ENYUZIPEPA ya ku Nertherlands yavwanzile pe vino wasimapepo wazwite pano walongine ukuti: “Vino awavule wazwite vitalanjizyanga nukuti walinji pa kulongana, maka maka pano kwalunguzile nkani. Nomba wa Nte asa vino wazwite pano walongananga ukulongana kwa Citungu. Awonsi wasongo na wacitici wazwite amajaketi na matai, awanaci wasongo na wacitici wazwite amasiketi amatali icete.” Ilivule awantu wakasalifya Inte zya kwe Yehova amuno wakazwala icete, ‘wakazwala iviyane swinya ivya mucinzi, mu nzila yino yayana wano wakati wakatiina Leza.’ (1 Tim. 2:9, 10.) Umutumwa Paulo wasundanga awanaci nomba vino walanzile vingavwa awina Klistu wonsinye ukusanzyako na wonsi.

² Ukuzwala icete kwacindama nkaninye kwe swe Nte zya kwe Yehova na kwe Leza wino tukapepa. (Inta. 3:21) Vino Amawaliko yakalanda pa mizwalile ni misakuliile vikalanjizya ukuti e Yehova wino wayana ukuteka iyulu ni nsi wawikako vino awantu wakwe wazipizile ukukonka pa mizwalile ni misakulile. Fwandi pano tukupingula pa mizwalile ni misakulile, tutazipizile twakwelenganya vye pe vino tukulonda swe weneco lelo tuzipizile twakwelenganya na pe vino vingasecelesya Tatakulu e Yehova.

³ Mu Masundo yano Leza wapile awina Israeli, wawanenile vino wazipizile wakonka pa kuti watati wawa ni misango imiwipe yino inko zinji zyakweti. Amasundo yalanjizizye ukuti e Yehova wapata ivizwalo ivyakuti wumwi nga azwite mutanga mumumanye nga amonsi nanti amwanaci. (Wazyani Amasundo 22:5.) Vino e Leza watunena pa mizwalile vikalanjizya ukuti asilonda ivizwalo vino vikalenga awonsi waloleka ngati awanaci nanti awanaci waloleka ngati awonsi, nanti ivizwalo vyakuti umuntu ndi azwite mutanga mumumanye nga amonsi nanti amwanaci.

⁴ Mwe Baibolo mwawa ivisinka vya masundo vino vikatwavwa pakuti twasola icete ivizwalo. Vyo-o ivisinka vikatwavwa asa mulandu ni nsi kuno tukakwikala, intambi zino tukakonka nanti vino kuno twikala kwawa nampo nga kwalungula nanti kwatalala. E Baibolo yitalanda vyonsinye pa vizwalo ivilekane lekane vino tuzipizile ukuzwala na vino tutazipizile ukuzwala, lelo mwawa ivisinka vya masundo vino vikatwavwa pano tukusola ivyakuzwala. Katulande pa visinka vya masundo vino vingatwavwa ukusolapo ukucita ‘icizima, icipocelelwe swinya icipwililike’ pano tukusola vino tukulonda ukuzwala.​—Rom. 12:1, 2.

⁵ Umutumwa Paulo walanjizizye ukuti amazwi yano yawa pe 2 Wakorinte 6:4 yacindama. (Wazyani.) Vino tukaloleka vikalanjizya vino twawa. Pa mulandu wa kuti awantu wakalola vye “umuwili kulonde kutupu,” wangalanda pe sweswe ukulingana na vino tukuloleka. (1 Sam. 16:7) Fwandi pa mulandu wakuti swe wawomvi wa kwe Leza, twamanya ukuti tutazipizile twazwala vino swe weneco tukunzile. Nga tukukonka vino Baibolo ikalanda pa mizwalile, tutaliwazwala ivizwalo ivileme ku muwili, iviwalale nanti vino vingalenga umuntu atalike ukwelenganya pakucita uwuzelele. Fwandi tutazipizile ukuzwala ivizwalo vino vikulanjizya ivilundwa vya wukwasi nanti vino vikulanjizya vyonsinye. Citanga cizipe ukuzwala ivizwalo vino vingalenga wanji ndi watulola, awalozye vye kunji.

⁶ Nga tukuzwala icete, ni misakulile yitu yili icete, awantu wakatucindika swinya wakalola ukuti swe wawomvi wa kwe Tatakulu e Yehova. Wakavwamba nu kutalika ukumupepa. Swinya nga tukuzwala icete awantu wakacindika iwungwe litu. Co-o cikalenga wateyelezya kwi landwe lizima.

