu yosôna i yé mbégdé. (Hiôb 31:1) Jam lipe li yé le, ngéda di nke nôgôp i ngwañ lép tole di nke i nhoga i titimba, mambot ma nhoga di mpohol ma nlama unda libak jés li kristen. (Bingéngén 11:2, 20) To ibale ngandak bôt i nkoñ isi i nhaba mambot ma nhoga ma ma mbii nyuu yosôna i mbégdé, ndi bés ba di ngwélél Yéhôva, mahabga més ma nlama ti nye lipém.

13. Inyuki maéba ma yé i kaat 1 Korintô 10:32, 33 ma mbéñge mambot di mpohol i haba?

¹³ Litiñ lipe li nla hôla bés i pohol mambot ma kôli tole mambot malam. Li yé le di nlama yoñ yihe ni kiññem i bôt bape, to ba yé bikristen, to ba ta bé. (Añ 1 Korintô 10:32, 33.) Di nlama bé jôha ni mbegee di gwé i tjél mambot ma ma nla ba ngok baagene inyu bape. Ñôma Paul a tila le: “Wee hiki mut ikété yés a noode ndigi lémél mut wé libôk inyu boñ nye longe i hôlôs nye.” I mbus a kônde ki le: “Inyule to Kristô a lémél bé nyemede.” (Rôma 15:2, 3) Ñ, i hôla bôt bape i bé nseñ inyu Yésu iloo loñge yé nyemede. Nlôm jam Djob a bé bat le a boñ li bé le a hôla bôt bape. Jon, di nlama tjôô mambot tole mahabga ma ma nla sék njel le bôt ba emble bañ likalô jés, to ibale di ngwés mambot ma.

14. Lelaa bagwal ba nla niiga bon bap i ti Djob lipém ni njel mahabga map?

¹⁴ Bagwal ba ba yé bikristen ba gwé mbegee i niiga mahaa map i noñ matiñ ma Djob. Hala a nkobla le, bo ni bon bap ba nlama boñ biliya i kônha Djob maséé, ni njel bienk ni mahabga map ma bôt ba nkon Djob woñi. (Bingéngén 22:6; 27:11) Bagwal ba nla ha ikété miñem mi bon bap woñi u Djob lipubi ba mbégés, ngéda ba nti bon bap ndémbél ilam, ba tinak ki bo biniigana bi kôli ni bo ikété gwéha. Kinje jam lilam ngéda bagwal ba niiga bon bap lelaa ba nla léba mambot malam, ni hee ba nlébna mo! Mambot malam ma ta bé ndik ma ma nlémél bo, ndi ma ma ga hôla bo i yônôs nson ni bisai ba gwé i ba mbôgi i Yéhôva Djob.

15. Kii i nla éga bés i pohol mambot més?

¹⁵ Bañga i Djob i nti maéba malam ma ma nla hôla bés i yoñ makidik ma pék inyu ti Djob lipém. I yé maliga le, bés bon di mpohol mambot més, ni le minlélém mi mambot bé ñwon mi nlémél bés bobasôna; yak bigwel gwés bi moo bi ta bé nlélém. Ndi to hala, mambot més ma nlama ba ngéda yosôna mbôñlak  loñge, mapubi, ma undga le di nkon Djob woñi, ma bak ma kôli ni ngéda, ma bak ki loñge i mis ma bôt ba libôga jés.

16. Inyuki biliya gwés i haba i nya i kôli i yé mahee?

¹⁶ I yé maliga le, hala a ta bé jam li ntomb i yoñ makidik ma ma ñunda le di gwé pék i bagal mam, ma ma nkiha ni ngéda, ni ma ma ñunda le di nyi wan mam ilole di mpohol mambot. Ngandak bisabe bi nuñul mambot ma ma noñ mahabga ma nkoñ isi, jon hala a nla bat le di boñ ngandak biliya, a yoñ ki bés ngéda, inyu léba loñge kidik isi, loñge mbot, loñge sodi, loñge kôti, loñge trosis, i i nit bé bés nyuu ngandak. Ndi, bilôk bikéé bi ga diihe biliya gwés i léba mambot malam ni ma ma kôli. Iloo le di bok mis més i ngii mandutu di nla boma i haba mambot ma nti Djob lipém, i yé nseñ le di bok mis més i ngii maséé makeñi di nkôhna i yi le mambot més ma nti Tata wés nu gwéha lipém.

