1, 2. Ino nkaambo nzi Bakamboni ba Jehova ncobatobela zyeelelo zisumpukide zyakusama? (Amubone cifwanikiso icili kumatalikilo aacibalo.)

MUTEENDE umwi waci Dutch wakaamba boobu kujatikizya muswaangano wabasololi bazikombelo: “Kwakali nsamino mbyaabi kapati, kwaambisya nokwakali kupya. Pele eeco tacili boobo amuswaangano wacooko wa Bakamboni ba Jehova. . . . Basankwa bacili baniini alimwi abamaalumi balasama Jakete a tayi, kakuli basimbi alimwi abamakaintu balasama masikeeti malamfwu aaboneka kabotu kweelana abuumi bwamazuba aano.” Masimpe, Bakamboni ba Jehova kanji-kanji balalumbaizyigwa akaambo ‘kakusama kabotu, cabulemu alimwi acakulibatamika . . . pele munzila yeelede bamakaintu [aabo] ibalyaamba kuti balilyaabide kuli Leza.’ (1Tim. 2:9, 10) Mwaapostolo Paulo wakali kwaamba kujatikizya bamakaintu, pesi zyeelelo nzyoona eezyi zilabeleka akubaalumi Banakristo.

² Zyeelelo zyakusama izyeelede zilayandika kapati kulindiswe mbotuli bantu ba Jehova, alimwi zilayandika akuli Leza ngotukomba. (Matl. 3:21) Cakutadooneka, ncaamba Magwalo kujatikizya nsamino alimwi akulibamba zitondezya kuti Mwami wabubumbo boonse ulijisi zyeelelo zibotu izyaamba mbobeelede kusama bakombi bakasimpe. Aboobo tatweelede kusama buyo mbuli mbotuyanda naa kulibamba mbuli mbotuyanda. Tweelede kuyeeya  kujatikizya mbwalimvwa Mwami Singuzuzyoonse Jehova.

3. Ino ncinzi ncotukonzya kwiiya kujatikizya nsamino kweelana a Mulawo Leza ngwaakapede bana Israyeli?

³ Mucikozyanyo, mu Mulawo Leza ngwaakapede bana Israyeli kwakali milawo iyakali kubakwabilila kukutalilemeka kwabantu ibakali kukkala muzisi izyakabazingulukide. Mulawo wakatondezya Jehova mbwalimvwa kujatikizya kusaminana zisani akati kabamaalumi abamakaintu. (Amubale Deuteronomo 22:5.) Kweelana abusolozi Leza mbwaakapa kujatikizya nsamino, tulalibonena caantangalala kuti Leza taikkomanini nsamino iipa bamaalumi kulibonya mbuli kuti mbaamakaintu, iipa bamakaintu kulibonya mbuli kuti mbaamaalumi naa iipa kuti cikatazye kubona lwiindano luliko akati kabamaalumi abamakaintu.

4. Ino ncinzi icikonzya kubagwasya Banakristo kutegwa basale kabotu kujatikizya mbobeelede kusama?

⁴ Jwi lya Leza lilijisi njiisyo izibagwasya Banakristo kuti basale kabotu kujatikizya mbobeelede kusama. Balacita oobo tacikwe makani abusena nkobakkala, zilengwa zyakubusena nkobazwa alimwi akuti naa kubusena ooko kulapya naa kulatontola. Tatuyandiki kuba amulongo buya wamusyobo wazisani nzyotweelede kusama alimwi azyeezyo nzyotuteelede kusama. Muciindi caboobo, tulijisi njiisyo zyamu Magwalo izitugwasya kulisalila mumakani aansamino kweelana aumwi mbwayanda. Lino atulange-lange njiisyo zimwi zyamu Bbaibbele izikonzya kutugwasya kuzyiba “kuyanda kwa Leza, ikubotu, kutambulika alimwi kulondokede” ciindi notusala zisani nzyotweelede kusama.—Rom. 12:1, 2.

5, 6. Ino nsamino yesu inga yabajatikizya buti bantu?

⁵ Mwaapostolo Paulo wakasololelwa amuuya kukankaizya njiisyo iiyandika kapati iili kulugwalo lwa 2 Bakorinto 6:4. (Amubale.) Nsamino yesu ilaamba zinji kujatikizya ndiswe. Bantu banji balaamba mbobayeeya kujatikizya ndiswe kweelana ‘azilibonya ameso.’ (1Sam. 16:7) Aboobo mbotuli babelesi ba Leza, tulizyi kuti nsamino yesu taili yakwiile kusama buyo zisani akaambo buyo kakuti zilatukkomanisya. Injiisyo nzyotwiiya kuzwa mu Jwi lya Leza zyeelede kutukulwaizya kutasama zisani zijata, zibalangala, naa ziletela muzeezo wakoonana. Eeci cilabikkilizya akutasama zisani zitondezya zizo zyamubili izyeelede kusiswa. Bantu tabeelede kukatazyigwa buya naa kulanga kumbali akaambo kambotusamide.

