1, 2. Mulandu nshi Inte sha kwa Yehova bafwalila bwino? (Moneni icikope pa muulu.)

INYUNSHIPEPALA ya ku Netherlands yalandile pa fyo bashimapepo bafwele ilyo balongene ati: ‘Ifyo abengi bafwele tafyalelanga ukuti bali pa kulongana, maka maka ilyo kwakabile. Lelo Inte sha kwa Yehova bena te fyo bafwele ilyo balelongana icitungu. Abaume abakalamba na baice bafwele amajaketi na matai, abanakashi abakalamba na baice bafwele amasketi ayatali bwino.’ Ilingi line abantu balatasha Inte sha kwa Yehova pantu ‘balafwala bwino, balafwala ifyalinga kabili ifya mucinshi, mu nshila iyalinga abantu abatila balatiina Lesa.’ (1 Tim. 2:9, 10) Umutumwa Paulo alefunda abanakashi lelo ifyo alandile kuti fwayafwa na baume Abena Kristu.

² Ukufwala bwino kwalicindama kuli ifwe fwe Nte sha kwa Yehova kabili kwalicindama na kuli Lesa uo tupepa. (Ukute. 3:21) Ifyo Amalembo yalanda pa mifwalile ne misakwile filanga ukuti Yehova uwalinga ukuteka umuulu ne sonde alibikako ifyo abantu bakwe balingile ukulakonka pa mifwalile ne misakwile. Kanshi ilyo tulepingula pa mifwalile ne misakwile, tatulingile ukulatontonkanya fye pa fyo tulefwaya fwe bene  lelo tufwile ukulatontonkanya pa fingasekesha Shikulu Mulopwe Yehova.

3. Finshi tulesambilila pa mifwalile ku Mafunde ayo Lesa apeele abena Israele?

³ Mu Mafunde ayo Lesa apeele abena Israele, alibebele ifyo balingile ukulakonka pa kuti beba ne misango yabipa iyo inko shimbi shakwete. Amafunde yalilangile ukuti Yehova alipata ifya kufwala ifya kuti umuntu nga nafwala te kuti mwishibe nampo nga mwaume nelyo mwanakashi. (Belengeni Amalango 22:5.) Ifyo Lesa atweba pa mifwalile filanga fye ukuti tafwaya ifya kufwala ifilenga abaume balamoneka kwati banakashi nelyo abanakashi balamoneka kwati baume nelyo ifya kufwala ifya kuti umuntu nga nafwala te kuti mwishibe nampo nga mwaume nelyo mwanakashi.

4. Finshi fingafwa Abena Kristu ukusala bwino ifyo balingile ukufwala?

⁴ Mu Baibolo mwaliba amashiwi ya kwa Lesa ayatutungulula pa kuti tulesala bwino ifya kufwala. Aya amashiwi yalatwafwa te mulandu ne calo twikalamo, intambi tukonka nelyo ifyo imiceele yaba uko twikala. Baibolo tayalanda fyonse pa fya kufwala ifyalekanalekana ifyo tulingile ukufwala ne fyo tushilingile ukufwala, lelo mwaliba amashiwi ya kwa Lesa ayakututungulula ilyo tulesala ifya kufwala. Natulande pa mashiwi ya kwa Lesa ayatutungulula ayengatwafwa ukusalapo ukucita “icisuma, icapokelelwa kabili icapwililika,” ilyo tulesa ifyo tulefwaya ukufwala.—Rom. 12:1, 2.

5, 6. Bushe imifwalile yesu ifwile ukulenga abantu bacita cinshi?

