1, 2. Tipagine aDezire Yekova abi agu arugute du tipa iriiri vo roko ti ni na nyanyakipaha? (Oni bi gu sura du ti tonatonaha.)

WARAGA PANGBANGA sa Netherlands yo afura tipa gu dunguratise nga ga agbia pambori ki ya: “Aboro navo aroko bau, gbe ho foi rago afaa ni. Ono anga wo duhe tipa gu bakere dunguratise nga ga aDezire Yekova te. . . . Akumbagude na akumba navo badara (costume) na girigose, adegude na adee avonga agu aroko du ni kere guruhe gbe te . . . ono agu aroko ngbaangba du ti gi gaani regbo re.” Nirengo, i natambua aDezire Yekova dedede tipa “ukadi tiyo na gu roko adu nga na enda ti ni ya, . . . rogo wene mangapai wa ngba ha fu agu [yo] idi pa sinombori.” (1 Tim. 2:9, 10) Gu mokedi nangia Pauro aafura tipa adee, ono kina gu bangisa rugute re a du tipa agu aKristano nga akumba.

² Agu arugute du tipa vo roko na nyanyakipaha furani wangia ani ga Yekova aboro, na gu Mbori ani airisoko nabihe a na nyanyakipaha. (Bam. P. 3:21) Gupai Ziazia Kekeapai apehe tipa votise na mbakadatise nayugo gupai ziazia nga gu Bakere Bakindo nga ga zegino ko na wene arugute beko fu ndikidi airisiko tipa votise. Sidu tie, si aidanga gaani siapai tipa vo roko na mbakadatise du ni gupai ngba ti kina rani sa te. Si naida ani berẽpa gupai a ngba ti Bakerepa Gbia nga Yekova.

3. Ginipai ani awirikaha tipa votise ti agu aNdiko Mbori afuhe fu aYisaraere?

 ³ Ni kpiapai, rogo ga Mbori aNdiko yo fu awiri aYisaraere, arugute adu kinaho ka banda yo ti gu gbegberẽ gene raka nangia ga agu aboro naadu patiyo. Gu Ndiko re ayugu gupai nga Yekova ima soga boro vo agu aroko ayugongo kparakparapai dagba kumba na dee ya, nga agu aroko du ti gi gaani regbo re adunga kparakparapai ti ni ti ga akumba na adee ya. (Oni gedi Pa Fu Rugute ni Ue he 22:5.) Nibi gu ga Mbori arugapai du tipa vo roko, ani nabi gupai ziazia nga rago angbanga ti Mbori na vo agu aroko nasa akumba i ningere wa adee kini sa adee i ningere wa akumba te, watadu nasaha ni mbumbuhe i ini gu kparakparapai du dagba akumba na adee a te.

4. Ginipai rengbe ka undo aKristano i mangi wene diaberã tipa wai ka votise?

⁴ Fugo Mbori na arugute rogoho nga gu naundo aKristano i mangi wene adiaberã tipa wai ka votise. Gipai re abingo pa gu ba i araka rogoho, pa asinoyo, watadu pa wai du gu rago du yo rogoho te. Ani aidanga i tangara rimo agu aroko atangara ngbaangba furani na agu angbanga ya te. Kuba gure, agu arugute nga ga Ziazia Kekeapai naundo rani ani sia agu aroko ngba tirani. Ani makianga bete agu arugute nga ga Ziazia Kekeapai nga gu rengbe ka undo rani ani “kpária pa gu he nga ga Mbori nyemu he du ni wene he, nzunzu, ni ziazia ha” ho ani adiaberã ni tipa gu roko ani ka voho.​—Rom. 12:1, 2.

5, 6. Gini ome si aida gaani vo roko du na ni kurii aboro?

⁵ Ga Mbori toro adu kugii gu mokedi nangia Pauro ko nyakasipa nyaka gu rugute du rogo 2 AKorindo 6:4. (Oni gedi.) Gu gene ani ambakada tirani ngbaha nayugo gini ngbatunga aboro nga ani. Gu gene ani ambakada tirani ngbaha nasa badungu aboro i naaberã kina pa ‘gu tama rani du ti kpotorani.’ (1 Sam. 16:7) Sidu tie, wangia ani ga Mbori abamangisunge, ani ima rugutirani na gupai nga si aidanga gaani votise du gbua nga vo kina guhe ngba tirani te. Si naida agu arugute ani agbiaha rogo Fugo Mbori yo fõ rani ani ne voda gbidigbidi aroko, agu du ni nzaranzara ha, watadu agu naba nyemu kodaba ti boro. Gipai re nakoda mbu vo agu aroko nayugo agu abarapa boro du ku dimo yo. Si aidanga rago gberẽ ti boro watadu ni naangera kubani ho ni abi gu gene ni ani navo roko ngbaha te.