⁶ Ikuti katusumbwide, katusamide kabotu, alimwi akulibamba kabotu, bantu balalangilwa kutulemeka akutubona kuti tuli babelesi ba Mwami Singuzuzyoonse Jehova. Alimwi buya balakonzya kukwelelezyegwa kuli Leza ngotukomba. Kuyungizya waawo, mbunga njotwiiminina iyoolemekwa akaambo kansamino yesu mbotu. Akaambo kaceeci, bantu bamwi balakonzya kuswiilila kumulumbe uufwutula ngotukambauka.

7, 8. Ino ndilili ikapati notuyandika kusama zisani zyeelela?

⁷ Akaambo ka Leza wesu uusalala, bakwesu abacizyi bakumuuya, alimwi abantu ibali mucilawo cesu, tweelede kusama kabotu kutegwa mulumbe ngotukambauka ulemekwe alimwi akuti Jehova awalo alemekwe. (Rom. 13:8-10) Kucita boobu cilayandika kapati kwaambisya ciindi notutola lubazu mumilimo ya Bunakristo, mbuli leelyo notuli kumiswaangano naa notuli mumulimo wakukambauka. Tweelede kusama “munzila yeelede [bantu] balyaamba kuti balilyaabide kuli Leza.” (1Tim. 2:10) Masimpe, zisani izikonzya kubonwa kuti zili kabotu kubusena bumwi inga zyabonwa kuti tazili kabotu kubusena bumbi. Aboobo, bantu ba Jehova munyika yoonse balabikkila maano ikutobela zilengwa zyakubusena nkobabede kutegwa batatyompyi bamwi.

 ⁸ Amubale 1 Bakorinto 10:31. Ciindi notuli kumiswaangano yabbazu alimwi ayacooko, nsamino yesu yeelede kuba yeeyo iyeelela aciindi eeco alimwi yeelede kuba yabulemu ikutali iitondezya nsamino iitali kabotu iidumide munyika. Noliba leelyo notwasika abusena mpotwasikila alimwi anotuzwa, alimwi anotulyookezya mapulogilamu naatanatalika alimwi anaamana, tatweelede kusama zisani izitali kabotu naa izitondezya muuya wabuzangi. Twacita boobo tunookkomene kulizyibya kuti tuli Bakamboni ba Jehova. Inzya, alimwi tunoolimvwa kwaanguluka ikupa bumboni ikuti twaba acoolwe cakucita boobo.

9, 10. Ino nkaambo nzi lugwalo lwa Bafilipi 2:4 ncolweelede kutugwasya mumakani aansamino yesu?

⁹ Amubale Bafilipi 2:4. Nkaambo nzi Banakristo ncobeelede kulanga-langa nsamino yabo mboibajatikizya bakombinyina? Kaambo komwe nkakuti, bantu ba Leza balabeleka canguzu kutobela lulayo lwamu Bbaibbele ilwaamba kuti: “Aboobo, amujaye zizo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kunyomenena zintu zibi.” (Kol. 3:2, 5) Inga tiitwayanda kupa kuti basyomima cibayumine kutobela lulayo oolu. Bakwesu abacizyi ibakabuleka bukkale bwakutalilemeka inga kabacijisi penzi lyakulombozya kucita zintu zibi. (1Kor. 6:9, 10) Sena inga twayanda kuti penzi lyabo lindilile kuyuma akaambo kansamino yesu?

¹⁰ Ciindi notuli akati kabakwesu abacizyi, nsamino yesu yeelede kutondezya kuti mbungano yesu mbusena busalala. Oobu mboceelede kuba kufwumbwa naa tuli antoomwe kumuswaangano naa kubusena bumbi buyo. Aumwi ulijisi  lwaanguluko lwakulisalila zyakusama. Nokuba boobo, toonse tujisi mukuli wakusama zisani zikonzya kupa kuti cuuba-ube kuli bamwi kuzumanana kusalala alimwi akubamba zyeelelo zya Leza ziluleme mumizeezo, mumajwi alimwi amumicito. (1Pet. 1:15, 16) Luyando lwini-lwini “talukwe cisapi, talubikkili buyo maano kuzintu nzyoluyanda.”—1Kor. 13:4, 5.

11, 12. Ino mbuti mbotukonzya kubabikkila maano bamwi ciindi notuyeeya nzyotweelede kusama?

