1, 2. Apay a nangato ti pagalagadan dagiti Saksi ni Jehova no maipapan iti panagbadbado? (Kitaen ti ladawan iti rugi ti artikulo.)

“ADU ti makitam a saan a desente a bado, nangruna no napudot ti tiempo,” kuna ti maysa a periodiko iti Netherlands maipapan iti miting dagiti lider ti relihion. Innayonna pay nga iti maysa a kombension dagiti Saksi ni Jehova, agamerikana ken agkurbata dagiti lallaki ken nupay moderno dagiti palda dagiti babbai, naemma ti kaatiddogna. Kinapudnona, masansan a mararaem dagiti Saksi ni Jehova gapu ta naemma ken natakneng ti panagbadbadoda a maitutop kadagiti agkunkuna nga agserserbi iti Dios. (1 Tim. 2:9, 10) Ibagbaga dayta ni apostol Pablo kadagiti babbai, ngem agaplikar met dayta a pagalagadan kadagiti Kristiano a lallaki.

² Napateg ti maitutop a panagbadbado kadagiti adipen ni Jehova, ken napateg dayta iti Dios a pagdaydayawantayo. (Gen. 3:21) Ti ibagbaga ti Kasuratan maipapan iti panagbadbado ken panaglanglanga nalawag nga ipakitana a ti Katan-okan iti uniberso ket adda nagsayaat a pagalagadanna iti panagbadbado para kadagiti pudno nga agdaydayaw kenkuana. Ngarud, ti panagbadbado ken  panaglanglangatayo ket masapul a saan laeng a maibatay iti kayattayo. Ikabilangantayo met ti makaay-ayo iti Soberano nga Apo a ni Jehova.

3. Ania ti isuro kadatayo ti Linteg nga inted ti Dios kadagiti Israelita maipapan iti panagbadbado?

³ Kas pagarigan, iti Linteg nga inted ti Dios kadagiti Israelita, adda dagiti pagannurotan a mangsalaknib kadakuada iti immoral a panagbiag dagiti nasion iti aglawlawda. Ipakita ti Linteg a kagura ni Jehova ti panagbadbado a saan a mailasin no lalaki wenno babai ti maysa, a maaw-awagan ita iti unisex fashion. (Basaen ti Deuteronomio 22:5.) Gapu iti dayta nga imbaga ti Dios maipapan iti panagbadbado, makitatayo a saan a maragsakan ti Dios no agkawes dagiti lallaki iti bado dagiti babbai, agkawes dagiti babbai iti bado dagiti lallaki, wenno narigat a mailasin no lalaki wenno babai ti maysa gapu iti badona.

4. Ania ti makatulong kadagiti Kristiano nga agdesision no ania ti pagbadoda?

⁴ Adda dagiti prinsipio ti Biblia a makatulong kadagiti Kristiano tapno ammoda no ania ti pagbadoda sadinoman ti ayanda, aniaman ti kulturada, wenno klima. Saantayo a kasapulan ti detalyado a listaan ti maawat wenno saan a maawat nga estilo ti bado. Imbes ketdi, adda dagiti prinsipio ti Biblia a mangiwanwan kadatayo tapno ammotayo ti pilientayo. Usigentayo dagiti prinsipio ti Biblia a makatulong tapno ammotayo no ania “ti naimbag ken makaay-ayo ken naan-anay a pagayatan ti Dios” no agpilitayo iti badotayo.—Roma 12:1, 2.

5, 6. Ania koma ti epektona iti sabsabali ti panagbadbadotayo?

⁵ Napaltiingan ni apostol Pablo a mangipaganetget iti nagpateg a prinsipio a mabasa iti 2 Corinto 6:4. (Basaen.) Adu ti ibaga ti langatayo maipapan kadatayo. Adda ipagarup ken maibaga dagiti tattao gapu iti makitada kadatayo. (1 Sam. 16:7) Gapuna, kas ministro ti Dios, maawatantayo a saan laeng a ti komportable ken kayattayo ti pagbadotayo. Dagiti prinsipio a maammuantayo iti Sao ti Dios ti mangtignay koma kadatayo a saan nga agbado iti nakipet wenno makagargari. Saantayo ngarud nga agbado iti makita wenno maibatad dagiti pribado a paset ti bagitayo. Awan koma ti mabain a mangkita kadatayo wenno kumita iti sabali gapu iti badotayo.