⁷ Nga tukuzwala ivya mucinzi lyo tukulanjizya ukuti twacindika Yehova, awanawitu, na wantu wano wakawika amano kwi lyasi ilizima, tukalanjizya nukuti twacindika ilandwe lizima lino tukawizya lino likalenga e Yehova ukucindikwa. (Rom. 13:8-10) Tuzipizile twazwala icete, maka maka papo pano tukulongana na pano tukuwizya. Tuzipizile ukuzwala mu nzila yino ‘yayana [awantu] wano wakati watiina Leza.’ (1 Tim. 2:10) Kweni ivizwalo vino wanji wangalola ukuti vyawa icetenye, pamwi ku ncende yinji asa vino wakavilola. Fwandi awantu wa kwe Yehova insi yonsinye wakakwelenganya na pa ntambi zino awantu wakakonka ku ncende kuno wikalila pakuti watati wazwala vino vingapunuzya wanji.

⁸ Wazyani 1 Wakorinte 10:31. Pano tuli pa kulongana kwa muputule nanti ukwa citungu, tuzipizile twazwala ivizwalo iviyane swinya ivya mucinzi. Tutazipizile ukuzwala ivizwalo vino vikalanjizya umuzimu wansi. Swinya tuzipizile tuwazwala icete na pansizi yakulongana cila wanda pano tukunyocela kuno tuficilizile. Nga tukuzwala icete tutanga twakwivwa insoni zyakuyimanyisya ukuti swe Nte zya kwe Yehova, swinya tungawizya ilyasi ilizima ku wali wonsinye wano tungasunkanya.

⁹ Wazyani Wafilipi 2:4. Amulandu ci wuno awina Klistu wazipile wawicila amano pe vino imizwalile yawo ikukuma wakapepa wawuye? Umulandu wa kutalicilapo awakuti, awantu wa kwe Leza wakawombesya ukukonka amazwi yano yakati: “Achaleka fwandi, mule muwakoma ukulonda konsi ukwamunsi kuno kuli mwakwe mwemwe, uwuzelele, ikombezya, ichilaka chiwipe [inyengwa].” (Kol. 3:2, 5) Fwandi tutazipizile tuwazwala ivizwalo vino vingalenga awanawitu na wankazi cawawomela ukukonka ko-o ukusunda. Awanawitu wano waleka ukucita uwuzelele ncepamwi wangalanga wakalwisya ukuleka imisango imiwipe. (1 Kor. 6:9, 10) Acino tutazipizile ukucita vino vingalenga cawawomela ukulwisya imisango imiwipe.

¹⁰ Pano tuli na wanawitu pa kulongana na pano tukwizizya nawo ponga, tuzipzile twazwala icete pakuti iwungwe lyawa ilya wusaka. Kweni twawa ni nsambu zyakuyisolela vino tukulonda ukuzwala. Naponye, swensinye tuzipizile twazwala ivya mucinzia vino vingalenga awanawitu watwalilile ukuwa awasanguluke nukuwa awatele mwe vino wakakwelenganya, mwe vino wakalanda nukucita. (1 Pet. 1:15, 16) Mu lukundo mutawa ‘ukucita vino vitayana, mutawa ukucita ivya kuyisecelesya.’​—1 Kor. 13:4, 5.

¹¹ Pano awawomvi wa kwe Leza wakusola vino wandi wazwale, wakakwizuka ukuti ‘kwawa impindi iya kupingula umulandu wonsinye nu mulimo wonsinye.’ (Eka. 3:1, 17) Kweni tukazwala ukulingana ni miceele, imikalile yitu ni ncende yino tulipo. Lelo vino Yehova watunena pa mizwalile visipiluka.​—Mal. 3:6.

¹² Nga kulungwile, cikatala ukuzwala ivya mucinzi. Lelo naponye, awanawitu wakakunda nkaninye nga cakuti tusakuzwala ivizwalo ivileme ku muwili nanti ivikulu nanti iviwalale. (Job 31:1) Swinya nga twaya mukwizya mu mbali ye sumbi nanti nga twaya mukucowa mu ciziwa, tuzipizile ukuzwala ivya mucinzi. (Imilu. 11:2, 20) Nanti acakuti awantu awavule wakazwala vye utwamukasi pakucowa, swe wawomvi wa kwe Yehova tuzipizile ukuzwala vino vingacindika e Leza witu umutele.

¹³ Swinya pano tukusola ivya kuzwala, tuzipizile twakwelenganya na pa kwe wakampingu wa kwe wanji, nampo wano tukwelenganyapo awanawitu nanti awe. (Wazyani 1 Wakorinte 10:32, 33.) Tuzipizile twawika sana amano kwe vino tukazwala pakuti tutapunuzya wanji. E Paulo walemvile ukuti: “Ukuwa, ndiwilamuntu awasechelesya umwinisi, alyakuti amusimpisya mwisuwilo.” Walemvile nu mulandu wuno walandizile wo-o, watili: “Amuno ne Klistu-nye atayisechelesizye umwenecho wenga.” (Rom. 15:2, 3) Ukwasowa nu kuvwilika e Yesu atacitanga ivya kuyisecelesya umweneco, lelo wawisile sana amano kukwavwilizya awantu nu kucita ukulonda kwa kwe Leza. Nasweswenye tutandi tuwazwala ivizwalo pa mulandu vye wakuti twavikunda lelo vino vingalenga awantu wakana ukwivwa kwi lyasi ilizima lino tukawizya.