⁵ Umutumwa Paulo alilangile ukuti amashiwi ayaba pali 2 Abena Korinti 6:4 yalicindama. (Belengeni.) Ifyo tumoneka filanga ifyo twaba. Apo abantu bamona fye “ifimoneka ku menso,” kuti balanda pali ifwe ukulingana ne fyo tulemoneka. (1 Sam. 16:7) Kanshi apo tuli babomfi ba kwa Lesa, twalishiba ukuti tatulingile ukufwala fye ifyo tutemenwe. Nga tulekonka ifyo Baibolo yalanda pa mifwalile, tatwakulafwala ifya kufwala ifyapapatila, ifyabengela nelyo ifyalubebelu nangu ifingalenga umuntu alatontonkanya pa kucita ubulalelale. Kanshi tatulingile no kulafwala ifya kufwala ifilelanga ifyo ifya mfwalo fikeele nelyo ifilelanga fye fyonse. Te kuti ciwame twafwala ifya kufwala ifya kuti abantu nga batumona balolesha kumbi.

⁶ Nga tulafwala bwino ne misakwile yaliba fye bwino, abantu bakatucindika kabili bakalatumona ukuti tuli babomfi ba kwa Shikulu Mulopwe Yehova kabili bakalafwaya no kutendeka ukupepa Lesa. Na kabili nga tulefwala bwino, abantu bakacindika icilonganino cesu. Ne ci cikalenga bakalekutika imbila nsuma.

7, 8. Ni lilali maka maka tulingile ukulafwala bwino?

⁷ Nga tulefwala ifya mucinshi ninshi tulelanga ukuti twalicindika Yehova, aba bwananyina, na bantu abo tubilako imbila nsuma no kuti twalicindika imbila iyo tubila iilenga Yehova alecindikwa. (Rom. 13:8-10) Tulingile ukulafwala bwino maka maka ilyo tulelongana na lintu tulebila imbila nsuma. Tulingile ukulafwala “mu nshila iyalinga [abantu] abatila balatiina Lesa.” (1 Tim. 2:10) Kwena ifya kufwala ifyo bamo bengamona ukuti fyaliba fye bwino, nalimo te kuti fibe bwino ku ncende imbi. Kanshi abantu ba kwa Yehova mwi sonde lyonse balatontonkanya na pa ntambi isho abantu bakonka  ku ncende bekala pa kuti belafwala ifingapunwisha bambi.

⁸ Belengeni 1 Abena Korinti 10:31. Ilyo tuli pa kulongana kwa muputule no kwa citungu, tulingile ukulafwala ifya kufwala ifyalinga kabili ifya mucinshi, tatulingile ukulafwala ifilanga umupashi wa calo. Na kabili tulingile ukulafwala bwino pa numa ya kulongana kwa cila bushiku ilyo twabwelela uko tuleikala. Nga tulefwala bwino te kuti tuleumfwa insoni sha kuilondolola ukuti tuli Nte sha kwa Yehova, kabili kuti tulebila imbila nsuma ku bantu abo twingalakumanya.

9, 10. Bushe ifyaba pa Abena Filipi 2:4 fyakuma shani ifyo tufwala?

⁹ Belengeni Abena Filipi 2:4. Mulandu nshi Abena Kristu balingile ukulatontonkanishisha pa fyo imifwalile yabo ikuma bakapepa banabo? Umulandu wa kubalilapo wa kuti, abantu ba kwa Lesa balabombesha ukukonka amashiwi yatila: “E ico, ipayeni ifilundwa fya mubili wenu umumonekela imibele yabipa, e kutila ubulalelale, ukukowela, insuuna.” (Kol. 3:2, 5) Kanshi tatulingile ukulafwala ifya kufwala ifingalenga cakosela aba bwananyina ukulakonka uku kufunda. Aba bwananyina abaleka ukucita ubulalelale nalimo kuti bacili balelwisha ukuleka imisango yabipa. (1 Kor. 6:9, 10) Kanshi tatulingile ukucita ifingalenga cabakosela ukulwisha ukuleka imisango yabipa.

¹⁰ Ilyo tuli na ba bwananyina pa kulongana  na lintu tuleyangalila pamo nabo, tulingile ukufwala bwino pa kuti icilonganino cileba ica busaka. Kwena twalikwata insambu sha kuisalila ifyo tulefwaya ukufwala. Na lyo line, bonse tulingile ukulafwala ifya mucinshi ifingalenga aba bwananyina batwalilila ukuba abasanguluka no kulaba aba mushilo mu fyo batontonkanya, mu fyo balanda na mu fyo bacita. (1 Pet. 1:15, 16) Mu kutemwa tamwaba “ukucita ifishayana, tamwaba ukucita ifya kuisekesha.”—1 Kor. 13:4, 5.

