1, 2. Warom is es wichtich fer Yeehoowa sayn tiiner was fer tsaych se aan tsiie? (Kuk tas pilt am aanfang fom artikel.)

 Een tsaytung fon Holant saat iwich een fersamlung fon relichyeese fiirer: “Fiil hon informaal tsaych aan kehat, hauptseechlich wayls waarem waar.” Ti tsaytung saat noch: ‘Te konkrës fon Yeehoowa sayn Tsayer is kans anerste. Mëner un puupe hon aantsich aan un krawate. Fraae un meet hon aanxtëntiche rek aan woo aach motërn sin.’ Ofts mool wëre Yeehoowa sayn Tsayer keloopt wayl se “kexayt tsaych aan tsiie un sich aanmeesich ferxmike mit kuute ferxtant . . . soo wii es richtich is fer tii woo saan tas se Kot aan peete.” (1 Tim. 2:9, 10) Te aphostel Phaul hot hiir iwich ti fraae kexproch, awer tas kilt aach fer ti kristliche mëner.

² Fer uns, Yeehoowa sayn tiiner, is es wichtich wise was fer tsaych tëm kefalt. Tiise sache is aach wichtich fer Yeehoowa. (Xee. 3:21) Te Soweraan fom kanse Uniwërs hot moraalixe mustere iwich wii sayn tiiner sich aan tsiie un ferxmike sole. Tiise oryentiirunge xteen kans klaar in ti Piipel. Soo, wën mer tsaych raus suuche, sole mer net ploos tenke aan was uns kefalt. Meyer sole aach tenke aan was te Soweraan Hër Yeehoowa kefalt.

3. Was khene mer lërne iwich Kot sayn Kesets fer ti israeliiter iwich klaytung?

³ Tsum payxpiil, im Kesets woo Yeehoowa Mooses kep hot, waare kesetse woo ti israeliiter kexitst hon fon tas imoraalix leepe fon tas folek woo um iir rom kewoont hot. Een fon tiise kesets saat tas ti fraa solt net tsaych aan tsiie wii te man un te man solt net tsaych aan tsiie wii ti fraa. (Lees Teuteronoomyum 22:5.) Tas kesets tsaycht kans klaar tas Yeehoowa hast tsaych woo macht tas een man aus siit wii een fraa un een fraa aus siit wii eene man, orer woo net kans klaar tsaycht ep tas eene man orer een fraa is.

4. Was khan ti kriste helfe kuute ëntxlise mache iwich wii sich aan tsiie?

⁴ In ti Piipel sin oryentiirunge woo uns helfe kuute ëntxlise mache iwich was aan tsiie, ekaal tas lant, kultuer orer tas weter. Meyer prayche net een lang list woo saat was mer khene orer net aan tsiie; meyer prayche ploos aan wëne ti piiplixe oryentiirunge. Tas petayt net tas mer khene net raus suuche tsaych woo uns kefalt. Yets wëre mer siin etliche oryentiirunge woo uns helfe wise was is “Kot sayne kuute, xeene un perfekte wile” wën mer raus suuche tas tsaych woo mer wole aan tsiie. (Rom. 12:1, 2)

5, 6. Warom sole mer uns ferninftich aan tsiie?

⁵ Kot hot kexikt te aphostel Phaul uf xraype ti oryentiirung woo xteet in 2 Korinter 6:4. (Lees.) Tas ausiin is wichtich, wayl was fiil layt iwich uns tenke hot tsu tuun mit wii mer aus siin. (1 Sam. 16:7) Meyer representiire Kot. Tes weeche, wën mer uns aan tsiie thërfe mer net ploos tenke aan was fer sort tsaych uns kefalt. Wën mer ferxteen ti oryentiirung fon Kot sayn Wort, wëre mer net aan tsiie tsaych woo is tsu ëng, khorts, tsu wayt aus kexnit orer sensuaal aus siit. Sicher tas hot tsu tuun mit tsaych woo tsu fiil acht pringt tsu etliche teele fom khërper. Meyer wole net tas ti anere sich xeeme sole, orer wech kuke mise weeche unser tsaych.

⁶ Woerxaynlich respektiire ti layt uns wii Yeehoowa sayn Tsayer wën unser tsaych sauwer, kexayt un aanmeesich is. Unser ausiin khan mache tas ti layt wole mee lërne iwich Kot un mee respekt hon iwich unser orkanisatsyoon. Tas khan mache tas se acht kepe tsu ti wichtich pexeet woo mer preetiche.

7, 8. Wën hauptseechlich mise mer uns kexayt aan tsiie?

⁷ Wayl mer wole Yeehoowa, unser priiter un ti layt in unser teritoryum respektiire, wole mer uns aan tsiie in een aat woo eer tsu Yeehoowa un unser pexeet kept. (Rom. 13:8-10) Tas is noch wichtiche wën mer uf ti fersamlunge keen orer in te preetich aarwayt xafe. Meyer sole uns aan tsiie “soo wii es richtich is fer tii woo saan tas se Kot aan peete.” (1 Tim. 2:10) Tas khan sin tas een sort tsaych woo uf een plats kuut aan kesiin is, wërt net soo aan kesiin uf een anert plats. Tes weeche, respektiire Yeehoowa sayn Tsayer in te kans welt ti aat wii ti layt keweent sin sich aan tsiie fer nimant pelaytiche.

