1, 2. Taano ta pinagdadanay kan Mga Saksi ni Jehova an pagkaigwa nin halangkaw na pamantayan sa pagbado? (Hilingon an ritrato sa itaas.)

“DAKUL kang mahihiling na nakakaswal na bado, lalo na kun mainit an panahon,” an sabi nin sarong diyaryo sa Netherlands mapadapit sa sarong pagtiripon nin mga lider kan simbahan. “Pero bakong arog kaiyan sa kumbensiyon kan Mga Saksi ni Jehova. . . . Nakaamerikana asin nakakurbata an mga lalaki, mantang an mga palda kan mga babayi . . . haralaba, pero bakong makaluma.” Iyo, parating nakokomendaran an mga Saksi ni Jehova huli sa pagsulot ninda nin “angay na bado, na may kabinian asin tultol na isip . . . sa paaging maninigo sa mga . . . igwa nin debosyon sa Diyos.” (1 Tim. 2:9, 10, NW) Baga man mga babayi an pinapanungdan digdi ni apostol Pablo, aplikado man sa Kristiyanong mga lalaki an pamantayan na ini.

² Bilang mga lingkod ni Jehova, mahalaga sa sato an pagkaigwa nin tamang pamantayan sa pagbado, asin mahalaga man iyan sa Diyos na satong sinasamba. (Gen. 3:21) Malinaw na ipinapahiling kan Kasuratan na an Soberano kan uniberso igwa nin marahay na pamantayan sa pagbado para sa saiyang tunay na mga parasamba. Kaya, an desisyon niyato dapit sa pagbado asin pagpakarhay sa sadiri dai dapat nakabasar sana sa kun ano an gusto ta. Dapat man niyatong ikonsiderar kun ano an gusto kan Soberanong Kagurangnan na Jehova.

3. Sa Katugunan nin Diyos sa mga Israelita, ano an manunudan niyato dapit sa pagbado?

 ³ Halimbawa, sa Katugunan nin Diyos sa mga Israelita, igwa nin mga susundon na maprotektar sa sainda sa imoral na marhay na pamumuhay kan mga nasyon na nakapalibot sa sainda. Ipinapahiling kan Katugunan na ikinakaanggot ni Jehova an pagsulot nin bado na dai na nahihiling an pagkakaiba kan lalaki asin babayi—inaapod iyan ngunyan na unisex fashion. (Basahon an Deuteronomio 22:5.) Malinaw na mahihiling sa pagbuot nin Diyos dapit sa pagbado na dai niya ikinakaugma an mga istilo nin pagbado na ginigibong garo babayi an lalaki, ginigibong garo lalaki an babayi, o dai na maaraman kun siisay an lalaki o babayi.

4. Ano an makakatabang sa mga Kristiyano na makapagdesisyon nin tama kun ano an isusulot?

⁴ Igwa nin mga prinsipyo an Tataramon nin Diyos na matabang sa mga Kristiyano na makapagdesisyon nin tama kun ano an isusulot. Aplikado iyan sain man sinda nakaistar, ano man an kultura o klima sa lugar ninda. Dai niyato kaipuhan nin halabang lista nin mga puwede o dai puwedeng istilo nin pagbado. Imbes, ginigiyahan kita kan mga prinsipyo sa Kasuratan na diyan libre pa man giraray kitang makakapili kan mga gusto niyato. Pag-ulayan niyato an nagkapira sa mga prinsipyo sa Bibliya na makakatabang sa sato na maaraman kun ano an “kabutan nin Diyos na marahay asin akseptable saka perpekto” pag madesisyon kita kun ano an satong isusulot.—Roma 12:1, 2, NW.

5, 6. Ano an dapat na magin epekto sa iba kan satong pagbado?

⁵ Pinasabngan si apostol Pablo na iduon an mahalagang prinsipyo na yaon sa 2 Corinto 6:4. * (Basahon.) Dakul an sinasabi kan satong hitsura manungod sa sato. Ibinabasar kan dakul na tawo an saindang impresyon asin opinyon dapit sa sato sa ‘nahihiling’ nindang itsura niyato. (1 Sam. 16:7) Kaya, bilang mga ministro nin Diyos, nasasabutan niyato na kaipuhan tang gumibo nin urog pa sa pagsulot sana nin bado na komportable asin gusto niyato. Dapat kitang mapahiro kan nanudan niyatong mga prinsipyo sa Tataramon nin Diyos na likayan na magsulot nin mga badong yapit, mapang-akit, o seksi. Nangangahulugan man ini na dapat tang likayan an pagbado na nahihiling na o natatalà an mga pribadong parte kan satong hawak. Dapat mayo nin siisay man an mag-alangan, o kaya mapiritan na humiling sa ibang direksiyon, pag nahiling an satong pagbado.

