1, 2. Ligongo cici Ŵamboni sya Yehofa akusawala mwakuŵajilwa? (Alole ciwulili cacili penanipa.)

NYUSIPELAPA jine ja ku Netherlands jasasile mwele acimlongola ŵa dini ŵawalile pamsongano wawo. Jatite, “Ŵawete mwangalicimbicisya, mnopemnope pakwatendaga citukuta. Nambo nyusipepalajo jasasilesoni pakwamba ya Mboni sya Yehofa, pajatite, “Ŵamboni sya Yehofa nganawala m’yoyo pamsongano wawo. . . . Acalume ŵawete majekete ni matayi, soni masiketi ga acakongwe galiji . . . gelewu cenene soni gakuwoneka cenene.” Kusala yisyene, ŵandu ŵajinji akusaŵayamicila Ŵamboni sya Yehofa ligongo ‘lyakulisalalisya ni yakuwala yakuŵajilwa, pakuwala mwakulicimbicisya soni mwalunda . . . mwakamulana ni mwele [ŵandu] ŵakusati akusamcimbicisya Mlungu akusosecela kulisalalicisya.’ (1 Tim. 2:9, 10) Pa lilembali ndumetume Paulo ŵaŵecetaga ya acakongwe, nambope yaŵasasileyi yikwakwayasoni acalume ŵaciklistu.

² Kuwala mwakuŵajilwa kuli kwakusosekwa mnope kwa m’weji soni kwa Mlungu jwatukusamlambila. (Gen. 3:21) Yagakusasala Malemba pangani ja kawale ni kalisalalisye yikusatusimicisya kuti Jwakulamulila jwamkulungwa jwa cilambo cosope, akwete malamusi ga mwele ŵakutumicila ŵakwe akusosecela kuwalila. M’yoyo  tukagambaga kusagula kuwala kapena kulisalalisya pakuya yakutusangalasya acimsyewe. Nambo tukusosekwa tuganicisyejesoni yayili yakumsangalasya Yehofa.

3. Ana tukulijiganya cici pangani ja kawale kutyocela m’Cilamusi ca Mlungu caŵapelece kwa Ayisalayeli?

³ Mwacisyasyo, Cilamusi caŵapelece Mlungu kwa Ayisalayeli cateteyaga ku ndamo syakusakala sya ŵandu ŵamitundu jine. Cilamusici calosyaga kuti Yehofa nganasangalalaga ni kawale kakatendekasyaga kuti ŵandu alepeleje kulekanganya pasikati pa acalume ni acakongwe, mpela mwayikuŵela moŵa agano pangani ja kawale. (Aŵalanje Deuteronomo 22:5.) Kutyocela ku Cilamusi caŵapelece Mlunguci, tuyiweni kuti Yehofa jwangasangalala ni kawale kakakusatendekasya kuti pakaŵa kulekangana pasikati pa acalume ni acakongwe.

4. Ana cici campaka cakamucisye Aklistu kusagula cenene pangani ja kawale?

⁴ M’Maloŵe ga Mlungu mwana malamusi gakwakamucisya Aklistu kusagula cenene pangani ja kawale. Malamusiga gakusakamula masengo pangajigalila malo gatukusatama, ndamo syetu, atamose kacenje ka nyengo. Ngatukusasosekwa kola ndandanda ja yakuwala yatukusosekwa kapena yangatukusosekwa kuwala. M’malo mwakwe tukusalongoleledwa ni malamusi gakusimanikwa m’Maloŵe ga Mlungu gagakusatukamucisya kusagula mwalunda pangani ja kawale. Kwende sambano tulole malamusi gane ga m’Baibulo gampaka gatukamucisye kumanyilila ‘lisosa lya Mlungu, lyambone, lyakwiticika soni lyamlama’ patukusagula yakuwala.—Alo. 12:1, 2.

5, 6. Ana kawale ketu mpaka kaŵe ni yakuyicisya yatuli kwa ŵandu ŵane?

⁵ Ndumetume Paulo ŵasalilidwe ni Mlungu kulemba maloŵe gakusosekwa mnope gagakusasimanikwa pa 2 Akolinto 6:4. (Aŵalanje.) Kawonece ketu kakusasala yejinji ya m’weji. Ŵandu ŵajinji mpaka amanyilile mwatuŵelele pakujigalila ‘yakuwoneka ni meso.’ (1 Sam. 16:7) Mpela ŵakutumicila ŵa Mlungu, tukusosekwa kuganicisya yejinji pangani jakusagula yakuwala, m’malo mwakwamba kuwala yatukuyiwona kuti yili yambone soni yakusangalasya kwa m’weji. Malamusi gaŵatupele Mlungu gakusatukamucisya kuŵambala kuwala yakuwala yakamula cilu, yakuwonecela mkati, kapena yakwakopa ŵane. M’yoyo tuŵambaleje kwatendekasya ŵandu ŵane kudandawula kapena kulola kumbali ligongo lya kawale ketu.