⁸ Lees 1 Korinter 10:31. Wën mer uf een konkrës keen, sol unser tsaych sich too tsu xteen. Meyer wole aan tsiie tsaych woo kexayt is un net ausferxeemte moote fon te welt noo mache. Soo kaar foer un noom konkrës, tsum payxpiil, wën mer ins hotel orer ausm hotel keen, orer wën mer xpatsiire keen mit unser priiter, wole mer uns net tsu informaal orer xlumsich aan tsiie. Soo, prayche mer uns net xeeme fer saan tas mer Yeehoowa sayn Tsayer sin un khene tsaye kepe wëns een keleechenheet kept.

9, 10. Wii heleft uns Filiper 2:4 unser tsaych raus suuche?

⁹ Lees Filiper 2:4. Meyer sole tenke aan was unser priiter iwich unser tsaych saan teete. Warom? Eene motiiw is tas Yeehoowa sayn folek sich aan xtrengt fer aan wëne ti piiplix aanreet: “Macht aach toot ti kliite fon ayre khërper woo se tuun hon mit seksuaal imoraaliteet, unraynheet, seksuaale luste ausm kontrol.” (Kol. 3:2, 5) Etliche fon unser priiter hon friier een imoraalix leepe kehat un im xtant xtrenge sich noch aan fer tiise ferkheerte winxe phake. (1 Kor. 6:9, 10) Meyer wole net tas unser tsaych tas noch xweyere macht fer tëne, kël?

¹⁰ Wën mer pay unser spirituaale priiter un xwestere sin, solt ti aat wii mer uns aan tsiie ti kemaynt helfe tas es een plats is mit een kuut moraal, ekaal ep mer mitsamer sin uf een fersamlung orer uf een anert plats. Is woer tas yeete eene fon uns is fray fer raus suuche wii eyer sich aan tsiie wil. Awer toch, yeete eene fon uns hot ti responsapiliteet fer sich aan tsiie in een aat woo heleft ti anere sich sauwer hale foer Kot sayn aue, in ketanke, in wërter un in aktsyoone. (1 Phe. 1:15, 16) Weer wërklich liipt “xtelt sich net unferninftich aan, suucht net sayn aychne interese.” (1 Kor. 13:4, 5)

11, 12. Wii Eklesyastes 3:1, 17 heleft uns aanmeesich sin wën mer tsaych raus suuche?

¹¹ Wën Kot sayn tiiner raus suuche was fer sort tsaych aan tsiie, mise se in te ketanke hon ‘tas een tsayt is fer yeete aktiwiteet un fer yeete aktsyoon’. (Ekl. 3:1, 17) Sicher, was mer aan tsiie hot aach tsu tuun mit weter, yoertsayt un anere umxtënte. Awer was Yeehoowa saat woo richtich orer ferkheert is ferënert sich net. (Mal. 3:6)

¹² Uf pletse woos aarich waarem is, khan es xweer sin aanmeesich un mit kuute ferxtant sich aan tsiie. Tes weeche, kepe unser priiter un xwestere kroos weyert wën mer uns aan xtrenge fer net aan tsiie tsaych woo tsu ëng orer tsu wayt is. (Yoo. 31:1) Un aach, wën mer aan ti praya orer pisina sin, sol unser paat tsaych aanmeesich sin. (Xpr. 11:2, 20) Is woer tas fiil layt woo net kriste sin unferninftich paat tsaych aan tsiie. Awer wii Yeehoowa sayn tiiner, wole mer eere unser hayliche Kot woo mer soo aarich liipe.

13. Wii 1 Korinter 10:32, 33 heleft uns raus suuche was fer tsaych aan tsiie?

¹³ Een anert wichtich oryentiirung fon te Piipel woo uns heleft wise was aan tsiie xteet in 1 Korinter 10:32, 33. (Lees.) Tiise wërse tsayche tas mer mise uns ketanke mache iwich ti anere sayn kewise, ep se unser priiter sin orer net. Soo, nëme mer kans ërnst aan ti responsapiliteet fer uns net aan tsiie uf een aat woo khent anere pelaytiche. Phaul hot kexrip: “Yeete fon uns sol mache was kuut is fer sayne neekste, fer tee uf muute. Wayl noch net mool Kristus hot ploos aan sich selepst ketenkt.” (Rom. 15:2, 3) Yeehoowa sayne wile mache un anere helfe waar wichticher fer Yeesus wii sayne aychne wile mache. Kraat soo, wën mer aach aarich kërn een sort tsaych hon, tsiie mer tas net aan wën tas khent mache tas ti layt net aan nëme teete ti pexeet woo mer preetiche.