⁶ No nadalus, naurnos, naemma, ken natakneng ti langatayo, ad-adda a raemendatayo kas ministro ti Soberano nga Apo a ni Jehova. Mabalin pay ketdi a maawisda nga agdayaw iti Diostayo. Kasta met, ti umiso a panagbadbadotayo ipakitana a nasayaat ti organisasiontayo. Kas resultana, mabalin nga ad-adda a maawis dagiti tattao a dumngeg iti makaispal iti biag a mensahetayo.

7, 8. Kaano a nangnangruna nga agusartayo iti maitutop a bado?

⁷ Gapu iti nasantuan a Diostayo, dagiti kakabsattayo, ken dagiti tattao iti teritoriatayo, rumbeng laeng nga agbadotayo iti pakaidayawan ti mensahetayo ken pakaidayawan ni Jehova. (Roma 13:8-10) Aramidentayo dayta nangnangruna no makigimong wenno mangasabatayo. Masapul nga agbadotayo “iti wagas a maitutop kadagiti [tattao] nga agkunkuna nga agraemda unay iti Dios.” (1 Tim. 2:10) Siempre, mabalin nga adda dagiti bado a maitutop iti maysa a lugar ngem saan a maitutop iti sabali a lugar. Gapuna, ikabilangan dagiti adipen ni Jehova iti intero a lubong ti kaugalian iti maysa a lugar tapno awan ti maitibkol.

 ⁸ Basaen ti 1 Corinto 10:31. No agatendertayo kadagiti asamblea ken kombension, masapul a maitutop ken naemma ti badotayo imbes a ti naidumduma nga estilo a gagangay iti lubong. No agdagustayo iti hotel ken no agpasiartayo sakbay ken kalpasan dagiti sesion ti kombension, saantayo koma nga agbado iti saan a desente wenno saan a nanakman. Iti kasta, saantayo a mabain a mangibaga a maysatayo a Saksi ni Jehova ken mangasabatayo no adda gundawaytayo.

9, 10. Apay nga ikabilangantayo koma ti Filipos 2:4 no agpilitayo iti pagbadotayo?

⁹ Basaen ti Filipos 2:4. Apay a masapul nga ikabilangan dagiti Kristiano ti epekto ti panagbadbadoda kadagiti kapammatianda? Gapu ta ikagkagumaan ti dadduma nga adipen ti Dios nga iyaplikar daytoy a balakad ti Biblia: “Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso.” (Col. 3:2, 5) Saantayo a kayat a marigatan dagiti kakabsat a mangyaplikar iti dayta a balakad. Mabalin a lablabanan pay laeng ti dadduma a kakabsat nga immoral idi ti panagbiagda ti dakes a tarigagayda. (1 Cor. 6:9, 10) Kayattayo a nalaklakada a labanan dayta a tarigagayda.

¹⁰ No kaduatayo dagiti kakabsat, makatulong koma ti pamay-an ti panagbadbadotayo tapno agtalinaed a nadalus iti moral ti kongregasion, iti man gimong wenno iti sadinoman. Nawayatayo nga agpili iti pagbadotayo. Ngem agbadotayo koma iti makatulong iti dadduma a nalaklaka nga agtalinaed a nadalus iti moral ken  mangsurot iti pagalagadan ti Dios mainaig iti kinadalus iti panunot, sasao, ken tigtignay. (1 Ped. 1:15, 16) Ti pudno nga ayat “saan a naalas ti panagtigtignayna, saanna a sapulen dagiti bukodna a pagimbagan.”—1 Cor. 13:4, 5.

11, 12. Ania ti ikabilangantayo no agpilitayo iti pagbadotayo?

