1, 2. მუშენ იცვენა იეჰოვაშ მოწმეეფი მუკოქუნაშ მაღალ ნორმეფს? (ქოძირით სურათი თე გვერდის)

ართ ჰოლანდიურ გაზეთის ჭარუდ, მუჭო რდეს მუკოქუნელ რელიგიურ ლიდერეფ ართ-ართ მუნეფიშ შეხვალამაშ დროს: „თე შეხვალამას ელაგერდულო მუკაქუნდეს, მუშნედა მანგარ სინჩხე რდუ“. კინ თე გაზეთის ჭარუდ, ნამდა იეჰოვაშ მოწმეეფიშ კონგრესის ქომოლკათა შარვალ-კოსტიუმით დო ჰალსტუხეფით რდეს, ოსურკათას მოკრძალებულ დო თანამედროვე კაბეფ მიკაქუნდეს. ფაქტი რე, იეჰოვაშ მოწმეეფს ხშირას ოცქვანა, მუშენდა მოკრძალებულო მუკაქუნა, თეშ მუჭოთ ოსადაგ ღორონთიშ მოშიშ კათას (1 ტიმ. 2:9, 10). მოციქულ პავლე თე მუხელეფს ოსურკათაშენ იჩიებუდ, მარა თაქ მოჩამილ პრინციპი ქრისტიან ქომოლკათას ხოლო ოხუ.

² ჩქი, მუჭოთ იეჰოვაშ ხალხიქ, მუკოქუნაშ მაღალ ნორმეფს ოკო იბცვენდათ, მუშენდა თენა მნიშვნელოვან რე ღორონთშო, ნამუსით თაყვანს ფცენთ (დაბ. 3:21). ბიბლია მუდგას მუკოქუნაშენ იჩიებუნ თიშე იძირე, ნამდა უზენაეს ღორონთის მუშ თაყვანიშმცემლეფშო დოდგინელ აფუ გონივრულ ნორმეფი. ათეშგურშენ ჩქინ მუკოქუნა დო მეჯინა ხვალე ჩქი მობწონან თიშნერ ოკო ვარდას; გეფთვალისწინათ ოკო, მუ მოწონს უზენაეს ღორონთ იეჰოვას.

3. მუს ბგურაფლენთ მუკოქუნაშ გურშენ ისრაელეფშა მეჩამილ ღორონთიშ კანონშე?

 ³ მაგალთო, ღორონთიშ კანონს ინოჭარილ მითითებეფი, თხილანდ ისრაელეფს გოხოლუას მახორუ ხალხიშ უზნეო ცხოვრებაშ გავლენაშე. თე კანონშე იძირედ, მუშმამწარათ ვა მოწონდ იეჰოვას თიშნერ მუკოქუნა, სოვრეშეთ ოსურ დო კოჩი ართიანშე ვეგშეჩინებედ; თაშ ამდღა ხოლო მიკიქუნანა (წეკითხით კანონიშ 22:5). ღორონთიშ თე მითითებაშე ჯგირო იძირე, ნამდა თის ვა მოწონს, მუჟამს კოჩი ოსურცალო მიკიქუნანს დო ოსურს ქოგუ, ოსურ კოჩიცალო მიკიქუნანს დო კოჩის ქოგუ.

4. მუ მიმეხვარებუნა სწორაშო გინობჭყვიდათ, მუნერ მუკაქუნალ გიშაბგორათ?

⁴ ღორონთიშ სიტყვას მოჩამილ პრინციპეფი მოხვარუნა, სწორაშო გეგნობჭყვიდათ, მუ მიკიფქუნათინ, თიშ უმკუჯინუო, სო ბცხოვრენთ, მუნერ კულტურა მიღუნა დო მუნერ კლიმატ რე ჩქინ ქიანას. ჩქი ვა მოსაჭირუნა კონკრეტულ სია, მუნერ სტილიშ ოკო რდას მუკაქუნალ დო მუნერ ვარ. ჩქი ბიბლიურ პრინციპეფს გიმიბრინუანთ, ნამუთ მარზენა საშვალებას ჩქი მუთ მობწონან თინა ხოლო გებთვალისწინათ. მორთ, გუვარჩუათ მუსხირენ ბიბლიურ პრინციპი, სოვრეშეთ ქიგებგენთ, „მუ რე ღორონთიშ ნება — ჯგირ, მოსაწონ დო სრულყოფილ“ მუკაქუნალიშ გიშაგორუაშ დროს (რომ. 12:1, 2).

5, 6. მუჭო ოკო იმოქმედას ჩქინ მუკაქუნალქ დო მეჯინაქ შხვეფწკუმა?