⁶ Posibleng marhay na irespeto kita kan mga tawo bilang mga ministro kan Soberanong Kagurangnan na Jehova kun areglado kita, malinig, mabini an bado, asin marahay an itsura. Asin tibaad magin mas interesado sinda sa Diyos na satong sinasamba. Dugang pa, an satong angay na pagbado magtatao nin marahay na impresyon sa organisasyon na irinerepresentar niyato. Bilang resulta, posibleng mas magdangog an mga tawo sa satong nagliligtas-buhay na mensahe.

7, 8. Nuarin kita lalo nang kaipuhan na magsulot nin angay na bado?

⁷ Obligasyon niyato sa satong banal na Diyos, sa satong mga tugang sa espirituwal, asin sa mga tawo sa satong teritoryo na magsulot kita nin bado na nagtatao nin kaumawan ki Jehova asin nin dignidad sa mensaheng dara niyato. (Roma 13:8-10) Lalo nang mahalaga ini pag nag-aatender kita sa satong Kristiyanong mga pagtiripon o nakikikabtang sa paghuhulit. Dapat kitang magbado “sa paaging maninigo sa mga igwa nin debosyon sa Diyos.” (1 Tim. 2:10, NW) Siyempre, may mga bado na angay isulot sa sarong lugar pero tibaad bakong angay sa ibang lugar. Kaya, kinokonsiderar kan mga lingkod ni Jehova sa bilog na kinaban an lokal na mga kostumbre sa sarong lugar tanganing dai sinda makakulog sa buot kan iba.

⁸ Basahon an 1 Corinto 10:31. Pag nag-aatender kita sa mga asembleya asin kumbensiyon, dapat  kitang magbado nin angay asin mabini, bakong arog kan sobrang mga istilo nin pagbado na uso sa kinaban. Sa pag-abot o sa paghali niyato sa dinadagusan tang hotel saka sa satong pamamasyar bago asin pagkatapos kan mga sesyon sa kumbensiyon, dapat na likayan niyatong magin sobra kakaswal o magin bagla sa satong pagbado. Kun gigibuhon ta ini, dai kita masusupog na magpamidbid na Mga Saksi ni Jehova. Iyo, dai kita mag-aalangan na magpatotoo pag magkaigwa nin pagkakataon.

9, 10. Taano ta dapat niyatong ikonsiderar an Filipos 2:4 sa pagpili niyato nin isusulot?

⁹ Basahon an Filipos 2:4. Taano ta kaipuhan na ikonsiderar kan mga Kristiyano kun ano an epekto kan saindang pagbado sa mga kapagtubod ninda? An sarong dahilan iyo na an mga lingkod nin Diyos nagmamaigot na iaplikar an konsehong ini kan Bibliya: “Gadanon nindo an mga kabtang kan saindong hawak na yaon digdi sa daga kun manungod sa seksuwal na imoralidad, karigsukan, dai makontrol na seksuwal na hurot.” (Col. 3:2, 5, NW) Dai niyato gusto na madipisilan an satong mga kapagtubod na masunod an sadol na iyan. An mga tugang niyato na tinalikdan na an imoral na pamumuhay tibaad nakikipaglaban pa man giraray sa makasalan na mga tendensiya. (1 Cor. 6:9, 10) Habo niyato na huli sa paagi ta nin pagbado, mas masakitan sinda sa saindang pakikipaglaban, bako daw?

¹⁰ Kun kaiba niyato an satong mga kapagtubod, an satong pagbado dapat na makatabang sa kongregasyon na magin sarong lugar na may kalinigan sa moral. Aplikado iyan baga man nasa pagtiripon kita o nasa impormal kitang mga kamugtakan. Libre kitang pumili kan mga gusto niyatong isulot. Pero, may obligasyon kitang magsulot nin bado na magigin mas pasil para sa iba na magdanay na  malinig sa moral asin masunod an mga pamantayan nin Diyos sa kabanalan sa pag-iisip, pagtaram, saka paggawi. (1 Ped. 1:15, 16) An tunay na pagkamuot “dai minagawi na mayong modo, dai nag-iisip kan sadiri sanang kapakanan.”—1 Cor. 13:4, 5, NW.