¹¹ No agpilpili dagiti adipen ti Dios iti pagbadoda, ammoda nga adda “tiempo iti tunggal aramid.” (Ecl. 3:1, 17) Ti pagbadotayo ket agdepende iti klima, paniempo, ken nagduduma a kasasaad ken pagnanaedan. Ngem saan nga agbaliw dagiti pagalagadan ni Jehova aniaman ti paniempo.—Mal. 3:6.

¹² Mabalin a narigrigat ti agpili iti nadayaw ken nanakman a bado iti napudot a klima. Gapuna, apresiaren dagiti kakabsat no saantayo nga agbado iti nakipet wenno nalawa ngem makita ti pribado a paset ti bagitayo. (Job 31:1) No addatayo met iti baybay wenno swimming pool, masapul a naemma koma ti isuottayo a pagdigus. (Prov. 11:2, 20) Uray no adu iti lubong ti agusar iti makagargari a pagdigus, datayo nga agserserbi ken Jehova laglagipentayo koma ti pakaidayawan ti nasantuan a Dios nga ay-ayatentayo.

13. Apay a laglagipentayo ti ibalakad ti 1 Corinto 10:32, 33 no agpilitayo iti pagbadotayo?

¹³ Adda pay nagpateg a prinsipio a makatulong kadatayo nga agpili iti badotayo. Panunotentayo koma ti konsiensia ti sabsabali—kapammatiantayo man wenno saan. (Basaen ti 1 Corinto 10:32, 33.) Masapul a liklikantayo ti agbado iti makaitibkol iti sabali. Insurat ni Pablo: “Tunggal maysa kadatayo ay-aywenna koma ti padana a tao iti naimbag a maipaay a pakapabilganna.” Imbagana no apay: “Ta uray ti Kristo saanna nga inay-ayo ti bagina.” (Roma 15:2, 3) Wen, inyun-una ni Jesus ti pagimbagan ti sabali imbes a ti pagimbaganna—ti panangtulongna kadakuada ket napateg iti panangaramidna iti pagayatan ti Dios. Gapuna, situtuloktayo a saan a mangisuot iti bado a kayattayo ngem manglapped kadagiti tattao a mangawat iti mensahetayo.

14. Kasano a sanayen dagiti nagannak dagiti annakda a mangidayaw iti Dios babaen iti panagbadbadoda?

¹⁴ Dagiti Kristiano a nagannak rebbeng nga isuroda dagiti annakda a mangyaplikar kadagiti prinsipio ti Biblia. Ramanen daytoy ti panangparagsakda ken dagiti annakda iti Dios babaen ti naemma a panagbadbadoda ken natakneng a panaglanglanga. (Prov. 22:6; 27:11) Maipaganetget dagiti nagannak kadagiti annakda ti panagraemda iti nasantuan a Dios a daydayawentayo babaen ti nasayaat nga ulidan ken panangisuroda kadakuada. Talaga a nagsayaat no isuro dagiti nagannak dagiti tin-edyerda no sadino ken kasano nga agpilida kadagiti natakneng a kawes! Kaipapananna daytoy a saan laeng a ti kayatda ti ikabilanganda no di ket laglagipenda ti pribilehioda a mangirepresentar iti Dios a ni Apo Jehova.

15. Ania koma ti mangiwanwan iti panagpilitayo iti bado?

¹⁵ Mangipaay ti Sao ti Dios iti praktikal a balakad a makatulong kadatayo a mangaramid kadagiti desision a mangipaay iti dayaw iti Dios. Nupay kasta, mabalin met a pilientayo ti kayattayo a pagbado. Agduduma ti kayattayo, ken ti pinansial a kabaelantayo. Ngem masapul a ti badotayo kanayon koma a nadalus, natakneng, maitutop  iti okasion, ken maawat iti lugar a pagnanaedantayo.

