1, 2. Dahme kahrehda Sounkadehdehn Siohwa kan ahneki koasoandi konehng ehu ong likou? (Menlau kilang tepin kilel.)

 EHU doaropwehn nuhs en Netherland kawehwehda mwomwen ahn kaunen pelien lamalam kan ar likou nan ehu arail mihting ko. Nuhso nda: “Ke kilang me tohto likawih likou sohte lipilipil, ahpw mehlel ni ahnsou me karakar.” Ahpw, doaropwehn nuhso pil nda me met sohte kin wiawi ni mihting tohrohr en Sounkadehdehn Siohwa kan. Nuhso nda me ohl oh pwutak kan kin doadoahngki sekid oh nektait oh lih oh serepein kan kin doadoahngki urohs me reirei mwahu, ahpw sidail ko kapw. Aramas kin kalapw kapingahki mwomwen ahn Sounkadehdehn Siohwa kan ar likou. Wahnpoaron Pohl nda me Kristian kan anahne “tiahk mwahu oh kanahieng arail likou kan” nin duwen me konehng sapwellimen Koht ladu kan. (1 Tim. 2:9, 10) Mendahki Pohl kin koasokoasoia duwen lih akan, kaweid wet pil kohwong ohl Kristian kan.

² Mwomwen likou me konehng kitail en likawih kin kesempwal ong kitail nin duwen sapwellimen Siohwa aramas akan, oh e pil kesempwal ong Kohto me kitail kin kaudokiong. (Sen. 3:21) Paipel kasalehda ni sansal me Siohwa, Kaunen lahng oh sampah,  sapwellimanki koasoandi mwahu ong mwomwen likou de kapwat me e kupwurki sapwellime ladu kan en likawih. Eri dahme kitail kin pilada en likawih en dehr kohsang ihte dahme kitail mwahuki, ahpw kesempwalsang met, e anahne kaperenda atail Kaun Lapalapo Siohwa.

3. Dahme kitail kak sukuhlkihsang sapwellimen Koht Kosonnedo ong mehn Israel ko me pid likou?

³ Nan kosonned en Moseso, mie kosonned kan me pere mehn Israel ko sang wiewia inenen samin kan en wehi kan me kapilpene irail. Kosonnedo kasalehda me Siohwa ketin kalahdeki soangen likou me sohte kasalehda ni sansal wekpeseng en ahn ohl de lih. Rahnpwukat, aramas akan pil kin likou ni ahl wet. (Wadek Deuderonomi 22:5.) Sang Kosonnedo, kitail sukuhlki me Siohwa sohte kupwurki soangen likou me kahrehda ohl kan en mwomwen lih de lih kan en mwomwen ohl, de kahrehda e apwal en kasawihada ma e ohl de lih.

4. Dahme kak sewese Kristian kan en wiahda pilipil mwahu ong mwomwen arail likou?

⁴ Kaweid kan oh ire mehlel kan en Paipel kak sewese kitail en wiahda pilipil mwahu ong duwen mwomwen atail likou. Iren kaweid pwukat kin kadoadoahk sohte lipilipil wasa me kitail mi ie, de ma wasao lemwulemwur de soh de soangen tiahk dah me kitail ahneki. Kitail sohte anahne koasoandi ehu me kilelehdi dahme konehng de sohte konehng kitail en likawih. Kitail anahne idawehnte kaweid kan en Paipel, me pil kin mweidohng kitail en likawih likou me kitail mwahuki. Kitail pahn koasoiapene ekei kaweid kan oh ire mehlel kan en Paipel me kak sewese kitail esehda ‘dahme mwahu, oh dahme Koht kin ketin kupwurperenki, oh dahme unsek’ ni atail kin pilada dahme kitail pahn likawih.​—Rom 12:1, 2.

5, 6. Ia duwen atail likou kan ar pahn kamwakid meteikan?

