1, 2. Why nao Olketa Jehovah’s Witness werem kaleko wea showimaot respect? (Lukim piksa long start bilong study.)

WANFALA niuspepa long Netherlands story abaotem kaleko wea olketa bigman bilong church werem long wanfala meeting bilong olketa. Hem sei: “Staka bigman hia werem kaleko wea no fitim and wea no showimaot respect, especially long taem wea weather hem hot.” Bat datfala sem niuspepa hem sei Olketa Jehovah’s Witness barava difren taem olketa go long convention bilong olketa. Olketa boy and olketa man werem jacket and nektae, and olketa gele and woman werem olketa longfala skirt wea luk naes. Staka taem pipol savve tok hae abaotem hao Olketa Jehovah’s Witness werem kaleko. Aposol Paul sei olketa Christian shud werem kaleko wea “showimaot respect and gudfala tingting” wea fitim pipol wea worshipim God. (1 Tim. 2:9, 10) Nomata aposol Paul story for olketa sista long kongregeson, disfala principle hem fitim tu olketa brata.

² Kaleko wea showimaot respect hem important long iumi, and hem important tu long God wea iumi worshipim. (Gen. 3:21) Wanem Bible storyim saed long kaleko and lukluk showimaot Jehovah, wea hem rulim full universe, hem garem standard for  pipol bilong hem saed long datwan. So kaleko wea iumi disaed for werem shud no followim nomoa tingting bilong iumiseleva bat hem shud followim olketa standard bilong Jehovah.

3. Wanem nao iumi lanem from Law bilong Moses abaotem tingting bilong Jehovah saed long kaleko?

³ Law bilong Moses garem olketa rul wea protectim olketa Israelite from olketa barava nogud wei bilong pipol wea stap raonem olketa. Datfala Law showimaot Jehovah hem barava heitim wei wea man werem kaleko bilong woman and woman werem kaleko bilong man. Staka distaem tu duim semkaen samting. (Readim Deuteronomy 22:5.) Law bilong Moses helpem iumi for luksavve Jehovah heitim wei for eniwan werem kaleko wea mekem hem hard for luksavve sapos hem man or hem woman.

4. Wanem nao savve helpem olketa Christian for mekem olketa gudfala disison saed long kaleko?

⁴ Olketa Bible principle savve helpem iumi for mekem olketa gudfala disison saed long kaleko wea iumi werem. Iumi savve followim olketa principle hia nomata wanem kantri iumi stap long hem or culture bilong iumi. Iumi no needim wanfala long list for talem iumi kaleko wea fitim and no fitim, bat wei for followim olketa Bible principle savve helpem iumi for chusim kaleko wea iumi laekem and wea God bae hapi long hem. Distaem bae iumi storyim samfala Bible principle wea savve helpem iumi for luksavve long “samting wea God laekem iumi for duim” taem iumi chusim kaleko for werem.—Rome 12:1, 2.

5, 6. Storyim hao kaleko wea iumi werem savve affectim olketa narawan.

⁵ Aposol Paul storyim wanfala important principle long 2 Corinth 6:4. (Readim.) Kaleko iumi werem and lukluk bilong iumi hem mekem pipol luksavve wanem kaen man nao iumi. (1 Sam. 16:7) From iumi pipol bilong God, iumi luksavve hem important for iumi mekem wise disison long kaleko wea iumi chus for werem. Taem iumi followim olketa Bible principle, datwan shud helpem iumi for no werem kaleko wea barava taet, showim body, or mekem narawan garem rong tingting. Diswan minim iumi no werem kaleko wea sheipim private part or wea showim susu. Kaleko wea iumi werem shud no mekem narawan feel nogud or for stambol.

⁶ Taem kaleko wea iumi werem hem klin and showimaot respect, pipol bae luksavve iumi worshipim Jehovah, wea hem Lord bilong evri samting, and olketa bae respectim iumi. And tu, maet datwan mekem olketa laek for savve long Jehovah, tinghae long organization bilong iumi, and willing for lisin long iumi taem iumi preach long olketa.

7, 8. Wanem taem nao hem barava important for iumi werem kaleko wea showimaot respect?

⁷ Kaleko wea iumi werem bae mekem pipol praisem or tok spoelem God bilong iumi wea holy. And tu, hem savve affectim olketa brata and sista, and pipol long territory bilong iumi. Iumi laek for werem kaleko wea fitim gud nius wea iumi preach abaotem and wea mekhae long Jehovah. (Rome 13:8-10) Hem barava important for iumi werem kaleko wea showimaot respect taem iumi go long olketa meeting and duim preaching waka. Iumi shud werem kaleko ‘wea fitim pipol wea sei olketa worshipim God.’ (1 Tim. 2:10) Hem tru, samfala kaleko wea hem fitim for man werem long wanfala kantri, hem no fitim for man werem long narafala kantri. So nomata wea nao iumi stap, iumi Olketa Jehovah’s Witness  shud no werem kaleko wea bae mekem olketa narawan for stambol.

