1, 2. Иегованың Херечилери кеттинеринге хамаарыштыр бедик негелделерден чүге туттунуп турарыл? (Статьяның эгезинде чурукту көрүңер.)

 «ДЫКА изиг турган болгаш, хөй улус ёзу-аайы-биле эвес кылдыр кеттинип алгаш турган». Шак ынчаар Нидерландының солунунга шажын удуртукчуларының ужуражылгазының дугайында бижээн. Ынчалзажок «Иегованың Херечилериниң шуулганында байдал сыр өске болган» деп аңаа демдеглээн. Бичии оолдар безин пиджак, галстуктуг, а кыс уруглар биле херээженнерниң юбкаларының узуну оларның хепти шын шилип билирин көргүзүп, модага дүүштүр кеттингенин статьяга онзалаан. Ийе, Иегованың Херечилери «Бурганны хүндүлээр» болгаш, «ужур-чурумга таарыштыр кеттинип, эгениичел база бодамчалыг» кылдыр боттарын каастап турары дээш, улуска мактадып турары ховар эвес (1 Тим. 2:9, 10). Мында Павел элчин христиан херээженнерниң дугайында бижип турар-даа болза, бо дүрүм эр улуска база хамааржыр.

² Иегованың бараалгакчылары хепти шилииринге шыңгыы хамаарылгалыг. Даштыкы хевиривис Бурганга база дыка чугула (Э. д. 3:21). Бижилгеде даштыкы хевирге болгаш идик-хепке хамаарыштыр бижээн чүүлдерден алырга, Октаргайның Дээргизи бараалгакчыларынга тодаргай негелделерни тургузуп каан деп көскү. Ындыг болганда, бо дээрге чүгле бодунуң күзелиниң аайы-биле шиитпирлээр айтырыг эвес-тир. Дээргивис болур Иегова Бурганывыстың саналын херекке алыр ужурлуг бис.

3. Моисейниң хоойлузундан идик-хептиң чамдык аян-хевирлеринге хамаарыштыр Бурганның хамаарылгазының дугайында чүнү билип ап болурул?

 ³ Бурганның израильчилерге берген Хоойлузунда долгандыр чоннарның бужар алдынарындан камгалаар айтыышкыннар турган. Эр-кызы-даа билдинмес кылдыр кеттинери Иеговага таарымча чок деп ол Хоойлудан илдең. (Ыдыктыг хоойлуну катаптааны 22:5 номчувут.) Бурганның идик-хепке хамаарыштыр берген айтыышкынындан алырга, эр кижи херээжен кижи ышкаш, а херээжен кижи эр кижи ышкаш кеттинерге, Бурган ону көөр хөңнү чок деп билдингир-дир.

4. Кеттинеринге хамаарышкан айтырыгларга шын шиитпирни хүлээринге христианнарга чүү дузалаарыл?

⁴ Бурганның Сөзүнде христианнарга, олар кандыг-даа агаар-бойдустуг болгаш культуралыг черге чурттап чорза, кеттинеринге хамаарышкан айтырыгларга шын шиитпирни хүлээринге дузалаар дүрүмнерни берип каан. Христианнарга кандыг идик-хеп тааржыр-таарышпазын айтып каан узун даңзының биске херээ чок. Хостуг эргевисти хажытпайн турар, ынчалза-даа «кандыг чүүлдер Аңаа [Бурганга] эки, таарымчалыг база болбаазыраңгай боорун билип» алырынга дузалаар библейжи дүрүмнерден туттунуп турар бис (Рим. 12:1, 2). Оларның чамдыызын көрээлиңер.

5, 6. Даштыкы хевиривис өскелерге кандыг салдарны чедирер ужурлуг?

⁵ Павел элчин, Бурганның сүлдезинге башкарткаш, 2 Коринфичилерге 6:4-те (номчувут) эргежок чугула дүрүмнү бижээн. Даштыкы хевиривис бистиң дугайывыста хөйнү чугаалап турар. Улус колдуунда кандыывысты «даштыкы хевиривистен» көөр (1 Хаан. 16:7). Ынчангаш Бурганның бараалгакчылары болганывыста, чүгле бодувуска эптиг, тааржыр кылдыр кеттинеринден аңгыда, Ооң саналын база херекке алырын утпас ужурлуг бис. Бурганның Сөзүнден билиглер бисти чыпшык, эътке өй, ажык болгаш шын эвес минниишкиннер тывылдырар хептен ойталаарынче оттурар ужурлуг. Чажырар ужурлуг мага-боттуң кезектерин дуглавайн, харын-даа көзүлдүр чуруп турар хеп кедери христиан кижиге дүүшпес. Бисче көргеш, улустуң эпчоксунуп, көрүжүн өскээр углаксаар күзели тывылбас ужурлуг.