⁵ Koht ketin doadoahngki wahnpoaron Pohl en kasalehda ire mehlel ehu me kileldi nan 2 Korint 6:4. (Wadek.) Mwomwatail kin kasalehda laud duwen kitail ong meteikan, oh aramas tohto pahn pein lemehda dahme re medewehki kitail. (1 Sam. 16:7) Pwehki kitail sapwellimen Koht ladu kei, kitail anahne wia laudsang en ihte doadoahngki likou me kitail kansenamwahuki de leliki. Ni atail idawehn kaweid en Paipel, e pahn sewese kitail en soikala likawih likou me it, kasalpaliwar, de kainangihada ineng suwed. Met wehwehki me kitail en dehr doadoahngki likou me kasalehda paliwaratail ni ahl me sohte konehng. Mwomwen atail likou en dehr kahrehiong meteikan en soansuwedda de anahne sohpeisang kitail ni arail kilang mwomwen atail likou.

⁶ Ma atail likou kin soandi mwahu, mwakelekel, kapwatda mwahu oh kasalehda aktikitik, e pahn kakete kalaudehla ahn aramas wauneki kitail nin duwen sapwellimen Kaun Lapalapo Siohwa ladu kei. Oh e pahn kakete kalaudehla arail men esehla duwen Kohto me kitail kin kaudokiong, kakairada arail wauneki atail pwihn, oh pahn perenki rong rohng en komour me kitail kin kalohki.

7, 8. Iahd me kitail keieu anahne likou mwahu?

⁷ Mwohn silangin atail Koht sarawio, riatail Kristian kan, iangahki aramas akan nan atail wasahn kalohk, kitail anahne likawih soangen likou me kin kawauwihala Siohwa oh pil rohngo me kitail kin kalohki. (Rom 13:8-10) Dahme kitail kin likawih uhdahn kesempwal ni atail kin iang towehda mihting kan de ni ahnsoun kalohk. Kitail anahne likouda nin duwen me konehng aramas akan me kin kaudokiong  Koht. (1 Tim. 2:10) Mehlel, mie ekei likou me kin konehng ehu wasa ahpw sohte konehng ehu wasa tohrohr. Eri sohte lipilipil wasa me kitail mi ie, nin duwen Sounkadehdehn Siohwa kan, kitail en dehr kansensuwedihala meteikan pwehki mwomwen atail likou.

⁸ Wadek 1 Korint 10:31. Ni atail kin towehda mihting tohrohr kan, atail likou kan kin anahne soandi mwahu oh konehng. Kitail en dehr alasang sidail kan me nohn daulihala me me tohto kin doadoahngki nan sampah wet. Pil mwohn oh mwurin prokram en mihting tohrohro oh ni atail kin kohla ni hotel kan lao kitail pedoisang, kitail en dehr doadoahngki likou sohte lipilipil de me sohte soandi mwahu. Ni ahl wet kitail pahn perenki kasalehda me kitail Sounkadehdehn Siohwa kei, oh kitail pahn pehm me kitail kak kalohk ong meteikan ni ahnsou sohte lipilipil.

9, 10. Dahme kahrehda Pilipai 2:4 pahn kamwakid dahme kitail kin likawih?

⁹ Wadek Pilipai 2:4. Dahme kahrehda kitail anahne medewe ia duwen atail likou oh kapwat eh kin kamwakid riatail Kristian kan? Ehu kahrepe iei sapwellimen Koht aramas akan kin doadoahk laud pwehn kapwaiada kehkehlik en Paipel wet: “Eri, kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed.” (Kol. 3:2, 5) Riatail Kristian kan me kesehlahr tiahk samin me pid wia nsenen pwopwoud, ele kin peipeiohngete ineng sapwung pwukat. Ma kitail sohte kanahieng, mwomwen atail likou kakete kahrehiong en uhdahn apwal ong irail  en idawehn kaweid en Paipel oh peiong ineng pwukat. (1 Kor. 6:9, 10) Kitail sohte men kahrehda en apwalla ong irail, kaidehn?

¹⁰ Ni atail kin mi rehn riatail Kristian kan, met kin pere kitail sang irail kan me kin kangoange mour samin. Sohte lipilipil ma kitail towehda mihting de mwemweitla wasa ehu, mwomwen atail likou pil kalaudehla mwakelekel en wasao. Mehnda ma kitail ahneki saledek en pilada dahme kitail en likawih, kitail pil pwukoahki en likawih likou me kahrehda en mengei ong meteikan en kolokol arail madamadau, lokaia oh wiewia en mwakelekel mwohn silangin Koht. (1 Pit. 1:15, 16) Limpoak mehlel “sohte kin aklemei, e sohte kin mehwo.”—1 Kor. 13:4, 5.