17. Mambe mam ma nla boñ le kristen munlôm i bana liyéé tole i bana bañ?

¹⁷ Kii di nla kal inyu bilôk bikéé bi bôlôm bi bi gwé mayéé? Mbén Môsé i bé bat le bôlôm ba bana mayéé. Ndi, bikristen bi ta bé isi Mbén Môsé, bi ta bé to nyégsaga i noñ yo. (Lôk Lévi 19:27; 21:5; Galatia 3:24, 25) I ngim biloñ, liyéé li ba ñeñk loñge, jon li nene loñge i mis ma bôt, li tinak ki ét nyuu. Hala a ntééñga bé ki to bôt ibale ñañal ñañ nlam a gwé nya liyéé i. I pot maliga, ngim mimañ ni ngim bahôla nson i gwé mayéé. To hala, ngim bilôk bikéé i nla pohol le ba ga bana bé liyéé. (1 Korintô 8:9, 13; 10:32) Ndi biloñ bipe tole mambok mape ma gwé bé lem i bana mayéé, hala a nene bé to loñge le kristen i bana liyéé. I pot maliga, i bana liyéé i nla sék mankéé nu munlôm njel i ti Yéhôva lipém ni njel bienk gwé. Li nla ki boñ le a ba ha bé mut ngitjéga nsohi.​—Rôma 15:1-3; 1 Timôtéô 3:2, 7.

18, 19. Lelaa kaat Mika 6:8 i nhôla bés mu kii di mboñ biliya le mahabga més ma lémél Djob?

¹⁸ Di nti Yéhôva mayéga le a bi ti bé bés ñañga nkeñi u minledek mi bikila inyu mambot ni bienk. Ndi, a bi ti bés kunde i gwélél ngap yés i pohol, inyu yoñ makidik malam, makidik ma ma niñne ikété biloñge bi matiñ ma Bibel. Jon, di nla gwélél mambot més ni bienk gwés inyu unda le di nsômbôl ‘kiha ni Nyambe wés ni ñem sôhga.’​—Mika 6:8.

¹⁹ Libak le di nyi minwaa nwés, li mboñ le di wan bésbomede ni suhulnyu, di héghaga ki libak jés ni libak lipubi li Yéhôva, inyule nyen di mbôdôl ñem inyu kôhna maéba ma nlôôha ba malam. Libak le di nyi minwaa nwés li mbat ki le di diihe mahoñol ni matehge ma bôt bape. Inyu hala nyen di ‘nkiha ni Nyambe ni ñem sôhga’ ngéda di noñ matiñ ma Djob i niñ yés, di diihege ki litehge li mam li bôt ba libôga jés.

20. Kii bôt ba nlama hoñol inyu yés i ngéda ba ntehe mambot ni bienk gwés?

²⁰ I mbéda bé le i ngéda bôt ba ntehe mambot més, ba hoñol bañ jam lipe, ndi ba yi ndik le di yé bagwélél ba Yéhôva. Bilôk bikéé bi bôlôm ni bi bôda, yak ni bôt bape, ba nlama tehe le mambot més ma ñunda le di yé bañga bagwélél ba Djob li telepsép. Djob a gwé matiñ malam, di mboñ ki biliya i noñ matiñ ma ni maséé. Di nti bibégés inyu bilôk bikéé bi bôlôm ni bi bôda bi bi gwé bilem ni bienk bi bi ntinde bôt ba miñem minlam i leege ñwin u niñ u Bibel, bi tinak ki Yéhôva lipém ni maséé. Ibabé nkaa, i yoñ makidik malam inyu jam li mambot, li ga kônde lipém yak Nu a “yé ñengbak ni lipém ni bai lipém.”​—Tjémbi 104:1, 2.