⁶ Арыг-силиг болгаш бөдүүн кылдыр кеттинер болзувусса, долгандыр кижилер биске, Дээрги Иегованың бараалгакчыларынга, оон-даа улуг хүндүткелдиг болур. Ынчангаш олар Бурганывыстың дугайында билип алыксай бээр чадавас. Оон аңгыда төлептиг даштыкы хевиривистиң ачызында организациявыстың дугайында улус эки бодаар. Ынчангаш олар чуртталгазын камгалап шыдаар медээни дыңнаар күзелдиг болур.

7, 8. Кандыг таварылгаларда даштыкы хевиривисче кичээнгей салыры ылаңгыя чугула?

⁷ Ыдыктыг Бурганывыстың, акы-угбаларывыстың, ол ышкаш долгандыр кижилерниң дугайында бодап чоруур болзувусса, медээвистиң үнезин онзалап, Иегованы алдаржыдып турар хепти кедер ужурлуг бис (Рим. 13:8—10). Бараалгалга хамаарышкан ажыл-херектерни кылып, чижээ, христиан ужуражылгаже баарда азы суртаалга киржирде ынчаар кеттинери ылаңгыя чугула. «Бурганны хүндүлээр дээн» улус болганывыста, төлептиг кылдыр кеттинээлиңер (1 Тим. 2:10). Бир черге таарымчалыг деп санаттынар хеп өске черге көңгүс таарышпас бооп болур. Ынчангаш Иегованың бараалгакчылары, каяа-даа чурттап чорааш, өскелерниң сагыш-сеткилин хомудатпас дээш, тус черниң ёзу-чаңчылдарын херекке алыр ужурлуг.

⁸ 1 Коринфичилерге 10:31 номчувут. Шуулганнарже баарда, хевивис ол өөрүшкүлүг болуушкунга дүгжүр ужурлуг. Бо делегейниң аян-шинчизин көргүзүп турар кылдыр үш-үдүрүм кеттинмес болзувусса эки. Аалчылар бажыңынче кирерде азы оон  үнерде, оон аңгыда шуулган соонда, хостуг үе эрттирип тургаш, хевивис хөлүн эрттир чудаңгы болбас ужурлуг. Төлептиг кылдыр кеттинер болзувусса, өскелер бисти Иегованың Херечилери деп танып каар, ынчан, арга тыптып кээрге, оларга эпчоксунмайн, суртаалдап болур бис.

9, 10. Филипчилерге 2:4-те сөстер кеттинеривисче кандыг салдар чедирер ужурлугул?

⁹ Филипчилерге 2:4 номчувут. Христианнар кеттинип турары-биле кады бүзүрээн акы-угбаларынче кандыг салдар чедирип турарының дугайында чүге боданыр ужурлуг? Чүге дээрге Бурганның бараалгакчылары «самыыралды, чүдек-бужар херектерни, туттунмас туралаашкынны... узуткаңар!» деп кыйгыны эдерер дээш, бар шаа-биле кызып турар (Кол. 3:2, 5). Бис дээш кады бүзүрээн ха-дуңмавыска ол сүмени эдерери берге апаарын күзевес бис. Оларның чамдыызы ооң мурнунда самыырап чораан, ам мөзү-шынар талазы-биле арыг артар дээш, шыдаар шаа-биле кызып турар-даа болза, ам-даа бачыттыг сундугуушкуннары-биле демиселин уламчылап чоруур чадавас (1 Кор. 6:9, 10). Ынчангаш бистиң хайывыс-биле оларның демисели оон-даа аар-берге апаарын күзевес бис.

¹⁰ Кады бүзүрээн ха-дуңмавыстың аразынга тургаш, мөзү-шынар чок чорукче ыдалаар улустуң салдарындан камгалаттынган бис. Ынчангаш мөзү-шынар талазы-биле арыг байдалды каяа-даа тургаш — христиан чыышка-даа азы оон-даа өске черге — кеттинип турарывыс-биле кызып деткиилиңер. Чүнү кедерин бодувус шиитпирлээр-даа болзувусса, кижи бүрүзүнде харыысалга бар: кеттинип турарывыс-биле өскелерге мөзү-шынар талазы-биле арыг артарынга  болгаш оларның бодалдарынга, чугаазынга, ажыл-херектеринге ыдыктыы-биле алдынарынга дузалаар ужурлуг бис (1 Пет. 1:15, 16). Ёзулуг ынакшыл «дүктүг арынныг болбас, бодунга ажык сүрбес» (1 Кор. 13:4, 5).

11, 12. Чүнү кедерин шиитпирлеп тургаш, чүнү херекке алыр ужурлуг бис?