11, 12. Ano an tama sanang ikonsiderar pag minapili kita nin isusulot?

¹¹ Pag nagdedesisyon kun ano an isusulot, isinasaisip kan mga lingkod nin Diyos na igwa nin “panahon para sa gabos na bagay asin para sa gabos na gibo.” (Par. 3:1, 17, BPV ^[1]) Natural sana na may epekto sa satong pagbado an manlain-lain na klima, kapanahunan, okasyon, asin kamugtakan sa buhay. Pero, dai nagbabago an mga pamantayan ni Jehova ano man an magin panahon o kamugtakan.—Mal. 3:6.

¹² Sa mga lugar na mas mainit an klima, mas bakong madaling masiyerto na an satong istilo nin pagbado kagalang-galang, mabini, asin nagpapahiling na may marahay kitang paghusgar. Huli kaini, papahalagahan kan satong mga tugang kun lilikayan tang magsulot nin mga badong yapit o haluwag na marhay asin mapang-akit. (Job 31:1) Asin kun kita man nagkakarigos sa dagat o swimming pool, dapat na magin mabini an istilo kan satong badong pangkarigos (swimwear). (Tal. 11:2, 20) Dawa ngani an kadaklan sa mga tawo sa kinaban nagsusulot nin mapang-akit na mga badong pangkarigos, sinisigurado niyato bilang mga lingkod ni Jehova na an satong isusulot matao nin kaumawan sa banal na Diyos na satong namumutan.

13. Taano ta dapat na makaimpluwensiya sa satong pagpili nin bado an sadol na yaon sa 1 Corinto 10:32, 33?

¹³ Igwa pa nin sarong mahalagang prinsipyo na makakatabang sa sato sa pagpili nin angay na bado. Iyan iyo an pagkonsiderar sa konsiyensiya kan iba—baga man kapagtubod sinda o dai. (Basahon an 1 Corinto 10:32, 33.) Dapat niyatong seryosuhon an satong obligasyon na lumikay sa pagsulot nin mga bado na tibaad makapasingkog sa iba. Si Pablo nagsurat: “An lambang saro sa sato gumibo nin mga bagay na ikakarahay kan satuyang kapwa, tanganing maparigon siya.” Asin sinabi pa niya an sarong dahilan: “Huling maski an Cristo bako an sadiring ikakarahay an inintindi.” (Roma 15:2, 3, NW) Iyo, ininot ni Jesus an pagtabang sa iba kisa sa sadiri niyang kaginhawahan—an pagtabang sa sainda sarong paagi para magibo niya an kabutan nin Diyos. Huli kaini, dawa gusto niyato an sarong bagay o istilo nin bado, dai niyato pipilion iyan kun iyan an magigin dahilan na dai magdangog an mga tawong hinuhulitan ta.

14. Paano masasanay kan mga magurang an saindang mga aki na magtao nin kaumawan sa Diyos paagi sa istilo ninda nin pagbado?

¹⁴ Responsabilidad kan Kristiyanong mga magurang na tukduan an saindang pamilya na iaplikar an mga prinsipyo sa Bibliya. Kaiba digdi an pagsiyerto na sinda asin an saindang mga aki napapaugma an Diyos paagi kan saindang mabining istilo nin pagbado asin itsura. (Tal. 22:6; 27:11) Masasanay kan mga magurang na igalang kan saindang mga aki an banal na Diyos na saindang sinasamba paagi sa pagpahiling nin marahay na halimbawa asin pagtao nin mamumuton saka praktikal na instruksiyon sa sainda. Marahayon nanggad kun itinutukdo kan mga magurang sa saindang mga aki kun sain asin kun paano makakahanap nin angay na mga bado! Nangangahulugan ini na dai sana sinda basta mapili nin bado na gusto ninda kundi idtong nagtatao man nin kaumawan sa Diyos na Jehova na saindang irinerepresentar.

15. Sa ano kita dapat magpagiya kun minapili kita nin isusulot?

¹⁵ An Tataramon nin Diyos nagtatao nin praktikal na giya na makakatabang sa sato na makagibo nin madunong na mga desisyon na makakapamuraway sa Diyos. Pero siyempre, an mga isinusulot ta, minsan paano, nakadepende sa gusto niyato. Iba-iba an gusto kan lambang saro sa sato, asin an satong kakayahan sa pinansiyal. Pero, dapat na  pirming areglado an satong bado, malinig, mabini, angay sa okasyon, asin akseptable sa kun sain kitang lugar.