11, 12. Ia duwen Eklesiasdes 3:1, 17 eh sewese kitail en toupahrek?

¹¹ Ni sapwellimen Koht kan ar pahn pilada dahme ren likawih, re ese me “wiewia koaros oh mehkoaruhsie pahn kin pweida ni ahnsou me koasoandier.” (Ekl. 3:1, 17) Karakar de lemwulemwur en wasa kan, wekideklahn irair en mour ele kin wekidala dahme kitail pahn likawih. Ahpw sapwellimen Siohwa koasoandi kan ahnsou koaros kin duduwehte.​—Mal. 3:6.

¹² Nan wasa kan me karakar, e apwal en tehk mwahu ma atail likou kin kasalehda wahu oh aktikitik. Riatail Kristian kan kin kalahnganki ma kitail dehr likawih likou me nohn it de walek me kasalehda paliwar. (Sohp 31:1) Pil duwehte ni ahnsou me kitail mihmi wasahn pampap, atail likoun pampap kan en kin konehng. (Lep. Pad. 11:2, 20) Mehnda ma me tohto nan sampah kin doadoahngki likoun pampap me kin kasalpaliwar, kitail anahne tehk mwahu me atail pilipil kin kawauwihala atail Koht sarawi, Siohwa.

13. Dahme kahrehda kaweid me kileldi nan 1 Korint 10:32, 33 anahne kamwakid atail pilipil me pid atail likou?

¹³ Pil mie ehu kaweid kesempwal me pahn kamwakid atail pilipil en likou. Kitail anahne kanahieng pwe atail pilipil en dehr kadipikelekelih kadeikpen loalen meteikan. (Wadek 1 Korint 10:32, 33.) Kitail pwukoahki en dehr likawih likou me kakete kansensuwedihala riatail Kristian kan oh pil irail kan me sohte kin papah Siohwa. Wahnpoaron Pohl ntingihedi: “Ahpw emenemen kitail uhdahn pahn kaparanih [“mehn mpatail,” NW] ni wiewia mwahu ong irail, pwe kitail en seweseirailda nan ar pwoson.” E pil kihda kahrepe wet: “Pwe Krais sohte ketin kupwurohkihte pein ih.” (Rom 15:2, 3) Duwehte Sises, wia kupwuren Koht oh sewese meteikan anahne kesempwal sang dahme ke pein mwahuki. Eri kitail en pilada en dehr likouki sidail en likou kan me kitail kin mwahuki ahpw pahn kakete kahrehiong aramas en sohte men rong dahme kitail kin kalohki.

14. Ia duwen pahpa nohno kan ar kak kaiahnehda neirail seri kan pwe ren kalinganahla Koht sang ni mwomwen arail likou?

¹⁴ Pahpa nohno Kristian kan pwukoahki padahkihong neirail seri kan ren idawehn kaweid en Paipel. Met pil pid arail en tehk mwahu me irail oh neirail seri kan en kin kaperenda Koht sang arail sidail en likou oh kapwat me konehng. (Lep. Pad. 22:6; 27:11) Ia duwen pahpa nohno kan ar kak kaiahnehda neirail seri kan en wauneki atail Koht sarawi oh sapwellime koasoandi kan? Pahpa nohno kan anahne kihda mehn kahlemeng mwahu ong neirail seri kan. Oh re anahne ni limpoak padahkihong neirail seri kan ia wasa oh ia duwen arail kak rapahkihda likou me konehng. Seri kan en dehr pilada likou kan ihte pwehki re mwahuki, ahpw kesempwal sang met, re anahne pilada likou me kin kalinganahla Siohwa, Kohto me re kin kalohki duwe.