¹¹ Хепке хамаарыштыр шиитпир хүлээп тургаш, Бурганның бараалгакчылары «Бүгү чүве өйлүг-шактыг база бо өртемчейде бүгү-ле чүүлге үе турар» деп чүүлдү кичээнгейге ап турар (Эккл. 3:1, 17). Бис агаар-бойдустуң болгаш чылдың үелерин барымдаалап, кеттинер болгай бис. Оон аңгыда кеттинеривисче янзы-бүрү амыдыралдың байдалдары салдар чедирип турар. Ынчалзажок Иегованың негелделери, агаар-бойдус дег, өскерилбес (Мал. 3:6).

¹² Изиг чурттарга бодамчалыг чорукту илередип, өскелерниң минниишкиннерин херекке алыр дээш, таарымчалыг кылдыр кеттинери белен эвес бооп болур. Ынчангаш христиан чыышта шупту улус, өскелер мөзүзү чок кылдыр көстүр, эмин эрттир чыпшык, эътке өй азы хөлбегер хеп кетпеске, өөрүп турар (Иов 31:1). Шак ынчаар бассейнге эштип азы суг кыдыынга дыштанып тургаш, сугга эштир хевивис ажык эвес боор ужурлуг (У. ч. 11:2, 20). Кижилерниң хөй кезии хөлүн эрттир ажык эштир хептерни кедип-даа турар болза, Иегованың бараалгакчылары болганывыста, бир дугаарында ыдыктыг Бурганывысты алдаржыдарын күзээр бис.

13. Идик-хепти шилип тургаш, 1 Коринфичилерге 10:32, 33-те сүмени чүге херекке алыр ужурлуг бис?

¹³ Таарымчалыг идик-хепти шилииринге дузалаар база бир чугула дүрүм бар. Өске улустуң — олар кады бүзүрээн ха-дуңмавыс азы ха-дуңмавыс эвес-даа болза — арын-нүүрүн кичээнгейге алыры чугула. (1 Коринфичилерге 10:32, 33 номчувут.) Өскелерни эпчоксундуруптар хире идик-хепти кетпес болзувусса эки деп, сактып чоруулуңар. Павел элчин: «Чанывыста кижиге ачылыг болзун, ооң бүзүрели быжыксын деп бодал-биле аңаа таарымчалыг чүүлдерни бистиң аравыста кижи бүрүзү кылыр ужурлуг» — деп бижээн. Улаштыр ол: «Христос база Бодунуң ажыын бодавайн чораан болгай» — деп тайылбырлаан (Рим. 15:2, 3). Шынап-ла, Иисус бодунуң ажыын бодавайн, өскелерге дузалаарын болгаш Бурганның күзел-соруун күүседирин бодап чораан. Ынчангаш идик-хепти чеже-даа аянзынып турзувусса, улус бистиң даштыкы хевиривистен човааш, буянныг медээни дыңнаксавайн баар болза, ындыг идик-хепти кетпес бис.

14. Ажы-төлү даштыкы хевири-биле Бурганны алдаржыдар кылдыр, ада-иелер оларны канчаар өөредип болурул?

¹⁴ Христиан ада-иелер ажы-төлүн библейжи дүрүмнерни ажыглаарын өөредир ужурлуг. Чижээ, ада-иелер боттары-даа, ажы-төлү-даа төлептиг идик-хеви-биле болгаш даштыкы хевири-биле Бурганның чүрээн өөртүп турарынга чигзинмес ужурлуг (У. ч. 22:6; 27:11). Ада-иелер ажы-төлүнге эки үлегер көргүзүп, оларны ынакшылдыы-биле сургап тургаш, ыдыктыг Бурганга хүндүткелдиг болурунга өөредип турар. Ада-иелер элээди ажы-төлүнге таарымчалыг идик-хепти кайыын база канчаар шилиирин айтып бээр болза, кончуг эки боор! Ооң ачызында ажы-төл анаа-ла сеткилинге кирген-не идик-хепти эвес, а Иегова Бурганны улус мурнунга төлептиг көргүзер дээш, хепти шын шилип ап болур.

15. Идик-хепти шилииривисче чүү салдар чедирер ужурлуг?

¹⁵ Бурганны алдаржыдарынга шын шиитпирлерни хүлээринге дузалаар, ажыктыг сүмелер Библияда бар. Ындыг-даа болза кижи акша-төгериин барымдаалап, сеткилинге тааржыр хепти шилип алыр болгай. Ынчалзажок кеткен идик-хевивис кезээде арыг-силиг,  таарымчалыг болгаш тус черниң ёзу-чаңчылдарынга дүгжүр ужурлуг.

16. Таарымчалыг идик-хеп шилип алыр дээш, күжениишкиннерни үндүрери чүге чугула?