⁶ Ho du ani ni gigiri kini vo tirani wenengai rogo pa iriso yo, si nawira wa aboro nikaa irisa rani airisa ni agu abamangisunge nga ga gu Bakerepa Gbia nga Yekova. Nyemu gu Mbori ani airisoko ima rengba ka zioyo. Kurigure, gaani wene votise nika yugo gu riigbu ani arukubaha. Ni sangbana gipai re, aboro ima rengba ka degatuyo kuti gu pangbanga nga ga bata ani atungusaha.

7, 8. Gini aregbo gbe si aida ani vo tirani wenengai ti ni?

⁷ Gu gene ani avo roko ngbaha ima rengba ka gberã ti Mbori, ti awirinarani, gbiati agu aboro du rogo gaani dagbarago watadu ka ngba tiyo. Si naida ani vo roko ngba gu gene nika fu taarimo fu Yekova na gu pangbanga ani atungusaha. (Rom. 13:8-10) Gipai re na nyanyakipaha gbe ho ani amanga agu apai ni nga ga aKristano wa ngbatunga gu nga nduge tipa adunguratise watadu ho ani amangasunge tungusapai ni. Si naida gaani votise du “rogo wene mangapai wa ngba ha fu agu [aboro] idi pa sinombori.” (1 Tim. 2:10) Rengo ngaha nga, kura aroko kinaho rẽarẽ rogo kura aba ono ka si arẽnga rogo kura aba ya. Sidu, ga Yekova aboro rogo zegino dũ nabi gu sino vo roko du rogo gayo dagbarago na nyanyakipaha mbiko i aidanga ka ba gberãrago ti kura aboro te.

 ⁸ Oni gedi 1 AKorindo 10:31. Ho ani andu ni tipa kikindigi adunguratise, si naida gaani votise rẽarẽ na kidu rogo pa iriso yo kuba gupai nga ani vo tirani ngba gu gene nika yugo gu gbegberẽ votise moipai rogo zegino. Zavura ho du ani ni rogo agu abambu i afu marã tipa ka ra yo watadu ho ani akura ni yo, kodihe na gu regbo ani aongoda ti ni singia mbata fu bakere dunguratise watadu fuoho, si naida ani ne vo agu aroko angbanga ya. Ngba gi gene re, ani nika du na ngbarago ka yugo tirani ni aDezire Yekova. Nirengo, ani nika du a na ranirii ka manga dezirepai ho momu amanga ni.

9, 10. Tipagine du si aida AFiripoio 2:4 du na ome ti ni kurii agu aroko ani avoda ha?

⁹ Oni gedi AFiripoio 2:4. Tipagine si aida aKristano makia wai rengbe gayo votise kadu na ome kurii akurayo airisimbori? Ndupai sa nga ga Mbori aboro namanga ome kakaka ka mangasunge kuti gu rugute du rogo Baibiri yo nga: “Oni ími apa kpotoroni yo du auru kpotosende no; pa bari, na meteka, na gbagaura.” (Koro. 3:2, 5) Si aidanga ani sa manga gi rugute re ni mbumbuhe fu akuarani aidipase te. Agu awirina nambu gu raka nga ga meteka, i ima rengba kaa sovura kindi kuti nyemu ingapai. (1 Kor. 6:9, 10) Nirengo, ani aidanga ka sa gu ome i amangaha ni mbumbuhe fuyo te.

¹⁰ Ho du ani ni na agu awirina nga ga toro yo, si naida gu gene ani avo roko ngbaha undo dungurati si du ni wene ba nga ga iriiri mangapai. Gipai re nakoda ho du ani ni na yo badunguratise yo watadu rogo kura aba a. Ani na kina ranirii berani ka sia gu roko ani aida ka voho. Wa vura duhe wo, ani dunduko du na gu tindiro nga ka vo agu  aroko nika saha taata fu kura aboro i nye gigiri na kini mangipai kuti ga Mbori arugute du tipa du gigiri berãse yo, rogo afugoyo, na rogo mangapai yo. (1 Pet. 1:15, 16) Ndikidi nyemuse “amanga nga gu pai angba nga ya te, agbata nga gaha pai te.”​—1 Kor. 13:4, 5.

11, 12. Gini ruru bipai si aida ani du na ni wa ani aberãpa gu roko ani ka voho?