⁶ Naga tukuŵa ŵacasa soni kuwala mwakulicimbicisya, ŵandu cacitucimbicisya mpela ŵakutumicila Yehofa. Jemanjaji mpaka akopece ni kutanda kusacilila kuti alijiganye ya Mlungu jwatukusamlambila. Konjecesya pelepa mpaka acimbicisye likuga lyetu, nambosoni mpaka aŵe ŵakusacilila kupikanila ngani syambone syakulupusya umi.

7, 8. Ana tukusosekwa kuwala mwakuŵajilwa mnopemnope pandaŵi japi?

⁷ Yili yakusosekwa mnope kwa Mlungu jwetu jwamswela, kwa abale ni alongo soni kwa ŵandu ŵatukusalalicila kuti tuwaleje yakuwala yayikusamcimbicisya Yehofa soni utenga watukusalalicila. (Alo. 13:8-10) Yeleyi yili yakusosekwa mnopemnope patukwawula ku misongano jaciklistu kapena patukulalicila. Tukusosekwa kuwala ‘mwakamulana ni mwele [ŵandu] ŵakusati akusamcimbicisya Mlungu akusosecela’ kuwalila. (1 Tim. 2:10) Yili yisyene kuti yakuwala yampaka yiŵe yakuŵajilwa kumalo kwine mpaka yiŵe yangaŵajilwa kumalo kwinesoni. M’yoyo mwangajigalila kumalo kwatukusatama, ŵandu ŵa  Yehofa wosope tukusosekwa kuŵambala yakuwala yampaka yakuŵasye ŵane.

⁸ Aŵalanje 1 Akolinto 10:31. Patukwawula ku misongano jekulungwakulungwa, kawale ketu kakusosekwa kuŵa kakuŵajilwa. Ngatukusosekwa kujigalila mwakusawalila ŵandu kucilamboku. Atamose patukwawula soni kutyoka ku malo gagona acalendo, pandaŵi jakupumula mwine msongano mkaniwutande kapena paumasile, tukusosekwa kuŵambala kuwala mwakulijasilila. Patukutenda yeleyi tucisangalala kulimanyikasya kuti tuli Ŵamboni sya Yehofa soni tuciŵa ŵagopoka kwalalicila ŵane upile paupatikene.

9, 10. Ligongo cici lilemba lya Afilipi 2:4 mpaka litukamucisye pangani ja kawale?

⁹ Awalanje Afilipi 2:4. Ligongo cici Aklistu akusosekwa kuganicisya mwele kawale kawo mpaka kakwaye ŵakulambila acimjawo? Ligongo limo lili lyakuti ŵakutumicila ŵa Mlungu akulingalinga mwamtawu kuya yajikusasala Baibulo kuti, ‘Atendekasye cilu cawo kuŵa cewe ku ndamo sya cilambo mpela cikululu, yausakwa, soni ungalilekasya pa yindu yamsese.’ (Akolo. 3:2, 5) Ngatukusosekwa kwatendekasya ŵakulupilila acimjetu kuti yasawusyeje kukuya lilamusili. Abale ni alongo ŵaŵalesile kutenda yindu yamsese akusaŵa ali mkulimbanape ni nganisyo syakulemweceka sya yindu yaŵatendaga kala. (1 Akoli. 6:9, 10) M’yoyo, ngatukusaka kwatendekasya kuti yasawusyeje kulimbana ni nganisyo syakulemwecekasyo.

¹⁰ Patuli sikati ja abale ni alongo, kawale ketu kakusosekwa katendekasyeje wosope kuŵa ŵakuteteyeka ku yindu yamsese. Tukusosekwa kutenda yeleyi cinga patuli  pamisongano kapena patukukunguluka. Yili yisyene kuti tukwete ukoto wakusagula kawale, nambo tukwetesoni ukumu wakuwala yakuwala yampaka yakamucisye ŵane kuti akalajilila kuŵa ŵaswela mu nganisyo, m’maloŵe soni mu yakutenda. (1 Pet. 1:15, 16) Cinonyelo cisyesyene ‘cangatenda yangaŵajilwa, soni cangasamala yakusaka yakwepe.’—1 Akoli. 13:4, 5.

