1, 2. Omolwashike Oonzapo dhaJehova hadhi vulika komithikampango dha dhenga mbanda dhi nasha nokuzala? (Tala kethano lyopetameko.)

OLOPOTA ya gandjwa koshifokundaneki shaHolanda yi nasha nokugongala kwaawiliki yoongeleki, oya ti: “Oto mono aantu ya zala omizalo dhakwalukehe, unene tuu ngele ku na uupyu.” Osha ti wo kutya: “Oshinima shoka ito shi mono mo mOonzapo dhaJehova, uuna ye li poshigongi. . . . Aamati naasamane ohaya kala ya zala ooshuta nootaye, omanga aakadhona noomeme ohaya kala ya zala oohulukweya oonde . . . tadhi monika nawa nodhi li pashinanena.” Eeno shili, Oonzapo dhaJehova odhi shi okupandulwa, sho hadhi ‘dhiladhila nawa kombinga yomizalo dhawo, naasho hadhi zala oonguwo dhi shi okutalwa nodha yogoka, ngaashi sho opalela ooitaali.’ (1 Tim. 2:9, 10) Nonando omuyapostoli Paulus okwa li ta popi u ukitha kaakiintu, ekotampango ndika otali longo wo nokaalumentu Aakriste.

² Omithikampango dha dhenga mbanda dhi nasha nokuzala, odha simana kutse tu li aapiya yaJehova nokuKalunga ngoka hatu longele. (Gen. 3:21) Shoka Omanyolo taga ti kombinga yokuzala nokwiiyopaleka, otashi tu ulukile kutya Omupangeli gweshito alihe oku na omithikampango omiwanawa kombinga yomizalo dhaalongeli ye yashili. Onkee ano, uuna tatu hogolola nkene tu na okuzala nokwiiyopaleka, inatu kala owala twi ikolelela kwaashoka tashi tu opalele. Pehala lyaashono, otu na  wo okukaleka momadhiladhilo shoka tashi nyanyudha Omuwa Omupangeliawike, Jehova.

3. MOmpango ndjoka Kalunga a li a pa Aaisraeli, otatu ilongo mo shike kombinga yomizalo?

³ Pashiholelwa, mOmpango yaKalunga ndjoka a pe Aaisraeli omwa li oompango ndhoka tadhi ya gamene, opo kaaya landule omikalondjigilile inaadhi yogoka dhiigwana mbyoka ye ya kundukidha. Ompango oya li yu ulike kutya Jehova iha nyanyukilwa omizalo ndhoka itaadhi gandja eyooloko lya yela pokati komulumentu nomukiintu; shoka kunena hashi ithanwa oonguwo dhomashenge. (Lesha Deuteronomium 22:5.) Okutala kwaashoka Kalunga a popi kombinga yoonguwo, otu wete lela kutya Kalunga iha nyanyudhwa komizalo ndhoka hadhi ningitha aalumentu ya kale taya monika ya fa aakiintu, naandhoka hadhi ningitha aakiintu ya kale taya monika ya fa aalumentu. Iha nyanyukilwa wo omizalo ndhoka tadhi shi ningitha oshidhigu okumona eyooloko pokati kaalumentu naakiintu.

4. Oshike tashi vulu okukwathela Aakriste ya ninge omatokolo omawanawa kombinga yomizalo?

⁴ MOmbiimbeli omu na omakotampango ngoka taga kwathele Aakriste ya ninge omatokolo gomondjila kombinga yankene ye na okuzala. Oye na oku ga landula kutya nduno ohaya kala peni, omuthigululwakalo gwawo ogwa tya ngiini nenge onkalo yombepo oyi li ngiini. Inatu pumbwa omusholondondo gwokondandalunde ngoka tagu popi omukalo gwokuzala ngoka gwa taambiwa ko naangoka gwa puka. Pehala lyaashono, ohatu wilikwa komakotampango gopamanyolo ngoka hage tu kwathele miinima yopaumwene. Natu taleni komakotampango gamwe gOmbiimbeli ngoka taga vulu oku tu kwathela tu ‘tseye ehalo lyaKalunga naashoka oshiwanawa, she mu opalela nosha gwana,’ uuna tatu hogolola shoka tu na okuzala. — Rom. 12:1, 2.