⁸ Readim 1 Corinth 10:31. Taem iumi go long olketa assembly and convention, iumi mas werem kaleko wea fitim and wea showimaot respect. Iumi shud no werem kaleko wea ova tumas and wea olsem pipol long world. Bifor iumi go long convention and bihaen long convention and taem iumi stap long accomodation bilong iumi, iumi shud werem kaleko wea fitim. Then bae iumi no hol bak for sei iumi Olketa Jehovah’s Witness, and bae iumi feel free for preach long eniwan wea iumi meetim.

9, 10. Hao nao Philippi 2:4 savve helpem iumi taem iumi chusim kaleko wea iumi werem?

⁹ Readim Philippi 2:4. Why nao iumi shud tingim feeling bilong olketa brata and sista bilong iumi taem iumi chusim kaleko for werem? Wanfala reason hem samting wea disfala scripture storyim. Hem sei: “Killim dae feeling bilong iufala for laek durong, for duim samting wea no klin, for ova tumas for laekem sex, for laekem tumas for duim nogud samting.” (Col. 3:2, 5) Bifor samfala brata and sista kam insaed long truth, laef bilong olketa hem olobaot and maet olketa stragol yet witim feeling for laek duim olketa nogud samting. Sapos iumi no keakea, kaleko wea iumi werem bae mekem hem barava hard long olketa for followim kaonsel long Bible for againstim datfala feeling. (1 Cor. 6:9, 10) Iumi no laek for spoelem tingting bilong olketa brata and sista bilong iumi wea stragol long diswan.

¹⁰ Kaleko wea iumi werem long olketa meeting or long olketa narataem wea iumi  stap witim olketa brata and sista bilong iumi hem savve helpem kongregeson for stap klin. Nomata iumiseleva savve chusim kaleko wea iumi laek for werem, iumi no laek for werem kaleko wea bae mekem narawan garem nogud tingting, talem nogud toktok, and duim eni samting wea God no hapi long hem. (1 Pet. 1:15, 16) Man wea garem love “hem evritaem showimaot respect, [and] no tingim hemseleva nomoa.”—1 Cor. 13:4, 5.

11, 12. Hao nao Ecclesiastes 3:1, 17 helpem iumi saed long kaleko wea iumi werem?

¹¹ Taem pipol bilong God disaedem wanem kaleko for werem, olketa luksavve “evri samting hem garem taem bilong hem.” (Eccl. 3:1, 17) Kaleko wea iumi werem hem depend long weather, ples wea iumi stap, and living bilong iumi. Nomata olsem, olketa standard bilong Jehovah hem no change.—Mal. 3:6.

¹² Sapos iumi stap long ples wea weather hem hot, maet iumi laek for werem kaleko wea mekem iumi no feel hot tumas, bat iumi shud werem kaleko wea fitim and wea showimaot respect. Olketa brata and sista bilong iumi bae hapi sapos iumi no werem kaleko wea taet tumas or wea big tumas. (Job 31:1) And tu, taem iumi swim long sea or long nara ples, kaleko wea iumi werem shud showimaot respect. (Prov. 11:2, 20) Nomata pipol long world werem kaleko for swim wea showim body bilong olketa, iumi laek for werem kaleko wea mekhae long God bilong iumi, Jehovah.

13. Hao nao kaonsel long 1 Corinth 10:32, 33 savve helpem iumi saed long kaleko wea iumi werem?

¹³ Iumi mas tingim narafala principle taem iumi chusim kaleko wea iumi bae werem. Iumi no laek for spoelem konsens bilong olketa narawan. (Readim 1 Corinth 10:32, 33.) Hem important for no werem kaleko wea mekem olketa brata and sista and olketa narawan for feel nogud. Aposol Paul sei: “Iumi evriwan mas duim samting wea helpem and strongim narawan.” Then hem talem why iumi mas duim olsem. Hem sei: “Christ tu bat no duim nomoa wanem hemseleva laekem.” (Rome 15:2, 3) Olsem Jesus iumi tu shud ting long wei for duim wanem God laekem and helpem olketa narawan olsem hem important winim wanem iumiseleva laekem. So iumi bae no werem kaleko wea iumiseleva laekem bat wea maet mekem pipol no laek for lisin long message wea iumi preach abaotem.