⁵ ღორონთიშ შურქ პავლე მოციქულს ინაჭარაფუ მნიშვნელოვან პრინციპი, ნამუთ მოჩამილ რე 2 კორინთელეფიშ 6:4-ის (წეკითხით). ჩქინ მეჯინა დო მუკაქუნალ ბრელ მუთუნს იჩიებ ჩქინ გურშენ. ბრელს შილებე ჩქინდე თოლით ნაძირეფშე აშუას წარმოდგენაქ (1 სამ. 16:7). ათეშგურშენ ღორონთიშ მსახურეფს მესმებუნა, ნამდა ხვალე თიშო ოკო ვეფიფქრათ, მუნერ მუკაქუნალ მობწონა დო მუ რე ჩქინო კომფორტულ. ღორონთიშ პრინციპეფი მოხვარუნა, ვემკიფქუნათ თიცალ მუკაქუნალ, ნამუთ რე გორწკიპილ, ნაბეტან ეშაღალირ დო ვულგარულ. თენა თის ნიშნენს, ნამდა ვემკიფქუნათ სხეულიშ ნაწილეფი გიშარჩქინდუნ ფერ მუკაქუნალ. ჩქინ მუკაქუნალქ შხვეფი უხერხულს ოკო ვენაჸათას დო იძულებულქ ვეჸუან, განშე მიკირთან.

⁶ მუჟამსით კოხტას, სუფთას დო მოკრძალებულო მიკმოქუნან, ხალხი უმოს პატის ქოფცენა, მუჭოთ უზენაეს ღორონთ იეჰოვაშ მსახურეფს. თინეფს შილებე ქაშუან სურვილქ გეჩინებაფუან ღორონთი. თეშ გარდა, ჩქინ ჯგირ მიკოქუნათ ვასახელენთ ორგანიზაციას, ნამუშ წევრეფ ვორეთ. დო საბოლათ, შილებე ნამთინექ ქიმირჩქილუას სიცოცხლეშ მუმაჩამალ ამბე, ნამუსით ფქადაგენთ.

7, 8. განსაკუთრებულო, მუჟამ ოკო მივაქცუათ ყურადღება თის, მუჭო მიკიფქუნანთინ?

⁷ ჩქი პასუხიშმგებელ ვორეთ წმინდა ღორონთიშ, სულიერ და დო ჯიმალეფიშ დო თი ხალხიშ წოხოლე, მიდგას უქადაქენთ, განვადიდათ ღორონთი ჩქინ მუკაქუნალით დო ფასი ვაუდინუათ ცნობას, ნამუსით ფქადაქენთ (რომ. 13:8—10). თენა განსაკუთრებით მნიშვნელოვან რე, მუჟამსით კრებეფს ვოსწრუთ ვარდა ფქადაქენთ. ჩქი თეშ ოკო მიკიფქუნათ, მუჭოთ ოსქვანს თი ხალხის, მით იჩიებუ, ნამდა ღორონთიშ მოშიშეფი რენა (1 ტიმ. 2:10). მუშო ოკო რაგად, შხვადოშხვა ადგილს შხვადოშხვანერ მუკაქუნალ რე მიღებულ. ათეშგურშენ, მთელ მსოფლიოს იეჰოვაშ მოწმეეფი ითვალისწინენა ადგილობრივ წესეფს დო ოცადუნა მუნეფიშ მუკოქუნათ მითინ ვადაბრკოლან.

⁸ წეკითხით 1 კორინთელეფიშ 10:31. მუჟამსით კონგრესის ვორეთინ, მიკმოქუნდან ოკო მოკრძალებულო დო ვართ ხოლო ექსტრავაგანტულო, მუჭოთ ქვეყნიერებას  რე მიღებულ. სერიშ გიოჩერებელ ადგილს ვარდა თექ, სოდეთ კონგრესშახ დო თიშ თებაშ უკულ ვორეთინ, ნებეტან თავისუფალო დო მუდგანერო ვემკიფქუნათ ოკო. თაშ ქიმიბქციებუთ-და, ონჯღორე ვადმაგურენა თიშ რაგადშა, ნამდა იეჰოვაშ მოწმეეფი ვორეთ დო შემალებენა ქადაგება ირ დროს.

9, 10. მუშენ ოკო იმოქმედას ფილიპელეფიშ 2:4-ის მოჩამილ პრინციპიქ მიკაქუნალიშ გიშაგორუაშ დროს?