11, 12. Ana tukusosekwa kuganicisya cici patukusagula yakuti tuwale?

¹¹ Patukutenda cakusagula pangani ja kawale, tukusosekwa kumanyilila kuti “cilicose cikwete ndaŵi jakwe.” (Mlal. 3:1, 17) Yili yisyene kuti kulekangana soni kucenga kwa nyengo nambosoni mwayiŵelele yindu paumi wetu mpaka yikwaye kawale ketu. Atamose yili m’yoyo, malamusi ga Yehofa gangacenga.—Mal. 3:6.

¹² Ndaŵi jacitukuta, mpaka yiŵe yakusawusya kuwala yakuŵajilwa soni yakulicimbicisya. Nambope, abale ni alongo ŵetu akusayamicila mnope naga tukuŵambala kuwala yakuwala yakamula cilu kapena yakuwonecela mkati. (Yobu 31:1) Nambosoni patupite kunyasa kukoga, yakuwala yetu yakojela yiŵeje yakulicimbicisya. (Miy. 11:2, 20) Atamose kuti ŵajinji kucilamboku akusawala yakuwala yakojela yakuwonecela mkati, nambo m’we, mpela ŵakutumicila ŵa Yehofa yakusagula yetu yiŵeje yakumcimbicisya Mlungu jwetu jwatukusamnonyela.

13. Ana lilamusi lyakutulongola lyalikusimanikwa pa 1 Akolinto 10:32, 33 mpaka litukamucisye catuli patukusagula yakuti tuwale?

¹³ Panasoni lilamusi lyakutulongola line lyampaka litukamucisye kusagula kuwala mwakuŵajilwa. Tukusosekwa kuŵa ŵakusamala kuti tukakuŵasya cikumbumtima ca ŵane. (Aŵalanje 1 Akolinto 10:32, 33.) Uli ukumu wetu kuŵambala kuwala yakuwala yampaka yakuŵasye ŵane. Paulo ŵalembile kuti, “Jwalijose jwetuwe amsangalasyeje mjakwe pa yindu yambone kuti amlimbikasye.” Kaneko jwalakwe ŵasasile kuti, “Ligongo atamose Klistu nganalisangalasya msyene.” (Alo. 15:2, 3) Yesu ŵakuwonaga kutenda lisosa lya Mlungu soni kwakamucisya ŵane kuŵa kwakusosekwa mnope kupunda yakusaka yakwe. Paligongo lyeleli, tukusosekwa kuŵambala yakuwala yatukuyinonyela nambo yampaka yalepelekasye ŵandu kupikanila utenga wetu.

14. Ana acinangolo mpaka ŵajiganye catuli ŵanace ŵawo mwampaka awalile kuti amcimbicisyeje Mlungu?

¹⁴ Acinangolo ŵaciklistu akwete ukumu wakwiganya maŵasa gawo kuti gakuyeje malamusi ga m’Baibulo. Yeleyi yikupwatikapo kulolecesya kuti ŵanace ŵawo nambosoni acimsyenewo akusangalasya mtima wa Mlungu mu kawale soni kalisalalisye kawo. (Miy. 22:6; 27:11) Acinangolo mpaka ŵakamucisye ŵanace ŵawo kuti amcimbicisyeje mnope Mlungu jwamswela jwakusamlambila mwakupeleka cisyasyo cambone kwa ŵanacewo nambosoni kwajiganya mwacinonyelo. Mpaka yiŵe yambone mnope kuti acinangolo ŵasalileje ŵanace ŵawo kwampaka akasume yakuwala yakuŵajilwa soni mwampaka ayipatile. Ŵanacewo ngakusosekwa kwamba kusagula yakuwala yakuyinonyela nambo yiŵeje yakumcimbicisya Yehofa Mlungu.

15. Ana cici campaka citukamucisye kuti tusaguleje mwalunda pangani ja kawale?

¹⁵ Maloŵe ga Mlungu mpaka gatukamucisye kuti tusaguleje mwalunda yindu yakumcimbicisya Mlungu. Yili yisyene kuti tukusasagula kuwala yatukuyinonyela, nambo yakuwala yampaka tunonyele kuwala mpaka yiŵe yakulekangana  ni ŵane pakujigalila kapate ketu. Nambope ndaŵi syosope yakuwala yetu yiŵeje, yacasa, yakuwoneka cenene, yakwenelela pandaŵijo, soni yakundidwa kumalo kwatukusatama.