16. Taano ta sulit an satong paghihinguwa na makapagsulot nin angay na bado?

¹⁶ Iyo, bako pirming pasil na makahanap nin mabini asin angay na bado. Dakul na tindahan nin bado an nagpapabakal sana nin kun ano an usong istilo, kaya kaipuhan nin panahon asin paghihinguwa tanganing makahanap nin mabining palda, bestida, asin blouse o bakong yapit na barong o long sleeve saka pantalon. Pero, maririsa asin mapapahalagahan kan mga tugang an satong paghihinguwa na makakua nin magayon asin angay na bado. Baliwala an ano man na sakit na tibaad inagihan ta para makapagsulot nin angay na bado huling aram niyato na napamuraway ta an satong mamumuton na Ama sa langit.

17. Ano an nagkapirang dapat ikonsiderar nin sarong brother kun baga mapatubo siya nin barabas o dai?

¹⁷ Tama daw na magkaigwa nin barabas an mga brother? Kaidto, kahagadan sa Katugunan ni Moises na magkaigwa nin barabas an mga lalaki. Pero, bako nang sakop ngunyan kan Katugunan an mga Kristiyano, ni obligado pa sindang mag-utob kaiyan. (Lev. 19:27; 21:5; Gal. 3:24, 25) Sa ibang kultura, tibaad akseptable an barabas na pulido an tabas, asin tibaad dai man iyan nagigin dahilan para dai magdangog an mga tawo sa mensahe kan Kahadian. An totoo, igwa nin barabas an ibang nombradong brother. Dawa arog kaiyan, tibaad magdesisyon an ibang brother na dai magpatubo nin barabas. (1 Cor. 8:9, 13; 10:32) Sa ibang kultura o lugar, bakong kaugalian an pagkaigwa nin barabas asin ibinibilang iyan na bakong akseptable para sa sarong ministrong Kristiyano. Sa katunayan, an pagkaigwa niya kaiyan tibaad makaulang sa pagtao nin kaumawan sa Diyos asin sa pagigin niyang daing katuyawan.—Roma 15:1-3; 1 Tim. 3:2, 7.

18, 19. Paano makakatabang sa sato an Miqueas 6:8 mantang nagmamaigot kitang makapaugma sa Diyos an satong istilo nin pagbado?

¹⁸ Nagpapasalamat nanggad kita na dai kita pinagabatan ni Jehova nin halabang lista nin mga susundon dapit sa satong pagbado asin pagpakarhay sa sadiri. Imbes, tinawan niya kita nin libertad na gumibo nin rasonableng mga desisyon na nakabasar sa mga prinsipyo sa Kasuratan. Kaya, dawa sa satong pagbado asin pagpakarhay sa sadiri, maipapahiling niyato na gusto niyatong ‘maglakaw na may kababaan nin buot kaiba kan satong Diyos.’—Miq. 6:8, NW.

¹⁹ Kaiba sa pagpahiling nin kababaan nin buot an mapakumbabang pagsiyasat sa sadiri ta na isinasaisip an pagigin dalisay saka pagigin banal ni Jehova asin pagmidbid na an saiyang mga pamantayan iyo an pinakamarahay na giya. Kaiba man sa pagpahiling nin kababaan nin buot an paggalang sa namamatian asin opinyon kan iba. Iyo, masasabing ‘naglalakaw kita na may kababaan nin buot kaiba nin Diyos’ kun namumuhay kita kauyon kan halangkaw na mga pamantayan niya asin kun iginagalang ta an namamatian saka opinyon kan iba.

20. Ano an dapat na magin epekto sa iba kan satong pagbado asin pagpakarhay sa sadiri?

²⁰ Dapat na mayo nang iba pang isipon an mga tawo dapit sa satong pagbado apuwera sa kita mga parasamba ni Jehova. Dapat na mahiling kan satong mga kapagtubod asin kan gabos na tawo na angay tang irinerepresentar an satong matanos na Diyos. May halangkaw siyang mga pamantayan asin maugma niyatong hinihinguwang masunod an mga iyan. Maninigo nanggad na komendaran an mga tugang na huli sa saindang itsura asin marahay na paggawi, napahiro an mga sadiyosan an puso na akuon an nagliligtas buhay na mensahe kan Bibliya asin napamuraway saka napaugma si Jehova. Kun magigin madunong an desisyon niyato dapit sa satong pagbado, siyertong padagos tang mapapamuraway an Saro na ginugubingan an saiyang sadiri nin ‘kamahalan asin kamurawayan.’—Sal. 104:1, BPV.