¹¹ Ciindi nobasala kujatikizya nzyobeelede kusama, babelesi ba Leza balizyi kuti “zintu zyoonse zicitika zilijisi ciindi canzizyo alimwi mulimo uuli woonse ulijisi ciindi canguwo.” (Muk. 3:1, 17) Bwini mbwakuti mbokwaca kulakonzya kupa kuti tusame munzila imwi. Alimwi eeci cilakonzya kubikkilizya akwiindana kwabukkale alimwi amasena. Nokuba boobo, zyeelelo zya Jehova tazicinci-cinci kweelana ambokwaca pe.—Malk. 3:6.

¹² Mumasena aapya kapati, cilakonzya kukatazya kapati kusama munzila yabulemu alimwi iitondezya kuti tuzilanga kabotu zintu. Aboobo, bakwesu abacizyi tabakonzyi kutyompwa ikuti tweeleba kusama zisani zijata kapati naa zibalangala izitondezya zizo zyamubili. (Job. 31:1) Kuyungizya waawo, ciindi notudwaya mucizyiba cakudwaila, zisani nzyotusama aciindi eeci zyeelede kuti kazipa bulemu. (Tus. 11:2, 20) Nokuba kuti bantu banji munyika balasama zisani zibalangala, swebo notubelekela Jehova tulabikkila maano ikukkomanisya Leza uusalala ooyo ngotuyanda kapati.

13. Ino nkaambo nzi lulayo lujanika kulugwalo lwa 1 Bakorinto 10:32, 33 ncolweelede kutugwasya ciindi notusala nzyotweelede kusama?

¹³ Kuli njiisyo aimbi iiyandika kapati iitugwasya kusala zisani zyeelede. Njiisyo eeyi itupa kubikkila maano kumanjezyeezya aabamwi—kufwumbwa naa mbakombima naa pe. (Amubale 1 Bakorinto 10:32, 33.) Tweelede kuubikkila maano kapati mukuli ngotujisi wakweeleba kusama zisani izikonzya kutyompya bamwi. Paulo wakalemba kuti: “Umwi aumwi wesu aakkomanisye mweenzinyina muzintu zibotu alimwi izimupa kuyakwa. Nkaambo naba Kristo tanaakalikkomanisya lwakwe mwini pe.” (Rom. 15:2, 3) Inzya, Jesu wakabikkila maano kapati kugwasya bamwi kwiinda zintu nzyaakali kuyanda walo—kugwasya bantu cakali cintu ciyandika kapati kulinguwe kutegwa acite kuyanda kwa Leza. Aboobo tweelede kuzitantamuka zintu naa nsamino njotuyandisya pele iikonzya kutyompya bantu mbotuyanda kukambaukila.

14. Mbuti bazyali mbobakonzya kuyiisya bana babo kulemeka Leza kwiinda munsamino yabo?

¹⁴ Bazyali Banakristo bajisi mukuli wakuyiisya mikwasyi yabo kutobela njiisyo zyamu Bbaibbele. Eeci caamba kuti beelede kusinizya kuti balo alimwi abana babo balabikkila maano kukkomanisya moyo wa Leza kwiinda mukusama cabulemu alimwi akulibamba kabotu. (Tus. 22:6; 27:11) Bazyali balakonzya kuyiisya bana babo kulemeka Leza uusalala ngobakomba kwiinda mukubatondezya cikozyanyo cibotu alimwi akubapa lulayo lugwasya caluyando. Eelo kaka inga cabota ikuti bazyali babatondezya bana babo busena ooko nkobakonzya kujana akuula zisani zili kabotu! Eeci tacaambi buyo kuula zisani nzyobayanda pe, pele caamba kuula zisani iziyoobapa kuti bacikonzye kubeleka mulimo wakwiiminina Jehova Leza.

15. Ino ncinzi iceelede kutugwasya kusala zisani nzyotweelede kusama?

¹⁵ Jwi lya Leza lilijisi busolozi bubotu ibukonzya kutugwasya kusala zintu zilemeka Leza. Pesi bwini mbwakuti, nzyotusama zitondezya buyo zintu nzyotukkomanina. Nzyotuyandisya  umwi aumwi wesu zilakonzya kwiindana kweelana ankomo yesu mboibede. Pesi zisani zyesu zyeelede kuti kazisumbula lyoonse, kazili zyabulemu, kazisamwa aciindi ceelede, alimwi kazitondezya bulemu kweelana akubusena oobo.