⁹ წეკითხით ფილიპელეფიშ 2:4. მუშენ ოკო იფიფქრათ, მუჭო იმოქმედენს ჩქინ მიკოქუნა თანამორწმუნეეფწკუმა? ართ-ართ მიზეზი თინა რე, ნამდა ღორონთიშ ხალხი მთელ შურ დო გურით ოცად, გეგმირინუას ბიბლიას ინოჭარილ მითითება: „ქინაჸვილით თქვან მიწიერ სხეულიშ ნაწილეფი: სიძვა, უწუნდურობა, ვნება“ (კოლ. 3:2, 5). ჩქი ვა მოკონა, ჩქინ საქციელიშ გურშენ თანაქრისტიანს გუჭირდას თე მითითებაშ მეჸუნაქ. და დო ჯიმალეფ, მით ადრე უზნეოთ ცხოვრენდუნ, შილებე ამდღა ხოლო ობრძოლუდან ცოდვილ მიდრეკილებეფს (1 კორ. 6:9, 10). მუშო ოკო რაგად, ვა მოკონა ჩქინ გურშენ თინეფს ბრძოლაქ გაუჭირდან.

¹⁰ მუჟამსით სულიერ და დო ჯიმალეფ შქას ვორეთინ, ჩქინ მიკოქუნაშ სტილქ ოკო ოგინაფუას თინეფს, ნამდა კრება სულიერ სიწმინდეშ ადგილ რე. თენა ოხუ მუჭოთ ქრისტიანულ შეხვალამეფს, თეშ თავისუფალ დროს ართო შაყარუას ხოლო. მუშო ოკო რაგად, მიღუნა უფლება ჩქინით გინობჭყიდათ, მუ მიკიფქუნათინ. მარა ვალდებულ ვორეთ, შხვეფს გუადვილათ, ქუდოსკიდან ზნეობრივო წმინდეფქ დო მიაჸუნან ღორონთიშ პრინციპეფს, ნამუთ ოხუ სიწმინდეს ფიქრიშ, სიტყვაშ დო საქციელიშ დროს (1 პეტ. 1:15, 16). დასურო,  ნამდვილ ჸოროფა „უწესოთ ვექციებ, მუშის ვეჩემენს“ (1 კორ. 13:4, 5).

11, 12. მუჭო მიმეხვარებუნა გონიერება მუკაქუნალიშ გიშაგორუაშ დროს?

¹¹ მუკაქუნალიშ გიშაგორუაშ დროს, ღორონთიშ მსახურეფი გურს უჩანა ბიბლიას მოჩამილ პრინციპის, ნამდა „არძა საქმეს დო არძანერ სამუშას მუშ დრო უღუ“ (ეკლ. 3:1, 17). გასაგებ რე, მუკაქუნალიშ გიშაგორუაშ დროს იფთვალისწინენთ კლიმატის, წანაშ დროეფს, შხვადოშხვა გარემოებას დო ოცხოვრებელ პირობეფს. მარა მესმებუნა, ნამდა ღორონთიშ პრინციპეფი დღას ვეთირუ დო თეცალ ფაქტორეფშა ვა რე დამოკიდებულ (მალ. 3:6).

¹² განსაკუთრებულო ჩხანა ამინდის შილებე რთულქ იჸუას მოკრძალებულ დო მისაღებ მუკაქუნალიშ გიშაგორუაქ. მარა და დო ჯიმალეფი აფასენა, მუჟამსით ვემკიფქუნათ მანგარ გორწკიპილს ვარდა ნაბეტან ფართოს, სოვრეშეთ ირფელ რჩქუ (იობ. 31:1). მუჟამსით ზღვას ვარდა ბასეინს იბომნუნთინ, ჩქინ მუკაქუნალ თაქ ხოლო მოკრძალებულ ოკო რდას (იგავ. 11:2, 20). ქვეყნიერებას ბრელს ზღვაშ მუკაქუნალ ნაბეტან ეშაღალირ მიკაქუნს, მარა ოკო ფშუდან, ნამდა ჩქინ მუკაქუნალით ირდიხას ოკო განვადიდათ წმინდა ღორონთ იეჰოვა, ნამუთ მიჸორა.

13. მუშენ ოკო იმოქმედას 1 კორინთელეფიშ 10:32, 33-ს ინოჭარილ პრინციპიქ ჩქინწკუმა მუკაქუნალიშ გიშაგორუაშ დროს?