5, 6. Omizalo dhetu odhi na okuguma aantu ngiini?

⁵ Omuyapostoli Paulus okwa li a nwethwa mo, a tse omuthindo esimano lyekotampango ndyoka li li mAakorinto aatiyali 6:4. (Lesha.) Eholokopo lyetu lyokombanda ohali holola kutya tse aantu ya tya ngiini. Aantu oyendji ohaya “tala kombanda,” e taya mono kutya otwa tya ngiini. (1 Sam. 16:7) Tu li aayakuli yaKalunga otu shi shi kutya uuna tatu zala, ihatu hogolola owala omizalo ndhoka tu hole. Omithikampango ndhoka twi ilonga mOmbiimbeli odhi na oku tu kwathela tu yande oonguwo ndhoka dha ponda kolutu, tadhi imonikila nenge tadhi pendutha omahalo gokuya momilalo. Shoka otashi ke tu kwathela twaa zale oonguwo ndhoka tadhi ulike iilyo yomalutu getu. Inatu ningitha aantu ya kale inaaya manguluka oku tu tala nenge tu ya thiminike ya punguluke, omolwomukalo ngoka twa zala.

⁶ Uuna twa yela, tatu monika nawa, twa zala oonguwo dhi li nawa notwi iyopaleka nawa, aantu otaya ka kala lela ye tu simaneka tu li aayakuli yOmuwa Omupangeliawike, Jehova. Otaya vulu wo okunanenwa kuKalunga ngoka hatu longele. Oshikwawo, okuzala oonguwo tadhi opalele, ohaku gandja edhina ewanawa kehangano lyetu. Oshizemo, aantu oyendji ohaya kala ya hala okupulakena ketumwalaka lyetu ndyoka tali hupitha oomwenyo.

7, 8. Uunake twa pumbwa unene okuzala oonguwo tadhi opalele?

⁷ Otu na ongunga yokuzala oonguwo ndhoka tadhi simanekitha etumwalaka ndyoka tatu uvitha noyokusimanekitha Jehova. Ongunga ndjoka otu yi nine Kalunga ketu omuyapuki, aamwatate naamwameme yopambepo nosho wo aantu mboka hatu uvithile moshitopolwa shetu. (Rom. 13:8-10) Shika ohatu shi ningi unene tuu uuna twi ipyakidhila niinima yopaKriste, ngaashi uuna tu li pokugongala nenge uuna tatu uvitha. Otu na okuzala ‘ngaashi sho opalela ooitaali’ nenge aakriste. (1 Tim. 2:10) Odhoshili kutya opu na oonguwo dhimwe ndhoka tadhi opalele pomahala gamwe, ihe pugamwe itadhi opalele. Onkee ano, aapiya yaJehova muuyuni awuhe, ohaya kaleke momadhiladhilo omikalondjigilile dhomomidhingoloko  moka ye li, opo kaaya zale momukalo ngoka tagu uvitha nayi aantu.

⁸ Lesha 1 Aakorinto 10:31. Uuna tu li piigongi, okuzala kwetu oku na okukala taku opalele notaku monika nawa, pehala lyokukala twa zala ngaashi aantu taya zala apuhe muuyuni. Uuna tu li mohotela nenge tatu zi mo, nenge uuna tatu nyanyukilwa pamwe manga oshigongi inaashi tameka nokonima ngele sha piti mo, otwa hala okuyanda okuzala oonguwo itaadhi monika nawa. Kungawo, otatu ka kala twa manguluka okuulika kutya tse Oonzapo dhaJehova notatu ka kala twa manguluka okugandja uunzapo, uuna twa mona ompito yoku shi ninga.