11, 12. Finshi tulingile ukutontonkanyapo ilyo tulesala ifya kufwala?

¹¹ Ilyo ababomfi ba kwa Lesa balesala ifyo balafwala, balebukisha ukuti “kwaliba inshita ya kupingula umulandu onse no mulimo onse.” (Luk. Mil. 3:1, 17) Kwena tufwala ukulingana ne miceele, imikalile yesu ne ncende tulipo. Lelo ifyo Yehova atweba pa mifwalile fyaba fye cimo cine.—Mal. 3:6.

¹² Nga nakukaba, cilafya ukufwala ifya kufwala fya mucinshi. Na lyo line, aba bwananyina balatemwa sana nga tatulefwala ifya kufwala ifyapapatila nelyo ifikulu kabili ifyabengela. (Yobo 31:1) Na kabili nga twaya mu kwangala ku lulamba lwa bemba nelyo mu kowa mu cishiba, tulingile ukufwala ifya mucinshi. (Amapi. 11:2, 20) Nangu ca kuti abantu abengi bafwala fye utwa mu kati pa kowa, fwe babomfi ba kwa Yehova tulingile ukulafwala ifingalenga Lesa wesu uwa mushilo acindikwa.

13. Mulandu nshi tulingile ukukonkela ukufunda kwaba pali 1 Abena Korinti 10:32, 33 ilyo tulesala ifya kufwala?

¹³ Na kabili, ilyo tulesala ifya kufwala, tulingile ukutontonkanya na pali kampingu ya bantu bambi, nampo nga ba bwananyina nelyo iyo. (Belengeni 1 Abena Korinti 10:32, 33.) Tulingile ukubika amano ku fyo tufwala pa kuti twilapunwisha bambi. Paulo alembele ati: “Ifwe umo umo tufwile ukucitila abanensu ifingabakuula.” Lyena alembele no mulandu alandiile ifi, atile: “Pantu nangu fye ni Kristu talecita fye ifyalemuwamina.” (Rom. 15:2, 3) Ukwabula no kutwishika Yesu talecita fye ifya kuisekesha, lelo abikile sana amano ku kwafwilisha abantu na ku kucita ukufwaya kwa kwa Lesa. Na ifwe bene tatwakulafwala ifya kufwala pa mulandu fye wa kuti twalifitemwa lelo ifingalenga abantu balakaana ukukutika imbila nsuma iyo tubila.

14. Bushe abafyashi kuti basambilisha shani abana babo ukulafwala bwino pa kuti balecindika Lesa?

¹⁴ Abafyashi Abena Kristu balikwata umulimo wa kusambilisha abana babo ifya kukonka amashiwi ya kwa Lesa ayatutungulula. Imifwalile ne misakwile ya bafyashi ne ya bana ilingile ukulasekesha Lesa. (Amapi. 22:6; 27:11) Abafyashi kuti basambilisha abana ukucindika Lesa uwa mushilo uo bapepa nga ca kuti balecita ifilanga ukuti balicindika Lesa kabili nga bali no kutemwa ilyo balebafunda. Abafyashi balingile ukulanga abana babo uko bengashita ifya kufwala ifya mucinshi ifya kuti nga nabafwala abantu balacindika Yehova Lesa.

15. Finshi fingatwafwa ukulasala bwino ifya kufwala?

¹⁵ Lesa alitweba ifya kukonka mu Cebo cakwe pa kuti tulesala bwino ifya kufwala ifingalenga acindikwa. Na lyo line, bonse tulaisalila ifya kufwala ifyo tulefwaya. Ifya  kufwala tutemwa ne fyo twingashita filapusanapusana ukulingana fye ne ndalama twakwata. Nangu cibe ifi, ifya kufwala fyesu filingile ukulamoneka bwino, ifya busaka, ifya mucinshi kabili ifilingene ne fyo tulecita ne cifulo tulipo kabili ifishingapunwisha abantu ku ncende twaba.