¹¹ Ho ga Mbori amoyambu amanga adiaberã ni tipa gu roko i aida ka voho, i nabi gupai nga “rago tipa apai ni ba sa sa dunduko na tipa mangaapai a ni ba sa sa.” (Batu. 3:1, 17) Ani ima rugatirani na ni nga sino arago ni bakiakia na arago nasaka tihe si kini moipai kurii gu gene ani avo roko ngbaha. Na agu apai du tipa aboro na agu aba i araka rogoyo nafubee afu a sa gipai re. Ono tie, ga Yekova arugute tipa vo roko aˈarianga tihe te.​—Mara. 3:6.

¹² Rogo agu arogo du ni fofoi he, si ima rengba kadu ni mbumbuhe ka vo gu ngbatunga aroko du ni iriirihe, ni wenehe, na nayugo rugatinapai. Sidu, awirinarani na ngbarago ho ani vonga agu aroko ni du ni gbidigbidihe watadu gu du ni nzaranzara ha ya. (Eyo. 31:1) Na berewe a, ho ani aongoda ni pangba ime watadu gu ime aboro aguzo rogoho, gu roko si aida ani voho ka guzo na ni du ni iriirihe. (Snz. 11:2, 20) Wa vura duhe nga badungu agu aroko aboro avoho rogo zegino kaa guzo na ni ni gbidigbidihe, agurani nairiso Yekova naberãpa fu taarimo fu gu ziazia Mbori ani akpinyemuko.

13. Tipagine si aida gu rugute du rogo 1 AKorindo 10:32, 33 du na ome kurii gaani siapai nga ga vo roko ti ni?

¹³ Gu kura nyanyakipa rugute kinaho rengbe ka undo rani ani sia gu roko ngbaangba. Si nga berãpa sangbakpoto kura aboro yo singia akuarani aidipase watadu kungbo aboro. (Oni gedi 1 AKorindo 10:32, 33.) Si naida ani bi gu gaani tindiro na nyanyakipaha nga ka ne agu aroko rengbe ka ba gberãrago ti aboro. Pauro akepai nga: “Ani mongo nimangi gu pai ngba angba ti akuarani sa wenepai, sa pa nyakasa he.” Fuani ko agbia gu ndupai kuti ni nga: “Bambiko Kristo a, ko amanga nga gu pai ngba ti kina ko te.” (Rom. 15:2, 3) Nirengo, Yesu aperesipa undo aboro mbata fu gako apai, na pa undoko yo nangia memepai tipa manga gupai Mbori akpinyemuhe. Sidu, si naida ani ne agu aroko ngba kina tirani ono nga gu naima rengba ka kiso berã agu aboro ani atungusapai fuyo.

14. Wai rengbe avunguagude ka ruga awiriyo i taasi Mbori ngba gu gene i avo roko ngbaha?

¹⁴ Agu aKristano nga avunguagude na gu tindiro nga ka yugopai fu gayo aborokporo i mangipai kuti agu arugute nga ga Ziazia Kekeapai. Si nakoda biyo gupai nga i gbiati awiriyo namanga ome ka fu ngbarago ku kpoto Mbori yo ni vo yo iriiri aroko na wene mbakadatise. (Snz. 22:6; 27:11) Avunguagude ima rengba ka raba awiriyo i du na irisa tipa gaani ziazia Mbori nga guko i airisoko ni maa yo wene kpiapai fu awiriyo na ni fuyo wene arugute. Nairiwo wai duhe ni wenehe fu avunguagude i yugupa gu ba na wai fu awiriyo i narengbe ka gbia agu aroko rẽarẽ! Gipai re ayugongo kina pa agu aroko i aidaha sa te, ono agu aroko nika sayo i ndu kumbatayo na gu momu nga ka rukuba Yekova Mbori.

15. Gini arugute si aida si nungusi gaani siapai nga ga vo roko?

¹⁵ Fugo Mbori nafu agu arugute rengbe ka undo rani ani mangi wene asiapai nga gu nika ye na taarimo fu Mbori. Wa vura duhe wo, kina rani nasia agu aroko ani aida ka voho. Agu aroko ngba ti aboro si ni bakiakia, kinawo a duhe nibipa gu marã du  berani. Ono si naida gaani aroko du ti aregbo dũ wenengai, ni gigiri he, ni iriirihe, ki rẽarẽ na gu regbo ani avoho ti ni na kidu gu ni roko ngbaangba ti aboro rogo gu dagbarago re.