9, 10. Aafilippi 2:4 otayi tu lombwele shike kombinga yokuzala?

⁹ Lesha Aafilippi 2:4. Omolwashike Aakriste ye na okukaleka momadhiladhilo nkene okuzala kwawo haku gumu aakriste ooyakwawo? Etompelo lyotango olyo kutya aapiya yaJehova ohaya longo nuudhiginini, ya tule miilonga shoka Ombiimbeli tayi tu kumagidha tayi ti: ‘Dhipageni ano uuhalu weni wopavi mboka tau longo mune ngashika oluhondelo, iipala nuuholume.’ (Kol. 3:2, 5) Inatu hala tu shi ninge oshidhigu kooitaali ooyakwetu ya tule miilonga omayele ngoka. Aamwatate naamwameme mboka ye etha po onkalamwenyo inaayi yogoka, otashi vulika taya kondjo natango negamo lyokuyona. (1 Kor. 6:9, 10) Onkee ano, inatu hala tu ya ningithe ya kale taya kondjo nuudhigu.

¹⁰ Uuna tu li naamwatate naamwameme, omikalo dhetu dhokuzala odhi na okuninga egongalo ehala lya yogoka. Osho shi na okukala ngaaka kutya nduno otu li pokugongala nenge opomahala gamwe gi ili. Otu na emanguluko lyokuhogolola shoka twa hala okuzala. Nonando ongawo, atuheni otu na oshinakugwanithwa shokuzala oonguwo  ndhoka tadhi shi ningitha oshipu kuyalwe, opo ya kale ya yogoka nokukaleka po omithikampango dhaKalunga dhuuyapuki moohapu, meihumbato nosho wo momadhiladhilo. (1 Pet. 1:15, 16) Ohole yashili “ihayi holoka nayi, ihayi kongo shayo yene.” — 1 Kor. 13:4, 5.

11, 12. Oshike tu na okukaleka momadhiladhilo, uuna tatu hogolola shoka tu na okuzala?

¹¹ Uuna aapiya yaKalunga taya hogolola shoka ye na okuzala, ohaya kaleke momadhiladhilo kutya “oku na ethimbo lyoshinima kehe nolyoshilonga kehe.” (Omuuv. 3:1, 17) Oshi shi okuuviwa ko kutya elunduluko lyonkalo yombepo nosho wo elunduluko lyomathimbo otali vulu okunwetha mo shoka hatu zala. Okuzala kwetu otaku vulu wo okunwethwa mo koonkalo dha yoolokathana. Nonando ongaaka, omithikampango dhaJehova ihadhi lundululwa nando konkalo yombepo. — Mal. 3:6.

¹² Pethimbo lyuupyu, otashi vulika shi kale oshidhigu okuzala omizalo ndhoka tadhi opalele, tadhi monika nawa notadhi ulike kutya otwe dhi hogolola pandunge. Aamwatate naamwameme ohaye shi pandula, uuna tatu yanda okuzala oonguwo ndhoka dha ponda nenge oonene notadhi imonikila. (Job 31:1) Oshikwawo, uuna tatu thuwa po pooha dhefuta nenge tu li pokandama kokumbwinda, oonguwo dhetu dhokumbwinda nadhi kale tadhi opalele. (Omayel. 11:2, 20) Nonando aantu oyendji muuyuni otaya zala oonguwo dhokumbwinda tadhi imonikila, tse tu li aalongeli yaJehova otu na okukaleka aluhe momadhiladhilo kutya otu na okusimanekitha Kalunga ketu omuyapuki ngoka tu hole.

13. Omolwashike tu na okulandula omayele ngoka ge li mAakorinto yotango 10:32, 33, uuna tatu hogolola shoka tu na okuzala?