16. Ino nkaambo nzi ncotuyandika kubeleka canguzu kutegwa katusama cabulemu?

¹⁶ Ikwaamba masimpe, tacili cuuba-uba lyoonse kusala munzila iitondezya kuti tuzilanga kabotu zintu alimwi akuti tulabikkila maano kutwaambo toonse itujatikizyidwe. Muzintoolo zinji kujanika misyobo yazisani zidumide mazuba aano, aboobo cilakonzya kutola ciindi alimwi akubeleka canguzu kutegwa mujane masikeeti, madileesi, mabbulauzi naa nsuuti alimwi amalukwe aatajati kapati. Cakutadooneka, basyomima bayoobona alimwi akulumbaizya akaambo kakubeleka canguzu kuti tujane zisani zibotu alimwi izyeelela. Alimwi lukkomano ndotujana akaambo kakupa kuti Taateesu wakujulu siluyando alemekwe ndunji kapati kwiinda buyumuyumu mbotukonzya kujana ibwakusala zisani zipa bulemu kuli Leza.

17. Ino ntwaambo nzi tumwi itweelede kulangwa-langwa ikuti mukwesu wasala kutagela malezu?

¹⁷ Ino mbuti kujatikizya bakwesu batageli malezu? Mulawo wa Musa wakali kuzumizya bamaalumi kutagela malezu. Nokuba boobo, Banakristo tabatobeli Mulawo wa Musa, alimwi tabeendelezyegwi anguwo pe. (Lev. 19:27; 21:5; Gal. 3:24, 25) Mumasena aamwi, kulekela malezu kuli kabotu lelikke buyo ikuti muntu kaabamba kabotu alimwi akuti naa kucita boobo takukonzyi kulesya bantu kutambula mulumbe wa Bwami. Kwaamba masimpe, bakwesu bamwi ibajisi mikuli balijsi malezu aabambwa kabotu. Nokuba boobo, bakwesu bamwi balakonzya kusala kwaagela. (1Kor. 8:9, 13; 10:32) Mumasena aamwi, cilengwa cakulekela malezu taciko pe alimwi eeci cibonwa kuti taceelede kuli Bakamboni ba Jehova. Ikulekela malezu inga kwapa kuti mukwesu atamulemeki Leza mumakani aakulibamba alimwi inga wabonwa kuba muntu uuli akampenda.—Rom. 15:1-3; 1Tim. 3:2, 7.

18, 19. Mbuti lugwalo lwa Mika 6:8 mbolutugwasya ciindi notubeleka canguzu kutegwa nsamino yesu ibe yeeyo iikkomanisya Leza?

¹⁸ Eelo kaka tulalumba kuti Jehova tatuminyi amulongo wamilawo kujatikizya mbotweelede kusama alimwi akulibamba. Muciindi caboobo, watuzumizya kubelesya cipego cesu cakulisalila kutegwa tusale kabotu zintu kwiinda mukutobela njiisyo zigwasya zyamu Magwalo. Aboobo nomuba munsamino yesu alimwi ambotulibamba, tulakonzya kutondezya kuti tuyanda ‘kweenda cakulibombya a Leza wesu.’—Mik. 6:8.

¹⁹ Kulibombya kwesu kubikkilizya kulilingula lwesu tobeni ciindi notulanga mbwasalala Jehova, nkaambo tusyoma nguwe cakumaninina kutegwa atusololele munzila mbotu kapati. Kuyungizya waawo, kulibombya kubikkilizya kubalemeka bamwi kujatikizya mbobalimvwa alimwi ambobayeeya mumakani aamwi. Aboobo ‘tuleenda cakulibombya a Leza wesu’ kwiinda mukweendelanya buumi bwesu azyeelelo zyakwe zisumpukide kapati alimwi akulemeka mbobalimvwa bamwi.

20. Ino nsamino yesu alimwi ambotulibamba zyeelede kubajatikizya buti bamwi?

²⁰ Insamino yesu tayeelede kupa kuti bantu batalike kudooneka kuti tuli bakombi ba Jehova. Bakwesu abacizyi alimwi abantu bambi buyo beelede kubona kuti tuleelela kwiiminina Leza wesu mululami. Ulijisi zyeelelo zisumpukide, alimwi cakukondwa tulabeleka canguzu ikwiiya zyeelelo eezyo. Tweelede kubalumbaizya bakwesu alimwi abacizyi ibasama kabotu alimwi ibalilemeka kabotu akupa kuti bantu babombe myoyo bautambule mulumbe wamu Bbaibbele uufwutula bantu akupa kuti Jehova akkomane alimwi akulemekwa. Ikusala kabotu kujatikizya zisani nzyotusama ncobeni kuyoozumanana ikupa kuti kalemekwa ooyo ‘uulisamika bulemu abweebesi.’—Int. 104:1, 2.