1, 2. Tanbasá mak Testemuña ba Jeová hakarak hatais iha dalan neʼebé loos? (Haree foto iha leten.)

JORNÁL ida iha lia-olandés hatete katak bainhira igreja nia ulun-naʼin sira halaʼo enkontru, “ita bele haree sira hatais hanesan iha uma, liuliu tanba loron neʼe manas”. Maibé jornál neʼe hatete katak, bainhira Testemuña ba Jeová sira bá tuir reuniaun boot, sira-nia hatais la hanesan neʼe. Mane hotu tau kazaku no tau gravata. No feto sira tau saia neʼebé naruk, no respeitu. Loos duni, baibain ema gaba duni dalan neʼebé Testemuña ba Jeová hatais. Apóstolu Paulo hatete katak ema kristaun neʼebé adora Maromak tenkesér “hatais ho loloos, ho respeitu”. (1 Timóteo 2:9, 10) Maski iha eskritura neʼe apóstolu Paulo koʼalia kona-ba feto nia hatais, maibé matadalan neʼe mós kona-ba mane kristaun nia hatais.

² Importante ba ita atu hatais iha dalan neʼebé loos, no Maromak haree dalan neʼebé ita hatais mós importante. (Gênesis [Kejadian] 3:21) Hodi nuneʼe mak Jeová, Ukun-Naʼin Boot Liu Hotu iha lalehan no rai, fó matadalan neʼebé klaru  ba ninia atan liuhusi Bíblia kona-ba dalan neʼebé nia hakarak sira atu hatais. Tan neʼe bainhira atu hili roupa, ita la hanoin kona-ba ita-nia hakarak deʼit, maibé importante liu atu hanoin kona-ba Jeová, Ukun-Naʼin Boot Liu Hotu, simu ka lae.

3. Ita bele aprende saida kona-ba hatais husi Ukun-Fuan neʼebé Maromak fó ba ema Izraél?

³ Moisés nia Ukun-Fuan fó matadalan barak hodi proteje ema Izraél husi nasaun viziñu sira kona-ba sira-nia moris neʼebé laiha morál. Ukun-Fuan neʼe fó sai katak Jeová hakribi tebes atu haree mane hatais feto nia roupa no feto hatais mane nia roupa. Ohin loron Jeová mós sente hanesan kona-ba ema neʼebé hatais iha dalan neʼe. (Lee Deuteronômio [Ulangan] 22:5. ^[1]) Husi ukun-fuan neʼe ita bele haree katak Jeová la gosta mane atu hatais haree hanesan feto, no feto hatais haree hanesan mane, no nia mós la gosta haree dalan hatais neʼebé halo susar ba ema atu haree neʼe mane ka neʼe feto.

4. Saida mak bele ajuda ema kristaun atu hatene hatais neʼebé loos?

⁴ Maromak nia Liafuan iha prinsípiu barak neʼebé bele ajuda ita atu foti desizaun diʼak kona-ba hatais. Maski ita hela iha rai ka klima neʼebé la hanesan, ka kultura la hanesan, ita bele nafatin uza prinsípiu sira-neʼe. Ita la presiza atu hakerek lista naruk kona-ba saida mak bele ka labele atu hatais, halo tuir deʼit prinsípiu husi eskritura sira bele ajuda ita atu hili roupa neʼebé ita gosta. Agora mai ita koʼalia kona-ba Bíblia nia prinsípiu balu neʼebé bele ajuda ita atu hatene “Maromak nia hakarak neʼebé diʼak no loos no neʼebé nia simu”, hodi ita mós bele hili saida mak hatais neʼebé loos.—Roma 12:1, 2.

5, 6. Oinsá mak ita-nia hatais bele kona ema seluk?