¹³ Opu na natango ekotampango limwe lya simana, ndyoka tali vulu oku tu kwathela tu hogolole omizalo ndhoka tadhi opalele. Otu na okudhiladhila kombinga yomaiyuvo gayalwe kutya nduno ogooitaali ooyakwetu nenge ogaantu yalwe. (Lesha 1 Aakorinto 10:32, 33.) Otu na okukala tu wete kutya osha simana noonkondo, tu dhiginine oshinakugwanithwa shetu shokuyanda oonguwo ndhoka tadhi uvitha nayi yalwe. Omuyapostoli Paulus okwa nyola a ti: “Kehe gumwe gwomutse no opalele mukwawo omoluuwanawa wamukwawo ngoka noku mu kokitha meitaalo.” Okwa gwedha ko a ti: “Oshoka Kristus ini iyopalela ye mwene.” (Rom. 15:2, 3) Jesus okwa li a pititha komeho okukwathela yalwe shi vulithe okuninga shoka a hala. Kungawo, okwa li a vulu okulonga ehalo lyaKalunga. Onkee ano, otatu ke etha po iinima nenge omizalo dhontumba ndhoka tu hole, oshoka otadhi ningitha aantu mboka hatu uvithile ya kale inaaya hala okupulakena ketumwalaka lyetu.

14. Ongiini aavali taya vulu okudheula oyana ya simanekithe Kalunga nokuzala kwawo?

¹⁴ Aavali oye na oshinakugwanithwa shokulonga aanegumbo yawo ya tule miilonga omakotampango gopaMbiimbeli. Oye na okushilipaleka kutya yo nosho wo oyana otaya kambadhala okunyanyudha omutima gwaJehova mokukala taya zala notaya iyopaleke mokukalo omwaanawa. (Omayel. 22:6; 27:11) Aavali oye na okuthindila momaluvalo gawo esimaneko lyokusimaneka Kalunga omuyapuki ngoka haya longele, moku ya tulila po oshiholelwa oshiwanawa nomokukala haye ya pe omayele omawanawa nogopahole. Ohashi kala oshiwanawa aavali ya longe oyana kutya openi nongiini taya vulu okulanda oonguwo oombwanawa. Aanona kaye na owala okuhogolola shoka ya hala okuzala, ihe oye na wo okutala kutya omizalo dhawo otadhi ya kwathele ngaa ya vule okuulika kutya oye li aakalelipo yaJehova Kalunga.

15. Oshike tashi tu kwathele tu ninge omatokolo gomondjila sho tatu hogolola omizalo?

¹⁵ Ombiimbeli oyi na omayele ngoka taga vulu oku tu kwathela tu ninge omatokolo gopandunge ngoka taga ka simanekitha Kalunga. Ihe shoka hatu zala ohashi ulike kutya otu hole shike. Aantu  otu hole iinima ya yoolokathana niiniwe yetu kayi thike pamwe. Ihe nonando ongaaka, omizalo dhetu odhi na aluhe okukala dha yela, dho opala, tadhi monika nawa, tadhi opalele ehala mpoka tu li nodha taambiwa ko momidhingoloko dhetu.

16. Omolwashike oonkambadhala ndhoka hatu ningi, opo tu zale oonguwo tadhi opalele dha simana?

¹⁶ Otu na okuzimina kutya haaluhe oshipu okuninga omatokolo gopandunge noga dhiladhilwa nawa. Oositola odhindji ohadhi landitha oonguwo ndhoka dhi holike apuhe muuyuni. Onkee ano, otashi vulika shi kuthe ethimbo noonkambadhala wu mone ohulukweya nohema ndjoka tayi opalele nenge oshuta nombulukweya ndjoka yi li nawa. Aamwatate naamwameme otaya ka mona oonkambadhala ndhoka to ningi wu zale oonguwo ndhoka oombwanawa notadhi opalele. Otaye ke shi pandula wo. Enyanyu ndyoka hatu mono sho tatu simanekitha Tate yetu omunahole, oli vule omaiyambo ngoka hatu ningi, opo tu zale oonguwo ndhoka tadhi mu simanekitha.