16. Tipagine du nyakipa manga ome ti ni ka vo roko ngba wene gene?

¹⁶ Si naida ani idi kuti gupai nga, anga si taata ti aregbo dunduko ani mangi gu wene diaberã nika yugo rugatinapai, gupai ngbaangba, na nga gu nakoda agu apai dunduko fura ani tipaha te. Badungu ababagaahe nabaga agu aroko ngba ti dungu aboro, sidu, si ima rengba ka dia bakere regbo na ome tipa ka gbia gu roko ngbaangba watadu adunga ni gbidigbidihe ya. Ono tie, si nawira wa akuarani aidipase nika bi gu asadatise abi ani amangaha ka vo agu aroko ngbaangba na i ki du na ngbarago na ni. Na gu ngbarago ani nika du na ni nga ka fu taarimo fu gu Barani nga boro nyemuse du ngbangbaturũ yo ima nyaka kisusi pa agu aroko ka ani mbu voho tipa ka fu taarimo fuko.

17. Gini bete apai rengbe ka sa gupai nga si rẽarẽ wirina mbu maingba ni?

¹⁷ Ya mo si rẽarẽ wirina mbu maingba ni? Agu aNdiko nangia ga Moize aidihe aida fu akumba i mbu maingba yo. Ono tie, aKristano areme tii ga Moize aNdiko te, na i aziongo yo i mangi he a te. (Pa Mot. 19:27; 21:5; Gara. 3:24, 25) Rogo kura angbatunga, mbu maingba ni guruhe ngbaangba na si ni iriirihe, na si arengbanga ka gbe berã aboro kusayo ti gu pangbanga nga ga Kindo te. Nirengo, kura awirina nangbembatayo rogo apai yo na kina maingba yo ti ni. Wa vura duhe wo, kura awirina rengbe ka diaberã kaa kpe maingbayo akpe. (1 Kor. 8:9, 13; 10:32) Rogo kura angbatunga watadu adagbarago, anga sino aboro ngaha kadu na maingba te, na i abingo ho ni wenepai fu Kristano ni mbu maingba ni a te. Nirengo, ho wirina ambu maingba ni ni si ima rengba ka sa gupai nga ka ni funga taarimo fu Mbori rogo gu gene ni avo roko na kini mbakadi tiní ngbaha ya, na ki gbarasi rimoni.​—Rom. 15:1-3; 1 Tim. 3:2, 7.

18, 19. Wai du Mika 6:8 aundo rani wa ani amanga ome tipa gaani gene vo roko naafu taarimo fu Mbori?

¹⁸ Nairiwo gu ngbarago du ani na ni nga Yekova afunga dendekere arugute tipa gaani vo roko na mbakadatise te. Kuba gure, ko mbugene furani ani mangisunge na gaani ranirii ka manga wene adiaberã nitirani, nga gu narurii agu arugute nga ga Ziazia Kekeapai. Sidu, zavura rogo gaani votise na mbakaditise, si naida ani yuguhe nga ani naida ka ‘ta ni umbasitise na Mbori.’​—Mika 6:8.

¹⁹ Padu ani na umbasitise nasarani ani wisigi tirani ringbisihe kuti wai du Yekova ni gigiri ko na ni ziazia ko mbiko ani nakido kutiko tipa ko ngbe furani kumbatayo. Na berewe a, umbasitise nakoda yugo irisa tipa ga aboro abipai na gayo aberãpai. Sidu tie, ‘ta ni umbasitise na Mbori’ nayugo pa raka ani ringbisihe kuti gako arugute na kini yugu irisa tipa ga kura aboro bipai.

20. Gini ome si aida gaani vo roko na mbakadatise du na ni kurii kura aboro?

²⁰ Si naida gaani siapai nga ga vo roko sa aboro i dakuti gupai nga ani nga airisi Yekova angianga kurapai kia ya. Si naida awirinarani wa sa na kura aboro bi gupai nga ani narukuba gaani ruru Mbori. Ko na arugute beko furani, na ani namanga ome na ngbarago tipa ka mangapai kuti agu arugute re. I natambua agu awirina navo tiyo wenengai na gayo wene mangapai kini sa agu aboro du na ruru ngbaduyo yo i di gu pangbanga nga ga Ziazia Kekeapai nabatasa unga kugume na kini fu taarimo na ngbarago fu Yekova. Nirengo, manga wene adiaberã tipa agu aroko ani avoho nikaa ndu kumbatayo kaa fu taarimo fu gu Ko du ‘ni ukadiukadi ko na irisa na bairiwo.’​—Tam. 104:1, 2.