14. Hao nao dadi and mami savve teachim pikinini for mekhae long God saed long kaleko wea hem werem?

¹⁴ Hem responsibility bilong dadi and mami for teachim pikinini for savve hao for followim olketa Bible principle. From dadi and mami and olketa pikinini laek for mekem Jehovah hapi, bae olketa mek sure kaleko and lukluk bilong olketa hem showimaot respect. (Prov. 22:6; 27:11) Hao nao dadi and mami savve teachim pikinini for respectim God bilong iumi wea holy, and for followim olketa standard bilong hem? Dadi and mami shud showimaot gudfala example long diswan. And tufala shud teachim pikinini for savve long wea nao gudfala ples for baem kaleko and for chusim kaleko wea fitim. Olketa pikinini savve chusim kaleko wea olketa laekem, bat samting wea barava important nao, kaleko wea olketa chusim mas mekhae long Jehovah, God wea olketa worshipim.

15. Wanem nao iumi shud tingim saed long kaleko wea iumi werem?

¹⁵ Bible hem helpem iumi for mekem olketa gudfala disison wea bae mekhae long  God. Bat iumiseleva savve chusim kaleko wea iumi laek for werem. Iumi evriwan no semsem long wanem kaen kaleko iumi laek for werem and kaleko wea iumi chusim hem depend tu long selen wea iumi garem. Nomata olsem, kaleko wea iumi werem mas klin, showimaot respect, hem fitim samting wea iumi duim, and no mekem pipol for stambol.

16. Why nao hem gud for faendem kaleko wea showimaot respect?

¹⁶ Hem no isi for faendem kaleko wea fitim and wea showimaot respect. Staka stoa salem nomoa olketa niu stael bilong kaleko wea pipol long world laekem. So iumi mas traem best for faendem olketa skirt, dress, and blouse wea showimaot respect, or olketa shirt and longkwi wea no taet tumas. Olketa brata and sista bilong iumi bae tinghae long wei wea iumi traem best for werem kaleko wea luk naes and wea fitim. Iumi tu bae hapi taem iumi werem kaleko wea mekhae long Jehovah nomata maet iumi mas waka hard for faendem kaleko wea showimaot respect.

17. Wanem nao bae helpem wanfala brata for disaed sapos hem bae garem beard or nomoa?

¹⁷ Waswe, hem fitim for olketa brata garem beard? Law bilong Moses sei olketa man mas garem beard. Bat olketa Christian no stap anda long Law bilong Moses. (Lev. 19:27; 21:5; Gal. 3:24, 25) Long samfala kantri, olketa brata savve garem short beard wea luk neat. Pipol acceptim datwan, and tu, pipol long territory willing for lisin long olketa brata nomata olketa garem beard taem olketa duim ministry. Samfala elder and ministerial servant long olketa kantri hia garem beard. Nomata olsem, samfala brata long olketa kantri hia disaed for no garem beard. (1 Cor. 8:9, 13; 10:32) Long olketa nara kantri, olketa brata no garem beard bikos pipol no acceptim datwan. Sapos wanfala brata long olketa kantri olsem hem garem beard, maet datwan spoelem nem bilong God and bae hem no savve duim eni waka long kongregeson.—Rome 15:1-3; 1 Tim. 3:2, 7.

18, 19. Hao nao Micah 6:8 hem helpem iumi taem iumi disaedem wanem kaleko for werem?

¹⁸ Iumi hapi tumas Jehovah no givim wanfala long list abaotem wanem kaen kaleko and lukluk nao hem fitim and no fitim. Bat hem laekem iumi for followim olketa Bible principle for disaed long gudfala wei. So iumi showimaot iumi hambol taem iumi disaedem wanem kaen kaleko for werem and garem lukluk wea fitim olketa wea worshipim God.—Mic. 6:8.

¹⁹ Iumi luksavve Jehovah hem holy and hem klin and olketa standard bilong hem best wan for iumi followim. Sapos iumi hambol, bae iumi laek for followim olketa standard bilong hem, and bae iumi respectim olketa narawan long wei for tingim feeling and tingting bilong olketa.

20. Wanem nao pipol shud luksavve long hem taem olketa lukim kaleko wea iumi werem and lukluk bilong iumi?

²⁰ Taem pipol lukim kaleko wea iumi werem olketa shud luksavve iumi pipol wea worshipim Jehovah. Jehovah garem olketa hae standard saed long kaleko and iumi hapi for followim olketa standard hia. Olketa brata and sista wea werem kaleko wea showimaot respect and wea garem gudfala wei olketa fit for kasem praise. Olketa mekhae long Jehovah and mekem hem hapi. Taem pipol bilong Jehovah duim olketa samting hia, datwan savve mekem pipol wea garem gudfala heart for laek herem message long Bible. Taem iumi mekem olketa gudfala disison saed long kaleko wea iumi werem, iumi bae gohed for mekhae long Jehovah wea hem garem bigfala glory and hem nambawan.—Ps. 104:1, 2.