¹³ არსებენს ხოლო ართ ბიბლიურ პრინციპი, ნამუთ მოხვარუნა მუკაქუნალიშ გონივრულო გიშაგორუას. თენა რე სინდისიშ გათვალისწინება მუჭოთ თანამორწმუნეეფიშ, თეშ შხვეფიშ ხოლო (წეკითხით 1 კორინთელეფიშ 10:32, 33). სერიოზულო ოკო დეფიფქრათ, ვემკიფქუნათ თიცალო, ნამდა შხვეფ გავაღიზიანათ. პავლე იჩიებ: „თითოულქ ვასიამოვნათ ოკო ჩქინ მოყვასი ირფელს, მუთ თიშ საჯგირობუოთ რე“. უკულ პავლე ეთმონწყუნს თეშ მიზეზის: „მუშენდა ვართ ქრისტე ფიქრენდ მუშ სიამოვნებაშოთ“ (რომ. 15:2, 3). იესოს პირველ ადგილშა შხვეფიშ მოხვარა გეურდ დო თეთ ღორონთიშ ნებას ასრულენდ. თაშ ნამდა, ვემკიბქუნათ ოკო თიცალ მუკაქუნალ, ნამუთ მობწონა, მარა შილებე ხალხის შეუშალას ხე ჭეშმარიტებაშ მორჩქილაფას.

14. მუჭო შეულებუნა მშობლეფს, ქუდაგურუან სქუალეფს, მუნეფიშ მუკაქუნალით განადიდან ღორონთი?

¹⁴ ქრისტიან მშობლეფი ვალდებულ რენა, დაგურუან სქუალეფს ბიბლიურ პრინციპეფიშ გიმორინაფა. მშობლეფქ სქუალეფწკუმა ართო ოკო ეცადან იეჰოვაშ გურიშ გახარებას მოკრძალებულ მუკოქუნათ დო მეჯინათ (იგავ. 22:6; 27:11). ჯგირ მაგალითით დო პრაქტიკულ მოხვარათ, მშობლეფ ოუგურანა სქუალეფს ღორონთიშ პატიცემას. ჯგირ იჸუაფ, მშობლეფქ ქუდაგურუან სქუალეფს, სო დო მუჭო გიშაგორან ნორმალურ მუკაქუნალ. ბარგიშ გიშაგორუაშ დროს ბაღანეფქ ხვალე თიშო ოკო ვეფიქრან, მუნეფს მუ მოწონან, თინეფქ თინა ხოლო ოკო გეთვალისწინან, მუნერ მუკაქუნალ განადიდენს იეჰოვა ღორონთის.

15. მუ ხემძღვანელობას ოკო მივაჸუნათ მუკაქუნალიშ გიშაგორუაშ დროს?

¹⁵ ღორონთიშ სიტყვას მოჩამილ ხემძღვანელობა მოხვარუნა საკითხეფი თეშ გინობჭყვიდათ, ნამდა ღორონთი განვადიდათ. მუშო ოკო რაგად, მუკაქუნალიშ გიშაგორუა გემოვნებაშ საკითხი რე. არძას შხვადოშხვანერ მუკოქუნაშ სტილი დო გემოვნება უღუ. მუკაქუნალიშ გიშაგორუა ფინანსეფშა ხოლო რე დამოკიდებულ. მარა ჩქი ირო კოხტას, სუფთას, მოკრძალებულო,  ადგილ დო დროს ოსადაგუნ თეშ ოკო მიკიფქუნათ.

16. მუშენ ოკო ვემუარკათ მონდომა მოკრძალებულ მუკაქუნალიშ გიშაგორუას?

¹⁶ ოკო ვაღიარათ, ნამდა ადვილ ვა რე ირო გონივრულო გინობჭყვიდათ საკითხეფი, სოდეთ გათვალისწინებულ იჸი ირნერ ფაქტორი. ბრელ მაღაზიას ბოლო მოდაშ ბარგეფი გიმიჩამუ, ათეშგურშენ დრო დო ენერგია რე საჭირო, დოგორე მოკრძალებულ კაბეფი, საროჩკეფი დო გორწკიპილ ვარენ ფერ შარვალ-კოსტიუმი. ნამდვილო, თანამორწმუნეეფი ქოძირუნა ჩქინ სქვამ დო მოკრძალებულ მუკაქუნალს დო დაფასენა ჩქინ მონდომას თეცალ მუკაქუნალიშ გიშაგორუაშ გურშენ. კმაყოფილება, ნამუთ ჩქინ მოჸოროფე ზეციერ მუმაშ განდიდებას მოუღ, გინოწონუნს ირნერ მსხვერპლის, მუდგას ვორთუთ ღორონთიშ მოსაწონო ქიმკიფქუნათინ თიშენ.

17. მუს ოკო გუჩას გურ ქრისტიან ჯიმაქ, ონდო გინმოჭყვიდუნს, უღუდას დო ვარ ბჟაკე?