¹⁴ Awakwasi awina Klistu wawa nu mulimo wakusambilizya awana wawo ukukonka ivisinka vya masundo ya mu Baibolo. Imizwalile ni misakulile ya wakwasi ni ya wana izipizile yasecelesya Yehova. (Imilu. 22:6; 27:11) Awakwasi wangasambilizya awana ukucindika e Leza umutele wino tukapepa nga cakuti wakucita vino vikulanjizya ukuti wamucindika swinya nga wali nu lukundo pano wakuwasunda. Wazipizile walanjizya wana wawo kuno wangakala ivizwalo vya mucinzi ivya kuti nga wazwala awantu watalike nukucindika Yehova.

¹⁵ E Leza watunena ivya kukonka mwi Zwi lyakwe pakuti tuwasola icete ivyakuzwala vino vingalenga acindikwe. Lelo naponye, swensinye tukayisolela ivyakuzwala vino tukulonda. Ivizwalo vino tukakunda na vino tungakala vikalingana ni ndalama zino tukweti swinya visiwa icili conga. Nanti ciwe wo-o, ivizwalo vitu vizipizile vyaloleka icete, ivya wusaka, ivya mucinzi swinya vino viyine na vino tukucita ni cifulo cino tuwezilepo, swinya vino vitange vipunuzye wanji.

¹⁶ Kweni asa we lyonsi pano cikapepuka ukupingula icete pa vintu. Ivyakuzwala ivivule vino wakakazya ya-a amanda avyovyo vino vikalema ku muwili, fwandi pakuti tuzanenye ivyakuzwala ivya mucinzi, tuzipizile ukuwikako amano nukutekanya sana. Awanawitu nga walola ukuti twawika amano ku kusola ivizwalo iviyane, waliwatusalifya. Swinya insansa zino tukazana nga tukuzwala ivizwalo vino vikalenga e Umukwasi witu uwa kwi yulu ukucindikwa, zikalusya na pe vino tukacula pakuzana ivizwalo iviyane.

¹⁷ Uzye awanawitu wazipizile ukutenjela icilezu? Mu Masundo ya kwe Musa, e Yehova wazumilizizye awonsi ukutenjela icilezu. Lelo awina Klistu ya-a amanda wasikonka Amasundo ya kwe Musa. (Lev. 19:27; 21:5; Gal. 3:24, 25) Mu ncende zimwi, cawa icetenye ukutenjela icilezu nga cakuti apezile icete swinya cisakulenga awantu wakana ukwivwa kwi lyasi ilizima. Awonsi wamwi wano wakawomba imilimo yimwi mwi wungwe, wakatenjela icilezu. Naponye awanawitu wamwi wakasolapo ukukanatenjela icilezu. (1 Kor. 8:9, 13; 10:32) Mu nsi zimwi wano wakakwikala mwe zyo-o incende wasitenjela icilezu. Na wina Klistunye wano wikala mwe zyo-o incende wasitenjela ivilezu. Umwanawitu ndi watenjela ivilezu, awantu watanga wacindika Leza amuno lyo imizwalile ni misakulile yakwe yitawa icete swinya lyo atunzilwe akawi.​—Rom. 15:1-3; 1 Tim. 3:2, 7.

¹⁸ Tukasalifya nkaninye amuno e Yehova atatunena ivyakukonka vyonsinye pa mizwalile ni misakulile. Lelo watupa uwuntungwa wakuyisolela vino tukulonda, ukuwomvya ivisinka vya masundo ya mu Baibolo. Fwandi mu mizwalile ni misakulile yitu, tungalanjizya ukuti tukalonda ‘tuwayichefya mbali nukutontela Leza.’​—Mik. 6:8.

¹⁹ Tukalanjizya ukuti twayicefya nga tukonka vino e Yehova umutele akatunena amuno awino tukalonda awatutungulula. Swinya nga twayicefya tuliwacindika vino wanji wakalola na vino wakayivwa pa vintu. Fwandi nga tukukonka vino e Yehova akalonda, swinya tukwelenganya na pa kampingu we wanji, lyo ‘tukuyicefya mbali nukutontela Leza.’

²⁰ Vino tukazwala vitazipizile ukulenga awantu wavwilika nga cakuti swe wawomvi wa kwe Leza nanti awe. Awanawitu na wantu vye wanji wazipizile walola ukuti molimonye swe wawomvi wa kwe Leza umutele. E Leza watunena ivya kukonka swinya tukakunda ukuvikonka. Tukasalifya nkaninye awanawitu wano wakazwala icete, wano wakacita vino vikalenga awantu wasambilile icisinka. Wakacindika Yehova swinya wakacita vino vingamusecelesya. Nga tukusola icete ivyakuzwala, tukatwalilila ukucindika Yehova wino wazwala “ivyawulali nuwukankala.”​—Amalu. 104:1, 2.