14. Wii khene ti eltere sayn khiner in lërne tsaych raus suuche woo Kot eert?

¹⁴ Kristliche eltere hon ti responsapiliteet fer iire khiner in lërne aan wëne ti piiplixe oryentiirunge. Too tsu keheert ti khiner tsayche tas es wichtich is aanmeesich tsaych raus suuche woo Yeehoowa sayn hërts frayt. (Xpr. 22:6; 27:11) Wii khene ti eltere iire khiner helfe unser hayliche Kot respektiire? Tii selepst mise een kuut payxpiil sin un iire khiner oryentiire mit liip un in een praktix aat. Wii kuut wën ti yunge fon iire eltere kelërnt hon woo un wii se khene een kexayt tsaych fine. Soo, lërne ti khiner net ploos tsaych raus suuche woo iir kefalt awer aach tsaych woo eere kept tsu Yeehoowa, te Kot woo se tiine.

15. Aan was sole mer tenke wën mer tsaych raus suuche?

¹⁵ Ti Piipel kept praktixe oryentiirunge woo uns helfe tsaych raus suuche woo Yeehoowa eert. Awer toch, was mer aan tsiie tsaycht was mer kërn hon. Tas kept fiile sorte tsaych, awer tas tsaych woo mer raus suuche sol sin aanmeesich, sauwer, kexayt un sich xteen in ti aat wii ti layt aan tsiie woo mer woone.

16. Warom is am weyert sich aan xtrenge fer kemeesich tsaych khaafe?

¹⁶ Is woer tas es net imer laycht is etwas fine woo aanmeesich un xeen is. Fiil kexefte ferkhaafe ploos was “moote” is. Tas khan net laycht sin fine aanmeesiche rek, kitle un pluuse orer aantsich un hose woo net tsu ëng sin. Unser priiter mërke un kepe fiil weyert wën mer uns aan xtrenge fer xeen un ferninftich tsaych aan tsiie. Un noch, wise tas mer eere tsu unser liipe himliche Fater kepe, macht tas es am weyert is uns too foer aan xtrenge.

17. Weyer tas richtich eene pruuter te paart xteen lose? Lee tas aus.

¹⁷ Weyer tas richtich eene pruuter te paart xteen lose? Tas Kesets woo Yeehoowa fer ti israeliiter kep hot saat tas te man solt te paart xteen lose. Awer ti kriste sin net mee unich tiise Kesets. (Lew. 19:27; 21:5; Kal. 3:24, 25) Uf etliche pletse is es khee propleem wën eene man te paart xteen lost. Tas macht net tas ti layt khee acht kepe tsu tas pexeet fom Raych. In woerheet, in etliche lënter, lose ti elteste un ti ministeryaale tiiner paart xteen. Awer toch, anere hon liipe khee paart. (1 Kor. 8:9, 13; 10:32) In anere lënter sin ti mëner net keweent te paart xteen lose. Tes weeche teet tas net kuut xteen wën eene pruuter teet te paart xteen lose. Soo kaar in tiise pletse wën eene pruuter te paart xteen lost, khent tee net kuut aan kesiin wëre un im xtant aach net “unxultich” kenënt sin. (Rom. 15:1-3; 1 Tim. 3:2, 7)

18, 19. Wii heleft uns Mikeyas 6:8 raus suuche tas sort tsaych woo mer aan tsiie fer Kot kefale?

¹⁸ Meyer fraye uns tas Yeehoowa uns net een lang list kep hot iwich was mer thërfe orer net mache. Xtats tas, lost tee tas mer unser fray wile penutse fer aanmeesiche ëntxlise mache woo sich hale aan ti piiplixe oryentiirunge. Awer wayl mer Yeehoowa sayn tiiner sin, wole mer unser ‘Kot mit teemuut aan heere’, soo kaar wën mer raus suuche tas tsaych woo mer aan tsiie wole. (Mik. 6:8)

¹⁹ Yeehoowa is haylich un rayn, un kept uns imer ti peste aanreete. Te persoon woo aanmeesich un teemuutich is uner suucht sayn tsaych fer sicher sin tas tas sich xteet mit was Yeehoowa kefalt. Un noch, tee respektiirt ti anere sayn mënung un xpiirung. Soo, wën mer ‘Kot mit teemuut aan heere’, nëme mer aan was Kot tenkt un tsayche mer respekt tsu ti anere sayn xpiirunge.

20. Was sole ti anere tenke iwich ti aat wii mer uns aan tsiie un ferxmike?

²⁰ Unser tsaych sol kans klaar tsayche tas mer Yeehoowa tiine. Unser priiter un aach ti anere layt sole erkhëne tas mer Kot representiire. Yeehoowa sayn oryentiirunge sin ti peste woos kept, un mer fraye uns fer tii aan wëne in unser leepe. Wii unser priiter sich aan xtele un aan tsiie khan mache tas ti layt woo een eerlich hërts hon ti woerheet lërne wole. Tiise priiter sole keloopt wëre wayl se Yeehoowa eere un sayn hërts fraye. Wën mer kuute ëntxlise mache iwich wii mer uns aan tsiie, wëre mer foran eere Yeehoowa woo sich aan tsiit mit “maxisteet un klans”. (Psal. 104:1, 2)