¹⁷ მორთ, გენიბხილათ, შილებე დო ვარ ჯიმალეფს ბჟაკე უღუდან. მოსეშ კანონით ქომოლკათას მეთხუებუდეს, ბჟაკე უღუდესკონ. მარა თე კანონი ქრისტიანეფს ვახუდ, ათეშგურშენ ვემმეთხუებუნა თიშ დაცვება (ლევ. 19:27; 21:5; გალ. 3:24, 25). ნამთინე კულტურას შილებე მიღებულ რდას, ქომოლკათას უღუდან სქვამაშე ღაჭილ ბჟაკე დო თენა ვაცილუდას შხვეფს, მირჩქილუან სახიოლო ამბე. თეცალ ქიანეფს ნამთინე პასუხიშმგებელ ჯიმას ბჟაკე უღუ, მარა ნამთინე ჯიმაქ შილებე გინოჭყვიდას, ვა უღუდას თინა (1 კორ. 8:9, 13; 10:32). მინ კულტურას ვარდა ტერიტორიას შილებე ბჟაკე ვარდას მიღებულ, ათეშგურშენ თინა ქრისტიან ჯიმალეფშო ხოლო ვეჸი მიღებულ. მარა, ქრისტიანქ იშენით გეგნოჭყვიდ ბჟაკე უღუდას-და, თექ შილებე ხე შეუშალას, განადიდას ღორონთი მუშ მუკოქუნათ დო მეჯინათ დო შილებე „ბრალქ ხოლო ქიგიადვას“ (რომ. 15:1—3; 1 ტიმ. 3:2, 7).

18, 19. მუჭო მოხვარუნა მიქაშ 6:8-ს ინოჭარილ სიტყვეფი მუკიფქუნათ ღორონთიშ მოსაწონო?

¹⁸ მარდულეფ ვორეთ, ნამდა იეჰოვა ვაგნოფშულიდუნა წესეფით, ნამუთ მუკოქუნა დო მეჯინას ოხუ. თიქ მუჩეს ნებაშ თავისუფლება დო შემლებუნა ბიბლიურ პრინციპეფიშ გიმორინაფათ პირადო გინობჭყვიდათ, მუ მიკიფქუნათ დო მუ ვარ. თაშ ნამდა, მუკაქუნალით დო მეჯინათ ხოლო შემლებუნა, ვოძირათ, ნამდა „მოკრძალებულო გილურთ ღორონთწკუმა ართო“ (მიქ. 6:8).

¹⁹ მოკრძალებას ვოძირანთ, მუჟამსით ჩქინ დუდს თანდაბლურო შევაფასენთ დო ვაღიარენთ, ნამდა ხოლოშა ხოლო ვემმართენა იეჰოვაშ სიწმინდეშა დო ჩქი მთლიანო თიშ ხემძღვანელობაშა ვორეთ დამოკიდებულ. მოკრძალებაშა თინა ხოლო მიშურს, პატი ფცათ შხვეფიშ გრძნობეფს დო შეხედულებეფს. თაშ ნამდა, „მოკრძალებულო გილურთ ღორონთწკუმა ართო“ თი დროს, მუჟამსით ღორონთიშ მაღალ ნორმეფს ცხოვრებას გიმიბრინუანთ დო პატის ფცენთ შხვეფიშ გრძნობეფს.

20. მუჭო მოქმედენს ჩქინ მუკოქუნა დო მეჯინა შხეფწკუმა?

²⁰ ჩქინ მუკოქუნაშ სტილქ ხალხის ვაფიქრებაფუას ოკო, ნამდა იეჰოვაშ თაყვანიშმცემლეფიშ მეტ ირფელ ვო რეთ. და დო ჯიმალეფს დო შხვეფს ვა გუჭირდან ოკო თიშ მეხვალამაქ, ნამდა სამართლიან ღორონთიშ მსახურეფ ვორეთ. ღორონთის მაღალ ზნეობრივ ნორმეფ უღუ დო ჩქი ხიოლით მეპჸუნთ თის. მართალო ოცქვაფურ რენა თი და დო ჯიმალეფი, მით მუნეფიშ მუკოქუნათ დო საქციელით ოხვარუნა ალალგურიშ ხალხის სიცოცხლეშო მნიშვნელოვან ამბეშ მორჩქილაფას დო თეთ იეჰოვაშ გურს ხოლო ახარენა. გონივრულო გიშაგორილ მუკაქუნალით, განვადიდენთ ღორონთის, ნამუთ „ღირსება დო სიდიადეთ რე მონწყილ“ (ფსალმ. 104:1, 2).