17. Oshike tashi vulu okukwathela omumwatate a mone ngele oku na okukala e na oombenzi nenge hasho?

¹⁷ Mbela osho opala komumwatate a kale e na oombenzi? Ompango yaMoses oya li ya popi kutya aalumentu oye na okukala ye na oombenzi. Ihe Aakriste kunena kaye li we kohi yOmpango, yo inaya pumbwa oku yi landula. (Lev. 19:27; 21:5; Gal. 3:24, 25) Momithigululwakalo dhimwe, osha taambiwa ko okukala wu na oombenzi dha kululwa nawa nohashi gandja esimaneko. Ihashi ningitha nando aantu ya kale inaaya hala okupulakena ketumwalaka lyetu. Aamwatate mboka haya kwatele komeho megongalo nayo oye na oombenzi. Nonando ongaaka, aamwatate yamwe otashi vulika ya tokole ya kale kaaye dhi na. (1 Kor. 8:9, 13; 10:32) Momithigululwakalo dhilwe nenge pomahala galwe, oombenzi inadhi taambiwa ko, naauvithi Aakriste inaya pitikwa okukala ye dhi na. Ngele omumwatate oku dhi na nokuli, kungawo ita simanekitha Kalunga mokuzala kwe nomokwiiyopaleka kwe. Ota kala wo e na oshipo. — Rom. 15:1-3; 1 Tim. 3:2, 7.

18, 19. Mika 6:8 otayi tu kwathele ngiini sho tatu kambadhala okushilipaleka kutya okuzala kwetu okwa hokiwa kuKalunga?

¹⁸ Otwa pandula sho Jehova inee tu tulila po omusholondondo gwoompango dhokondandalunde dhankene tu na okuzala nokwiiyopaleka. Pehala lyaashono, okwe etha tu longithe emanguluko lyetu lyokuninga omatokolo nosho wo oondunge dhetu, opo tu ninge omatokolo gopaumwene, taga wilikwa komakotampango gopaMbiimbeli. Kungawo, okupitila mokuzala kwetu nomokwiiyopaleka kwetu, otatu vulu okuulika kutya otwa hala ‘okukala muukumwe nomeifupipiko naKalunga ketu.’ — Mika 6:8.

¹⁹ Eifupipiko olya kwatela mo okuzimina kutya Jehova omuyogoki nomuyapuki nosho wo kutya omithikampango dhe otadhi tu pe ewiliko lya dhenga mbanda. Olya kwatela mo wo okukala hatu simaneke omaiyuvo gayalwe nosho wo omataloko gawo. Onkee ano, ohatu ‘kala muukumwe nomeifupipiko naKalunga ketu’ mokukala hatu vulika komakotampango ge ga dhenga mbanda nomokuulika kutya otwa simaneka omaiyuvo gayalwe.

20. Okuzala nokwiiyopaleka kwetu oku na okuguma ngiini yalwe?

²⁰ Omukalo gwetu gwokuzala inagu ningitha aantu ya thike pehulithodhiladhilo lilwe, kaali shi ndyoka kutya tse aalongeli yaJehova. Aamwatate naamwameme nosho wo aantu yalwe naya kale ye wete lela kutya otu li aakalelipo yaKalunga ketu omuyuuki. Oku na omithikampango dha dhenga mbanda nohatu kambadhala okuvulika kudho nenyanyu. Ohatu pandula aamwatate naamwameme mboka eholokopo neihumbato lyawo ewanawa lya nana aanamitima omiwanawa ya pulakene ketumwalaka lyOmbiimbeli, ndyoka tali hupitha oomwenyo. Shoka ohashi ya kwathele ya simanekithe Jehova noye mu nyanyudhe. Okuninga omatokolo gopandunge ge na ko nasha nomizalo dhetu otaku ka tsikila okusimanekitha ngoka i izaleka “esimano neadhimo.” — Eps. 104:1, 2.