15. Dahme pahn sewese kitail en wiahda pilipil mwahu kan?

¹⁵ Paipel wia mehn kaweid mwahu ehu me kak sewese kitail en wiahda pilipil mwahu kan me pahn kawauwih Koht. Ahpw, dahme kitail pilada en likawih kin kasalehda dahme kitail mwahuki. Soangen sidail me kitail mwahuki oh soangen likou me kitail kak pwainda ele pahn weksang ahn meteikan. Ahpw atail likou kan anahne ahnsou koaros soandi mwahu, mwakelekel, kasalehda aktikitik, konehng irair en ahnsowo, oh pwungiong atail wasa.

16. Dahme kahrehda mie katepe en nantihong rapahki likou me konehng?

¹⁶ Kaidehn ahnsou koaros e kin mengei en diarada likou me konehng. Sidohwa tohto kin netiki sidail kante me ndand. Eri kitail ele pahn doadoahngki ahnsou laud en rapahki urohs, likouli, oh seht me konehng, de sekid oh rausis kan me sohte nohn it. Ahpw riatail Kristian kan pahn tehk oh kalahnganki atail kin nanti en likawih likou kan me kaselel oh konehng. Oh nsenamwahu me kohsang atail kalinganahla Samatail limpoak nanleng kin laudsang tounmetei koaros me kitail wiahda en likouda ni ahl ehu pwehn kalinganahla ih.

17. Soahng dah kei me kak kahrehda brother men en mie eh alis de soh?

¹⁷ Ia duwe, e konehng brother kan en mie arail alis? Kosonned en Moseso kin anahne ohl akan en mie arail alis. Ahpw, Kristian kan sohte mi pahn kosonned en Moseso de pil anahne idawehn. (Lip. 19:27; 21:5; Kal. 3:24, 25) Ekei tiahk, re kin pwungki oh wauneki alis me soandi oh reirei mwahu, oh met sohte kin kasohwe aramas en rong dahme kitail padahngki. Ni mehlel, mie ekei brother keidi kan me mie arail alis. Mendahki met, ekei brother ele pilada en sohte mie arail alis. (1 Kor. 8:9, 13; 10:32) Nan ekei tiahk de wasa, aramas ko sohte mwahuki alis oh re sohte medewe me e konehng Kristian men en mie eh alis. Ni mehlel, brother men wasao me mie eh alis kak kasohwe eh pahn kalinganahla Koht oh eh irair “pwung.”​—Rom 15:1-3; 1 Tim. 3:2, 7.

18, 19. Ia duwen Maika 6:8 eh sewese kitail?

¹⁸ Ia uwen atail kalahnganki me Siohwa sohte ketin katoutouwihkin kitail soangen oaritik kan me kitail anahne wia me pid dahme kitail pahn likawih de kapwatki. Ahpw, e ketin mweidohng kitail en doadoahngki atail saledek en wiahda pein atail pilipil kan me poahsoankihda kaweid kan oh ire mehlel kan sang nan Paipel. Eri, ni atail pil kin pilada mwomwen atail likou oh kapwat, kitail kak kasalehda me kitail men aktikitik ni atail papah Koht.—Maika 6:8.

¹⁹ Kitail pohnese ni aktikitik me Siohwa kin ketin mwakelekel oh sarawi oh me sapwellime koasoandi kan iei kaweid me keieu mwahu ong kitail. Ma kitail men aktikitik, kitail pahn idawehn sapwellime koasoandi kan nan atail mour. Aktikitik pahn pil sewese kitail en wauneki pepehm oh madamadau en meteikan.

20. Ia duwen atail likou oh kapwat ar pahn kamwakid meteikan?

²⁰ Atail likou kan anahne kasalehda ni sansal me kitail sapwellimen Siohwa ladu kan. Siohwa sapwellimanki koasoandi kan me ileile sang ahn aramas oh kitail kin perenki idawehn. Kaping en kohwong riatail Kristian kan pwehki mwomwarail oh arail wiewia kan me mwahu. Re kin kahrehiong aramas mwahu kan en perenki rong rohng en komour sang Paipel oh kalinganahla oh kaperenda Siohwa. Ni atail wiahda pilipil mwahu kan ong duwen dahme kitail pahn likawih, kitail pahn pousehlahte kalinganahla Meno me kin ketin kapwatkihda “roson oh lingan.”​—Mel. 104:1, 2.