⁵ Maromak leno apóstolu Paulo hodi hakerek prinsípiu importante ida iha 2 Korinto 6:4. (Lee.) Liuhusi ita-nia hatais, ema bele koñese ita mak sé. (1 Samuel 16:7) Tan neʼe mak, nuʼudar Jeová nia atan, ita la naran foti roupa ida neʼebé ita gosta atu hatais no hanoin neʼe diʼak ona. Hatene kona-ba Bíblia nia prinsípiu sira tenkesér book ita atu la uza roupa neʼebé aperta demais, hatudu isin, ka dada ema nia atensaun iha dalan seksuál. Ita-nia hatais lakohi halo ema neʼebé haree ita sente moe no la hatene atu hateke ba neʼebé.

⁶ Se ita mak hadiʼa an ho didiʼak no hatais roupa neʼebé kabeer, moos, no diʼak, karik neʼe sei halo ema seluk respeitu ita nuʼudar Jeová nia atan. No karik neʼe mós bele dada sira ba adorasaun neʼebé loos, halo sira respeitu liu Jeová nia organizasaun, no bele halo sira hakarak rona kona-ba mensajen neʼebé ita hatoʼo ba sira.

7, 8. Liuliu iha tempu saida deʼit mak ita presiza hatais roupa neʼebé hatudu respeitu?

⁷ Dalan neʼebé ita hatais fó impaktu ba Maromak santu nia naran, ba irmaun-irmán sira, no ba ema iha haklaken-fatin. Tan neʼe mak ita tenke hatais iha dalan neʼebé halo ema fó glória ba Jeová no ba ita-nia mensajen. (Roma 13:8-10) Neʼe importante tebes liuliu se ita bá tuir reuniaun ka bá haklaken. Ita tenke hatais iha dalan neʼebé loos se ita dehan katak ita mak ema neʼebé adora Maromak. (1 Timóteo 2:10) Roupa balu diʼak atu uza ba fatin ida, maibé iha fatin seluk karik ladiʼak atu hatais. Tan neʼe mak ita tenke hanoin kona-ba ema nia  kultura hodi la uza roupa neʼebé bele halo ema sidi.

⁸ Lee 1 Korinto 10:31. Bainhira bá tuir reuniaun boot, ita tenke hatais roupa neʼebé loos no respeitu. Ita lakohi hatais tuir modelu mundu nian neʼebé dada atensaun liu. Hanesan neʼe mós antes reuniaun boot komesa no bainhira reuniaun hotu ona, ka se ita hela iha otél, ita presiza atu hatais roupa neʼebé hatudu respeitu, labele hatais sabraut deʼit. Hodi nuneʼe, ita la sente an atu fó sai katak ita mak Testemuña ba Jeová, no neʼe mós sei fó oportunidade ba ita hodi sempre prontu atu fó sasin ba ema seluk.

9, 10. Tanbasá mak ita tenke uza matadalan husi Filipe 2:4 kona-ba hatais?

⁹ Lee Filipe 2:4. Tanbasá mak ita tenke hanoin katak ita-nia hatais bele fó impaktu ba ita-nia maluk kristaun sira? Razaun ida mak tanba ita hotu hakaʼas an atu moris tuir Bíblia nia konsellu neʼebé dehan: “Hamate hakarak isin nian neʼebé book imi atu halo hahalok hanesan sala-foʼer, hahalok la moos, hakarak seksuál neʼebé foʼer.” (Koloso 3:2, 5) Ita hakarak ajuda malu atu halo tuir konsellu neʼe. Iha irmaun-irmán balu, antes tama lia-loos, sira moris iha dalan neʼebé la morál, no karik agora sira sei luta hela hasoru hakarak aat sira-neʼe. (1 Korinto 6:9, 10) Tan neʼe ita lakohi duni atu fó tan susar ba sira, loos ka lae?

¹⁰ Bainhira ita hamutuk ho irmaun-irmán sira, maski tuir reuniaun ka iha tempu halimar nian, ita-nia hatais tenke hatudu katak ita hamutuk iha  kongregasaun neʼebé santu. Maski ita iha liberdade atu hili roupa neʼebé ita gosta atu hatais, maibé ita mós iha responsabilidade atu hatais roupa neʼebé halo fasil ba ema seluk atu moris tuir Maromak nia morál neʼebé santu iha sira-nia hanoin, koʼalia no hahalok. (1 Pedro 1:15, 16) Loos duni, domin neʼebé loos ‘hatudu respeitu, no la buka nia rasik nia diʼak’.—1 Korinto 13:4, 5.