¹⁶ Ийе, бодамчалыг чорукту болгаш оон-даа өске чүүлдерни сагывышаан, идик-хепти шилиири белен эвес. Садыгларның хөй кезиинде чүгле сөөлгү моданың идик-хептери бар. Ынчангаш чамдыкта таарымчалыг юбканы, платьени, хөйлеңни азы хөлүн эртир тар эвес пиджак, чүвүрнү тып алыр дээш, кижи хөй үени болгаш күштү үндүрер апаар. Кады бүзүрээн ха-дуңмавыс бистиң кызып тургаш, таарымчалыг, чараш идик-хепти тып алганывысты эскерип кааш, ону үнелээр дээрзинге чигзинмейн барып болур бис. А дээрде Адавысты алдаржыдып турар бис деп бодалдан сеткиливис өөрүп, христианнарга тааржыр идик-хепти дилээр дээш үндүрген күжениишкиннеривис хилис барбаан боор.

17. Сегел салын эдилээр-эдилевезин шиитпирлээрде христиан акывыс чүнү херекке ап болурул?

¹⁷ Христиан эр улус сал өстүрүп болур бе? Моисейниң хоойлузу-биле алырга, шупту эр улус салдыг болур ужурлуг турган. Ынчалза-даа христианнар Моисейниң хоойлузунга чагыртпайн турар болгаш, ону күүседири албан эвес (Лев. 19:27; 21:5; Гал. 3:24, 25). Чамдык культураларда аянныг таарткан сегел салын эдилээри хоруглуг эвес. Ынчангаш ындыг культуралыг черде чурттап турар христиан акывыс сегел салы эдилеп турар болза, ол канчап-даа өскелерниң кичээнгейин буянныг медээден өскээр чардыктырбас. Безин чадаарда хуралда харыысалгалыг чамдык акылар сегел салын эдилеп чоруур. А өскелери өстүрбес деп шиитпирлээн (1 Кор. 8:9, 13; 10:32). Кезек культураларда болгаш черлерде сегел салын өстүрери ужур-чурумга таарышпас, ынчангаш христиан бараалгакчылар ону база херекке ап турар. Оон башка даштыкы хевири-биле христиан акый «буруудаткы дег чүве чок» кылдыр санатпайн, Бурганны алдаржыдып шыдавайн баар (Рим. 15:1—3; 1 Тим. 3:2, 7).

18, 19. Кеттинип турарывыс-биле Бурганны алдаржыдарынче чүткүүрүнге Михей 6:8-те сөстер биске канчаар дузалап турарыл?

¹⁸ Даштыкы хевиривиске болгаш кеттинеринге хамаарыштыр хөй негелделер-биле бисти чүдүрүп кагбааны дээш, Иеговага өөрүп четтирер-дир бис. Библейжи дүрүмнерге даянмышаан, хостуг эргевисти ажыглап, мерген шиитпирлер хүлээрин ол биске чөпшээреп турар. Шак ынчаар бодувустуң даштыкы хевиривис-биле болгаш таарымчалыг кеттингенивис-биле «Бурганның мурнунга томаарып» чурттап чоруурувусту көргүзүп болур бис (Мих. 6:8).

¹⁹ Ол бүгүден аңгыда томаарып чурттаары дээрге арыг, ыдыктыг Иегова Бурганның негелделеринге дүүштүр биче сеткилдии-биле хынаныры болгаш Ооң үнелиг удуртулгазы чокта шиитпир хүлээри болдунмас деп чүүлдү херекке алыры дээни ол. Оон ыңай биче сеткилдиг кижи өскелерниң минниишкиннерин болгаш саналын хүндүлеп чоруур. Шак ынчаар долгандыр кижилерниң минниишкиннерин херекке ап, Иегованың бедик негелделеринге дүүштүр чурттап тургаш, «Бурганның мурнунга томаарып» чоруурувусту көргүзер бис.

20. Идик-хевивисче болгаш даштыкы хевиривисче көргеш, долгандыр кижилер чүнү бодаар ужурлуг?

²⁰ Улус бисти көргеш, Иегованың бараалгакчылары-дыр деп чигзинмес ужурлуг. Кады бүзүрээн ха-дуңмавыс-даа, өске-даа улус чөптүг-шынныг Бурганывысты даштыкы хевиривис-биле алдаржыдып турарывысты тода көөр ужурлуг. Ол биске бедик негелделерни тургускан, ынчангаш оон туттунар дээш, кызып чоруур бис. Чараш даштыкы хевири-биле болгаш үлегерлиг алдынып турары-биле ак сеткилдиг кижилерни библейжи алыс шынче хаара тудуп, Иеговага алдар-хүндүнү чедирип, Ооң чүрээн өөртүп турар акы-угбалар макталга төлептиг. Идик-хепти шилииринге мерген шиитпирлер хүлээп тургаш, моон-даа соңгаар «чайынналчак мактал-хүндү» кеткен Бурганывысты алдаржыдар бис (Ыд. ыр. 103:1, 2).