16. Ligongo cici kuli kwakusosekwa kulingalinga kuti tuwaleje mwakuŵajilwa?

¹⁶ Ndaŵi sine yikusaŵa yakusawusya kusagula yakuwala yakuŵajilwa soni yakulicimbicisya. M’malo gejinji akusasumisya yakuwala yangaŵajilwa yayiwandile m’cilamboci, mwati yikusaŵa yakusawusya kupata masiketi, madilesi, soni malaja gambone, kapena masuti ni matalawusa gangakamula cilu. Nambope, ŵakulambila acimjetu cacisangalala ligongo lyakulingalinga kwetu kuti tupate yakuwala yakuwoneka cenene soni yakuŵajilwa. Nambosoni kusacilila kwetu kuti twacimbicisyeje Atati ŵetu ŵakwinani kucitulimbikasya kutenda yakomboleka kuti tuwaleje mwakwacimbicisya ŵalakwe.

17. Ana pana magongo gapi gampaka gamtendekasye m’bale kulanga ndewu kapena iyayi?

¹⁷ Ana yili yakuŵajilwa kuti abale alanjeje ndewu? Cilamusi ca Mose calamulaga acalume kuti alanjeje ndewu. Nambope, moŵa agano Aklistu nganaŵa pasi pa Cilamusi ca Mose. (Lev. 19:27; 21:5; Aga. 3:24, 25) Mu ndamo sine, kola ndewu syekatile cenene kuli kwakundidwa, soni nganikuŵa kwalepelekasisye ŵandu kuti apikanile utenga wetu. Sonitu abale ŵane ŵakwete maukumu mumpingo akusalanga ndewu. Nambo atamose yili m’yoyo abale ŵane akusasagula kuti akalangaga ndewu. (1 Akoli. 8:9, 13; 10:32) Mu ndamo sine ŵangalimbikasya acalume kulanga ndewu soni yikusaŵa yangaŵajilwa kwa Aklistu kuti alanjeje ndewu. Nambosoni, naga m’bale akulanga ndewu mpaka yilepelekasye ŵandu kumcimbicisya Mlungu soni mpaka ampatile magongo.

18, 19. Ana lilemba lya Mika 6:8 mpaka litukamucisye catuli patukulingalinga kuti tuwaleje mwakumsangalasya Mlungu?

¹⁸ Tuli ŵakusangalala mnope ligongo lyakuti Yehofa ŵangatupa malamusi gamajinji pangani ja kawale soni kalisalalisye. Nambo jwalakwe akusatukunda kuti tusaguleje jika yayili yakuŵajilwa pakuya malamusi gakutulongola ga m’Baibulo. M’yoyo, atamose mu kawale soni kalisalalisye ketu mpaka tulosye kuti tukusaka ‘kwenda mwakulinandiya pameso pa Mlungu jwetu.’—Mika 6:8.

¹⁹ Kulinandiya kwetu kukusapwatikapo kuliwungunya cenene pakumanyilila uswela wa Yehofa, pakuŵa tukusajegamila kwa jwalakwejo kuti atulongoleleje. Nambosoni kukusapwatika kucimbicisya mwakupikanila ŵane mumtima soni nganisyo syawo. M’yoyo, ‘tukusajenda mwakulinandiya pameso pa Mlungu’ mwakutenda yindu yakamulana ni malamusi gapenani ga Yehofa soni kucimbicisya mwakupikanila ŵane mumtima.

20. Ana kawale soni kalisalalisye ketu kakusosekwa kwakwaya catuli ŵane?

²⁰ Kawale ketu kakatendekasyaga ŵane kutuganicisya yakulemweceka nambo kalosyeje kuti tuli ŵakulambila ŵa Yehofa. Abale ni alongo ŵetu soni ŵandu ŵane aloleje kuti kawale ketu kali kakuŵajilana ni Mlungu jwakulungama jwatukusamjimila. Yehofa akwete malamusi gapenani soni tukusaŵa ŵakusangalala kugakuya. Tukusosekwa kwayamicila abale ni alongo ŵele kawonece kawo soni ndamo syawo syambone sikusatendekasya ŵandu ŵamtima wambone kuti apikanile utenga wakulupusya umi wa m’Baibulo, nambosoni amlumbeje Yehofa. Naga tukusagula cenene pangani ja kawale, tucijendelecela kuyikasya ucimbicimbi kwa Mlungu jwakusaliweca “ucimbicimbi ni lumbili.”—Sal. 104:1, 2.