11, 12. Oinsá mak Eclesiastes 3:1, 17 ajuda ita iha hanoin neʼebé loos kona-ba hatais?

¹¹ Bainhira ita atu hili saida mak atu hatais, ita hatene katak buat hotu iha ninia tempu. (Eclesiastes [Pengkhotbah] 3:1, 17) Dala ruma, roupa neʼebé ita hili sei troka depende ba klima no situasaun iha ita-nia rai. Maibé ita hatene katak Maromak nia hanoin kona-ba dalan neʼebé ita hatais nunka troka.—Malaquias (Maleakhi) 3:6.

¹² Liuliu iha tempu manas, la fasil atu hili roupa neʼebé loos no respeitu. Maibé ita-nia irmaun-irmán sira hafolin ita-nia hakaʼas-an atu la uza roupa neʼebé aperta demais ka longar liu toʼo hatudu isin. (Jó [Ayub] 31:1) Roupa neʼebé ita uza bainhira hariis tasi ka pixina mós tenkesér hatudu respeitu. (Provérbios [Amsal] 11:2, 20) Maski ema barak iha mundu neʼe uza roupa neʼebé hatudu isin bainhira halimar iha tasi, maibé tanba ita adora Jeová, ita tenke fó atensaun ba ita-nia hatais atu bele fó glória ba Jeová, Maromak santu nia naran.

13. Oinsá mak konsellu husi 1 Korinto 10:32, 33 bele ajuda ita atu hili roupa neʼebé loos?

¹³ Iha tan prinsípiu importante ida neʼebé bele ajuda ita hili hatais, neʼe mak hanoin kona-ba ema seluk nia sentimentu. (Lee 1 Korinto 10:32, 33.) Ita iha responsabilidade atu la halo sidi irmaun-irmán ka ema neʼebé la adora Jeová. Apóstolu Paulo dehan: “Mai ita ida-idak buka atu fó ksolok ba ita-nia maluk liuhusi buat neʼebé diʼak atu hametin sira. Basá Kristu rasik mós la buka atu fó ksolok ba nia an.” (Roma 15:2, 3) Jesus hatudu duni ezemplu diʼak ba ita hodi tau uluk Maromak no ema seluk nia hakarak duké buka uluk ninia diʼak. Tan neʼe, ita lakohi hili roupa neʼebé bele hanetik ema atu rona ba mensajen neʼebé ita haklaken ba sira.

14. Oinsá mak inan-aman bele hanorin oan fó glória ba Maromak liuhusi hatais?

¹⁴ Inan-aman iha responsabilidade atu hanorin oan kona-ba halo tuir Bíblia nia prinsípiu. Tan neʼe sira hakarak haree didiʼak kona-ba sira-nia hatais no hadiʼa an hodi sira no sira-nia ona bele halo Maromak nia laran kontente. (Provérbios [Amsal] 22:6; 27:11) Oinsá mak inan-aman bele hanorin oan atu hatudu respeitu ba Maromak no ninia matadalan sira? Liuhusi sira-nia ezemplu. Sira mós presiza hanorin oan kona-ba oinsá no iha neʼebé mak bele buka roupa neʼebé hatudu respeitu. Labele husik oan sira atu hili roupa tuir sira-nia hakarak deʼit, maibé importante tebes atu ajuda sira hili roupa neʼebé fó glória ba Maromak.

15. Saida mak bele ajuda ita atu halo desizaun ho matenek?

¹⁵ Bíblia mak matadalan neʼebé diʼak atu ajuda ita halo desizaun matenek neʼebé sei lori glória ba Maromak. Maski nuneʼe, ita rasik iha nafatin liberdade atu hili roupa neʼebé ita gosta atu hatais. Ema ida-idak gosta hatais roupa ho modelu  neʼebé la hanesan. Maibé buat neʼebé importante mak atu iha hatais neʼebé kabeer, moos, la dada atensaun, tuir situasaun, no la kontra ema nia kultura.