16. Mulandu nshi tulingile ukulabikilako amano ku kusala ifya kufwala ifya mucinshi?

¹⁶ Kwena te lyonse canguka ukupingula bwino pa fintu. Ifya kufwala ifingi ifyo bashitisha muno nshiku ni filya ifipapatila, kanshi pa kuti tusange fye ifya kufwala ifya mucinshi tulingile ukubikako sana amano no kutekanya. Aba bwananyina nga bamona ukuti twalibika amano ku kusala ifya kufwala ifyalinga, bakalatutasha. Na kabili insansa tukwata nga tulefwala ifya kufwala ifilenga Shifwe wa ku muulu acindikwa, shilacila pa mafya tukwata pa kusanga ifya kufwala ifyalinga.

17. Finshi fimo ifingalenga munyinefwe asalapo nampo nga kuteka umwefu nelyo iyo?

¹⁷ Bushe bamunyinefwe balingile ukuteka umwefu? Mu Mafunde ya kwa Mose, Yehova alisuminishe abaume ukuteka umwefu. Lelo Abena Kristu muno nshiku tabakonka Amafunde ya kwa Mose. (Lebi 19:27; 21:5; Gal. 3:24, 25) Mu ncende shimo, caliba fye bwino ukuteka umwefu nga ca kuti baleubeya bwino kabili taulelenga abantu balekaana ukukutika imbila nsuma. Na kuba, abaume bamo abasontwa mu cilonganino balateka umwefu. Na lyo line, bamunyinefwe bamo balasalapo ukukanateka umwefu. (1 Kor. 8:9, 13; 10:32) Mu fyalo fimo nelyo mu ncende shimo abantu tabateka umwefu kabili na Abena Kristu abekala muli ishi ncende tabateka umwefu. Na kuba, munyinefwe nga ateka umwefu, abantu te kuti balecindika Lesa pantu ninshi imifwalile ne misakwile yakwe yalibipa kabili ninshi alatungwa akabi.—Rom. 15:1-3; 1 Tim. 3:2, 7.

18, 19. Bushe Mika 6:8 itwafwa shani ilyo tuleibikilishako ukufwala ifingalenga Lesa alasekelela?

¹⁸ Tulatasha nga nshi pantu Yehova tatweba fye fyonse ifya kukonka pa mifwalile ne misakwile. Lelo alitupeela ubuntungwa bwa kuisalila ifyo tulefwaya, ukubomfya amashiwi yakwe ayatutungulula. Kanshi mu mifwalile na mu misakwile yesu kuti twalanga ukuti tufwaya ‘ukwenda bufuuke bufuuke na Lesa wesu.’—Mika 6:8.

¹⁹ Tulalanga ukuti twalifuuka nga tulekonka ifyo Yehova wa mushilo atweba pantu e o tufwaya aletutungulula. Na kabili nga twalifuuka tukalacindika ifyo bambi bamona ne fyo bomfwa pa fintu. Kanshi nga tulekonka ifyo Yehova afwaya, kabili tuletontonkanya na pali kampingu ya bantu bambi, ninshi ‘tulenda bufuuke bufuuke na Lesa.’

20. Bushe imifwalile yesu ne misakwile filingile ukulenga abantu

²⁰ Ifyo tufwala tafilingile ukulenga abantu balatwishika nampo nga tuli babomfi ba kwa Yehova nelyo iyo. Aba bwananyina na bantu fye bambi balingile ukumona ukuti cine cine tuli babomfi ba kwa Lesa uwa mushilo. Lesa alitweba ifya kulakonka kabili tulatemwa ukukonka ifyo atweba. Tulatasha nga nshi aba bwananyina abafwala bwino, abacita ifilenga abantu basambilila icine kabili balacindika Yehova kabili balacita ne filenga alasekelela. Nga tulesala bwino ifyo tufwala, tukatwalilila ukucindika Yehova uwafwala “ubucindami na bukatebebe.”—Amalu. 104:1, 2.