16. Apay a nasayaat no ikagumaantayo ti agbirok iti naemma a kawes?

¹⁶ Aminentayo a saan a kanayon a nalaka ti agdesision no ania ti nasayaat a pilien, natakneng, ken masapul nga ikabilangan. Adu a paglakuan ti agilako iti uso, isu a narigrigat ti agpili iti naemma a bado, palda ken blusa, wenno amerikana ken pantalon a saan unay a nakipet. Ngem makita dagiti kapammatiantayo ken apresiarenda nga ikagkagumaantayo ti agbirok kadagiti napintas ken maitutop a kawes. Maragsakantayo met a maidayaw ti naayat a nailangitan nga Amatayo nupay narigat ti agbirok iti kawes a mangyeg iti pakaidayawanna.

17. Ania dagiti banag a mabalin nga ikabilangan ti maysa a kabsat a lalaki no kayatna ti maaddaan wenno saan iti barbas?

¹⁷ Maitutop kadi a maaddaan iti barbas dagiti lallaki? Kalikaguman ti Linteg a naited ken Moises a maaddaan idi ti barbas dagiti lallaki. Nupay kasta, saanen nga alagaden dagiti Kristiano ti Linteg a naited ken Moises. (Lev. 19:27; 21:5; Gal. 3:24, 25) Iti dadduma a kultura, mabalin a maawat ti napintas ti pannakapukisna a barbas, ken mabalin a saan a makalapped iti mensahe ti Pagarian nga ikasabatayo. Kinapudnona, adda barbas ti dadduma a nadutokan a kakabsat. Nupay kasta, mabalin a kayat ti dadduma a kakabsat nga awan ti barbasda. (1 Cor. 8:9, 13; 10:32) Iti dadduma a kultura wenno lugar, saanda nga ugali ti maaddaan iti barbas ken maibilang pay ketdi a saan a maawat kadagiti ministro a Kristiano. Kinapudnona, mabalin pay ketdi a dayta a kabsat saanna a maidayaw ti Dios gapu iti panagbadbado ken panaglanglangana ken saan a maibilang nga awan pakababalawanna.—Roma 15:1-3; 1 Tim. 3:2, 7.

18, 19. Kasano a makatulong ti Mikias 6:8 kadatayo no ikagumaantayo a paragsaken ti Dios babaen ti panagbadbadotayo?

¹⁸ Agyamantayo ta saan a nangted ni Jehova iti detalyado a listaan dagiti alagaden maipapan iti panagbadbado ken panaglanglanga. Imbes ketdi, inikkannatayo iti wayawaya nga agaramid iti umiso a desision nga iwanwanwan dagiti prinsipio ti Biblia. Iti kasta, uray iti panagbadbado ken panaglanglangatayo, maipakitatayo a kayattayo ti agbalin a ‘naemma a makipagna iti Dios.’—Mik. 6:8.

¹⁹ Karaman iti kinaemma ti napakumbaba a panangsukimat iti bagitayo no idilig iti kinadalus ken kinasanto ni Jehova, ta naan-anay nga agpannuraytayo kenkuana para iti kasayaatan a pannakaiwanwan. Kasta met, ti kinaemma ramanenna ti panangipakita iti panagraem iti rikna ken panunot ti sabsabali. No kasta, agbalintayo a naemma a ‘makipagna iti Dios’ no itunostayo ti biagtayo iti nangato a pagalagadanna ken raementayo ti kapanunotan ti sabsabali.

20. Ania koma ti epektona iti dadduma ti panagbadbado ken panaglanglangatayo?

²⁰ Mailasin koma dagiti tattao babaen iti kawestayo nga adipennatayo ni Jehova. Dagiti kakabsattayo ken uray ti kaaduan a tattao mailasinda koma a maitutop nga irepresentartayo ti nalinteg a Diostayo. Nangato dagiti pagalagadanna, ket maragsakantayo a mangipakita kadagita. Makomendaran dagiti kakabsat a mangipakpakita iti napintas a langa ken nasayaat nga ugali a makaawis kadagiti nasingpet a tattao a dumngeg iti makaispal iti biag a mensahe ti Biblia ken mangyeg iti pakaragsakan ken pakaidayawan ni Jehova. Sigurado a ti nainsiriban a desisiontayo mainaig iti panagbadbado ket mangyeg iti pakaidayawan Daydiay nangkawes iti bagina “iti dayaw ken kinangayed.”—Sal. 104:1, 2.