16. Tanbasá mak ita hakarak hakaʼas an atu hatais ho respeitu?

¹⁶ La fasil atu buka roupa neʼebé loos no respeitu. Loja barak faʼan deʼit modelu sira neʼebé ema barak gosta. Tan neʼe mak karik presiza tempu barak atu buka-hetan saia, vestidu, no bluza neʼebé diʼak, ka kazaku, no kalsa naruk neʼebé la aperta liu. Maibé ita-nia irmaun-irmán sira sei hafolin ita-nia hakaʼas-an hodi hatais iha dalan neʼebé furak no respeitu. Hodi hatene katak ita fó glória ba Maromak sei halo ita sente kontente liu se kompara ho sakrifísiu neʼebé ita halo atu la hatais roupa neʼebé ita gosta.

17. Irmaun ida tenke hanoin kona-ba saida deʼit se nia hakarak atu husik hasarahun?

¹⁷ Oinsá ho hasarahun, irmaun bele husik hasarahun ka lae? Moisés nia Ukun-Fuan hatete katak mane ida tenkesér husik hasarahun. Maibé ema kristaun la moris tuir ona Moisés nia Ukun-Fuan no la presiza halo tuir tan ukun-fuan sira-neʼe. (Levítico [Imamat] 19:27; 21:5; Galásia 3:24, 25) Iha rai balu, ema bele husik hasarahun neʼebé tesi ho kabeer no respeitu, no neʼe la fó impaktu negativu ba serbisu haklaken. Irmaun balu neʼebé kaer responsabilidade iha kongregasaun mós husik hasarahun. Maski nuneʼe, karik balu hili atu la husik hasarahun. (1 Korinto 8:9, 13; 10:32) Iha fatin balu, ema la iha toman atu husik hasarahun, no Testemuña ba Jeová mós moris tuir toman sira-neʼe. Tanba iha fatin sira-neʼe mak irmaun ida husik hasarahun, neʼe sei hanetik nia atu fó glória ba Maromak no ema sei uza neʼe atu sai razaun hodi buka sala husi nia.—Roma 15:1-3; 1 Timóteo 3:2, 7.

18, 19. Oinsá mak Miquéias 6:8 bele ajuda ita kona-ba hatais no hadiʼa an?

¹⁸ Ita agradese ba Jeová tanba nia la halo ukun-fuan neʼebé naruk kona-ba oinsá ita tenke hatais no hadiʼa an. Nia fó liberdade ba ita atu halo desizaun neʼebé diʼak hodi tuir Bíblia nia prinsípiu. Tan neʼe mak liuhusi ita-nia hatais no hadiʼa an, ita bele hatudu katak ita hakarak laʼo tuir Maromak ho haraik-an.—Miquéias (Mikha) 6:8.

¹⁹ Ho haraik-an, ita rekoñese duni katak Jeová mak moos no santu, no ninia ukun-fuan sira mak matadalan neʼebé diʼak ba ita, tan neʼe ita hakarak moris tuir ninia matadalan sira. Haraik-an mós bele ajuda ita atu hatudu respeitu ba ema seluk nia sentimentu no hanoin.

20. Tanbasá mak tenke fó atensaun ba ita-nia hatais no hadiʼa an?

²⁰ Ita-nia hatais tenkesér hatudu katak ita mak Jeová nia atan. Jeová nia matadalan hotu santu, no nia hakarak ita atu halo tuir matadalan sira-neʼe. Ita gaba duni irmaun-irmán kona-ba sira-nia hatais no hahalok diʼak. Sira-nia ezemplu dada duni ema laran-loos no lori mós glória no ksolok ba Jeová. Halo desizaun neʼebé matenek kona-ba ita-nia hatais sei kontinua lori glória ba Jeová, Ida neʼebé hatais ho “dignidade no kmanek”.—Salmo (Mazmur) 104:1, 2.